ଦାରିଦ୍ର୍ୟ ତାଡ଼ନା: ରେଳଗାଡ଼ି ଆଗକୁ ଡେଇଁ ଗୋଟିଏ ପରିବାରର ୫ ଜଣଙ୍କ ଆତ୍ମହତ୍ୟା

ସମ୍ବଲପୁର: ସର୍‌ଲା ଜଙ୍କ୍‌ସନ୍‌ ନିକଟସ୍ଥ ରେଳ ଧାରଣାରୁ ମଙ୍ଗଳବାର ରାତିରେ ଗୋଟିଏ ପରିବାରର ପାଞ୍ଚ ଜଣ ସଦସ୍ୟଙ୍କ କଟି ଯାଇଥିବା ଶବ ଉଦ୍ଧାର କରାଯାଇଛି। ମୃତ ବ୍ୟକ୍ତିଙ୍କ ମଧ୍ୟରେ ଅଛନ୍ତି ଜଣେ ପୁରୁଷ, ଜଣେ ମହିଳା ଏବଂ ତିନି ଜଣ ଝିଅ। ଏମାନେ ସମୂହ ଆତ୍ମହତ୍ୟା କରିଛନ୍ତି।

ମୃତ ବ୍ୟକ୍ତିମାନେ ହେଲେ ଜଗନ୍ନାଥ କଲୋନିରେ ବସବାସ କରୁଥିବା ଆନୁମାନିକ ୪୮ ବର୍ଷିୟ ଧରଣୀଧର ପଣ୍ଡା, ତାଙ୍କ ପତ୍ନୀ ସଙ୍ଗୀତା, ବଡ଼ ଝିଅ ଅପରାଜିତା, ଯୁକ୍ତଦୁଇରେ ଅଧ୍ୟୟନ କରୁଥିବା ମଝିଅାଁ ଝିଅ ଅନନ୍ୟା ଏବଂ ସପ୍ତମ ଶ୍ରେଣୀରେ ପଢୁଥିବା ସାନଝିଅ ସିଦ୍ଧି।

ଜଗନ୍ନାଥଙ୍କ ନିଜ ଘର ବରଗଡ଼ ଜିଲ୍ଲାର ବୁରୁଦା ଗାଁରେ। ସେ ସ୍ଥାନୀୟ ମଦନାବତୀ ପବ୍ଲିକ୍‌ ସ୍କୁଲ୍‌ରେ ସଙ୍ଗୀତ ଶିକ୍ଷକ ରୂପେ କାର୍ଯ୍ୟ କରୁଥିଲେ। ପଡ଼ୋଶୀଙ୍କ ସୂତ୍ରରୁ ପ୍ରକାଶ ସେ ପରିବାର ବଡ଼ ଅଭାବ ଅନଟନରେ କାଳାତିପାତ କରୁଥିଲେ। ଜଗନ୍ନାଥ କଲୋନିରେ ସେମାନେ ଯେଉଁ ଘରେ ରହୁଥିଲେ, ତାହା ଜଗନ୍ନାଥଙ୍କର ଜଣେ ବନ୍ଧୁଙ୍କ ଘର। ସେଠାରେ ସମ୍ଭବତଃ ସେ ଅତି ସ୍ୱଳ୍ପ ଅର୍ଥ କିଂବା ଆଦୌ ଘର ଭଡ଼ା ନ ଦେଇ ରହୁଥିଲେ।
ମଙ୍ଗଳବାର ରାତି ପ୍ରାୟ ସାଢ଼େ ଆଠଟାବେଳେ ପାଞ୍ଚଜଣ ଯାକ ସମ୍ବଲପୁର ରୋଡ୍‌ ଠାରୁ ୮୦୦ ମିଟର୍‌ ଦୂରରେ ଟ୍ରେନ୍‌ ଆଗକୁ ଡେଇଁ ଆତ୍ମହତ୍ୟା କରିଥିଲେ।

ସମ୍ବଲପୁର-ଝାରସୁଗୁଡ଼ା ଡିଏମ୍‌ୟୁର ଚାଳକ ମଙ୍ଗଳବାର ରାତି ୯ଟାରେ ଆର୍‌ଜିପିକୁ ଶବ ସଂକ୍ରାନ୍ତରେ ସୂଚନା ଦେଇଥିଲେ। ଜିଆର୍‌ପି ଏବଂ ଆର୍‌ପିଏଫ୍‌ ଘଟଣାସ୍ଥଳରେ ଉପସ୍ଥିତ ହୋଇ ଶବଗୁଡ଼ିକୁ ଉଦ୍ଧାର କରିଥିଲେ। ଗାଁ’ରେ ଥିବା ଜଗନ୍ନାଥଙ୍କର ନିଜଟ ସମ୍ପର୍କୀୟଙ୍କୁ ଅଘଟଣ ବିଷୟରେ ସୂଚନା ଦିଆଯାଇଛି। ଜଣେ ମାଜିଷ୍ଟ୍ରେଟ୍‌ଙ୍କ ଅନୁସନ୍ଧାନ ପରେ ଶବଗୁଡ଼ିକୁ ବ୍ୟବଚ୍ଛେଦ ନିମନ୍ତେ ବୁର୍ଲା ପଠାଯିବ।

ପରିସ୍ଥିତିର ସମୀକ୍ଷା କରିବା ନିମନ୍ତେ ସମ୍ବଲପୁର ବିଧାୟକ ରାସେଶ୍ୱରୀ ପାଣିଗ୍ରାହୀ ମଧ୍ୟ ଘଟଣାସ୍ଥଳରେ ପହଞ୍ଚିଛନ୍ତି।