ଲକ୍ଷାଧିକ ଟଙ୍କାର ସମ୍ପତ୍ତି ଜଳିଗଲା; ଅଳ୍ପକେ ବର୍ତ୍ତିଲେ କର୍ମଚାରୀ

ବଡ଼ବିଲ: କେନ୍ଦୁଝର ଜିଲ୍ଲା ବଡ଼ବିଲ ତହସିଲ ଅନ୍ତର୍ଗତ ଚମ୍ପୁଆ ବସ୍ତିରେ ଥିବା ଆର୍‌ୟା ଆଇରନ ଆଣ୍ଡ ଷ୍ଟିଲ୍‌ କାରଖାନା ପରିସରରେ ନିଆଁ ଲାଗି ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଛି। କାର୍ଯ୍ୟରତ କିଛି କର୍ମଚାରୀ ଅଳ୍ପକେ ବର୍ତ୍ତି ଯାଇଛନ୍ତି।

ଶ୍ରମିକ ଦିବସ ପାଇଁ କାରଖାନାରେ କାମ ବନ୍ଦ ଥିଲା। ହଠାତ୍‌ ପ୍ରଶାସନିକ କୋଠାର ଆକାଉଣ୍ଟସ ବିଭାଗ କକ୍ଷରୁ ଧୂଆଁ ବାହାରୁଥିବା ସେମାନେ ଦେଖିବାକୁ ପାଇଥିଲେ। ଜଣେ ଚତୁର୍ଥ ଶ୍ରେଣୀ କର୍ମଚାରୀ ଏନେଇ ଦାୟିତ୍ୱରେ ଥିବା ସୁରକ୍ଷାକର୍ମୀଙ୍କୁ ଖବର ଦେଇଥିଲେ। ସୁରକ୍ଷା ଅଧିକାରୀ ଓ କର୍ମଚାରୀମାନେ ଘଟଣାସ୍ଥଳରେ ନିଆଁକୁ ଆୟତ୍ତ କରିବାକୁ ଉଦ୍ୟମ କରିଥିଲେ। ଅଗ୍ନି ନିର୍ବାପକ ଯନ୍ତ୍ର ଅଚଳ ହୋଇଯାଇଥିବାରୁ ସେମାନେ ନିଆଁକୁ ଆୟତ୍ତ କରିବାରେ ବିଫଳ ହୋଇଥିଲେ। ପରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ।