ଗଜରାଜଙ୍କ ଉତ୍ପାତ: ଦଳି‌ ପକାଉଛନ୍ତି କୁଡ଼ିଆ ଘର, ଖାଇ ଯାଉଛନ୍ତି ଫସଲ

ଭଞ୍ଜନଗର: ଗଂଜାମ ଜିଲ୍ଲା ଭଞ୍ଜନଗର ବ୍ଳକ ବ୍ରାହ୍ମଣପଦର ପଞ୍ଚାୟତର ନୂଆପଲ୍ଲୀ ଗ୍ରାମରେ ହାତୀପଲ ଉପଦ୍ରବ ଖେଳାଇଛନ୍ତି। ଗତକିଛି ଦିନ ହେଲା ସନ୍ଧ୍ୟା ହେବା କ୍ଷଣି ନିକଟସ୍ଥ ଜଙ୍ଗଲରୁ ବାହାରି ଜନବସତି ମୁହାଁ ହେଉଛନ୍ତି। ବର୍ତ୍ତମାନ ଧାନ ଫସଲ ଅମଳ ବେଳ ହୋଇଥିବାରୁ ଲୋକ ମାନେ ମଧ୍ୟ ସେମାନଙ୍କ ଫସଲକୁ ସୁରକ୍ଷା ଦେବାକୁ ହାତୀଙ୍କୁ ଘଉଡାଇବା ପାଇଁ କସରତ କରୁଛନ୍ତି। ଏଭଳି ସ୍ଥିତିରେ ଶନିବାର ବିଳମ୍ବିତ ରାତିରେ ୨୬ ଟିକିଆ ହାତୀପଲ ଗାଲେରି ବନାଞ୍ଚଳ ଅଧିନ ବଦାଙ୍ଗି ସେକ୍ସନର ରାଣିକିଆରୀ ଇଲାକାରେ ବ୍ୟାପକ କ୍ଷୟକ୍ଷତି କରିଛନ୍ତି।

ଏହି ଖବର ପଢ଼ନ୍ତୁ: ଥାଇଲ୍ୟାଣ୍ଡ ଆସିଥିବା 'ଥାଇ ପିଙ୍କ' ପ୍ରଜାତିର ପିଜୁଳି ଚାଷ

ନୂଆଁପଲ୍ଲୀ ଗ୍ରାମ ଭିତରେ ପଶି ହାତୀପଲ ୬ଟି ଘର ଭାଙ୍ଗିଥିବା ବେଳେ ଘର ମଧ୍ୟରେ ଥିବା ଅମଳ ହୋଇଥିବା ଧାନ ଓ ଚାଉଳ ବସ୍ତା ଟାଣି ଖାଇଥିବା ସହ ଘରର ଆସବାବପତ୍ର ନଷ୍ଟ ମଧ୍ୟ କରିଥିବା ଅଭିଯୋଗ ହୋଇଛି। ଖବର ପାଇ ବନବିଭାଗ ଅଧିକାରୀ ଘଟଣାସ୍ଥଳରେ ପହଞ୍ଚି ତଦନ୍ତ କରି ଫେରିଛନ୍ତି। ବିଳମ୍ବିତ ରାତିରେ ଉକ୍ତ ହାତୀପଲ ଗ୍ରାମର ଭାସି ମଳିକ, ସତ୍ୟ ମଳିକ, ଦିଲ୍ଲୀପ ମଳିକ, ପ୍ରଦୀପ ମଳିକ, ପଞ୍ଚାନନ ମଳିକ ଓ ସୁଶାନ୍ତି ମଳିକଙ୍କ ଘର ଭାଙ୍ଗି ବ୍ୟାପକ କ୍ଷୟକ୍ଷତି ଘଟାଇଛନ୍ତି। ସୌଭାଗ୍ୟ ବଶତଃ ଏଥିରେ କୌଣସି ଲୋକର କୌଣସି କ୍ଷତି ଘଟିନାହି। ହାତୀଙ୍କ ପାଟି ଶୁଣି ସୁରକ୍ଷିତ ସ୍ଥାନକୁ ସମସ୍ତେ ଦୌଡି ପଳାଥିଲେ। ଟର୍ଚ୍ଚ ଲାଇଟ ପକାଇବା ସହ ବଡ ପାଟି କରି ହାତୀଙ୍କୁ ଘଉଡାଇଥିଲେ। ଗୋଟାଏ,ଦୁଇଟି ଲେଖାଏଁ ବଖରା ଚାଳ ଘର ଭାଙ୍ଗିଯାଇଛି। ଏହାସହ ପ୍ରଦିପଙ୍କ ଖଳାରେ ଜମା ଥିବା ଧାନକୁ ମଧ୍ୟ ଟାଣି ଖାଇଛନ୍ତି। ଗ୍ରାମ ନିକଟରେ ଥିବା ବରାଳ ଦେବୀ ମନ୍ଦିର ପାଚେରୀର କିଛି ଅଂଶ ଭାଙ୍ଗିବା ସହ ମନ୍ଦିର ସାମ୍ନାରେ ଥିବା ଏକ ସିଂହ ମୂର୍ତ୍ତିକୁ ମଧ୍ୟ ଠେଲି ତଳେ ପକାଇ ଦେଇଥିବା ଦେଖିବାକୁ ମିଳିଛି।

