🔴 LIVE | News Updates 12 February 2026: ଭାରତ ବନ୍ଦ ଯୋଗୁଁ ୪୯ ନମ୍ବର ଜାତୀୟ ରାଜପଥ ବନ୍ଦ; ବାଂଲାଦେଶରେ ଆଉ ଜଣେ ହିନ୍ଦୁ ଯୁବକଙ୍କୁ ହତ୍ୟା

ଆମେ ଆମର ପାଠକଙ୍କୁ ପ୍ରତ୍ୟେକ ମୁହୂର୍ତ୍ତରେ ଖବର ସହିତ ଅପଡେଟ୍ କରିବାକୁ ଉଦ୍ୟମ କରୁଛୁ। ଆପଣଙ୍କ ପାଇଁ ସଦ୍ୟତମ ଏବଂ ବ୍ରେକିଂ ନ୍ୟୁଜ୍ ଆଣିବାକୁ ଆମେ ପ୍ରତିବଦ୍ଧ। ପ୍ରାରମ୍ଭିକ ସୂଚନା ମାଧ୍ୟମରେ ଏହି ଖବରକୁ ନିରନ୍ତର କ୍ରମାଗତ ଭାବେ ଅପ୍‌ଡେଟ୍‌ କରୁଛୁ। ସଦ୍ୟତମ ବ୍ରେକିଂ ନ୍ୟୁଜ୍ ଏବଂ ଅପଡେଟ୍ ପାଇଁ sambad.in ସହିତ ଯୋଡ଼ି ରୁହନ୍ତୁ। 

New Update
Feb 12, 2026 10:20 IST

୩ଦିନ ତଳେ ନିଖୋଜ ବ୍ୟକ୍ତିଙ୍କ ଗାଁ ପୋଖରୀରୁ ମୃତଦେହ ଉଦ୍ଧାର



ଦଶପଲ୍ଲା: ନୟାଗଡ଼ ଜିଲ୍ଲା ଦଶପଲ୍ଲା ଥାନା ବାଟେଣୀ ଗାଁର ରବୀନ୍ଦ୍ର ପ୍ରଧାନ ଗତ ସୋମବାର ଦିନ ଗାଁ ପୋଖରୀକୁ ଗାଧୋଇ ଯାଇ ନିଖୋଜ ଥିବାବେଳେ ଆଜି ଗାଁ ପୋଖରୀରୁ ମୃତଦେହ ଉଦ୍ଧାର କରାଯାଇଛି। ରବୀନ୍ଦ୍ର ଗାଧୋଇ ଯାଉଛି ବୋଲି ପରିବାର ଲୋକଙ୍କୁ କହି ଯାଇଥିଲେ। ହେଲେ ସେ ଆଉ ଘରକୁ ଫେରି ନଥିଲେ। ଘରକୁ ନ ଫେରିବାରୁ ଘର ଲୋକେ ସବୁ ଆଡ଼େ ଖୋଜାଖୋଜି କରିଥିଲେ ଏବଂ ଦଶପଲ୍ଲା ଦମକଳ ବାହିନୀ ସାହାଯ୍ୟରେ ଗାଁ ପୋଖରୀରେ ମଧ୍ୟ ଖୋଜା ଖୋଜି କରିଥିଲେ। ହେଲେ କୌଣସି ସନ୍ଧାନ ମିଳି ନଥିଲା। ବନ୍ଧୁ ବାନ୍ଧବଙ୍କ ଠାରୁ ଆରମ୍ଭ କରି ଆତ୍ମୀୟଙ୍କ ଘରେ  ସବୁଠି ଖୋଜାଖୋଜି କରିଥିବା ବେଳେ ବର୍ତ୍ତମାନ ସକାଳୁ ସକାଳୁ ଗାଁ ପୋଖରୀରେ ରବୀନ୍ଦ୍ରଙ୍କ ମୃତଦେହ ଭାସୁ ଥିବାର ଗାଁ ଲୋକେ ଦେଖି ପୁଲିସକୁ ଖବର ଦେଇଥିଲେ। ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି। ସେପଟେ ମୃତ ରବୀନ୍ଦ୍ରଙ୍କ କୌଣସି ସନ୍ତାନ ନଥିବାରୁ ସବୁବେଳେ ମନ ଦୁଃଖ ରେ ରହୁଥିଲେ ବୋଲି କହିଛନ୍ତି ତାଙ୍କ ସ୍ତ୍ରୀ। 

