ସ୍ବପ୍ନର ଘରକୁ ବାସ୍ତବତାର ରୂପ ଦେଉଛି ଏଆଇ

ବର୍ତ୍ତମାନ ସମୟ ବଦଳିଛି, ବଦଳିଛି ଲୋକଙ୍କ ଜୀବନଧାରଣ ‌ମାନ ଓ ପସନ୍ଦ। ଏଥିପାଇଁ କୃତ୍ରିମ ବୁଦ୍ଧିମତ୍ତା ଜ୍ଞାନକୌଶଳ ଆଧାରରେ ଘରର ଆର୍କିଟେକ୍ଟର ଏବଂ ଇଣ୍ଟିରିୟର୍‌ ଡିଜାଇନ୍‌ କରାଯାଉଛି। ଅନ୍ୟାନ୍ୟ କ୍ଷେତ୍ର ପରି ଘରର ନିର୍ମାଣ ଶୈଳୀ ଓ  ସାଜସଜ୍ଜା ଲାଗି ପ୍ରଯୁକ୍ତିର ବହୁଳ ବ୍ୟବହାର ଯୋଗୁଁ ଏଥିରେ ଉଲ୍ଲେଖନୀୟ ପରିବର୍ତ୍ତନ ଘଟିଛି।

F ସ୍ପେସ୍ ପ୍ଲାନିଂ:  ଗୃହ ନିର୍ମାଣ ସମୟରେ ନିର୍ଦ୍ଦିଷ୍ଟ ପରିସୀମା ଭିତରେ କିଭଳି  ସ୍ଥାନର ସର୍ବୋତ୍କୃଷ୍ଟ ଉପଯୋଗ କରି ନକ୍ସା କରାଯାଇପାରିବ ତାହା ଏବେ କୃତ୍ରିମ ବୁଦ୍ଧିମତ୍ତା ପରିଚାଳିତ ଆପ୍‌ଲିକେସନ୍ କରିଦେଉଛି। ଘରର ସର୍ବୋତ୍କୃଷ୍ଟ ଲେଆଉଟ୍‌ ପାଇଁ କୃତ୍ରିମ ବୁଦ୍ଧିମତ୍ତା ଏବେ ସ୍ଥପତିଙ୍କୁ ପରାମର୍ଶ ଦେଉଛି।

F ଡିଜାଇନ୍‌ ସହାୟତା: କୃତ୍ରିମ ବୁଦ୍ଧିମତ୍ତା ଚାଳିତ ଉପକରଣଗୁଡ଼ିକ ସ୍ବୟଂକ୍ରିୟ ଭାବେ ରେଣ୍ଡରିଂ, ସାମଗ୍ରୀ ଚୟନ ଓ ଥ୍ରିଡି ମଡେଲିଂ ପରି କାର୍ଯ୍ୟଗୁଡ଼ିକୁ ସହସା ସମ୍ପନ୍ନ କରି ଘର ନକ୍ସା ଡିଜାଇନ୍‌ କରିବାରେ ଆର୍କିଟେକ୍ଟମାନଙ୍କୁ ସାହାଯ୍ୟ କରୁଛି। ଏକଦା ଯାହା କରିବାକୁ ସେମାନଙ୍କୁ କାଗଜ-ପେନ୍‌ସିଲ୍ ଓ ପରେ ଅଟୋକାଡ୍‌ ଭଳି ସଫ୍ଟୱେର୍‌ ବ୍ୟବହାର କରିବାକୁ ପଡୁଥିଲା, ତାହା ଏବେ ଅତି ସହଜ ହୋଇଛି।

F ବ୍ୟକ୍ତିଗତ ଚାହିଦା: କୃତ୍ରିମ ବୁଦ୍ଧିମତା ସହାୟତାରେ ସ୍ଥପତି ଗ୍ରାହକଙ୍କ ନିଜସ୍ବ ପସନ୍ଦ ଏବଂ ଆବଶ୍ୟକତାକୁ ଚାହିଁ ବରାଦ ମୁତାବକ ଉନ୍ନତ ଓ ସ୍ବତନ୍ତ୍ର ଡିଜାଇନ୍‌ କରିପାରୁଛନ୍ତି। ଏହାକୁ ପର୍ସନାଲାଇଜ୍‌ଡ୍‌/ କଷ୍ଟମାଇଜ୍‌ଡ୍‌ ଡିଜାଇନ୍ କହାଯାଉଛି।

