ଭାରତୀୟ ଆଥ୍‌ଲେଟ୍‌ ୫ ଭିନ୍ନ ଭିନ୍ନ ଗ୍ରାମରେ ରହିବେ, ମହିଳା କ୍ରିକେଟ୍‌ ଦଳ ପାଇଁ ଅଲଗା ବ୍ୟବସ୍ଥା

ନୂଆଦିଲ୍ଲୀ: ଜୁଲାଇ ୨୮ ତାରିଖରୁ ଆରମ୍ଭ ହେବାକୁ ଯାଉଥିବା ବର୍ମିଙ୍ଗହାମ୍‌ ରାଜ୍ୟଗୋଷ୍ଠୀ କ୍ରୀଡ଼ା ଅବସରରେ ଭାରତୀୟ ଆଥ୍‌ଲେଟ୍‌ ଏବଂ ଅଧିକାରୀମାନେ ୫ଟି ଭିନ୍ନ ଭିନ୍ନ ଗ୍ରାମରେ ଅବସ୍ଥାନ କରିବେ। ତେବେ ପ୍ରଥମ ଥର ଲାଗି ଅଂଶଗ୍ରହଣ କରୁଥିବା ମହିଳା କ୍ରିକେଟ୍‌ ଦଳ ପାଇଁ ବର୍ମିଙ୍ଗହାମ୍‌ ସିଟି ସେଣ୍ଟରରେ ଅଲଗା‌ ବ୍ୟବସ୍ଥା କରାଯାଇଥିବା ଆୟୋଜକଙ୍କ ପକ୍ଷରୁ ସୂଚନା ଦିଆଯାଇଛି। ଏହି କ୍ରୀଡ଼ା ପାଇଁ ଭାରତ ଏକ ୨୧୫ ଜଣିଆ ପ୍ରତିନିଧି ଦଳ ପଠାଇଛି। ଭାରତ ୧୬ ଶୃଙ୍ଖଳରେ ପ୍ରତିଦ୍ବନ୍ଦ୍ବିତା କରିବ। ଆଥ୍‌ଲେଟ୍‌ଙ୍କ ସହିତ ଅଧିକାରୀମାନଙ୍କୁ ମିଶାଇ ଭାରତୀୟ ଦଳର ସଂଖ୍ୟା ମୋଟ ୩୨୫ ରହିଛି। ସାଧାରଣତଃ ସମସ୍ତ ଆଥ୍‌ଲେଟ୍‌ ଉତ୍ସର୍ଗୀକୃତ କ୍ରୀଡ଼ା ଗ୍ରାମରେ ରହିବା କଥା। କିନ୍ତୁ ବର୍ମିଙ୍ଗ୍‌ହାମ୍‌ ଆୟୋଜକ ଆଥ୍‌ଲେଟ୍‌ଙ୍କ ପାଇଁ ଭିନ୍ନ ଭିନ୍ନ ୫ ଗ୍ରାମରେ ରହଣୀ ବ୍ୟବସ୍ଥା କରିଛନ୍ତି। ଏହି ବହୁଦଳୀୟ ପ୍ରତିଯୋଗିତାରେ ମୋଟ ଉପରେ ୫୦୦୦ରୁ ଅଧିକ ଆଥ୍‌ଲେଟ୍‌ ଭାଗ ନେଉଥିବା ଆୟୋଜକଙ୍କ ସୂତ୍ରରୁ ପ୍ରକାଶ। ଭାରତୀୟଙ୍କ ରହଣୀ ବ୍ୟବସ୍ଥା ନେଇ ଉଭୟ ଜାତୀୟ କ୍ରୀଡ଼ା ସଂଗଠନ ଏବଂ ଭାରତୀୟ ଅଲିମ୍ପିକ୍‌ ସଂଘ (ଆଇଓଏ)କୁ ଅବଗତ କରାଯାଇଛି। କୋଭିଡ୍‌ ପ୍ରୋଟୋକଲ ଅନୁଯାୟୀ ଲଣ୍ଡନ ପହଞ୍ଚିବାର ୭୨ ଘଣ୍ଟା ପୂର୍ବରୁ ଆଥ୍‌ଲେଟ୍‌ମାନଙ୍କର ଆର୍‌ଟି-ପିସିଆର୍‌ ପରୀକ୍ଷା ବାଧ୍ୟତାମୂଳକ କରାଯାଇଛି।