ପାଠପଢା ପରେ ଷ୍ଟିଲ ପ୍ଲାଣ୍ଟରୁ କ୍ୟାରିୟର ଆରମ୍ଭ କରିଥିଲେ ସିଞ୍ଜୋ ଆବେ

ଟୋକିଓ: ଜାପାନର ପୂର୍ବତନ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କର ଆଜି ଦେହାନ୍ତ ହୋଇଛି। ଜଣେ ଦୃବୁର୍ତ୍ତଙ୍କ ଗୁଳିମାଡରେ ତାଙ୍କର ଜୀବନ ଚାଲିଯାଇଥିବାବେଳେ ସେ ଜାପାନର ଜଣେ ଲୋକପ୍ରିୟ ପ୍ରଧାନମନ୍ତ୍ରୀ ଥିଲେ | ୬୭ ବର୍ଷୀୟ ସିଞ୍ଜୋ ଆବେ ଜାପାନର ଦୀର୍ଘ ସମୟ ଧରି ପ୍ରଧାନମନ୍ତ୍ରୀ ଥିଲେ। ସେ ୨୦୦୬ ରୁ ୨୦୦୭ ପର୍ଯ୍ୟନ୍ତ ଏବଂ ପୁନର୍ବାର ୨୦୧୨ ରୁ ୨୦୨୦ ପର୍ଯ୍ୟନ୍ତ ପ୍ରଧାନମନ୍ତ୍ରୀ ଥିଲେ। ତେବେ ଷ୍ଟିଲ ପ୍ଲାଣ୍ଟରୁ କାର୍ଯ୍ୟ ଆରମ୍ଭ କରିଥିବା ସିଞ୍ଜୋ ଆବେ କିଭଳି ପ୍ରଧାନମନ୍ତ୍ରୀ ହୋଇଥିଲେ ସେ ବାବଦରେ ଆଜି ଆମେ ଆପଣଙ୍କୁ କହିବୁ | ସିଞ୍ଜୋ ଆବେ ୨୧ ସେପ୍ଟେମ୍ବର ୧୯୫୪ରେ ଟୋକିଓରେ ଜନ୍ମଗ୍ରହଣ କରିଥିଲେ | ସେ ଜାପାନର ଏକ ପ୍ରଭାବଶାଳୀ ରାଜନୈତିକ ପରିବାରରେ ଜନ୍ମ ନେଇଥିଲେ | ତାଙ୍କ ଜେଜେବାପା କୈନା ଆବେ ଏବଂ ପିତା ସିଣ୍ଟାରୋ ଆବେ ଜାପାନର ଲୋକପ୍ରିୟ ରାଜନେତା ଥିଲେ।

ଏଥି ସହିତ ତାଙ୍କ ଅଜା ନୋବୋସୁକେ କିଶି ଜାପାନର ପ୍ରଧାନମନ୍ତ୍ରୀ ଥିଲେ। ସେ ନିଜର ପ୍ରାଥମିକ ଶିକ୍ଷା ନୋବୋସୁକେରେ ସମାପ୍ତ କରିଥିବାବେଳେ ଏହା ପରେ ସେ ସାଇକେଇ ୟୁନିଭରସିଟିରୁ ରାଜନୀତି ବିଜ୍ଞାନରେ ସ୍ନାତକ ହାସଲ କରିଥିଲେ | ସିଞ୍ଜୋ ଆବେ ତା’ପରେ ତାଙ୍କର ପରବର୍ତ୍ତୀ ଅଧ୍ୟୟନ ସମାପ୍ତ କରିବାକୁ ଆମେରିକା ଯାଇଥିଲେ | ଯେଉଁଠାରେ ସେ ସାଉଥ୍ କାଲିଫର୍ଣ୍ଣିଆ ବିଶ୍ୱବିଦ୍ୟାଳୟରୁ ଅଧ୍ୟୟନ ସମାପ୍ତ କରିଥିଲେ | ସିଞ୍ଜୋ ଆବେ ରାଜନୀତିରେ ପ୍ରବେଶ କରିବା ପୂର୍ବରୁ ଦୁଇ ବର୍ଷ କୋବେ ଷ୍ଟିଲ ପ୍ଲାଣ୍ଟରେ କାର୍ଯ୍ୟ କରିଥିଲେ। ଇସ୍ପାତ କାରଖାନାରେ ଦୁଇ ବର୍ଷ କାମ କରିବା ପରେ ସେ ଚାକିରି ଛାଡି ରାଜନୀତିରେ ପ୍ରବେଶ କରିଥିଲେ। ସିଞ୍ଜୋ ଆବେଙ୍କ ପିତାଙ୍କର ୧୯୯୩ରେ ମୃତ୍ୟୁ ହେବା ପରେ ସେ ପ୍ରଥମ ଥର ପାଇଁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ |

ନିର୍ବାଚନରେ ​​ସେ ସର୍ବାଧିକ ଭୋଟ୍ ପାଇଥିଲେ। ଏହା ପରେ ସିଞ୍ଜୋ ଆବେଙ୍କ ଲୋକପ୍ରିୟତା ବଢ଼ିବାରେ ଲାଗିଥିଲା | ୨୦୦୬ରେ, ଲିବରାଲ୍ ଡେମୋକ୍ରାଟିକ୍ ପାର୍ଟିର ନେତା ସିଞ୍ଜୋ ଆବେ ୫୨ ବର୍ଷ ବୟସରେ ଜାପାନର ପ୍ରଧାନମନ୍ତ୍ରୀ ଭାବରେ ନିର୍ବାଚିତ ହୋଇଥିଲେ। ସେ ଜାପାନର ସର୍ବ କନିଷ୍ଠ ପ୍ରଧାନମନ୍ତ୍ରୀ ହୋଇଥିବାବେଳେ ଦୀର୍ଘଦିନ ଧରି ପ୍ରଧାନମନ୍ତ୍ରୀ ଥିଲେ | ସେ ଲଗାତାର ୭ବର୍ଷ ୬ ମାସ ପର୍ଯ୍ୟନ୍ତ ଜାପାନର ପ୍ରଧାନମନ୍ତ୍ରୀ ଭାବରେ ରହିଥିଲେ । ତେବେ ଅସୁସ୍ଥତା ଯୋଗୁଁ ସିଞ୍ଜୋ ଆବେଙ୍କୁ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବାକୁ ପଡିଥିଲା ।