ବର୍ତ୍ତମାନ କୃତ୍ରିମ ବୁଦ୍ଧିମତ୍ତା ଗୃହ ନିର୍ମାଣ ଓ ଆଭ୍ୟନ୍ତରୀଣ ସାଜସଜ୍ଜା ପ୍ରକ୍ରିୟାରେ ସୃଜନଶୀଳତା ଓ ଦକ୍ଷତା ବୃଦ୍ଧି କରିବାରେ ବେଶ୍‌ ସହାୟକ ହେଉଛି। ଓଡ଼ିଶାରେ ମଧ୍ୟ କୃତ୍ରିମ ବୁଦ୍ଧିମତ୍ତା ଆର୍କିଟେକ୍ଚର ଓ ଇଣ୍ଟିରିୟର୍‌ ଡ‌ିଜାଇନିଂ କ୍ଷେତ୍ରରେ ସ୍ବତନ୍ତ୍ର ସ୍ଥାନ ଦଖଲ କଲାଣି ବୋଲି କହନ୍ତି ‘ଏଡିଜାଇନ୍‌ସ୍’ର ପ୍ରତିଷ୍ଠାତା ଅର୍ଣ୍ଣବ କୁମାର।

F ଶକ୍ତି ସଞ୍ଚୟ: କୃତ୍ରିମ ବୁଦ୍ଧିମତା ଦ୍ବାରା କରାଯାଉଥିବା ବିଶେଷ ଡିଜାଇନ୍‌ କୋଠରିରେ ସୂର୍ଯ୍ୟକିରଣ ପଡ଼ିବା, ଉତ୍ତାପ ନିୟନ୍ତ୍ରଣରେ ରହିବା ଓ ସ୍ବାଭାବିକ ବାୟୁ ଆଦି ଦିଗ ଉପରେ ଗୁରୁତ୍ବ ଦେଉଛି। ଫଳରେ ଏଭଳି ଡିଜାଇନ୍‌ର ଘରେ  ବିଜୁଳି ବ୍ୟୟ କମ୍‌ ରହୁଛି ଓ ଶକ୍ତି ସଂଚୟ କରାଯାଇ ପାରୁଛି।

F ଭର୍ଚୁଆଲ୍ ରିଅଲିଟି ଏବଂ ଅଗ୍‌ମେଣ୍ଟେଡ୍‌ ରିଅଲିଟି: ଗୃହ ନିର୍ମାଣ ପୂର୍ବରୁ ଡିଜାଇନ୍‌ର ଭର୍ଚୁଆଲ୍ ରିଅଲିଟି (ଆଭାସୀ ବାସ୍ତବିକତା) ଏବଂ ଅଗ୍‌ମେଣ୍ଟେଡ୍‌ ରିଅଲିଟି (ସଂବର୍ଦ୍ଧିତ ବାସ୍ତବତା) ଗ୍ରାହକ ଦେଖିପାରୁଛନ୍ତି। କୃତ୍ରିମ ବୁଦ୍ଧିମତା ସାହାଯ୍ୟରେ ଘର ଭିତର ଓ ବାହାର କିଭଳି ଦେଖାଯିବ ଓ ବ୍ୟବହାର୍ଯ୍ୟ ଅନୁଭୂତି କିଭଳି ରହିବ ତାହା କମ୍ପ୍ୟୁଟର୍‌ ଜରିଆରେ ପ୍ର‌ତ୍ୟକ୍ଷ କରିହେଉଛି। ତେଣୁ ଗ୍ରାହକ ସଂପୂର୍ଣ୍ଣ ସନ୍ତୁଷ୍ଟ ହେବା ପରେ ଚୂଡ଼ାନ୍ତ ନିଷ୍ପତ୍ତି ନେଉଛନ୍ତି। ଏହା  ନୂତନ  ବୈଷୟିକ ପ୍ରଯୁକ୍ତି ଦ୍ବାରା ସମ୍ଭବ ହେଉଛି।

F ସ୍ମାର୍ଟ ବିଲ୍‌ଡିଂ: ସ୍ମାର୍ଟ ହୋମ୍ ଓ ବିଲ୍‌ଡିଂ ପାଇଁ ଇଣ୍ଟର୍‌ନେଟ୍‌ ଅଫ୍‌ ଥିଙ୍ଗ୍‌ସ ଉପକରଣ ମାଧ୍ୟମରେ କୃତ୍ରିମ ବୁଦ୍ଧିମତ୍ତା ଆଲୋକ, ତାପମାତ୍ରା, ସୁରକ୍ଷା ଓ ଅନ୍ୟାନ୍ୟ କାର୍ଯ୍ୟଗୁଡ଼ିକୁ ଦକ୍ଷତାର ସହିତ ପରିଚାଳନା କରୁଛି।

F ତଥ୍ୟ ବିଶ୍ଳେଷଣ: ଭବିଷ୍ୟତର ଡିଜାଇନ୍‌ ବିଷୟରେ ସୂଚନା ଦେବା ସହିତ ପ୍ରଚଳିତ ଡିଜାଇନ୍‌, ଗ୍ରାହକଙ୍କ ବ୍ୟବହାର ସୁବିଧା ଓ ପରିବେଶ ପ୍ରଭାବ ଚିହ୍ନଟ କରିବାକୁ କୃତ୍ରିମ ବୁଦ୍ଧିମତ୍ତା ଅନେକ ତଥ୍ୟ ବିଶ୍ଳେଷଣ କରୁଛି।