Feb 12, 2026 09:44 IST

ଯୁବକଙ୍କୁ ହତ୍ୟା ଅଭିଯୋଗ ଆଣିଲେ ପରିବାର ଲୋକ

ଜଗତସିଂହପୁର ଜିଲ୍ଲା ବାଲିକୁଦା ଥାନା ସଂଗ୍ରାମପୁରରେ ହତ୍ୟାକାଣ୍ଡ। ଏହି ଗ୍ରାମର କାଳନ୍ଦୀ ଭୋଇଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି । ପରିବାର ପକ୍ଷରୁ କୁହାଯାଇଛି ଯେ ଗତକାଲି ତିନି ଜଣ ଯୁବକ ମାଡ ମାରିଥିଲେ। ସେମାନଙ୍କ ମାଡରେ ଜୀବନ ଚାଲିଯାଇଛି । ଅଭିଯୋଗ ପାଇବା ପରେ ପୁଲିସ ଘଟଣାସ୍ଥଳରେ ପହଂଚିଥିବାବେଳେ ୨ ଜଣଙ୍କୁ ଅଟକ ରଖିଛି।

Feb 12, 2026 09:08 IST

ବାଂଲାଦେଶରେ ଆଉ ଜଣେ ହିନ୍ଦୁ ଯୁବକଙ୍କୁ ହତ୍ୟା 



ଢାକା: ବାଂଲାଦେଶର ମୌଲଭିବଜାର ଜିଲ୍ଲାର କମଲଗଞ୍ଜ ଉପଖଣ୍ଡ ଅଞ୍ଚଳରେ ଏକ ଚା ବଗିଚାରୁ ୨୮ ବର୍ଷୀୟ ହିନ୍ଦୁ ଯୁବକ ରତନ ସାହୁକରଙ୍କ ମୃତଦେହ ଉଦ୍ଧାର କରାଯାଇଛି। ପୁଲିସ ରିପୋର୍ଟ କରିଛି ଯେ ତାଙ୍କ ହାତ ଗୋଡ ବନ୍ଧା ହୋଇଥିଲା ଏବଂ ତାଙ୍କ ଶରୀରରେ ଗୁରୁତର ଆଘାତ ଲାଗିଥିଲା। ଏହି ଘଟଣା ନିର୍ବାଚନ ହିଂସା ଏବଂ ସଂଖ୍ୟାଲଘୁଙ୍କ ଉପରେ ଆକ୍ରମଣର ବଢ଼ୁଥିବା ଭୟକୁ ଆହୁରି ବଢ଼ାଇ ଦେଇଛି।
ସ୍ଥାନୀୟ ଲୋକମାନେ ଗତକାଲି ସକାଳ ୧୦ଟା ସମୟରେ ଚମ୍ପାର ଚା ବଗିଚାରେ ରତନଙ୍କ ମୃତଦେହ ଠାବ କରି ତୁରନ୍ତ ପୁଲିସକୁ ଖବର ଦେଇଥିଲେ। ମୃତଦେହ ରକ୍ତରେ ଜୁଡୁବୁଡୁ ଥିଲା ଏବଂ ଶରୀରର ବିଭିନ୍ନ ସ୍ଥାନରେ ଗଭୀର କ୍ଷତ ହୋଇଥିଲା। କମଲଗଞ୍ଜ ଥାନା ପ୍ରଭାରୀ ଅବଦୁଲ ଆୱାଲ ନିଶ୍ଚିତ କରିଛନ୍ତି ଯେ ମୃତକ ରତନ ସାହୁକର, ସେହି ବଗିଚାରେ ଜଣେ ଶ୍ରମିକ ଏବଂ ଇସଲାମପୁର ୟୁନିଅନ ସହିତ ଜଡିତ ଥିଲେ।

