ଆରମ୍ଭ ହେଲା ରାଜ୍ୟ ଫିଜିଓଥେରାପିଷ୍ଟ ବ୍ୟାଡମିଣ୍ଟନ ଲିଗ

ଭୁବନେଶ୍ୱର: ସ୍ୱାସ୍ଥ୍ୟ ହିଁ ସମ୍ପଦ, ଆଉ କ୍ରୀଡା ଦ୍ୱାରା ହିଁ ସ୍ୱାସ୍ଥ୍ୟ ଠିକ ରହେ | କିଛି ଏଭଳି ବାର୍ତ୍ତା ନେଇ ଆଜିଠାରୁ ଭୁବନେଶ୍ୱରରେ ଆରମ୍ଭ ହୋଇଯାଇଛି ରାଜ୍ୟ ଫିଜିଓଥେରାପିଷ୍ଟ ବ୍ୟାଡମିଣ୍ଟନ ଲିଗ | ଭୁବନେଶ୍ୱରର ପାୱାର ସଟଲର ବ୍ୟାଡମିଣ୍ଟନ ଏକାଡେମୀଠାରେ ଏହି କ୍ରୀଡା ପ୍ରତିଯୋଗିତା ଆରମ୍ଭ ହୋଇଥିବାବେଳେ ଆଜି ଭୁବନେଶ୍ୱର ମେୟର ସୁଲୋଚନା ଦାସ ମୁଖ୍ୟ ଅତିଥି ଭାବେ ଯୋଗ ଦେଇ ଏହାର ଉଦଘାଟନ କରିଥିଲେ | ଆସନ୍ତା ସେପ୍ଟେମ୍ବର ୮ ତାରିଖରେ ବିଶ୍ୱ ଫିଜିଓଥେରାପି ଦିବସ ଭାବେ ପାଳନ ହେବାକୁ ଥିବାବେଳେ ଏହାକୁ ଦୃଷ୍ଟିରେ ରଖି ଫିଜିଓଥେରାପିଷ୍ଟ ବ୍ୟାଡମିଣ୍ଟନ ଲିଗ ଆଜିଠାରୁ ଆରମ୍ଭ ହୋଇଛି |

 ଏହି କ୍ରୀଡା ପ୍ରତିଯୋଗିତାରେ ଶତାଧିକ ଫିଜିଓଥେରାପିଷ୍ଟ ଯୋଗ ଦେଇଥିଲେ | ଏହି ଅବସରରେ ମେୟର ସୁଲୋଚନା ଦାସ କହିଥିଲେ ଯେ ଆମର ସ୍ୱାସ୍ଥ୍ୟ କ୍ଷେତ୍ରରେ ଫିଜିଓଥେରାପିର ଏକ ଗୁରୁତ୍ୱପୂର୍ଣ୍ଣ ଭୂମିକା ରହିଛି | ଆଉ ଏହାକୁ ଜୀବନର ବ୍ରତ ଭାବେ ଗ୍ରହଣ କରିଥିବା ଫିଜିଓଥେରାପିଷ୍ଟମାନେ ଆବାଳବୃଦ୍ଧବନିତାଙ୍କ ସେବାରେ ନିଜକୁ ନିୟୋଜିତ କରିଥାନ୍ତି | ତେଣୁ ସେହି ଫିଜିଓଥେରାପିଷ୍ଟମାନେ ଫିଟ ରହିଲେ ହିଁ ଅନ୍ୟକୁ ଫିଟ କରିପାରିବେ | ଆଉ ଫିଟ ରହିବା ପାଇଁ ବ୍ୟାଡମିଣ୍ଟନର ବଡ ଭୂମିକା ରହିଛି | ଏହି ବ୍ୟାଡମିଣ୍ଟନ ଲିଗକୁ ଡ଼.ଦୀପକ ସାମନ୍ତରାୟ, ଡ଼.ବିଶ୍ୱଜିତ ସାହୁ, ଡ଼.ସୌମେନ୍ଦ୍ର କୁମାର ପଣ୍ଡା, ଡ଼.ବିଭୁତି ଭୂଷଣ ଜେନା, ଡ଼.ଚିନ୍ମୟ କୁମାର ପାତ୍ର, ଡ଼.ସାଗର ଦୀକ୍ଷିତ, ଡ଼.ପି ଵାଲା କିଶୋର, ଡ଼.ତାପସ ମିତ୍ର ପ୍ରମୁଖ ଆୟୋଜନ କରିଥିଲେ |