ଭାରତୀୟ ସେନାଙ୍କ 'ଅପରେସନ୍ ସିନ୍ଦୂର'ର କଡ଼ା ଜବାବକୁ ସଲାମ ଜଣାଇ ପୁଅର ନାମ ରଖିଲି ସିନ୍ଦୂର

ଅଯୋଧ୍ୟା:ପହଲଗାମ ଆତଙ୍କବାଦୀ ଆକ୍ରମଣ ପରେ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀରରେ ଆତଙ୍କବାଦୀ ଆଡ୍ଡା ଉପରେ ଭାରତୀୟ ସେନା 'ଅପରେସନ୍ ସିନ୍ଦୂର' ଜରିଆରେ କଡ଼ା ପ୍ରତିଶୋଧ ନେଇଛନ୍ତି। ଭାରତୀୟ ସେନାଙ୍କ ଏହି କାର୍ଯ୍ୟାନୁଷ୍ଠାନରୁ ଅନୁପ୍ରାଣିତ ହୋଇ ଅଯୋଧ୍ୟାର ଏକ ଦମ୍ପତି ସେମାନଙ୍କର ନବଜାତ ପୁତ୍ରର ନାମ 'ସିନ୍ଦୂର' ରଖିଛନ୍ତି।

ଅଯୋଧ୍ୟାର କ୍ୟାଣ୍ଟନମେଣ୍ଟ ଥାନା ଅଞ୍ଚଳର ପାଲିଆ ଶାହାବାଡି ଗାଁର ବାସିନ୍ଦା ସୋନି କନୌଜିଆ ମଇ ୭ ତାରିଖରେ ଜିଲ୍ଲା ହସ୍ପିଟାଲରେ ଏକ ପୁତ୍ର ସନ୍ତାନକୁ ଜନ୍ମ ଦେଇଥିଲେ। 'ଅପରେସନ୍ ସିନ୍ଦୂର'ରେ ଭାରତୀୟ ସଶସ୍ତ୍ର ବାହିନୀର ସାହସିକତାରେ ଅନୁପ୍ରାଣିତ ହୋଇ ସୋନି ଏବଂ ତାଙ୍କ ସ୍ୱାମୀ ରାହୁଲ କନୌଜିଆ ସେମାନଙ୍କ ପୁଅର ନାମ ସିନ୍ଦୂର ରଖିବାକୁ ନିଷ୍ପତ୍ତି ନେଇଥିଲେ।

ପୁଅର ନାମ ସିନ୍ଦୂର ରଖିବା ପଛରେ ଥିବା ପ୍ରେରଣା ବିଷୟରେ ବଖାଣି ରାହୁଲ କହିଛନ୍ତି, "'ଅପରେସନ୍ ସିନ୍ଦୂର' ସମୟରେ ଆମ ବାହିନୀ ଦେଖାଯାଇଥିବା ସାହସ ପାଇଁ ଦେଶ ଗର୍ବିତ। ଆମର ସଶସ୍ତ୍ର ବାହିନୀ ପହଲଗାମରେ ଆତଙ୍କବାଦୀ ଆକ୍ରମଣରେ ନିହତ ନିରୀହ ନାଗରିକଙ୍କ ସହିଦତାର କଡ଼ା ପ୍ରତିଶୋଧ ନେଇଛନ୍ତି। ସେହି ବଳିଦାନକୁ ସମ୍ମାନ ଜଣାଇ, ଆମେ ଆମ ପୁଅର ନାମ ସିନ୍ଦୂର ରଖିବାକୁ ନିଷ୍ପତ୍ତି ନେଇଛୁ। ମୁଁ ବି ଚାହେଁ ମୋ ପୁଅ ବଡ଼ ହୋଇ ସୈନିକ ହେଉ ଏବଂ ଦେଶ ସେବା କରୁ।’