ଵାଲାସାହେବ ଠାକରେ ଦେଇଥିଲେ ଚାକିରି, କିଛି ବର୍ଷ ଭିତରେ କ୍ରାଇମ ରିପୋର୍ଟରରୁ ଶିବସେନାର ବଡ ନେତା ହୋଇଥିଲେ ରାଉତ

ମୁମ୍ବାଇ: ମୁମ୍ବାଇର ପତ୍ରା ‘ଚଲ୍‌’ର ପୁନଃବିକାଶ କାର୍ଯ୍ୟରେ ହୋଇଥିବା ଅନିୟମିତା ନେଇ ଆଜି ଇଡି ଶିବସେନା ସାଂସଦ ସଞ୍ଜୟ ରାଉତଙ୍କୁ ଅଟକ ରଖିଛି। ଆଉ ଏହି ଘଟଣା ପରେ ସେ ଟ୍ୱିଟ କରି ଲେଖିଥିଲେ ଯେ “ଆପଣ ସେହି ବ୍ୟକ୍ତିଙ୍କୁ ପରାସ୍ତ କରିପାରିବେ ନାହିଁ ଯିଏ କେବେ ହାର ମାନେ ନାହିଁ। ଝୁକେଙ୍ଗ ନେହିଁ। ଜୟ ମହାରାଷ୍ଟ୍ର'। ମିଳିଥିବା ସୂଚନା ମୁତାବକ ସଞ୍ଜୟ ରାଉତଙ୍କର ଉଦ୍ଧବଙ୍କ ଦଳରେ ଏକ ଗୁରୁତ୍ୱପୂର୍ଣ୍ଣ ସ୍ଥାନ ରହିଛି। ବିଜେପି ଉପରେ ଆକ୍ରମଣ କରିବାରେ ସେ ଦଳର ଜଣେ ଆଗୁଆ ନେତା ହୋଇଥିବାବେଳେ ବହୁତ ଲୋକପ୍ରିୟ। ତେବେ ସାମ୍ବାଦିକତାରୁ ନିଜର କ୍ୟାରିୟର ଆରମ୍ଭ କରିଥିବା ଏହି ବ୍ୟକ୍ତି କିପରି ରାଜନୀତିରେ ପହଞ୍ଚିଥିଲେ ଆସନ୍ତୁ ଜାଣିବା | ସଞ୍ଜୟ ରାଉତ ୧୫ ଅକ୍ଟୋବର ୧୯୬୧ରେ ଜନ୍ମଗ୍ରହଣ କରିଥିଲେ। ମୁମ୍ବାଇ କଲେଜରୁ ବି.କମ ପରେ ସେ ସାମ୍ବାଦିକତା କ୍ଷେତ୍ରରେ ପ୍ରବେଶ କରିଥିଲେ। ସେ ମରାଠୀ ଖବରକାଗଜରେ କ୍ରାଇମ ରିପୋର୍ଟର ଭାବରେ କାମ କରିବା ଆରମ୍ଭ କରିଥିଲେ। ଅଣ୍ଡରୱାର୍ଲ୍ଡରେ ତାଙ୍କର ଭଲ ଉତ୍ସ ଥିଲା ଏବଂ କ୍ରାଇମ ରିପୋର୍ଟର ଭାବରେ ତାଙ୍କର ସୁନାମ ଥିଲା |

ସାମ୍ବାଦିକତା ସମୟରେ ସେ ରାଜ ଠାକରେଙ୍କ ସହ ପରିଚିତ ହୋଇ ଭଲ ବନ୍ଧୁ ହୋଇଥିଲେ। ସେତେବେଳେ ରାଜ ଠାକରେ ଶିବସେନାରେ ଜଣେ ବଡ ନେତା ଥିଲେ। ସଞ୍ଜୟ ରାଉତ କ୍ରାଇମ ରିପୋର୍ଟର ଭାବରେ ଭଲ କାମ କରୁଥିଲେ। ଏହି ସମୟରେ, ଶିବସେନାର ମୁଖପତ୍ର 'ସାମନା'ରେ କାର୍ଯ୍ୟନିର୍ବାହୀ ସମ୍ପାଦକଙ୍କର ପଦବୀ ଖାଲି ଥିବାବେଳେ ଏହି ପଦ ପାଇଁ ବାଲାସାହେବ ସଞ୍ଜୟ ରାଉତଙ୍କୁ ଚୟନ କରିଥିଲେ। ଏହା ପରେ ସଞ୍ଜୟ ରାଉତ 'ସାମନା'ର ପରିଚାଳନା ବୁଝୁଥିବାବେଳେ ସେ ବହୁତ ତୀକ୍ଷ୍ଣ ସମ୍ପାଦକୀୟ ଲେଖୁଥିଲେ | ବାଲାସାହେବ ତାଙ୍କ ଲେଖାକୁ ବହୁତ ପସନ୍ଦ କରିଥିଲେ। ଖୁବ ଶୀଘ୍ର ବାଲାସାହେବଙ୍କ ଚିନ୍ତାଧାରା ଏବଂ ସଞ୍ଜୟ ରାଉତଙ୍କ ଲେଖା ଏତେ ଭଲ ଭାବରେ ତାଳମେଳ ରହିଲା ହେଲା ଯେ ସେ ଯାହା ଲେଖିଥିଲେ ତାହା ବାଲାସାହେବଙ୍କର ବୋଲି ବିବେଚନା କରାଯାଉଥିଲା |

୨୦୦୪ରେ ଶିବସେନା ତାଙ୍କୁ ପ୍ରଥମ ଥର ପାଇଁ ରାଜ୍ୟସଭାକୁ ପଠାଇଥିଲା। ଶିବସେନା ଏବଂ ବିଜେପିକୁ ପୃଥକ କରି ମହା ବିକାଶ ଆଘାଡି ସରକାର ଗଠନରେ ସଞ୍ଜୟ ରାଉତଙ୍କର ମଧ୍ୟ ଏକ ପ୍ରମୁଖ ଭୂମିକା ରହିଛି ବୋଲି ବିବେଚନା କରାଯାଏ। ନିର୍ବାଚନ ଫଳାଫଳ ବାହାରିବା ପରେ ସେ ପ୍ରଥମେ ଏନସିପି ମୁଖ୍ୟ ଶରଦ ପାୱାରଙ୍କୁ ଭେଟିଥିଲେ। ଏହା ପରେ ହିଁ ମୁଖ୍ୟମନ୍ତ୍ରୀ ପଦବୀକୁ ବିଜେପି ସାମ୍ନାରେ ରଖିବା ଏବଂ ପରେ ମେଣ୍ଟ ଭାଙ୍ଗିବା ପ୍ରକ୍ରିୟା ଆରମ୍ଭ ହୋଇଥିଲା।