ସଙ୍ଗରୋଧରୁ ଫେରିବା ପରେ ଘରେ ପୂରାଇ ଦେଲେନି ଭାଇ ଭାଉଜ, ଥାନାରେ ମାମଲା ପରେ ବନ୍ଧା ହେଲେ

ବୁଗୁଡ଼ା : କରୋନା ମହାମାରୀ ବିଗାଡ଼ି ଦେଇଛି ସାମାଜିକ ସନ୍ତୁଳନ। ଏଥିପାଇଁ ରାଜ୍ୟ ବାହାରୁ ଫେରିଥିବା ପ୍ରବାସୀ ଓଡ଼ିଆଙ୍କୁ ନିଜ ଭାଇଠୁ ଆରମ୍ଭ କରି ପରିବାର ଓ ବନ୍ଧୁବାନ୍ଧବ ସମସ୍ତେ ସନ୍ଦେହ ଓ ଘୃଣା ଚକ୍ଷୁରେ ଦେଖିବାକୁ ପଛାଉ ନାହାନ୍ତି। ଗଞ୍ଜାମ ଜିଲ୍ଲା ବୁଗୁଡ଼ା ଥାନା ମୋଟାବାଡ଼ି ଗ୍ରାମରୁ ଏଭଳି ଏକ ଘଟଣା ସାମ୍ନାକୁ ଆସିଛି। ଆନୁଷ୍ଠାନିକ ସଙ୍ଗରୋଧ ଅବଧି ଶେଷ କରି ଘରକୁ ଫେରିଥିବା ଜଣେ ପ୍ରବାସୀ ଓଡ଼ିଆଙ୍କୁ ତାଙ୍କ ନିଜ ବଡ଼ ଭାଇ ଓ ଭାଉଜ ମାଡ଼ ମାରି ଘରେ ପୂରାଇ ନଦେବା ଚର୍ଚ୍ଚାର ବିଷୟ ପାଲଟିଛି।

ମୋଟାବାଡ଼ି ଗ୍ରାମର ପ୍ରଦୀପ ସେଠୀ, ପତ୍ନୀ ମଞ୍ଜୁଳା ଓ ଝିଅ ବର୍ଷା ସୁରତରୁ ଫେରିଥିଲେ। ପ୍ରଦୀପ କୁଶପଲ୍ଲୀ ଓ ମଞ୍ଜୁଳା ଏବଂ ବର୍ଷା ଗୋଲିଆ ସଙ୍ଗରୋଧ କେନ୍ଦ୍ରରେ ଥିଲେ। ୧୪ ଦିନ ଅବଧି ଶେଷ ହେବାରୁ ପ୍ରଦୀପ ସପରିବାର ମୋଟାବାଟି ଗ୍ରାମ ନିଜ ଘରକୁ ଫେରିଥିଲେ। ମାତ୍ର ସେମାନେ ଘରକୁ ଫେରୁଥିବା ଜାଣି ବଡ଼ଭାଇ ରଙ୍କ ସେଠୀ ଓ ଭାଉଜ କୁନି ସେମାନଙ୍କୁ ଅଟକାଇ ଗାଳିଗୁଲଜ କରିବା ସହ ମାଡ଼ ମାରିଥିଲେ। ଆଉ ଘରେ ପୂରାଇ ଦେଇ ନଥିଲେ। ପ୍ରଦୀପଙ୍କ ଅଭିଯୋଗ ପରେ ବୁଗୁଡ଼ା ପୁଲିସ କେସ୍ ନମ୍ବର ୧୩୪ରେ ମାମଲା ରୁଜୁ କରି ପ୍ରଦୀପଙ୍କ ଭାଇଭାଉଜଙ୍କୁ ଗିରଫ କରିଛି।