Feb 12, 2026 08:27 IST

ଭୁବନେଶ୍ବରରେ ବନ୍ଦର ପ୍ରଭାବ

ଭୁବନେଶ୍ବର: ଭାରତ ବନ୍ଦର ପ୍ରଭାବ ଭୁବନେଶ୍ବରରେ ଦେଖିବାକୁ ମିଳିଛି। ୧୬ ନମ୍ବର ଜାତୀୟ ରାଜପଥରେ ଯାନବାହନ ଚଳାଚଳ ଠପ୍‌ ହୋଇଯାଇଛି। 



Feb 12, 2026 08:15 IST

ଭାରତ ବନ୍ଦ ଯୋଗୁଁ ୪୯ ନମ୍ବର ଜାତୀୟ ରାଜପଥ ବନ୍ଦ



ଭୁବନେଶ୍ବର: ୧୦ଟି ଶ୍ରମିକ ଓ ସ୍ବାଧୀନ ଫେଡେରେସନ୍‌ ପକ୍ଷରୁ  ଆଜି ୧୨ ଘଣ୍ଟିଆ ସର୍ବଭାରତୀୟ ଧର୍ମଘଟ ଡାକରା ଦିଆଯାଇଛି। କେନ୍ଦ୍ରୀୟ ଶ୍ରମ ଆଇନକୁ ବିରୋଧ କରି ସକାଳ ୬ଟାରୁ ଆରମ୍ଭ ହୋଇଥିବା ଏହି ଆନ୍ଦୋଳନ ସନ୍ଧ୍ୟା ୬ଟା ପର୍ଯ୍ୟନ୍ତ ଦେଶବ୍ୟାପୀ ଜାରି ରହିବ। ଓଡ଼ିଶାରେ ଶ୍ରମିକ ସଂଗଠନଙ୍କ ପକ୍ଷରୁ ବିଭିନ୍ନ ସ୍ଥାନରେ ରେଳ ରୋକ, ପିକେଟିଂ ଓ ବିକ୍ଷୋଭ ଚାଲିଛି। ଶ୍ରମିକ ସଂଗଠନମାନଙ୍କ ଏହି ସର୍ବଭାରତୀୟ ଧର୍ମଘଟକୁ ଓଡ଼ିଶାରେ କଂଗ୍ରେସ ଓ ବିଜେଡି (ବିଜୁ ଶ୍ରମିକ ସାମ୍ମୁଖ୍ୟ) ସମର୍ଥନ ଘୋଷଣା କରିଛି। ଅନ୍ୟ ସଂଗଠନମାନେ ମଧ୍ୟ ଏହି ଧର୍ମଘଟକୁ ସମର୍ଥନ ଜଣାଇଥିବାରୁ ରାଜ୍ୟରେ ସ୍କୁଲ, କଲେଜ, ବ୍ୟାଙ୍କ, ପେଟ୍ରୋଲ ପମ୍ପ ଓ ପରିବହନ ସେବା ବାଧାପ୍ରାପ୍ତ ହୋଇଛି। ମୟୂରଭଂଜ ଜିଲ୍ଲା ବାଙ୍ଗିରିପୋଷି ଜାତୀୟ ରାଜପଥ-୪୯ ବିଶୋଇ - କୋଲକାତା ରୋଡ ବନ୍ଦ କରିଛନ୍ତି ବିକ୍ଷୋଭକାରୀ।

