ରୋହିତ ପାକିସ୍ତାନ ଯିବା ସମ୍ଭାବନା: ଚାମ୍ପିଅନ୍ସ ଟ୍ରଫି ପୂର୍ବରୁ ଆସିଲା ବଡ଼ ଖବର

ଇସଲାମାବାଦ୍: ପାକିସ୍ତାନ ଦ୍ୱାରା ଆୟୋଜିତ ହେଉଥିବା ଚାମ୍ପିଅନ୍ସ ଟ୍ରଫି ୨୦୨୫ ହାଇବ୍ରିଡ ମଡେଲରେ ଖେଳାଯିବ। ବାସ୍ତବରେ, ଏହି ଟୁର୍ନାମେଣ୍ଟ ପାଇଁ ଟିମ୍ ଇଣ୍ଡିଆକୁ ପାକିସ୍ତାନ ନ ପଠାଇବାକୁ ବିସିସିଆଇ ନିଷ୍ପତ୍ତି ନେଇଛି।

ଏଭଳି ପରିସ୍ଥିତିରେ ଟିମ୍ ଇଣ୍ଡିଆ ଏହାର ସମସ୍ତ ମ୍ୟାଚ୍ ଦୁବାଇରେ ଖେଳିବ ଏବଂ ଅବଶିଷ୍ଟ ମ୍ୟାଚ୍ କେବଳ ପାକିସ୍ତାନରେ ଖେଳାଯିବ। ଯଦି ଟିମ୍ ଇଣ୍ଡିଆ ଫାଇନାଲରେ ପହଞ୍ଚେ ତେବେ ମ୍ୟାଚ୍ ଦୁବାଇରେ ଅନୁଷ୍ଠିତ ହେବ, ନଚେତ୍ ପାକିସ୍ତାନ ଫାଇନାଲ୍ ଆୟୋଜନ କରିବ।

ଏସବୁ ମଧ୍ୟରେ ରୋହିତ ଶର୍ମାଙ୍କୁ ନେଇ  ଏକ ବଡ଼ ଖବର ସାମ୍ନାକୁ ଆସିଛି। ଏକ ରିପୋର୍ଟରେ ଦର୍ଶାଯାଇଛି ଯେ, ଟୁର୍ଣ୍ଣାମେଣ୍ଟ ଆରମ୍ଭ ପୂର୍ବରୁ ରୋହିତଙ୍କୁ ପାକିସ୍ତାନ ଗସ୍ତ କରିବାକୁ ପଡିପାରେ।

ଚାମ୍ପିଅନ୍ସ ଟ୍ରଫି ୧୯ ଫେବ୍ରୁଆରିରୁ କରାଚିରେ ଆରମ୍ଭ ହେବ। ଏହା ୯ ମାର୍ଚ୍ଚ ପର୍ଯ୍ୟନ୍ତ ଖେଳାଯିବ। ଟିମ୍ ଇଣ୍ଡିଆ ଏହି ଟୁର୍ନାମେଣ୍ଟରେ ଫେବ୍ରୁଆରି ୨୦ରେ ଏହାର ପ୍ରଥମ ମ୍ୟାଚ୍ ଦୁବାଇରେ ଖେଳିବ।

ପ୍ରତ୍ୟେକ ଆଇସିସି ଟୁର୍ନାମେଣ୍ଟ ପୂର୍ବରୁ ଆୟୋଜକ ଦେଶ ସାଧାରଣତଃ ଟୁର୍ନାମେଣ୍ଟରେ ଅଂଶଗ୍ରହଣ କରୁଥିବା ସମସ୍ତ ଅଧିନାୟକଙ୍କ ଉପସ୍ଥିତିରେ ଏକ ବଡ଼ କାର୍ଯ୍ୟକ୍ରମ ଆୟୋଜନ କରିଥାଏ। ଏହି ସମୟରେ ଅଧିନାୟକଙ୍କ ଫଟୋସୁଟ ସହିତ ଏକ ସାମ୍ବାଦିକ ସମ୍ମିଳନୀ ମଧ୍ୟ ଅନୁଷ୍ଠିତ ହୋଇଥାଏ।