ଏହି ଖବର ପଢ଼ନ୍ତୁ: ଦେଶର ସୁରକ୍ଷା ପାଇଁ ଭୁବନେଶ୍ବରରେ ଆଲୋଚନା

ଭଂଜନଗର ବ୍ଲକର ବିଭିନ୍ନ କ୍ଷେତରେ ଶନିବାର ରାତିରେ ପଶୁଥିବା ବେଳେ ସ୍ଥାନୀୟ ଲୋକ ଓ ବନ ବିଭାଗର କର୍ମଚାରୀମାନେ ମଧ୍ୟ ହାତୀଙ୍କୁ ଘଉଡାଇଥିଲେ। ରାତି ପ୍ରାୟ ୨ଟା ପରେ ହାତୀପଲ ଗ୍ରାମରେ ପଶି ଏଭଳି ଘଟଣା ଭିଆଥିଲେ। ଖବର ପାଇ ବନବିଭାଗ ଅଧିକାରୀ ଘଟଣାସ୍ଥଳରେ ପହଞ୍ଚି ତଦନ୍ତ କରିଛନ୍ତି। ତଦନ୍ତ ପରେ କ୍ଷତିଗ୍ରସ୍ତ ପରିବାରକୁ ସରକାରୀ ନିୟମ ଅନୁଯାୟୀ ସମସ୍ତଙ୍କୁ ସହାୟତା ପ୍ରଦାନ କରାଯିବ।

-ଆଶାଲତା ଦିଗାଲ, ବନାଞ୍ଚଳ ଅଧିକାରୀ

ଏହି ଖବର ପଢ଼ନ୍ତୁ: ସ୍ବାମୀଙ୍କ ଠାରୁ ସ୍ତ୍ରୀଙ୍କୁ ଛଡ଼ାଇ ନେଲା ଯମ

ଜିଲ୍ଲାର ବିଭିନ୍ନ ସ୍ଥାନରେ ବର୍ତ୍ତମାନ ପାଚିଲା ଧାନ ଅମଳ ଜାରି ରହିଛି। ପାଚିଲା ଧାନ ବାସ୍ନାରେ ହାତୀପଲ ସଞ୍ଜ ହେବା କ୍ଷଣି ନିକଟସ୍ଥ ଜଙ୍ଗଲରୁ ବାହାରି କ୍ଷେତ ମୁହାଁ ହେଉଛନ୍ତି। ଗତ କିଛି ଦିନ ପୂର୍ବରୁ ଉକ୍ତ ହାତୀପଲ ମୁଜାଗଡ ବନାଞ୍ଚଳରେ ସେମାନଙ୍କ ଗତିବିଧି ଜାରି ରଖିଥିଲେ। ରାଜରାସ୍ତା ଅତିକ୍ରମ କରିବା ସହ ବିଭିନ୍ନ ଚାଷ ଜମି ଓ ପରିବା ବାଡିରେ ପଶିଥିଲେ। ଏହାପରେ ସପ୍ତାହେ ହେବ ସେମାନେ ଗାଲେରି ବନାଞ୍ଚଳରେ ଘୂରି ବୁଲୁଛନ୍ତି। ଏହିପଲରେ ଏକ ହାତୀ ଅସୁସ୍ଥ ଥିବା ନେଇ ମଧ୍ୟ ଖବର ପ୍ରଚାରିତ ହୋଇଥିଲା। ତେବେ ଏନେଇ କୌଣସି ଚିତ୍ର ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇପାରିନି। ତଥାପି ବନ ବିଭାଗ କର୍ମଚାରୀ ଏହି ପଲ ଉପରେ ନଜର ରଖିଛନ୍ତି। 

ଏହି ଖବର ପଢ଼ନ୍ତୁ: ଭୁବେନଶ୍ବରଙ୍କ ନାମରେ ମୋହର ମାରିଲା ଚୟନ କମିଟି