ପିଲାଚୋରି ସନ୍ଦେହରେ ଆନନ୍ଦପୁର ଡ଼ାକ୍ତରଖାନାରେ ଉତ୍ତେଜନା

ଆନନ୍ଦପୁର : ଆନନ୍ଦପୁର ଉପଖଣ୍ଡ ଡାକ୍ତରଖାନାରେ ପିଲାଚୋରି ସନ୍ଦେହରେ ଉତ୍ତେଜନା ପ୍ରକାଶ ପାଇଥିଲା। ଶୁକ୍ରବାର ଅପରାହ୍ଣ ୩ଟାବେଳେ ଡାକ୍ତରଖାନାର ମା ଓ ଶିଶୁ ୱାର୍ଡ଼ରେ ରହିଥିବା ଜଣେ ରୋଗୀଙ୍କ ସମ୍ପର୍କୀୟ ଭିନ୍ନକ୍ଷମ ଶିଶୁକନ୍ୟାକୁ ଜଣେ ବ୍ୟକ୍ତି ବଳପୂର୍ବକ ନେବାକୁ ଉଦ୍ୟମ କରୁଥିବାବେଳେ ଚିତ୍କାର ଶୁଣି ସୁରକ୍ଷା କର୍ମଚାରୀ ଓ ଲୋକମାନେ ଦେଖିପାରି ତାକୁ ଅଟକାଇଥିଲେ। ପିଲାଚୋରି ସନ୍ଦେହରେ ତାଙ୍କୁ ଉତ୍ତମମଧ୍ୟମ ଦିଆଯାଇଥିବା ମଧ୍ୟ ଜଣାପଡିଛି। ଖବରପାଇ ଘସିପୁରା ପୁଲିସ୍ ଘଟଣା ସ୍ଥଳରେ ପହଞ୍ଚି ଅଭିଯୁକ୍ତ ବ୍ୟକ୍ତିଙ୍କୁ ଅଟକ ରଖି ତଦନ୍ତ ଜାରିରଖିଛି। ଏ ସମ୍ପର୍କରେ ଥାନା ଅଧିକାରୀ ମନୋରଂଜନ ବିଶିଙ୍କୁ ପଚାରିବାରୁ ସେ କହିଥିଲେ ଯେ ଜଣେ ବ୍ୟକ୍ତିଙ୍କୁ ଅଟକ ରଖାଯାଇଛି। ପଚରାଉଚରା ଜାରି ରହିଛି। ପ୍ରାଥମିକ ତଦନ୍ତରୁ ଯାହା ଜଣାପଡ଼ିଛି ସେମିତି କିଛି ହୋଇ ନଥିବା ସେ ପ୍ରକାଶ କରିଛନ୍ତି।