Feb 12, 2026 08:06 IST

ଡିଭାଇଡରରେ ପିଟି ହୋଇ ନିୟନ୍ତ୍ରଣ ହରାଇଲା ବୋଲେରୋ



ଗୋରଖପୁର: ବିବାହ ଶୋଭାଯାତ୍ରାରୁ ଫେରୁଥିବା ଉତ୍ତରପ୍ରଦେଶର ଗୋରଖପୁର ଜିଲ୍ଲା ଭିଥା ଟୋଲ୍ ପ୍ଲାଜା ନିକଟରେ ଏକ ବୋଲେରୋ ଡିଭାଇଡରରେ ପିଟି ହୋଇ ନିୟନ୍ତ୍ରଣ ହରାଇ ଓଲଟି ପଡ଼ିଛି। ଦୁର୍ଘଟଣାରେ ଦୁଇ ଯୁବକଙ୍କ ମୃତ୍ୟୁ ଘଟିଥିବା ବେଳେ ଚାରି ଜଣ ଗୁରୁତର ଆହତ ହୋଇଛନ୍ତି। ଘଟଣା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା। ଟୋଲ୍ କର୍ମଚାରୀ ଏବଂ ସ୍ଥାନୀୟ ଲୋକଙ୍କ ସହାୟତାରେ ଆହତମାନଙ୍କୁ ବାହାର କରି ଡାକ୍ତରଖାନା ପଠାଯାଇଥିଲା। ଚରପାନ ସୁଆଡ୍ଡା ଏବଂ ନାଗୱାନ ଟୋଲାର ଆଶୁତୋଷ ପାଣ୍ଡେ, ସୁରଜ ପାଣ୍ଡେ, ସରୱାନ ଚୌହାନ, ଆଲୋକ ଶର୍ମା, ଦୀପକ ନିଷାଦ, ଶିବମ ଗୁପ୍ତା ଏବଂ ସୁରଜ ଶର୍ମା ଚରପାନ ଖୁର୍ଦ୍ଦର ବାସିନ୍ଦା ସୁଭାଷ ମୌର୍ଯ୍ୟଙ୍କ ପୁଅର ବିବାହରେ ଯୋଗଦେବା ପାଇଁ ବୋଲେରୋ (ୟୁପି ୫୩ ସିଜେଡ୍ ୫୪୯୭) ରେ ଗୋଲା ବଜାରକୁ ଯାଇଥିଲେ।

Feb 12, 2026 08:01 IST

ରୁଦ୍ଧଦ୍ୱାର ବୈଠକ କଲେ ଟ୍ରମ୍ପ-ନେତାନ୍ୟାହୁ 

ୱାଶିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ବୁଧବାର ୱାଶିଂଟନରେ ରୁଦ୍ଧଦ୍ବାର ବୈଠକ କରିଛନ୍ତି। କିନ୍ତୁ ବିଶ୍ବର ଏହି ଦୁଇ ଜଣାଶୁଣା ନେତାଙ୍କ ସାକ୍ଷାତରେ କ’ଣ କଥାବାର୍ତ୍ତା ହୋଇଛି, ସେନେଇ ଗଣମାଧ୍ୟମରେ ଖବର ପ୍ରକାଶ ପାଇନାହିଁ। ଇରାନ ଉପରେ କୌଣସି ନିର୍ଣ୍ଣାୟକ ଚୁକ୍ତି ହୋଇନାହିଁ। ଦୁଇ ନେତା ଦୁଇ ଘଣ୍ଟାରୁ ଅଧିକ ସମୟ ଧରି ଏକ ରୁଦ୍ଧଦ୍ୱାର ଆଲୋଚନା କରିଥିଲେ। କ୍ଷମତାକୁ ଫେରିବା ପରେ ଏହା ଟ୍ରମ୍ପଙ୍କ ନେତାନ୍ୟାହୁଙ୍କ ସହ ସପ୍ତମ ବୈଠକ ଥିଲା।



