କେନ୍ଦ୍ର କୋଇଲା ମନ୍ତ୍ରୀଙ୍କୁ ଭେଟିଲେ ସାଂସଦ

ତାଳଚେର : ଢେଙ୍କନାଳ ସାଂସଦ ମହେଶ ସାହୁ ଗତ ୨୫ ତାରିଖରେ ଲୋକସଭାର ଶୂନ୍ୟକାଳରେ ଭରତପୁର କୋଇଲା ଖଣିରେ ଦୁର୍ଘଟଣା ପ୍ରସଙ୍ଗ ଉଠାଇଥିଲେ। ତୁରନ୍ତ ମାଟି ଗଦା ତଳେ ଫସିଥିବା ଶ୍ରମିକଙ୍କୁ ବାହାର କରିବା ଓ ଖଣିରେ କାର୍ଯ୍ୟରତ ଶ୍ରମିକଙ୍କୁ ଉଚିତ ସୁରକ୍ଷା ଦାବି କରି ସାଂସଦ ଶ୍ରୀ ସାହୁ ଗୃହର ଦୃଷ୍ଟି ଆକର୍ଷଣ କରିଥିଲେ। ଏହା ବ୍ୟତୀତ ସାଂସଦ ଶ୍ରୀ ସାହୁ ଗତକାଲି କେନ୍ଦ୍ର କୋଇଲା ମନ୍ତ୍ରୀ ପ୍ରହ୍ଲାଦ ଯୋଶୀଙ୍କୁ ତାଙ୍କ କାର୍ଯ୍ୟାଳୟରେ ସାକ୍ଷାତ କରି ଏ ସଂକ୍ରାନ୍ତରେ ଏକ ଦାବିପତ୍ର ପ୍ରଦାନ କରିଥିଲେ। ଆଜି ଅପରାହ୍ଣରେ ସାଂସଦ ଶ୍ରୀ ସାହୁ ଭରତପୁର କୋଇଲା ଖଣି ଦୁର୍ଘଟଣାସ୍ଥଳ ପରିଦର୍ଶନ କରିଥିଲେ। ସେଠାରେ ଉଦ୍ଧାର କାର୍ଯ୍ୟ ସଂପର୍କରେ ଉଦ୍ଧାରକାରୀ ଦଳ, ଖଣି ଅଧିକାରୀ ଓ ସୁରକ୍ଷା ଅଧିକାରୀଙ୍କ ସହ ଆଲୋଚନା କରିଥିଲେ। ପରେ ସାଂସଦ ଶ୍ରୀ ସାହୁ ମୃତ ଶ୍ରମିକଙ୍କ ପରିବାର ସଦସ୍ୟଙ୍କୁ ଭେଟି ସମବେଦନା ଜଣାଇଥିଲେ। ତାଙ୍କ ଗସ୍ତ ବେଳେ ବିଧାୟକ ବ୍ରଜକଶୋର ପ୍ରଧାନ ଉପସ୍ଥିତ ଥିଲେ।