‘ଭାରତୀୟ ସମ୍ବିଧାନ ରଚନା ଡ. ଆମ୍ବେଦକରଙ୍କ ଏକ ମହାନ ଅବଦାନ’

କୋରାପୁଟ: ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ଆନୁକୁଲ୍ଯରେ ଶୁକ୍ରବାର ଭାରତର ସାମାଜିକ ପରିଦୃଶ୍ୟକୁ ନୂଆ ରୂପ ଦେଇଥିବା ଦୂରଦର୍ଶୀ ଜନନାୟକ ଭାରତ ରତ୍ନ ଡ. ଭୀମରାଓ ଆମ୍ବେଦକରଙ୍କ ଶ୍ରାଦ୍ଧବାର୍ଷିକୀ ଅବସରରେ ମହାପରିନିର୍ବାଣ ଦିବସ ପାଳିତ ହୋଇଯାଇଛି। ବିଶ୍ବବିଦ୍ୟାଳୟର ଭରପ୍ରାପ୍ତ କୁଳପତି ତଥା ଭରପ୍ରାପ୍ତ କୁଳସଚିବ ପ୍ରଫେସର ନୃସିଂହ ଚରଣ ପଣ୍ଡା ଜୈବ ବିବିଧତା ଓ ପ୍ରାକୃତିକ ସମ୍ପଦ ସଂରକ୍ଷଣ ବିଦ୍ୟାଳୟର ଡିନ୍ ପ୍ରଫେସର ଶରତ କୁମାର ପଳିତା ଏବଂ ସମାଜବିଜ୍ଞାନ ବିଭାଗର ମୁଖ୍ୟ ଡ. କପିଳ ଖେମୁଣ୍ଡୁ, ଅଧ୍ୟାପକ, କର୍ମଚାରୀ ଏବଂ ଛାତ୍ରଛାତ୍ରୀମାନେ ଡ. ଆମ୍ବେଦକରଙ୍କୁ ପୁଷ୍ପମାଲ୍ୟ ଅର୍ପଣ କରି ତାଙ୍କ ସ୍ଥାୟୀ ପରମ୍ପରାକୁ ସମ୍ମାନ ଜଣାଇ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ହିନ୍ଦୀ ବିଭାଗର ସହକାରୀ ପ୍ରଫେସର ଡ. ସୁନୀତ ପାସୱାନ ସ୍ୱାଗତ ଭାଷଣ ଦେଇ ମହାପରିନିର୍ବାଣ ଦିବସର ମହତ୍ତ୍ୱ ଏବଂ ଡ. ଆମ୍ବେଦକରଙ୍କ ଅବଦାନ ଉପରେ ଆଲୋକପାତ କରିଥିଲେ।

ଏହି ଖବର ପଢ଼ନ୍ତୁ: ଅଙ୍ଗନବାଡି କର୍ମୀଙ୍କୁ ହତ୍ୟା କଲେ ନକ୍ସଲ

ପ୍ରଫେସର ପଣ୍ଡା ତାଙ୍କ ଅଭିଭାଷଣରେ ସ୍ୱାଧୀନତା ପରବର୍ତ୍ତୀ ଭାରତ ପାଇଁ ଡ. ଆମ୍ବେଦକରଙ୍କ ଅତୁଳନୀୟ ଅବଦାନକୁ ବର୍ଣନା କରିଥିଲେ। ସାମାଜିକ, ଅର୍ଥନୈତିକ ଏବଂ ରାଜନୈତିକ କ୍ଷେତ୍ର ସମେତ ସମାଜର ସମସ୍ତ ଦିଗକୁ ଅତିକ୍ରମ କରି ସମତା, ନ୍ୟାୟ ଏବଂ ସ୍ୱାଧୀନତା ବିଷୟରେ ଡ. ଆମ୍ବେଦକରଙ୍କ ଦୃଷ୍ଟିକୋଣ ଉପରେ ସେ ଗୁରୁତ୍ୱାରୋପ କରିଥିଲେ। ଡ. ଆମ୍ବେଦକରଙ୍କ ଭାରତୀୟ ସମ୍ବିଧାନ ରଚନା ଏକ ମହାନ ଅବଦାନ ବୋଲି ପ୍ରଫେସର ପଣ୍ଡା ଉଲ୍ଲେଖ କରି ଏହାକୁ ବିଶ୍ୱର ସର୍ବବୃହତ ଲିଖିତ ସମ୍ବିଧାନ ବୋଲି କହିଥିଲେ। ଭାରତର ସମୃଦ୍ଧି ପାଇଁ ତାଙ୍କର ଦୃଷ୍ଟିକୋଣକୁ ବୁଝିବା ପାଇଁ ତାଙ୍କ ଦ୍ଵାରା ଲିଖିତ ସମସ୍ତ ପୁସ୍ତକକୁ ଅଧ୍ୟୟନ କରିବାକୁ ସେ ଛାତ୍ରଛାତ୍ରୀମାନଙ୍କୁ ପରାମର୍ଶ  ଦେଇଥିଲେ।

ଏହି ଖବର ପଢ଼ନ୍ତୁ: ଗୃହରେ ସିଏଜି ରିପୋର୍ଟ ଉପସ୍ଥାପିତ

ପ୍ରଫେସର ପଲିତା ଡ. ଆମ୍ବେଦକରଙ୍କ ଉଲ୍ଲେଖନୀୟ ଜୀବନ ଏବଂ ତାଙ୍କ ଅବଦାନ, ବିଶେଷ କରି ଭାରତୀୟ ସମ୍ବିଧାନ ପ୍ରଣୟନ ଉପରେ ଆଲୋକପାତ କରିଥିଲେ। ସେ ଆମ୍ବେଦକରଙ୍କ ସାମାଜିକ ଦର୍ଶନ ବିଷୟରେ ବିସ୍ତୃତ ଭାବରେ ବର୍ଣ୍ଣନା କରିଥିଲେ ଏବଂ ସମାନତା ଏବଂ ସାମାଜିକ ନ୍ୟାୟ ପ୍ରତି ତାଙ୍କର ପ୍ରତିବଦ୍ଧତା ଉପରେ ଗୁରୁତ୍ୱାରୋପ କରିଥିଲେ। ପ୍ରଫେସର ଭରତ କୁମାର ପଣ୍ଡା ଭଗବତ ଗୀତାର ଏକ ଶ୍ଳୋକକୁ ଉଦାହରଣ ଦେଇ ଡ. ଆମ୍ବେଦକରଙ୍କୁ ଜଣେ ଦିବ୍ୟ ବ୍ୟକ୍ତିତ୍ୱ (ଭଗବାନଙ୍କ ଅବତାର) ଭାବରେ ବର୍ଣ୍ଣନା କରିଥିଲେ, ଯାହାର ଲକ୍ଷ୍ୟ ଥିଲା ଅଜ୍ଞତା ଦୂର କରିବା ଏବଂ ରାଷ୍ଟ୍ରର ବିକାଶ ପାଇଁ ସାତ୍ୟର ପ୍ରତିଷ୍ଠା କରିବା।

ଡକ୍ଟର ଖେମୁଣ୍ଡୁ ଡକ୍ଟର ଆମ୍ବେଦକରଙ୍କ ସାମାଜିକ ଏବଂ ଗଣତାନ୍ତ୍ରିକ ମୂଲ୍ୟବୋଧ ର ଦୃଷ୍ଟିକୋଣ ଉପରେ ଆଲୋଚନା କରିଥିଲେ ଏବଂ ନ୍ୟାୟ, ସମାନତା ଏବଂ ଭାଇଚାରାନୀତିରେ ତାଙ୍କର ବିଶ୍ୱାସ ଉପରେ ଗୁରୁତ୍ୱାରୋପ କରିଥିଲେ। ସେ ଆମ୍ବେଦକରଙ୍କୁ ଜଣେ ଦୂରଦର୍ଶୀ ନେତା ଭାବରେ ବର୍ଣନା କରି ତାଙ୍କୁ କେବଳ ଜଣେ ମହାନ ସାମାଜିକ ଚିନ୍ତକ ନୁହଁନ୍ତି, ବରଂ ଜଣେ ଆଇନଜୀବୀ, ଅର୍ଥନୀତିଜ୍ଞ, ଶିକ୍ଷାବିତ୍ ଏବଂ ରାଜନୈତିକ ନେତା ମଧ୍ୟ ଥିଲେ ବୋଲି କହିଥିଲେ।

ଏହି ଖବର ପଢ଼ନ୍ତୁ: ପିଜା ହବ୍‌ରେ ହେଉଥିଲା ପ୍ରେମୀଙ୍କ ଗୁପ୍ତ ଭିଡିଓ

ଡ. ଆମ୍ବେଦକର ସେଣ୍ଟର ଅଫ୍ ଏକ୍ସଲେନ୍ସର ସଂଯୋଜକ ଡ. ବିକେ ଶ୍ରୀନିବାସ ଧନ୍ୟବାଦ ଅର୍ପଣ କରିଥିଲେ। ଏନ୍ ଏସ୍ ଏସ୍ ସଂଯୋଜକ ଡ. ଅଞ୍ଜନେୟୁଲୁ ଥୋଟାପଲ୍ଲୀ ଓ ଲୋକସମ୍ପର୍କ ଅଧିକାରୀ ଡ. ଫଗୁନାଥ ଭୋଇ କାର୍ଯ୍ୟକ୍ରମ ସଂଯୋଜନା କରିଥିଲେ। ଅଧ୍ୟାପକ ଓ ଛାତ୍ର-ଛାତ୍ରୀଙ୍କ ସମେତ ଡ. ପଦ୍ମଚରଣ ମିଶ୍ର, ଡ. ନିଖିଲ ଗୌଡ, ଡ. ଚକ୍ରଧର ପଧାନ, ଡ. ଗୁରୁଜିତ୍ ସିଂହ ୱାଲିଆ, ଡ. ଦେବବ୍ରତ ପଣ୍ଡା, ଡ. କାକୋଲି ବାନାର୍ଜୀ, ଡ. ଶୁଭସ୍ମିତା ପରିଡ଼ା, ଡ. ଆଲୋକ ବରାଳ, ଡ. ପ୍ରଦୋଷ କୁମାର ସ୍ବାଇଁ, ଡ. ରଘୁନାଥ ଓଝା, ଡ. ନେଶା ଶବର, ଡ. ନବିନ ଚନ୍ଦ୍ର ପ୍ରଧାନ, ଡ. ମନୋଜ କୁମାର ସିଂହ ପ୍ରମୁଖ ଉପସ୍ଥିତ ରହି ଆମ୍ବେଦକରଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ବିଶ୍ୱବିଦ୍ୟାଳୟରେ ମହାପରିନିର୍ବାଣ ଦିବସ ପାଳନ ଡ. ଆମ୍ବେଦକରଙ୍କ ଭାରତୀୟ ସମାଜ ଉପରେ ସ୍ଥାୟୀ ଅବଦାନ ଏବଂ ଆଜିର ବିଶ୍ୱରେ ତାଙ୍କ ମୂଲ୍ୟବୋଧର ଜାରି ରହିଥିବା ପ୍ରାସଙ୍ଗିକତାକୁ ସମ୍ମାନ ଜଣାଇଥିଲା