ବୈଠକ ପରେ ଟ୍ରମ୍ପ ସୋସିଆଲ ମିଡିଆରେ ଲେଖିଛନ୍ତି ଯେ କୌଣସି ଦୃଢ଼ ନିଷ୍ପତ୍ତି ନିଆଯାଇନାହିଁ। ମୁଁ କେବଳ ନିଷ୍ପତ୍ତି ନେଇଥିଲି ଯେ ଇରାନ ସହିତ ଆଲୋଚନା ଜାରି ରହିବା ଉଚିତ ଯାହା ଦେଖି ଏକ ଚୁକ୍ତି ହୋଇପାରିବ କି ନାହିଁ। ଯଦି ଏକ ଚୁକ୍ତି ହୁଏ, ତାହା ଆମର ପ୍ରଥମ ପସନ୍ଦ ହେବ। ଯଦି ନୁହେଁ, ତେବେ ଆମେ ପରବର୍ତ୍ତୀ ପଦକ୍ଷେପ ବିଷୟରେ ପରେ ବିଚାର କରିବୁ।  

Feb 12, 2026 07:21 IST

ବାଂଲାଦେଶରେ ନିର୍ବାଚନ ପାଇଁ ଭୋଟ୍ ଗ୍ରହଣ ଜାରି



ଢାକା: ବାଂଲାଦେଶରେ ଗୁରୁବାର ଜାତୀୟ ନିର୍ବାଚନ ପାଇଁ ଭୋଟ୍ ଗ୍ରହଣ କରାଯାଉଛି। ପ୍ରାୟ ୧୮ ମାସ ପୂର୍ବେ ଜୁଲାଇ ୨୦୨୪ ଛାତ୍ର ବିଦ୍ରୋହ ପରେ ଏହା ବାଂଲାଦେଶର ପ୍ରଥମ ନିର୍ବାଚନ। ଏହି ବିଦ୍ରୋହ ୧୫ ବର୍ଷ ଧରି ଶାସନ କରିଥିବା ଶେଖ୍ ହସିନାଙ୍କୁ କ୍ଷମତାରୁ ବହିଷ୍କାର କରିଥିଲା। ତାଙ୍କୁ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବାକୁ ଏବଂ ଦେଶ ଛାଡିବାକୁ ବାଧ୍ୟ କରାଯାଇଥିଲା ଏବଂ ମହମ୍ମଦ ୟୁନୁସଙ୍କ ନେତୃତ୍ୱରେ ଏକ ମଧ୍ୟବର୍ତ୍ତୀକାଳୀନ ସରକାର ଗଠନ କରାଯାଇଥିଲା।
ବାଂଲାଦେଶର ୧୩ତମ ସଂସଦୀୟ ନିର୍ବାଚନରେ ​​ମୁଖ୍ୟ ପ୍ରତିଦ୍ୱନ୍ଦ୍ୱିତା ବାଂଲାଦେଶ ନ୍ୟାସନାଲିଷ୍ଟ ପାର୍ଟି ଏବଂ ଜମାତ-ଏ-ଇସଲାମି ମଧ୍ୟରେ ହେବ ବୋଲି ଆକଳନ କରାଯାଉଛି। ତାରିକ ରହମାନଙ୍କ ନେତୃତ୍ୱରେ BNP ଏକ ୧୦-ଦଳୀୟ ମେଣ୍ଟର ଅଂଶ ଭାବରେ ପ୍ରତିଦ୍ୱନ୍ଦ୍ୱିତା କରୁଛି। ୬୦ ବର୍ଷୀୟ ରହମାନ ୧୭ ବର୍ଷ ସ୍ୱ-ନିର୍ବାସ ପରେ ବାଂଲାଦେଶ ଫେରିଛନ୍ତି ଏବଂ ପ୍ରଧାନମନ୍ତ୍ରୀ ହେବାର ଆଶା କରାଯାଉଛି। BNP ଜମାତ-ଏ-ଇସଲାମି ସହିତ ମୁହାଁମୁହିଁ ହେଉଛି, ଯାହା ୧୧-ଦଳୀୟ ମେଣ୍ଟର ନେତୃତ୍ୱ ନେଉଛି। ଏହି ବ୍ଳକରେ ହସିନାଙ୍କ ବିରୋଧରେ ପ୍ରତିବାଦ କରିଥିବା ଛାତ୍ରମାନଙ୍କ ଦ୍ୱାରା ଗଠିତ ନ୍ୟାସନାଲ୍ ସିଟିଜେନ୍ସ ପାର୍ଟି ମଧ୍ୟ ଅନ୍ତର୍ଭୁକ୍ତ।

