ଶିଶୁକୁ ଚେଙ୍କ ଦେବା ଘଟଣା: ଜେଜେମା କୋର୍ଟ ଚାଲାଣ ପରେ ଜେଲ ଗଲେ

ଚନ୍ଦାହାଣ୍ଡି: ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକ ଗମ୍ଭାରୀଗୁଡା ପଂଚାୟତ ଅଧିନସ୍ଥ ଫୁଣ୍ଡେଲପଡା ଗ୍ରାମର ଜଣେ ଦଶ ଦିନର ଶିଶୁ ଅସୁସ୍ଥ ହେବାରୁ ତାକୁ ଚିକିତ୍ସା ପରିବର୍ତ୍ତେ ଅନ୍ଧ ବିଶ୍ୱାସର ବଶବର୍ତ୍ତୀ ହୋଇ ଶିଶୁ ଦେହରେ ୬୦ରୁ ଅଧିକ ଚେଙ୍କ ଦିଆ ଯାଇଥିଲା।

ଏହି ମାମଲାରେ ଗୁରୁବାର ଚନ୍ଦାହାଣ୍ଡି ପୁଲିସ ଶିଶୁର ଜେଜେମାକୁ ଗିରଫ କରି କୋର୍ଟ ଚାଲାଣ କରିଛି। ଏହି ଘଟଣାକୁ ନେଇ ଚନ୍ଦାହାଣ୍ଡି ଥାନାରେ କେସ ନଂ ୩୩/୨୫ ଆଧାରରେ ଶିଶୁର ବାପା ସରୋଜ ନାୟକ, ମା ପୂର୍ଣ୍ଣମୀ ନାୟକ ଏବଂ ଜେଜେମା କୁନ୍ତଳା ମଶ୍ରାଙ୍କ ନାମରେ ଏକ ମାମଲା ରୁଜୁ କରି ନିଜେ ଆଇଆଇସି ପ୍ରଶାନ୍ତ କୁମାର କୋଲ୍ଲାହର୍ଷ ଏହାର ତଦନ୍ତ ଦାୟିତ୍ୱ ନେଇଥିଲେ।

ଗୁରୁବାର ଶିଶୁର ଜେଜେମା କୁନ୍ତଳା ମଶ୍ରାଙ୍କୁ ବିଏନଏସର ଧାରା ୧୧୮(୨)/୩(୫)ଏବଂ  ୨୩ ଜୁଭେନାଇଲ ଜଷ୍ଟିସ ଆକ୍ଟରେ ଗିରଫ କରି ଝରୀଗାଁ ପ୍ରଥମ ଶ୍ରେଣୀ ବିଚରାପତିଙ୍କ  ଅଦାଲତକୁ ଚାଲାଣ କରାଯାଇଥିବା ଆଇଆଇସି କୋଲ୍ଲା ହର୍ଷ ପ୍ରକାଶ କରିଛନ୍ତି। ତେବେ ଜାମିନ ଆବେଦନ ଖାରଜ ହେବା ପରେ ତାଙ୍କୁ ଜେଲ ହାଜତକୁ ପଠାଇ ଦିଆଯାଇଥିବା ପୁଲିସ ସୂତ୍ରରୁ ଜଣା ପଡିଛି।

ଅଧିକ ପଢ଼ନ୍ତୁ: ୩ ସହରରେ ତାପମାତ୍ରା ୪୦ ଡିଗ୍ରି ସେଲସିୟସ୍ ଛୁଇଁଲା

ପ୍ରକାଶ ଥାଉକି ଶିଶୁ ଜନ୍ମ ହେବାର ଦଶ ଦିନ ପରେ ବହୁତ କାନ୍ଦୁ ଥିବାରୁ ଶିଶୁକୁ ଚେଙ୍କ ଦେଲେ ସୁସ୍ଥ ହେବ ବୋଲି ଲୋକଙ୍କ ପାଖରୁ ଶୁଣି ଶିଶୁର ବାପା, ମା ଓ ଜେଜେମା ଶିଶୁର ମୁଣ୍ଡ ଓ ପେଟରେ ଚେଙ୍କ ଦେଇଥିଲେ। 

ଯାହା ଫଳରେ ଶିଶୁ ଗୁରୁତର ହେବାରୁ ଉମରକୋଟ ଡିଏନକେ ହସ୍ପିଟାଲରେ ଭର୍ତ୍ତି କରିଥିଲେ। ଶିଶୁ ରୋଗ ବିଶେଷଜ୍ଞ ତଥା ନବରଙ୍ଗପୁର ସିଡ଼ି ଏମ ଓ  ଡ଼ଃ ସନ୍ତୋଷ କୁମାର ପଣ୍ଡା ଶିଶୁର ଚିକିତ୍ସା କରିବା ପରେ ଶିଶୁ ସୁସ୍ଥ ହୋଇଥିବା ଜଣାପଡ଼ିଛି। ଏହି ଘଟଣା ଗଣମାଧ୍ୟମରେ ପ୍ରକାଶ ପାଇବା ପରେ ପୁଲିସ ନିଜ ଆଡୁ ମାମଲା ରୁଜୁ କରିଥିଲା।

ଅଧିକ ପଢ଼ନ୍ତୁ: ରାଜ୍ୟରେ କାର୍ଯ୍ୟରତ ସାମ୍ବାଦିକଙ୍କର ସଂଖ୍ୟା କେତେ: ସୂଚନା ଦେଲେ ମୁଖ୍ୟମନ୍ତ୍ରୀ