ସେ କ’ଣ ସଫଳତା ପାଇଛନ୍ତି? ରୋହିତଙ୍କୁ ମୋଟା କହିଥିବା ଶମାଙ୍କୁ ପ୍ରଶ୍ନ କଲେ ହରଭଜନ

ନୂଆଦିଲ୍ଲୀ: ଭାରତୀୟ ଦଳ ରୋହିତ ଶର୍ମାଙ୍କ ଅଧିନାୟକତ୍ୱରେ ବହୁତ ଭଲ ପ୍ରଦର୍ଶନ କରୁଛି ଏବଂ ଆଇସିସି ଚାମ୍ପିଅନ୍ସ ଟ୍ରଫି ୨୦୨୫ରେ ଲଗାତାର ୩ଟି ମ୍ୟାଚ୍ ଜିତି ସେମିଫାଇନାଲରେ ପହଞ୍ଚିଛି। ସାରା ଦେଶରେ ରୋହିତଙ୍କ ଦକ୍ଷତାକୁ ନେଇ ଚର୍ଚ୍ଚା ଚାଲିଥିବା ବେଳେ କଂଗ୍ରେସ ମୁଖପାତ୍ର ଶମା ମହମ୍ମଦ ହିଟମ୍ୟାନଙ୍କୁ କିଛି ଦିନ ତଳେ ମୋଟା ବୋଲି କହି ବିବାଦୀୟ ହୋଇଥିଲେ। ନିଜର ପୋଷ୍ଟ ହଟାଇସାରିଥିଲେ ବି ଏବେ ତାଙ୍କୁ ବିଭିନ୍ନ ନେତା ଓ କ୍ରିକେଟର ସମାଲୋଚନା କରୁଛନ୍ତି।

ଏବେ ଭାରତୀୟ କ୍ରିକେଟ ଟିମର ପୂର୍ବତନ ସ୍ପିନର ହରଭଜନ ସିଂହ, ଶମାଙ୍କୁ ତାଙ୍କ ସଫଳତା ବିଷୟରେ ପଚାରିଛନ୍ତି। ବିବାଦ ନେଇ ହରଭଜନଙ୍କୁ ପ୍ରଶ୍ନ କରାଯିବାରୁ ସେ କହିଥିଲେ, "କିଛି ଲୋକ ତାଙ୍କ ଫିଟନେସ୍, ଅଧିନାୟକତ୍ୱ ଦକ୍ଷତା ବିଷୟରେ କଥାବାର୍ତ୍ତା କରି ଚାଲିଥିବେ। କିନ୍ତୁ ମୁଁ ରୋହିତ ଶର୍ମାଙ୍କ ଫିଟନେସ୍ ବିଷୟରେ ଏହି ମନ୍ତବ୍ୟ ଦେଇଥିବା ମହିଳାଙ୍କୁ ଅତି ସରଳ ପ୍ରଶ୍ନ ପଚାରିବାକୁ ଚାହେଁ। କ୍ରୀଡ଼ା କ୍ଷେତ୍ରରେ ତାଙ୍କର ନିଜର ସଫଳତା କ'ଣ? କାହା ଆଡ଼କୁ ଆଙ୍ଗୁଠି ଉଠାଇବା ବହୁତ ସହଜ। କିନ୍ତୁ ନିଜକୁ ମଧ୍ୟ ଦେଖନ୍ତୁ।"

ସେ ଆହୁରି କହିଥିଲେ, "ଭାରତ ପାଇଁ ଖେଳିଲେ କିପରି ଅନୁଭବ ହୁଏ ଏବଂ ଜଣେ ଖେଳାଳି କେଉଁ ପ୍ରକାରର ଚାପ ଦେଇ ଗତି କରେ ତାହା କେବଳ ସେହି ଖେଳାଳି ହିଁ ଜାଣେ। ଲୋକଙ୍କ ପାଇଁ ତାହା ବୁଝିବା ବହୁତ କଷ୍ଟକର। ଦଳକୁ ଆଗକୁ ନେବାର ଦାୟିତ୍ୱ ରୋହିତଙ୍କ ପାଖରେ ଅଛି, କିନ୍ତୁ ତାଙ୍କୁ ଜଣେ ଖେଳାଳି ଭାବରେ ମଧ୍ୟ ପ୍ରଦର୍ଶନ କରିବାକୁ ପଡିବ। ରୋହିତ ଶର୍ମା ଜଣେ ବହୁତ ପରିଶ୍ରମୀ ବ୍ୟକ୍ତି, ସେ ଜଣେ ନିଃସ୍ୱାର୍ଥପର ବ୍ୟକ୍ତି। ସେ ଜଣେ ନେତା, ଯିଏ ସାମ୍ନାରୁ ନେତୃତ୍ୱ ନିଅନ୍ତି। ଯିଏ ସବୁବେଳେ ନିଜ ଅପେକ୍ଷା ଦଳର ସ୍ୱାର୍ଥକୁ ପ୍ରାଥମିକତା ଦିଅନ୍ତି। ତାଙ୍କ ପରି ନେତା, ତାଙ୍କ ପରି ଖେଳାଳି ପାଇବା ଭାଗ୍ୟର କଥା।"