Feb 12, 2026 07:07 IST

୫ଟି ରାଜ୍ୟ ପାଇଁ ବର୍ଷା ସତର୍କତା ଜାରି



ନୂଆଦିଲ୍ଲୀ: ସାରା ଦେଶରେ ପାଗ ନିରନ୍ତର ପରିବର୍ତ୍ତନ ହେଉଛି। ଭାରତୀୟ ପାଣିପାଗ ବିଭାଗ ସତର୍କତା ଜାରି କରିଛି। ଆଇଏମ୍‌ଡି ଅନୁଯାୟୀ ଆଗାମୀ ୨୪ ଘଣ୍ଟା ମଧ୍ୟରେ ୫ଟି ରାଜ୍ୟରେ ବର୍ଷା ହେବାର ସମ୍ଭାବନା ଅଛି। ଯେଉଁ ରାଜ୍ୟଗୁଡ଼ିକରେ ବର୍ଷା ସତର୍କତା ଜାରି କରାଯାଇଛି ସେମାନଙ୍କ ମଧ୍ୟରେ ଜମ୍ମୁ କଶ୍ମୀର, ଲଦାଖ, ଅରୁଣାଚଳ ପ୍ରଦେଶ, ତାମିଲନାଡୁ ଏବଂ ପୁଡୁଚେରୀ ଅନ୍ତର୍ଭୁକ୍ତ। ମତ୍ସ୍ୟଜୀବୀଙ୍କୁ ସମୁଦ୍ର କୂଳରୁ ଦୂରେଇ ରହିବାକୁ ପରାମର୍ଶ ଦିଆଯାଇଛି। ଏହି ସମୟରେ ଲୋକଙ୍କୁ ସତର୍କ ରହିବାକୁ ପଡ଼ିବ ବୋଲି ପାଣିପାଗ ବିଭାଗ କହିଛି। ବର୍ଷା ସମୟରେ ଘଣ୍ଟା ପ୍ରତି ୩୦ରୁ ୪୦ କିଲୋମିଟର ବେଗରେ ପବନ ମଧ୍ୟ ବହିପାରେ।

ତାପମାତ୍ରା ୧ରୁ ୨ ଡିଗ୍ରୀ ସେଲସିୟସ୍ ହ୍ରାସ ପାଇପାରେ, ଯାହା ଫେବ୍ରୁଆରି ୧୪ ପର୍ଯ୍ୟନ୍ତ ଥଣ୍ଡାରୁ କୌଣସି ମୁକ୍ତି ଦେବ ନାହିଁ। ତାପମାତ୍ରାରେ ଏହି ପରିବର୍ତ୍ତନ ସ୍ୱାସ୍ଥ୍ୟ ଉପରେ ମଧ୍ୟ ପ୍ରତିକୂଳ ପ୍ରଭାବ ପକାଇପାରେ। ତେଣୁ, ପିଲା ଏବଂ ବୃଦ୍ଧମାନଙ୍କୁ ସେମାନଙ୍କ ସ୍ୱାସ୍ଥ୍ୟର ବିଶେଷ ଯତ୍ନ ନେବାକୁ ପଡିବ।