ଟୁରରେ ବେଶୀ ଦିନ କ୍ରିକେଟରଙ୍କ ସହିତ ରହିପାରିବେନି ପରିବାର

ନୂଆଦିଲ୍ଲୀ: ଭାରତୀୟ କ୍ରିକେଟ ଟିମର ଅଧିନାୟକ ରୋହିତ ଶର୍ମା ଏବଂ ତାଙ୍କ ଦଳ ଅଷ୍ଟ୍ରେଲିଆରେ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ହାରିବା ପରେ ଏବେ ଆକ୍ସନ ମୋଡରେ ବିସିସିଆଇ। ଚୟନ କମିଟିର ଅଧ୍ୟକ୍ଷ ଅଜିତ ଅଗରକର, ଅଧିନାୟକ ରୋହିତ ଶର୍ମା ଏବଂ ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀରଙ୍କ ସହ ବିସିସିଆଇ ଏକ ସମୀକ୍ଷା ବୈଠକ କରିଥିଲା। କୁହାଯାଉଛି ଯେ, ଅଷ୍ଟ୍ରେଲିଆରେ ନିରାଶାଜନକ ପ୍ରଦର୍ଶନ ପରେ ବିସିସିଆଇ, ଖେଳାଳିମାନଙ୍କ ପାଇଁ ନୂତନ ନିର୍ଦ୍ଦେଶାବଳୀ ଲାଗୁ କରିବାକୁ ଯାଉଛି।

ନୂତନ ନିର୍ଦ୍ଦେଶାବଳୀ ଅନୁଯାୟୀ, କ୍ରିକେଟରଙ୍କ ପତ୍ନୀମାନେ ସମଗ୍ର ଗସ୍ତ ସମୟରେ ଆଉ ସେମାନଙ୍କ ସହିତ ରହିପାରିବେ ନାହିଁ। ୪୫ ଦିନିଆ ଗସ୍ତ ସମୟରେ ଜଣେ କ୍ରିକେଟରଙ୍କ ପରିବାରକୁ ସର୍ବାଧିକ ଦୁଇ ସପ୍ତାହ ରହିବାକୁ ଅନୁମତି ଦିଆଯିବ। ଏହା ସହିତ, ପ୍ରତ୍ୟେକ ଖେଳାଳିଙ୍କୁ ଟିମ୍ ବସ୍‌ରେ ଯାତ୍ରା କରିବାକୁ ପଡିବ। ପରିବାର ସହ ଅଲଗା ଯାତ୍ରା ପାଇଁ ଅନୁମତି ଦିଆଯିବ ନାହିଁ। ଦଳର ପ୍ରଦର୍ଶନକୁ ଉନ୍ନତ କରିବା ପାଇଁ, ବିସିସିଆଇ ଏହି ନୂତନ ନିର୍ଦ୍ଦେଶାବଳୀ ପ୍ରସ୍ତୁତ କରିଛି।

ଏହା ମଧ୍ୟ କୁହାଯାଉଛି ଯେ, ବିସିସିଆଇ ବୈଠକରେ ଖେଳାଳିମାନଙ୍କୁ ଘରୋଇ କ୍ରିକେଟ୍ ଖେଳିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି। ଏପରି ପରିସ୍ଥିତିରେ, ଏବେ ସମସ୍ତ ଖେଳାଳିଙ୍କୁ ରଣଜୀ ଟ୍ରଫି ମ୍ୟାଚ ଖେଳୁଥିବାର ଦେଖାଯାଇପାରେ। ଅନ୍ୟପକ୍ଷରେ, ଭାରତୀୟ ଦଳ ଜାନୁଆରି ୨୨ରୁ ଇଂଲଣ୍ଡ ବିପକ୍ଷରେ ୫ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଖେଳିବାକୁ ଯାଉଛି। ଭାରତ, ଇଂଲଣ୍ଡ ବିପକ୍ଷରେ ୫ଟି ଟି-୨୦ ଏବଂ ୩ଟି ଦିନିକିଆ ମ୍ୟାଚର ଏକ ସିରିଜ୍ ଖେଳିବ। ଏହା ପରେ, ଟିମ୍ ଇଣ୍ଡିଆ ଚାମ୍ପିଅନ୍ସ ଟ୍ରଫି ଖେଳିବ।