ମନୁଙ୍କୁ ପ୍ରେସିଡେଣ୍ଟ୍ସ କପ୍‌ ସ୍ବର୍ଣ୍ଣ

ରୋକ୍‌ଲୋ (‌ପୋଲାଣ୍ଡ): ଭାରତୀୟ ମହିଳା ପିସ୍ତଲ ସୁଟର ମନୁ ଭାକର ଏଠାରେ ଚାଲିଥିବା ଆଇଏସ୍‌ଏସ୍‌ଏଫ୍‌ ପ୍ରେସିଡେଣ୍ଟ୍‌ସ କପ୍‌ ରାଇଫଲ/ପିସ୍ତଲ ପ୍ରତିଯୋଗିତାରେ ସ୍ବର୍ଣ୍ଣ ପଦକ କରାୟତ୍ତ କରିଛନ୍ତି। ୧୦ ମିଟର ଏୟାର ପିସ୍ତଲ ମିଶ୍ରିତ ଦଳଗତରେ ଅଲିମ୍ପିକ୍‌ ବିଜେତା ଇରାନର ଜାଭେଦ୍‌ ଫୋରୋଗିଙ୍କୁ ସାଥୀ କରି ମନୁ ଏହି ପଦକ ଜିତିଥିଲେ। ଶନିବାର ଫାଇନାଲ୍‌ରେ ଏହି ଭାରତ ଓ ଇରାନ ଯୋଡ଼ି ୧୬-୮ରେ ଫ୍ରାନ୍ସ ଓ ରୁଷିଆ ଯୋଡ଼ି ମାଥିଲଡେ ଲାମୋଲେ ଓ ଅର୍ତେମ ଚେର୍‌ନୌସଭଙ୍କୁ ମାତ୍‌ ଦେଇଥିଲେ। କ୍ବାଲିଫିକେସନ୍‌ରେ ମନୁ ଓ ଜାଭେଦ ଏକାଠି ୫୮୨/୬୦୦ ସ୍କୋର୍‌ ସହ ସେମିଫାଇନାଲ୍‌ରେ ପହଞ୍ଚିଥିଲେ। ୪ ଯୋଡ଼ିଙ୍କ ମଧ୍ୟରେ ଏମାନେ ଶୀର୍ଷରେ ରହି ଫାଇନ‌ାଲ୍‌ରେ ପହଞ୍ଚିଥିଲେ। ଲାମୋଲେ ଓ ଆର୍ତେମ ଦ୍ବିତୀୟ ସେମିଫାଇନାଲ୍‌ରୁ ଫାଇନାଲ୍‌ରେ ପ୍ରବେଶ କରିଥିଲେ।

ଅନ୍ୟ ଭାରତୀୟଙ୍କ ମଧ୍ୟରେ ଅଭିଷେକ ବର୍ମା ଓ ତାଙ୍କ ୟୁକ୍ରେନ ସାଥୀ ଓଲେନା କୋସ୍ତେଭିଚ୍‌ ଏବଂ ସୌରଭ ଚୌଧୁରୀ ଓ ତାଙ୍କ ସ୍ବିଜରଲାଣ୍ଡ ସାଥୀ ହେଇଦି ଗର୍ବର ଡାଇଥେଲେମ ସେମିଫାଇନାଲ୍‌ରେ ଯଥାକ୍ରମେ ଷଷ୍ଠ ଓ ସପ୍ତମରେ ରହି ବିଦାୟ ନେଇଥିଲେ। ସେହିପରି ଚତୁର୍ଥ ଭାରତୀୟ ଭାବେ ଏହି ପ୍ରତିଯୋଗିତାରେ ଭାଗ ନେଇଥିବା ଯଶସ୍ବିନୀ ଦେଶସ୍ବାଲ ୧୨ ଦଳ ମଧ୍ୟରେ ଦଶମରେ ରହି ବିଦା ହୋଇଥିଲେ। ଯଶସ୍ବିନୀ ସ୍ଲୋଭାକିଆ‌ର ଜୁରାଜ ତୁଜିନସ୍କାଏଙ୍କୁ ସାଥୀ କରି ମଇଦାନକୁ ଓହ୍ଲାଇଥିଲେ।