ସମତାର ସ୍ୱର ସବୁଜ ପକ୍ଷରୁ ଦୁଇ ଦିନିଆ ନାଟ୍ୟ ଉତ୍ସବ ଆରମ୍ଭ

ଭୁବନେଶ୍ୱର: ହୁ ହୁ ହୋଇ ସ୍ଥାନ ମଣ୍ଡନ କରୁଛି ପ୍ରତିମୂର୍ତି। ଏହି ସ୍ଥାପନର ମୂଳ ଉଦ୍ଦେଶ୍ୟ ବଡ଼ବଡ଼ୁଆଙ୍କ ପ୍ରତି ଶ୍ରଦ୍ଧା ନିବେଦନ ଓ ସ୍ମୃତି ଚାରଣ। ମାତ୍ର ବଞ୍ଚିଥିବା ଅବସ୍ଥାରେ ହିନିମାନ କରି ମଲା ପରେ ପ୍ରତିମୂର୍ତି ଗଢ଼ି ତୋଳିବାର କି ଯଥାର୍ଥତା ରହିଛି। କ’ଣ ତାଙ୍କ ଜୀବନଯାକର ଦାନ କେବଳ ବର୍ଷକୁ ଥରେ ଗୋଟିଏ ଫୁଲମାଳରେ ସୀମିତ ? ନା ନିଜର ଭଲଲୋକ ପଣିଆକୁ ଦେଖେଇ ହେବା ଲାଗି ଏହା ବର୍ଷକୁ ଥରେ ଏକ ବାହାନା। ଏମିତି ଅନେକ ପ୍ରଶ୍ନର ଉତ୍ତର ଦେଇଥିଲା ଆଜି ସ୍ଥାନୀୟ ଭଂଜ କଳା ମଣ୍ଡପରେ ମଂଚସ୍ଥ ନାଟକ ‘ପ୍ରତିମୂର୍ତି’। ସମତାର ସ୍ୱର ସବୁଜ ଆନୁକୂଲ୍ୟରେ ଆୟୋଜିତ ୨ ଦିନିଆ ନାଟ୍ୟ ଆନ୍ଦୋଳନର ପ୍ରଥମ ପର୍ବରେ ମଂଚସ୍ଥ ହୋଇଥିଲା ଏହି ନାଟକ।

ପ୍ରଜ୍ଞାରଂଜନ ଖଟୁଆଙ୍କ ରଚନା ଓ ନିର୍ଦେଶନାରେ ମଂଚସ୍ଥ ଏହି ନାଟକରେ ସହ ନିର୍ଦେଶକର ଦାୟିତ୍ୱ ତୁଲାଇଥିଲେ ବିପ୍ଳବ। ମାରୁତି ପୁହାଣ ସଂଗୀତ ନିର୍ଦେଶନା ଦେଇଥିବା ବେଳେ ସହଯୋଗ କରିଥିଲେ ଅଭିଳାସ ଓ ପୂର୍ଣ୍ଣଚନ୍ଦ୍ର। ଆଲୋକ ସମ୍ପାଦନା ଅଭିଜିତ କରିଥିବା ବେଳେ ମଂଚ ସଜେଇଥିଲେ ସ୍ୱରୂପ ଓ ସୌମ୍ୟ। ବିଭିନ୍ନ ଭୂମିକାରେ ଅଭିନୟ କରି ଦର୍ଶକଙ୍କ ଦୃଷ୍ଟି ଆକର୍ଷଣ କରିଥିଲେ ମୁନ୍ନା, ପ୍ରଦୋଷ, ଅନ୍ତର୍ଯ୍ୟାମୀ, ରାଜେଶ, ସୁଜିତ୍‌, ରମାକାନ୍ତ, ଶକ୍ତି, ଜୀବନ, ବିପ୍ଳବ, ଚିରଂଜୀବୀ, ଦୁର୍ଗେଶ, ବିଶ୍ୱରେଖା, ପବନା, ସୌମ୍ୟରଂଜନ। କୋରସ୍‌ରେ ଥିଲେ ସଦ୍ଧାର୍ଥ, ଲକ୍ଷ୍ମଣ ଓ ଶବର। ଏହି ଅବସରରେ ଓଡ଼ିଶା ସଂଗୀତ ନାଟକ ଏକାଡେମିର ସଚିବ ପ୍ରଦୀପ ମିଶ୍ର, ଗାଳ୍ପିକ ଅଜୟ ସ୍ୱାଇଁ, ଅଭିନେତା ତଥା ନିର୍ଦେଶକ ଅଭିନ୍ନ ରାଉତରାୟ ପ୍ରମୁଖ ଅତିଥି ଭାବେ ଯୋଗ ଦେଇଥିବା ବେଳେ ଅନୁଷ୍ଠାନର ସଭାପତି ବାଦଲ ସିକ୍‌ଦାର ଉପସ୍ଥିତ ଥିଲେ।