ଶୁଣ ସରକାର! ମାମଲାର ତଦନ୍ତ ହେଉ; ଭୁଲ୍‌ ନଥିଲେ ଅଭିଯୋଗକାରିଣୀଙ୍କୁ ନ୍ୟାୟ ମିଳୁ

ବ୍ୟାଙ୍କ୍‌ର ସଭାପତି ହେଉଛନ୍ତି ବିଜୁ ଜନତା ଦଳର ଜଣେ ପରୁଖା ନେତା। ଯିଏ ତାଙ୍କ ବିରୋଧରେ ଯାଆନ୍ତି; ସେ ତାଙ୍କର ବଦଳି କରିଦିଅନ୍ତି କିମ୍ବା ଅନ୍ୟାନ୍ୟ ସମସ୍ୟା କରନ୍ତି। ଯେତେବେଳେ ସଭାପତି ମୋ ସ୍ବାମୀଙ୍କୁ ଚେୟାର୍‌ ଲୁଚାଇବା ବିଷୟରେ ପଚରିଲେ ତ ସେ କିଛି ବି ଜାଣିନଥିବା କହିବାରୁ ସଭାପତି ମୋ ସ୍ବାମୀଙ୍କ ଉପରେ ରାଗ ରଖିଲେ। ତାଙ୍କୁ ସିସିଟିଭି ଟ୍ୟାମ୍ପରିଂ ମାମଲାରେ ଯୋଡ଼ିଲେ। ତାଙ୍କୁ ଦ୍ବିଗୁଣା ଦାୟିତ୍ବ ଦେଲେ। ହେଲେ ସେ‌ତେବେଳେ ଆମ ସ୍ବାମୀ ଓ ସ୍ତ୍ରୀ ଉଭୟଙ୍କର ସ୍ବାସ୍ଥ୍ୟଗତ ସମସ୍ୟା ଥିବାରୁ ସେ ଅତିରିକ୍ତ ଦାୟିତ୍ବ ନେବାକୁ ମନାକଲେ। ଏଥିପାଇଁ ସେ ଲେଖା ବି ଦେଇଥିଲେ। 

ଆଶ୍ଚର୍ଯ୍ୟଜନକ କଥା ହେଉଛି ମୋ ସ୍ବାମୀଙ୍କୁ ୨ ବ‌ର୍ଷ ଭିତରେ ୫ ଥର ବଦଳି କରାଇଛନ୍ତି; ଯେଉଁଟାକି ନିୟମ ବାହାରେ। ଏଥିପାଇଁ ମୋର ପ୍ରଥମ ପିଲା ପେଟରେ ଥିବା ବେଳେ ମୁଁ ଏପଟ ସେପଟ ହେଇ ବହୁ ସମସ୍ୟାର ସାମ୍ନା କଲି ଓ ମୋ ପିଲାଟିକୁ ମୋତେ ହରେଇବାକୁ ପଡ଼ିଲା। ସେ ସମୟରେ ଦରମା ବି ବନ୍ଦ୍‌ କରିଦେଲେ। ଯେଉଁଥିପାଇଁ ଆମେ ନାହିଁନଥିବା ଅସୁବିଧା ସାମ୍ନା କରିଛୁ। ମୋ ସ୍ବାମୀଙ୍କୁ ବହୁତ ମାନସିକ ନିର୍ଯାତନା ଦିଆଯାଇଛି। ସେ ଅଫିସ୍‌ ଗ‌ଲେ ତାଙ୍କୁ ଚେୟାର୍‌ ବି ଦିଆଯାଉନଥିଲା। ସେ ପ୍ଲାଷ୍ଟିକ୍‌ ଚେୟାର୍‌ରେ ବସି ବସି ଘରକୁ ଫେରିବାକୁ ପଡୁଥିଲା। କିଛି କାମ ଦେବେନି ଆଡ଼େ ରାତି ୮ଟା ପର୍ଯ୍ୟନ୍ତ ଅଫିସ୍‌ରେ ବସେଇବେ। ଅଫିସ୍‌ର କେହି ବି ତାଙ୍କ ସହ କଥା ହେଉନଥିଲେ। ୨ ବର୍ଷ ତାଙ୍କର କୌଣସି ଦରମା ବଢ଼ିଲା ନାହିଁ। ନିକଟ‌ରେ ଜୁନ୍‌ ୧୩ ତାରିଖରେ ତାଙ୍କୁ ବହିଷ୍କୃତ କରାଯାଇଛି। ସେଇ ପୁରୁଣା ଘଟଣା ସବୁକୁ ଦର୍ଶାଇ ତାଙ୍କୁ ବହିଷ୍କୃତ କରାଯାଇଛି।

ଏବେ ମୋର ୮ ମାସର ଝିଅଟିଏ। ଆମେ ସହରରେ ଘରଭଡ଼ା ନେଇ ରହୁଛୁ। ମୋର ସ୍ବାସ୍ଥ୍ୟଗତ ସମସ୍ୟା ଅଛି। ଏହି ମୁହୁର୍ତ୍ତରେ ଚାକିରି ଯିବା ଘଟଣା ଆମ ପାଇଁ ଖୁବ୍ ସମସ୍ୟା ଛିଡ଼ା କରିଛି। ବେଳେ ବେଳେ ଆମ ମନକୁ ଆତ୍ମହତ୍ୟା ଭାବନା ବି ଅସୁଛି। ଆମେ କେତେବେଳେ କିଛି ବି କରିଦେବୁ। କେବଳ ଛୁଆ ପାଇଁ ବଞ୍ଚିରହିଛୁ। 

ମୋ ଝିଅକୁ ୨ ମାସ ହୋଇଥିବା ବେଳେ ମୁଁ ଜିଲ୍ଳାପାଳଙ୍କ ନିକଟକୁ ପୋଷ୍ଟାଲ୍‌ ଯୋଗେ ଅଭିଯୋଗ ପତ୍ର ପଠାଇଥିଲି। ଫେବ୍ରୁଆରି ୧୭ ତାରିଖରେ ଟ୍ବିଟ୍‌ (ଏବେ ଏକ୍ସ) ବି କରିଛି। ହେଲେ ଫଳାଫଳ ଶୂନ। ସରକାର ମୋ ଅସୁବିଧା ନ ବୁଝିବାରୁ ମୁଁ ବାଧ୍ୟ ହୋଇ ପୁଣି ଥରେ ‌ମୋ ସମସ୍ୟାକୁ ବୁଧବାର ରାତିରେ ପୋଷ୍ଟ୍‌ ଜରିଆରେ ଜଣାଇଛି।’’