ଶିକ୍ଷିତ ଜିଲ୍ଲାରେ କୁମାରୀ ମାତୃତ୍ବ ଚିନ୍ତା: ୫ ବର୍ଷରେ ବଢ଼ିଲାଣି ୮୦ ପ୍ରତିଶତ

ଶୁଭକାନ୍ତ ପଢ଼ିହାରୀ

ଜଗତସିଂହପୁର: ଶିକ୍ଷିତ ଜିଲ୍ଲା ଜଗତସିଂହପୁରରେ କୁମାରୀ ମାତୃତ୍ବ ସଂଖ୍ୟା ଲଗାତାର ଭାବେ ବୃଦ୍ଧି ପାଇବା ଉଦ୍‌ବେଗର କାରଣ ହୋଇଛି। ୧୮ବର୍ଷ ପୂର୍ବରୁ ଗର୍ଭଧାରଣ କରୁଥିବା ବାଳିକାଙ୍କ ସଂଖ୍ୟା କ୍ରମାଗତ ଭାବେ ବଢ଼ି ଚାଲିଛି। ସରକାରୀ ତଥ୍ୟ ଅନୁଯାୟୀ ଗତ ୫ ବର୍ଷ ଭିତରେ ପାଖାପାଖି ୮୦ ପ୍ରତିଶତ ବଢ଼ିଛି କୁମାରୀ ମାତୃତ୍ବ ସଂଖ୍ୟା। ସରକାରୀ ତଥ୍ୟ ଏତିକି ହୋଇଥିବା ବେଳେ ବେସରକାରୀ ତଥ୍ୟ ଏହାଠୁ ଯଥେଷ୍ଟ ଅଧିକ ବୋଲି କୁହାଯାଉଛି।

୨୦୧୯-୨୦ରେ ୩୪ଟି କୁମାରୀ ମାତୃତ୍ବ ଘଟଣା ସାମ୍ନାକୁ ଆସିଥିବା ବେଳେ ୨୦୨୦-୨୧ରେ ଏହି ସଂଖ୍ୟା ଥିଲା ୧୫୩। ସେହିଭଳି ୨୦୨୧-୨୨ରେ ୧୯୨, ୨୦୨୨-୨୩ରେ ୧୯୭ ଓ ୨୦୨୩-୨୪ରେ ୨୯୫ କୁମାରୀ ମାତୃତ୍ବ ଘଟଣା ରେକର୍ଡ ହୋଇଥିବା ସରକାରୀ ତଥ୍ୟ ରହିଛି। ୨୦୨୪-୨୫ରେ ଏହି ସଂଖ୍ୟା ଯଥେଷ୍ଟ ବଢ଼ିବା ଆକଳନ କରାଯାଉଛି। ଯେତେବେଳେ ମମତା ଯୋଜନାରେ ସାମିଲ ହେବା ପାଇଁ ଗର୍ଭବତୀମାନେ ଆସିଲେ ସେତେବେଳେ ପରିଚୟପତ୍ରରେ ଉଲ୍ଲେଖ ଥିବା ବୟସରୁ ଏ କଥା ସାମ୍ନାକୁ ଆସିଥିଲା। ଏହି ଯୁବତୀମାନଙ୍କ ବିବାହ ବୟସ ୧୮ ବର୍ଷରୁ କମ୍ ରହିଥିଲା। ତେଣୁ ନିୟମ ଅନୁସାରେ ମମତା ଯୋଜନାରେ ସେମାନଙ୍କୁ ସାମିଲ କରା ନ ଯିବା ସହ କୁମାରୀ ମାତୃତ୍ବ ଭାବେ ବିବେଚନା କରାଯାଇଥିଲା। ଏହି ଗର୍ଭବତୀମାନେ ସରକାରୀ ହସ୍ପିଟାଲକୁ ଆସିବା ପରେ ଏ କଥା ସାମ୍ନାକୁ ଆସିଥିଲା। କିନ୍ତୁ ଘରୋଇ ହସ୍ପିଟାଲ୍‌ ଓ କ୍ଲିନିକ୍‌ରେ ଏମାନଙ୍କ ସଂଖ୍ୟା ଯଥେଷ୍ଟ ଅଧିକ ହେବ ବୋଲି କୁହାଯାଉଛି। ଘରୋଇ ହସ୍ପିଟାଲ୍‌ କିମ୍ବା କ୍ଲିନିକ୍ ତଥ୍ୟ ମଧ୍ୟ ଯାଞ୍ଚ କରାଯାଉ ନାହିଁ।

ଯାହାଫଳରେ ପ୍ରକୃତ ତଥ୍ୟ ଜଣାପଡ଼ୁ ନାହିଁ। କୁମାରୀ ମାତୃତ୍ବ ପଛରେ ପ୍ରେମ, ପ୍ରତାରଣା, ପଳାୟନ ଓ ବାଲ୍ୟ ବିବାହ ଭଳି ଘଟଣାକୁ ଦାୟୀ କରାଯାଉଛି। ୨୦୨୨ରେ ପ୍ରଶାସନ ପକ୍ଷରୁ ୧୨ଟି ଓ ୨୦୨୩ରେ ୧୬ଟି ବାଲ୍ୟ ବିବାହକୁ ରୋକା ଯାଇଥିଲା। ପ୍ରେମ ପଳାୟନ, ବାଲ୍ୟ ବିବାହକୁ ରୋକିବା ଓ ସଚେତନତା ସୃଷ୍ଟି କରିବା ପାଇଁ ପ୍ରଶାସନ ପକ୍ଷରୁ ଇତିମଧ୍ୟରେ ପଦକ୍ଷେପ ନିଆଯାଇଛି। ହାଇସ୍କୁଲ, କଲେଜରେ ଏ ନେଇ ଛାତ୍ରଛାତ୍ରୀଙ୍କୁ ସଚେତନ କରାଯାଉଛି। ମନ୍ଦିର, ଧର୍ମାନୁଷ୍ଠାନରେ ମଧ୍ୟ ସଚେତନତା ବାର୍ତ୍ତା ପୋଷ୍ଟର ମାଧ୍ୟମରେ ଲଗାଯାଇଛି। କିନ୍ତୁ ସ୍ଥିତି ଯାହା ଏ ଦିଗରେ ଅଧିକ ସକ୍ରିୟ ତଥା ତ୍ବରାନ୍ବିତ ପଦକ୍ଷେପ ନିଆ ନଗଲେ, ଜଗତସିଂହପୁର ହୁଏତ ଆଗାମୀ ଦିନରେ ଏକ ଅଲୋଡ଼ା ରେକର୍ଡର ଅଧିକାରୀ ହେବ।