ଏସ୍‌ଏନ୍‌ ଟାଏକୋଣ୍ଡୋ ଏକାଡେମିକୁ ୨୩ ପଦକ

ଭୁବନେଶ୍ୱର: ପଶ୍ଚିମବଙ୍ଗର ମାଲ୍‌ଦାଠାରେ ଅନୁଷ୍ଠିତ ଦୁଇ ଦିନିଆ ପ୍ରତିଯୋଗିତାରେ କଟକର ଏସ୍‌ଏନ୍‌ ଟାଏକୋଣ୍ଡୋ ଏକାଡେମି ଚମତ୍କାର ସଫଳତା ପାଇଛି। ଚଳିତ ମାସ ୧୪ ଓ ୧୫ ତାରିଖରେ ଆୟୋଜିତ ପ୍ରତିଯୋଗିତାରେ ଏହି ଏକାଡେମିର ପ୍ରତିଯୋଗୀମାନେ ପୁମ୍‌ସେ ଓ କ୍ୟୁରୋଗୀରେ ୪ ସ୍ୱର୍ଣ୍ଣ, ୧୦ ରୌପ୍ୟ ଓ ୯ କାଂସ୍ୟ ସହିତ ମୋଟ ୨୩ ପଦକ ହାସଲ କରିଛନ୍ତି। ଅୟୁଧ ବେନାର୍ଗ ଉଭୟ ବର୍ଗରେ ସ୍ୱର୍ଣ୍ଣ ପଦକ ଜିତିଥିଲା ବେଳେ ହିତାଂଶୁ ଦାଶ, ସ୍ଥିତପ୍ରଜ୍ଞ ଓ ଶ୍ରୀୟାଶିଷ ଜେନା ଉଭୟ ବର୍ଗରେ ରୌପ୍ୟ ଏବଂ ଅଚିନ୍ତ ବେରା ଓ ଜ୍ୟୋତି ସାଇ କର ଉଭୟ ବର୍ଗରେ କାଂସ୍ୟ ଜିତିଛନ୍ତି।

ଅନ୍ୟମାନଙ୍କ ମଧ୍ୟରେ ଆଶୁତୋଷ ଅଗ୍ରଓ୍ଵାଲ ସ୍ୱର୍ଣ୍ଣ ଓ କାଂସ୍ୟ, ଅୟେଶକାନ୍ତ ନାୟକ ରୌପ୍ୟ ଓ ସ୍ୱର୍ଣ୍ଣ, ଶାଳିନୀ ବେହେରା କାଂସ୍ୟ ଓ ରୌପ୍ୟ, ସୋୟମ ମହାନ୍ତି ରୌପ୍ୟ, ସୋଭମ୍‌ ରୌପ୍ୟ, ଅର୍ମନ୍‌ ରଥ କାଂସ୍ୟ, ସତ୍ୟନାରାୟଣ କାଂସ୍ୟ ଏବଂ ସୌର୍ଯ୍ୟ ବର୍ମା କାଂସ୍ୟ ପଦକ ହାସଲ କରିଥିଲେ। ତାପସ ଦାସ ଏହି ଏକାଡେମି ଦଳର ପ୍ରଶିକ୍ଷକ ଥିଲା ବେଳେ ସୁଦୀପ୍ତା ନନ୍ଦ ବୈଷୟିକ ମୁଖ୍ୟ ରହିଥିଲେ।