Amar join bjp: ପଦ୍ମ ଧରିଲେ ଅମର; ଅମର ବାବୁ ବିଜେଡିରେ ଅଣନିଃଶ୍ବାସୀ ହୋଇପଡ଼ୁଥିଲେ: ମୁଖ୍ୟମନ୍ତ୍ରୀ

ଭୁବନେଶ୍ବର: ପୂର୍ବତନ ରାଜ୍ୟସଭା ସାଂସଦ ଅମର ପଟ୍ଟନାୟକ ବିଜେଡି ଛାଡ଼ି ବିଜେପିରେ ମିଶିଛନ୍ତି। ବିଜେପି ରାଜ୍ୟ କାର୍ଯ୍ୟାଳୟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ବିଜେପି ରାଜ୍ୟ ସଭାପତି ମନମୋହନ ସାମଲ ଓ ପ୍ରଭାରୀ ବିଜୟପାଲ ସିଂହ ତୋମାରଙ୍କ ଉପସ୍ଥିତିରେ ସେ ବିଜେପିରେ ଯୋଗ ଦେଇଥିଲେ। ନୂଆପଡ଼ାରେ ବିଜେଡି ମୁଖିଆ ଉଦ୍‌ବୋଧନ ଦେଉଥିବା ବେଳେ ଏପଟେ ଅମରଙ୍କ ବିଜେପିରେ ଯୋଗଦାନ ଚର୍ଚ୍ଚାକୁ ଖୋରାକ ଯୋଗାଇଛି। ଭାରତୀୟ ଅଡିଟ୍ ଓ ଆକାଉଣ୍ଟ୍‌ସ ସେବାର ଅଧିକାରୀ ଅମର ପଟ୍ଟନାୟକ ୨୦୧୮ ମସିହାରେ ଚାକିରି ଛାଡ଼ି ହଠାତ୍ ବିଜେଡିରେ ଯୋଗ ଦେଇଥିଲେ। ଆରମ୍ଭରୁ ତାଙ୍କୁ ବିଜେଡିରେ ବେଶ୍ ଗୁରୁତ୍ବ ମିଳିଲା। ଦଳୀୟ ପଦପଦବି ସହ ଜାତୀୟ ମୁଖପାତ୍ର ଭାବେ ନିଯୁକ୍ତ କରାଗଲା। ତତ୍କାଳୀନ ଦ୍ବିତୀୟ କ୍ଷମତା କେନ୍ଦ୍ର ଭି କେ ପାଣ୍ଡିଆନଙ୍କର ସେ ଥିଲେ ଅତ୍ୟନ୍ତ ବିଶ୍ବସ୍ତ। ବିଜେଡିରେ ଯୋଗ ଦେବାର କିଛି ମାସ ମଧ୍ୟରେ ଅର୍ଥାତ୍‌ ୨୦୧୯ ଜୁନ୍‌ରେ ତାଙ୍କୁ ରାଜ୍ୟସଭା ପଠାଗଲା। ୨୦୨୪ରେ ତାଙ୍କର ରାଜ୍ୟସଭା କାର୍ଯ୍ୟକାଳ ଶେଷ ହୋଇଥିଲା।  ବିଜେଡିର ଅନେକ ଗୁରୁତ୍ବପୂର୍ଣ୍ଣ ଦାୟିତ୍ବରେ ସେ ରହୁଥିଲେ। ତାଙ୍କୁ ଆଇଟି ସେଲ୍‌ ଆବାହକ ଭାବେ ନିଯୁକ୍ତି ଦିଆଯାଇଥିଲା। ୨୦୨୪ ସାଧାରଣ ନିର୍ବାଚନରେ ବିଜେପି ଉପରେ ଭୋଟ ଚୋରିର ଆରୋପ ଲଗାଇ ବିଜେଡି ନିର୍ବାଚନ କମିସନଙ୍କ ନିକଟରେ ଯେଉଁ ଅଭିଯୋଗ କରିଛି, ତାହାର ନେତୃତ୍ବ ଅମର ନେଉଥିଲେ। ବିଜେପି କିପରି ଭୋଟ ଚୋରି କରି ଜିତିଛି, ତାହାକୁ ସେ ଲଗାତାର ଭାବେ ପ୍ରଚାର କରୁଥିଲେ। 

ଆଜିର ମିଶ୍ରଣ ସଭାରେ ମୁଖ୍ୟମନ୍ତ୍ରୀ କହିଥିଲେ, ଅମର ବାବୁ ବିଜେଡିରେ ଅଣନିଃଶ୍ବାସୀ ହୋଇପଡ଼ୁଥିଲେ। ବିଜେଡିରେ ବାକ୍ ସ୍ବାଧୀନତା ନାହିଁ ବୋଲି ଅନ୍ୟ ନେତାମାନେ ବି କୁହନ୍ତି। ମାତ୍ର ବିଜେପିରେ ଯୋଗ ଦେବା ପରେ ସେ ସ୍ବାଧୀନ ଭାବେ କାର୍ଯ୍ୟ କରିପାରିବେ। ଆଜି ବିରୋଧୀ ଦଳ ନେତା ନବୀନ ପଟ୍ଟନାୟକ ପ୍ରଚାର ମଇଦାନକୁ ଓହ୍ଲାଇଛନ୍ତି। ସେତିକିବେଳେ ତାଙ୍କ ଦଳର ବରିଷ୍ଠ ନେତା ଅମର ବାବୁ ବିଜେପିରେ ସାମିଲ ହୋଇଛନ୍ତି। ସେ ଯେତେବେଳେ ନୂଆପଡ଼ା ଯାଇ ପ୍ରଚାର କରିବେ, ସେତେବେଳେ ନବୀନ ବାବୁ ତାଙ୍କ ସ୍ଥିତି ବିଷୟରେ ଅବଗତ ହୋଇପାରିବେ। ବିଜେପି ରାଜ୍ୟ ସଭାପତି ଶ୍ରୀ ସାମଲ ଓ ପ୍ରଭାରୀ ଶ୍ରୀ ତୋମାର ବିଜେପିକୁ ଅମରଙ୍କୁ ସ୍ବାଗତ କରିବା ସହ ତାଙ୍କ ଦୀର୍ଘ ଅନୁଭବର ଲାଭ ବିଜେପିକୁ ମିଳିବ ବୋଲି କହିଥିଲେ।