ଦୁର୍ଗାପୂଜା ଦେଖି ଘରକୁ ଫେରୁଥିଲେ: ଅଜଣା ଗାଡ଼ି ଧକ୍କାରେ ଆରପାରିକୁ ଚାଲିଗଲା ବାପ, ପୁଅ ଗୁରୁତର

ଦେଓଗାଁ/ସଇଁତଲା: ୨୬ନମ୍ବର ଜାତୀୟ ରାଜପଥ ବଲାଙ୍ଗୀର ଜିଲ୍ଲା ସଇଁତଲା ଥାନା ବେଲଗାଁ ଫାଣ୍ଡି ପୀପୃଟ ଗାଁ ନିକଟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏଠାରେ ଅଜଣା ଗାଡ଼ି ଧକ୍କା ଦେବାରୁ କରମତଳା ପଞ୍ଚାୟତ ଝିମାନପାଲି ଗ୍ରାମର ଲକ୍ଷ୍ମଣ ଭୋଇ(୪୫)ଙ୍କ ମୃତ୍ୟୁ ହୋଇଥିବାବେଳେ ପୁଅ ଅନିଲ(୨୦) ଗୁରୁତର ଆହତ ହୋଇଥିବା ଜଣାଯାଇଛି।
ପୁଲିସ ସୂତ୍ରରୁ ପ୍ରକାଶ, ବାପ ପୁଅ ଦୁହେଁ ମୋଟର ସାଇକେଲରେ ଶିଷକେଲା ଗ୍ରାମକୁ ଦୁର୍ଗାପୂଜା ଦେଖିବାକୁ ଯାଇଥିଲେ। ରବିବାର ରାତିରେ ଫେରୁଥିବାବେଳେ ଉଭୟଙ୍କୁ ଏକ ଅଜଣା ଗାଡ଼ି ଧକ୍କା ଦେଇ ପଳାଇଥିଲା। ଏହାଫଳରେ ଲକ୍ଷ୍ମଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ପୁଅ ଅନିଲଙ୍କୁ ଗୁରୁତର ଅବସ୍ଥାରେ ପୁଲିସ ଉଦ୍ଧାର କରି ସଇଁତଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ। ସୋମବାର ସକାଳୁ ବ୍ୟବଚ୍ଛେଦ ପାଇଁ ଲକ୍ଷ୍ମଣଙ୍କ ମୃତଦେହକୁ ପୁଲିସ ଟିଟିଲାଗଡ଼ ପଠାଇଛି।