ଦିଲ୍ଲୀରେ ହେବ ମେଘ ଅମଳ

ବାୟୁ ପ୍ରଦୂଷଣ ମୁକାବିଲା ପାଇଁ ଦିଲ୍ଲୀ-ଜାତୀୟ ରାଜଧାନୀ କ୍ଷେତ୍ର(ଏନ୍‌ସିଆର୍‌) ଅଞ୍ଚଳରେ ପାଞ୍ଚଟି କ୍ଲାଉଡ୍ ସିଡିଂ ବା ମେଘ ଅମଳ ପରୀକ୍ଷଣ କରିବା ପାଇଁ ଦିଲ୍ଲୀ ସରକାର ନିଷ୍ପତ୍ତି ନେଇଛନ୍ତି। ଏଥି ପାଇଁ ୩.୨୧ କୋଟି ଟଙ୍କାର ବ୍ୟୟ ଅଟକଳକୁ ମଧ୍ୟ ଅନୁମୋଦନ କରାଯାଇଛି। ଚଳିତ ମାସ ଶେଷ ସୁଦ୍ଧା ହେବାକୁ ଥିବା ପ୍ରଥମ ପରୀକ୍ଷଣ ଦିଲ୍ଲୀ ଉପକଣ୍ଠରେ ୧୦୦ ବର୍ଗ କିଲୋମିଟର ଅଞ୍ଚଳରେ କରାଯିବ। କାନପୁର ସ୍ଥିତ ଭାରତୀୟ ପ୍ରଯୁକ୍ତିବିଦ୍ୟା ସଂସ୍ଥାନ (ଆଇଆଇଟି) ଏହାର ଭିତ୍ତିଭୂମି ପ୍ରସ୍ତୁତି, ଯୋଜନା ଓ କାର୍ଯ୍ୟାନ୍ୱୟନ ପରିଚାଳନା କରିବ। 

କ୍ଲାଉଡ୍ ସିଡିଂ ହେଉଛି ବାୟୁରେ ଭାସମାନ କଣିକା ବିଲୋପ କରିବା ଏବଂ ପ୍ରଦୂଷଣ ହ୍ରାସ କରିବା ପାଇଁ କୃତ୍ରିମ ବର୍ଷା ସୃଷ୍ଟି କରିବାର ପ୍ରକ୍ରିୟା। ବିଶେଷ କରି ମେଘରେ ଶୁଷ୍କ ବରଫ, ସିଲଭର ଆୟୋଡାଇଡ୍ କିମ୍ବା ଲୁଣ(ସୋଡିୟମ୍ କ୍ଲୋରାଇଡ୍) ପରି ଉପାଦାନ ସିଞ୍ଚନ କରି ଆର୍ଦ୍ରତାକୁ ବର୍ଷାରେ ପରିଣତ କରାଯାଇଥାଏ। ଦୀର୍ଘ ମରୁଡ଼ି ସମୟରେ ବର୍ଷା ସୁଗମ କରିବା ପାଇଁ ୧୯୭୩ ମସିହାରେ ତାମିଲନାଡୁରେ ଏବଂ ୧୯୭୪ ମସିହାରେ ମୁମ୍ବାଇରେ କ୍ଲାଉଡ୍ ସିଡିଂ ପରୀକ୍ଷଣ କରାଯାଇଥିଲା, କିନ୍ତୁ ଭାରତରେ ବାୟୁ ପ୍ରଦୂଷଣ କିମ୍ବା ଧୂଆଁ ବିରୋଧରେ ଏହି କୌଶଳ ଏପର୍ଯ୍ୟନ୍ତ ପରୀକ୍ଷିତ ହୋଇନାହିଁ। କର୍ଣ୍ଣାଟକ ସରକାର ୨୦୧୭ ମସିହାରେ କ୍ଲାଉଡ୍ ସିଡିଂ ପରୀକ୍ଷଣ କରିଥିଲେ, ତେବେ ତାହା କିଛି ନିର୍ଦ୍ଦିଷ୍ଟ ଅଞ୍ଚଳରେ ବର୍ଷା ବୃଦ୍ଧି କରିବା ଲକ୍ଷ୍ୟରେ କରାଯାଇଥିଲା। ପ୍ରଭାବଶାଳୀ ମେଘ ଅମଳ ପାଇଁ ନିର୍ଦ୍ଦିଷ୍ଟ ମେଘ ପରିସ୍ଥିତି ଆବଶ୍ୟକ, ଯାହା ସାଧାରଣତଃ ଦିଲ୍ଲୀର ଥଣ୍ଡା ଓ ଶୁଷ୍କ ଶୀତ ମାସଗୁଡ଼ିକରେ ଅନୁପସ୍ଥିତ ଥାଏ। ତଥାପି, ଦିଲ୍ଲୀ ସରକାର ଏହି ପଦ୍ଧତିର ପ୍ରଭାବ ପରୀକ୍ଷା କରିବା ପାଇଁ ପ୍ରତିବଦ୍ଧ। ସହରର ଯେକୌଣସି ଅଞ୍ଚଳରେ କ୍ଲାଉଡ୍ ସିଡିଂ ଆରମ୍ଭ ହେବା ପୂର୍ବରୁ, ସରକାରଙ୍କୁ କେନ୍ଦ୍ର ପରିବେଶ ମନ୍ତ୍ରଣାଳୟ, ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ, ପ୍ରତିରକ୍ଷା ମନ୍ତ୍ରଣାଳୟ, ଗୃହ ମନ୍ତ୍ରଣାଳୟ ଓ ଭାରତୀୟ ବିମାନବନ୍ଦର ପ୍ରାଧିକରଣ ସମେତ ୧୩ରୁ ଅଧିକ ବିଭିନ୍ନ ଏଜେନ୍ସିରୁ ଅନୁମତି ନେବାକୁ ପଡ଼ିବ।