ଏଭଳି ପରିସ୍ଥିତିରେ ରୋହିତ ଏହି କାର୍ଯ୍ୟକ୍ରମ ପାଇଁ ପାକିସ୍ତାନ ଗସ୍ତ କରିବେ ବୋଲି ପାକିସ୍ତାନୀ ଗଣମାଧ୍ୟମରେ ଦାବି କରାଯାଇଛି। ତେବେ କ୍ୟାପଟେନ ରୋହିତଙ୍କ ପାକିସ୍ତାନ ଯିବାର କୌଣସି ସରକାରୀ ଘୋଷଣା ହୋଇନାହିଁ।

୨ଟି ଗ୍ରୁପରେ ବିଭକ୍ତ ହୋଇଥିବା ଚାମ୍ପିଅନ୍ସ ଟ୍ରଫିରେ ମୋଟ ୮ଟି ଦଳ ଖେଳିବେ। ଟିମ୍ ଇଣ୍ଡିଆ ପାକିସ୍ତାନ, ନ୍ୟୁଜିଲ୍ୟାଣ୍ଡ ଏବଂ ବାଂଲାଦେଶ ସହିତ ଗ୍ରୁପ୍ ‘ଏ’ରେ ଅଛି। ଫେବ୍ରୁଆରି ୨୦ରେ ବାଂଲାଦେଶ ବିପକ୍ଷରେ ଏହି ଟୁର୍ନାମେଣ୍ଟରେ ଟିମ୍ ଇଣ୍ଡିଆ ନିଜର ପ୍ରଥମ ମ୍ୟାଚ୍ ଖେଳିବ।

ଭାରତୀୟ ଦଳ ୨୩ ଫେବ୍ରୁଆରିରେ ପାକିସ୍ତାନ ବିପକ୍ଷରେ ଦ୍ୱିତୀୟ ମ୍ୟାଚ୍ ଖେଳିବ। ଏହା ପରେ ଗ୍ରୁପ୍‌ର ଶେଷ ମ୍ୟାଚ୍‌ରେ ଭାରତୀୟ ଦଳ ମାର୍ଚ୍ଚ ୨ରେ ନ୍ୟୁଜିଲାଣ୍ଡକୁ ଭେଟିବ। ଗ୍ରୁପ୍ ପର୍ଯ୍ୟାୟ ପରେ ସେମିଫାଇନାଲ ଏବଂ ଫାଇନାଲ୍ ମ୍ୟାଚ୍ ଖେଳାଯିବ।

ଅଧିକ ପଢ଼ନ୍ତୁ: ବାଂଲାଦେଶ ସେନାରେ ବିଦ୍ରୋହ: ଦୁଇ ଜେନେରାଲ ଗୋଷ୍ଠୀ ମୁହାଁମୁହିଁ

ଚାମ୍ପିଅନ୍ସ ଟ୍ରଫି ୨୦୨୫ ପାଇଁ ଏପର୍ଯ୍ୟନ୍ତ ଟିମ୍ ଇଣ୍ଡିଆର ଖେଳାଳିଙ୍କ ଘୋଷଣା ହୋଇନାହିଁ। ୧୮ କିମ୍ବା ୧୯ ଜାନୁଆରିରେ ଚୟନ କମିଟିର ବୈଠକ ହେବ ଏବଂ ପରେ ଦଳ ଘୋଷଣା କରାଯିବ ବୋଲି କୁହାଯାଉଛି।

ଏହି ବଡ଼ ଟୁର୍ନାମେଣ୍ଟ ପୂର୍ବରୁ ଭାରତୀୟ ଦଳକୁ ଇଂଲଣ୍ଡ ବିପକ୍ଷରେ ୩ ମ୍ୟାଚ୍ ବିଶିଷ୍ଟ ଏକଦିବସୀୟ ସିରିଜ୍ ଖେଳିବାକୁ ପଡିବ। ଏହି ସିରିଜ୍ ପାଇଁ ଏପର୍ଯ୍ୟନ୍ତ ଭାରତୀୟ ଦଳ ଚୟନ କରାଯାଇ ନାହିଁ।

ଅଧିକ ପଢ଼ନ୍ତୁ: ଟୁର୍ଣ୍ଣାମେଣ୍ଟ ସମୟରେ ଖେଳାଳି ପତ୍ନୀମାନଙ୍କ ସହିତ ରହି ପାରିବେ ନାହିଁ