କରୋନା କାଳର ଦେବଦୂତ ଡାକ୍ତର ସୁନିଲ ହେବ୍ୱି: ସଞ୍ଚୟ ଟଙ୍କାରେ କଲେଣି ୧.୨ଲକ୍ଷ ଲୋକଙ୍କ ଚିକିତ୍ସା

ସେହି ଦିନଠୁ ସେ ପ୍ରତିଜ୍ଞା କଲେ ଅର୍ଥାଭାବରୁ ହେଉ କିମ୍ବା ଅନ୍ୟ କୌଣସି କାରଣ ପାଇଁ ହେଉ ମେଡିକାଲ ସୁବିଧାରୁ ବଞ୍ଚିତ ଲୋକଙ୍କ ସେବାରେ ନିଜକୁ ନିୟୋଜିତ କରିବେ । ପ୍ରଥମେ ପ୍ରଥମେ ଏଥିପାଇଁ ତାଙ୍କୁ ସମସ୍ୟା ହୋଇଥିଲା । କାରଣ ତାଙ୍କ ନିଜ ପରିବାରର ଆର୍ଥିକ ଅବସ୍ଥା ମଧ୍ୟ ଭଲ ନଥିଲା । ଅତି ଦାରିଦ୍ର୍ୟ ଭିତରେ ପାଠ ପଢାଇ ତାଙ୍କୁ ମଣିଷ କରିଥିଲେ ବାପା, ମା’ । ତେଣୁ ଘରର ଅବସ୍ଥା ସୁଧୁରିବା ପାଇଁ ଡ୍ୟୁଟି କରିବା ସହ ଲୋକଙ୍କ ସେବା କରିବା ତାଙ୍କ ପାଇଁ ସହଜ ନଥିଲା । ସେଥିପାଇଁ ଛୁଟିଦିନ ସେ ବିଭିନ୍ନ ସ୍ଥାନକୁ ଯାଇ ମାଗଣା ମେଡିକାଲ କ୍ୟାମ୍ପ ଆୟୋଜନ କରିବା ସହ ମାଗଣାରେ ଲୋକଙ୍କୁ ଔଷଧ ବାଣ୍ଟୁଥିଲେ । ଯେତେବେଳେ ଘରର ଅବସ୍ଥା ସୁଧୁରିଲା ଆଉ ଅନ୍ୟ ଭାଇ ରୋଜଗାରକ୍ଷମ ହେଲେ ଡାକ୍ତର ସୁନିଲ ଚାକିରି ଛାଡିଦେଇ ନିଃଶୁଳ୍କ ରୋଗୀ ସେବାରେ ଲାଗି ପଡିଲେ ।

ଡାକ୍ତର ସୁନିଲଙ୍କ କାର ହିଁ ତାଙ୍କ ମୋବାଇଲ କ୍ଲିନିକ୍ ପାଲଟିଥିଲା। ଏହି ମୋବାଇଲ କ୍ଲିନିକ୍ ମଧ୍ୟରେ ବିଭିନ୍ନ ଆବଶ୍ୟକ ଔଷଧ ସାଙ୍ଗକୁ, ରକ୍ତଚାପ ମାପିବା ମେସିନ୍, ଅସ୍ତ୍ରୋପଚାର ଉପକରଣ ସାଙ୍ଗକୁ ଅକ୍ସିଜେନ୍ ସିଲିଣ୍ଡର, ଇସିଜି ମେସିନ ସବୁକିଛି ରହିଛି । ପରିସ୍ଥିତି ଯାହା ହେଉନା କାହିଁକି ଡାକ୍ତର ସୁନିଲଙ୍କ ଫୋନ କିନ୍ତୁ କେବେବନ୍ଦ ହୁଏନା । ଯେତେବେଳେ ଯିଏ ଫୋନ କଲେ ତୁରନ୍ତ ତାଙ୍କ ସେବାରେ ପହଞ୍ଚିଯାନ୍ତି ଡାକ୍ତର ସୁନିଲ ହେବ୍ୱି । ଏଯାଏଁ ସେ ୮୦୦ରୁ ଅଧିକ ମେଡିକାଲ କ୍ୟାମ୍ପ ଆୟୋଜିତ କରିସାରିଥିବା ସହ ଏପର୍ଯ୍ୟନ୍ତ ନିଜ ସଞ୍ଚୟ ଟଙ୍କାରେ ସେ ୧.୨ଲକ୍ଷ ଲୋକଙ୍କ ଚିକିତ୍ସା କରିସାରିଲେଣି। ତାଙ୍କର ସେବା ପାଇଁ ସେ କେବେ କାହାଠାରୁ କିଛି ଆଶା କରିନାହାଁନ୍ତି । ତଥାପି ତାଙ୍କୁ ମିଳିଛି ଅନେକ ଶୁଭେଚ୍ଛା, ପ୍ରଶଂସା ଓ ସମ୍ମାନ । ସେବା କ୍ଷେତ୍ରରେ ତାଙ୍କର କୃତିକୁ ଯୁଗାନ୍ତକାରୀ ବୋଲି କହିଛନ୍ତି ବୁଦ୍ଧିଜୀବୀ ତଥା ଉପରାଷ୍ଟ୍ରପତି ଭେଙ୍କିୟା ନାଇଡୁ ।