୬ ହଜାର ଟଙ୍କା ଲାଞ୍ଚ ନେଇ ବିଂଝାରପୁର ଥାନା ଏସ୍‌ଆଇ ଗିରଫ

ବିଂଝାରପୁର : ଭିଜିଲାନ୍ସ ଜାଲରେ ପଡ଼ିଛନ୍ତି ଯାଜପୁର ଜିଲ୍ଲା ବିଂଝାରପୁର ଥାନା ଏସଆଇ ଫକୀରମୋହନ ସିଂହ। ଏକ ଗଣ୍ଡଗୋଳ ମାମଲାରେ ସହଯୋଗ କରିବାକୁ କହି ସେ ୬ ହଜାର ଟଙ୍କା ଲାଞ୍ଚ ନେଉଥିଲେ।

ମିଳିଥିବା ସୂଚନା ଅନୁସାରେ କଲ୍ୟାଣପୁର ପଞ୍ଚାୟତ ବୈରିବାଗ ଗ୍ରାମର ୨ ପରିବାର ମଧ୍ୟରେ କୌଣସି ଘଟଣାକୁ ନେଇ ଗତମାସ ମାରପିଟ୍‌ ହୋଇଥିଲା। ଉଭୟ ପକ୍ଷ ଥାନାରେ ଅଭିଯୋଗ କରିଥିଲେ। ଏ ସଂକ୍ରାନ୍ତରେ ବିଂଝାରପୁର ଆଇଆଇସି ଅମରେନ୍ଦ୍ର ଦାସ ୫୧୪/୨୧ ଓ ୫୧୫/୨୧ରେ ଦୁଇଟି ମାମଲା ରୁଜୁ କରି ଏସଆଇ ସିଂହଙ୍କୁ ତଦନ୍ତ ଦାୟିତ୍ବ ଦେଇଥିଲେ। କେସ୍‌ ନମ୍ବର ୫୧୫/୨୧ରେ ୩ ଜଣଙ୍କୁ ଧାରା ୪୧ରେ ଜାମିନ କରିବା ସହ ଅନ୍ୟାନ୍ୟ ସହଯୋଗ କରିବେ ବୋଲି କହି ଏସଆଇ ସିଂହ କଲ୍ୟାଣପୁର ଗ୍ରାମର ବସନ୍ତ ଜେନାଙ୍କୁ ୬ ହଜାର ଟଙ୍କା ଦାବି କରିଥିଲେ। ଦାବି ମୁତାବକ ବସନ୍ତ ଆଜି ଅପରାହ୍ଣରେ ୬ ହଜାର ଟଙ୍କା ନେଇ ଥାନାକୁ ଯାଇଥିଲେ। ଏ ବିଷୟରେ ସେ ଭିଜିଲାନ୍ସକୁ ଜଣାଇ ଦେଇଥି‌ଲେ।

ଆଜି ବସନ୍ତଙ୍କଠାରୁ ଏହି ଟଙ୍କା ନେଉଥିବା‌ବେଳେ ଏସ୍‌ଆଇ ଫକିରମୋହନଙ୍କୁ ଭିଜିଲାନ୍ସ ଡିଏସ୍‌ପି ସୁଶୀଲ କୁମାର ଏକ୍କା ଓ ତାଙ୍କ ଟିମ୍ ମାଡ଼ିବସିଥିଲେ। ତାଙ୍କୁ ଗିରଫ କରି ଯାଜପୁର ଭିଜିଲାନ୍ସ କାର୍ଯ୍ୟାଳୟକୁ ନେଇ ଅଧିକ ପଚରାଉଚରା କରାଯାଉଛି। ଏଥିସହ ଭିଜିଲାନ୍ସ ଟିମ୍‌ ଆଜି ଏସ୍‌ଆଇ ଫକୀରମୋହନ ସିଂହଙ୍କ ବିଂଝାରପୁର ଏବଂ କଟକ କନ୍ଦରପୁରସ୍ଥିତ ଘରେ ଚଢ଼ଉ କରିଥିବା ଜଣାପଡିଛି।