ଅହିରାଜ ମଥାରେ ଚୁମ୍ବନ ଦେଇ ଭିଡିଓ ସେୟାର୍‌ କଲେ ଯୁବକ, ଏଭଳି ପ୍ରତିକ୍ରିୟା ଦେଲେ ସୋସିଆଲ୍‌ ମିଡିଆ ବ୍ୟବହାରକାରୀ

ନୂଆଦିଲ୍ଳୀ: ଯେତେବେଳେ ଆମେ ସାପର ନାମ ଶୁଣିଥାଉ, ଭୟଭୀତ ହୋଇଥାଉ। କିନ୍ତୁ, କିଛି ସାହସୀ ଲୋକ ଅଛନ୍ତି ଯେଉଁମାନଙ୍କ ମଧ୍ୟରେ  ଏହି ଭୟ ନଥାଏ। ସେମାନେ ସରୀସୃପମାନଙ୍କୁ ଭୟ କରିନଥାନ୍ତି, ବରଂ ସେମାନଙ୍କ ସହ ଖେଳିଥାନ୍ତି।

ଏହିପରି ଜଣେ ବ୍ୟକ୍ତି ହେଉଛନ୍ତି ମାଇକ୍ ହୋଲଷ୍ଟନ୍, ଯିଏ ବନ୍ୟଜନ୍ତୁ ସହିତ ତାଙ୍କର ବିଭିନ୍ନ ପ୍ରକାରର ଭିଡିଓକୁ ସୋସିଆଲ୍‌ ମିଡିଆରେ ସେୟାର୍‌ କରିଥାନ୍ତି। ନିକଟରେ ସେ ଏକ ଭିଡିଓ ସେୟାର କରିଛନ୍ତି, ଯେଉଁଥିରେ ସେ ଦୁନିଆର ସବୁଠାରୁ ବିଷାକ୍ତ ସାପ ଅହିରାଜ ମୁଣ୍ଡରେ ଚୁମ୍ବନ ଦେଉଥିବାର ଦେଖିବାକୁ ମିଳିଛି।

ଭିଡିଓରେ, ହୋଲଷ୍ଟନ୍ ଚୁମ୍ବନ ଦେବା ପାଇଁ ଧୀରେ ଧୀରେ ସାପ ଆଡକୁ ଗତି କରୁଛନ୍ତି। କିଛି କ୍ଷଣ ପରେ, ବ୍ୟକ୍ତି ଜଣକ ସାପ ମୁଣ୍ଡରେ ଚୁମ୍ବନ ବି ଦେଉଛନ୍ତି।  ତା’ପରେ ସେ ଟିକେ ପଛକୁ ଯାଇ କ୍ୟାମେରାକୁ ଚାହିଁ ହସି ଦଉଛନ୍ତି।

ପୋଷ୍ଟର କ୍ୟାପସନରେ ସେ ଲେଖିଛନ୍ତି, ଏହି ସାପ ଭିତରେ ଏତେ ବିଷ ଅଛି ଯେ ଏହା ଏକ ସମୟରେ ଅନେକ ହାତୀଙ୍କୁ ମାରି ଦେଇପାରେ। ସେୟାର୍ ହେବା ପରଠାରୁ, ଭିଡିଓକୁ ୨୭,୦୦୦ ରୁ ଅଧିକ ଲାଇକ୍ ମିଳିଛି। ଭିଡିଓଟି ଏବେ ଦ୍ରୁତ ଗତିରେ ଭାଇରାଲ୍ ହେଉଛି, ଅନେକ ଲୋକ ମନ୍ତବ୍ୟରେ ନିଜର ଭୟପ୍ରକାଶ କରିଛନ୍ତି। କିଛି ଲୋକ ସେହି ବ୍ୟକ୍ତିଙ୍କ ବିଷୟରେ ବି ଚିନ୍ତା କରୁଥିବାର ଦେଖିବାକୁ ମିଳିଛି।

ଜଣେ ଉପଭୋକ୍ତା ଲେଖିଛନ୍ତି, "ତୁମେ ମୋତେ ଦଶ ଲକ୍ଷ ଦେଲେ ବି ମୁଁ ତାହା କରିବି ନାହିଁ"। ଅନ୍ୟ ଜଣେ ଲେଖିଛନ୍ତି, ‘‘ଏପରି ପାଗଳଙ୍କ ପରି କାମ କାହିଁକି କଲ?’’

ଅହିରାଜ ଦୁନିଆର ସବୁଠାରୁ ବିଷାକ୍ତ ସାପ ମଧ୍ୟରୁ ଅନ୍ୟତମ। ନ୍ୟାସନାଲ୍ ଜିଓଗ୍ରାଫିକ୍ ୱେବସାଇଟ୍ ଅନୁଯାୟୀ, ଜଣେ ବୟସ୍କ ଅହିରାଜୀ ଲମ୍ବ ୧୦ ରୁ ୧୨ ଫୁଟ ଏବଂ ଓଜନ ୨୦ ପାଉଣ୍ଡ (୯ କିଲୋଗ୍ରାମ) ହୋଇପାରେ।