ବିଜେଡି ସରକାରଙ୍କ ସୁଖୁଆ ବୋଝ ମୁଣ୍ଡେଇଛୁ, ଯେତେ କିଆଫୁଲ ମାରିଲେ ବି ଗନ୍ଧ ଛାଡୁନି: ମନ୍ତ୍ରୀ

ଭୁବନେଶ୍ୱର: ହୋଲି ପାଳନ ସମୟରେ ଓଡ଼ିଶାର ବିଭିନ୍ନ ସ୍ଥାନରେ ଛଅ ଜଣଙ୍କୁ ହତ୍ୟା କରାଯିବାର ଗୋଟିଏ ଦିନ ପରେ, ବିରୋଧୀ ବିଜୁ ଜନତା ଦଳ (ବିଜେଡି) ରବିବାର ରାଜ୍ୟର ଆଇନ ଶୃଙ୍ଖଳା ପରିସ୍ଥିତିକୁ ନେଇ ଭାରତୀୟ ଜନତା ପାର୍ଟି (ବିଜେପି) ସରକାରଙ୍କୁ ଟାର୍ଗେଟ କରିଛି।

ରାଜ୍ୟ ସରକାରଙ୍କୁ କଡ଼ା ସମାଲୋଚନା କରି ବରିଷ୍ଠ ବିଜେଡି ନେତା ତଥା ବିଧାୟକ ଅରୁଣ କୁମାର ସାହୁ ଅଭିଯୋଗ କରିଛନ୍ତି ଯେ, ରଙ୍ଗ ପର୍ବରେ ଜନସାଧାରଣଙ୍କ ସୁରକ୍ଷା ସୁନିଶ୍ଚିତ କରିବାକୁ ପ୍ରତିଶ୍ରୁତି ଦେଇଥିଲେ ମଧ୍ୟ ବିଜେପି ଶାସକ ଆଇନ ଶୃଙ୍ଖଳା ବଜାୟ ରଖିବାରେ ବିଫଳ ହୋଇଛନ୍ତି।

ରାଜ୍ୟରେ ଆଇନ ଶୃଙ୍ଖଳା ରକ୍ଷା କରିବାରେ ସରକାରଙ୍କ ଦକ୍ଷତା ଉପରେ ପ୍ରଶ୍ନ ଉଠାଇ ପୂର୍ବତନ ମନ୍ତ୍ରୀ କହିଛନ୍ତି ଯେ, 'ମହା ନଗର' ରେ 'ମହା ହତ୍ୟା'  ଘଟିଛି।

ହୋଲି ପୂର୍ବରୁ ସରକାରଙ୍କ ପକ୍ଷରୁ ଘୋଷଣା କରାଯାଇଥିଲା ଯେ ସାରା ରାଜ୍ୟରେ ଏହି ପର୍ବ ଶାନ୍ତିପୂର୍ଣ୍ଣ ଭାବରେ ପାଳନ କରାଯିବ। ଘୋଷଣା ପରେ ମଧ୍ୟ ଏଭଳି ହତ୍ୟାକାଣ୍ଡ ଘଟିଛି। 

ଅପରାଧୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ପାଇଁ ସରକାର ଅନେକ ଚେତାବନୀ ଦେବା ପରେ ମଧ୍ୟ କାହିଁକି ସ୍ପଷ୍ଟ ଦିବାଲୋକରେ ଏତେ ସଂଖ୍ୟକ ହତ୍ୟାକାଣ୍ଡ ଘଟିଲା ବୋଲି ଅରୁଣ ସାହୁ ପ୍ରଶ୍ନ କରିଛନ୍ତି।

ସେ ଅଭିଯୋଗ କରିଛନ୍ତି, ରାଜ୍ୟରେ ଏକ 'ଦୁର୍ବଳ' ସରକାର ଅଛି ବୋଲି ଜାଣିବା ପରେ ଅପରାଧୀମାନେ ଅଧିକ ଅପରାଧ କରିବା ପାଇଁ ଶକ୍ତି ପାଉଛନ୍ତି।

ବିଜେଡି ନେତାଙ୍କ ଅଭିଯୋଗ ନେଇ କଡ଼ା ପ୍ରତିକ୍ରିୟା ପ୍ରକାଶ କରି ନଗର ଉନ୍ନୟନ ମନ୍ତ୍ରୀ କୃଷ୍ଣ ଚନ୍ଦ୍ର ମହାପାତ୍ର କହିଛନ୍ତି ଯେ, ପୂର୍ବ ସରକାର ସମୟରେ ଦେଖାଦେଇଥିବା ସମସ୍ୟାଗୁଡ଼ିକ ବର୍ତ୍ତମାନ ମଧ୍ୟ ଏକ ବଡ଼ ବୋଝ ହୋଇ ରହିଛି। ଅପରାଧୀଙ୍କୁ ଦଣ୍ଡ ମିଳିନି।

ସେ ପୁଲିସ ବାହିନୀରେ ଥିବା ମାନବସମ୍ବଳର ଅଭାବ ସଙ୍କଟକୁ ଉଲ୍ଲେଖ କରି ଉତ୍ତରଦାୟିତ୍ୱ ଉପରେ ପ୍ରଶ୍ନ ଉଠାଇ କହିଛନ୍ତି, ଆମେ ବିଜେଡି ସରକାରଙ୍କ ଅପାରଗତାର ପରିଣାମ ସହିତ ମୁକାବିଲା କରୁଛୁ।

ଅଧିକ ପଢ଼ନ୍ତୁ: ତାତିରେ ସିଝିଲା ଓଡ଼ିଶା: ବୌଦ୍ଧରେ ସର୍ବାଧିକ ୪୩.୬

ବିଜେଡି ସରକାରଙ୍କର ସୁଖୁଆ ବୋଝ ଆମେ ମୁଣ୍ଡେଇଛୁ। ଯେତେ କିଆଫୁଲ ମାରିଲେ ବି ଗନ୍ଧ ଛାଡୁନି ବୋଲି ନଗର ଉନ୍ନୟନ ମନ୍ତ୍ରୀ କଟାକ୍ଷ କରି ସାମ୍ବାଦିକମାନଙ୍କୁ କହିଛନ୍ତି।

ସେ କହିଛନ୍ତି ଯେ, ପୁଲିସ ବାହିନୀରେ ଖାଲି ପଦବୀ ପୂରଣ ପାଇଁ ନିଯୁକ୍ତି ପ୍ରକ୍ରିୟା ଆରମ୍ଭ ହୋଇଛି। ଏହା ପରେ ଆଇନ ଶୃଙ୍ଖଳା ସ୍ଥିତି ଖୁବ୍ ଶୀଘ୍ର ସୁଦୃଢ଼ ​​ହେବାର ଆଶା ରହିଛି।

ଅଧିକ ପଢ଼ନ୍ତୁ: ୬୪ ଜଣ ମାଓବାଦୀଙ୍କ ଆତ୍ମସମର୍ପଣ