🔴 LIVE | News Updates 16th Dec 2025: ଥାଇଲାଣ୍ଡରୁ ଦିଲ୍ଲୀ ଆସିଲେ ଲୁଥ୍ରା ବ୍ରଦର୍ସ, ଗିରଫ କଲା ପୁଲିସ

ସୋନପୁର: ସୁବର୍ଣ୍ଣପୁର ଜିଲ୍ଲା ତରଭା ବ୍ଲକ ଚାରଭଟାସ୍ଥିତ ସରକାରୀ ଉଚ୍ଚମାଧ୍ୟମିକ ବିଦ୍ୟାଳୟର ଯୁକ୍ତ ଦୁଇ ପ୍ରଥମ ବର୍ଷ ଛାତ୍ର ଆର୍ଯ୍ୟାନ୍ ସୁନାଙ୍କ ବିଦ୍ୟାଳୟର ଛାତ୍ରବାସରେ ସନ୍ଦେହଜନକ ମୃତ୍ୟୁ ଘଟିଛି। ଆର୍ଯ୍ୟାନ୍‌କୁ ପ୍ରଥମେ ଚାରଭଟା ସ୍ବାସ୍ଥ୍ୟ କେନ୍ଦ୍ରକୁ ଅଣା ଯାଇଥିଲା। ଡାକ୍ତର ତାକୁ ସେଠାରେ ମୃତ ଘୋଷଣା କରିଥିଲେ। ସେ ଡୁଙ୍ଗୁରିପାଲି ବ୍ଲକର ବାସିନ୍ଦା ବୋଲି ଜଣାଯାଇଛି। ଅଭିଭାବକଙ୍କୁ ଖବର ଦିଆ ଯାଇଛି ଓ ତାଙ୍କ ଅପେକ୍ଷା କରାଯାଇଛି। ତରଭା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଆନଯାଇ ଶବ ବ୍ୟବଚ୍ଛେଦ କରାଯିବା ସୂଚନା ରହିଛି। ମୃତ୍ୟୁର କାରଣ ଜଣାପଡ଼ିନାହିଁ।

ଭୁବନେଶ୍ବର: ରାଜଧାନୀ ଭୁବନେଶ୍ବରର ଛାତି ଉପରେ ନାବାଳିକାଙ୍କୁ ଗଣଦୁଷ୍କର୍ମ ଘଟଣା ଅତ୍ୟନ୍ତ ସ୍ପର୍ଶକାତର ଏବଂ ବିଚଳିତ କରିଦେବା ପରି ବିଷୟ। ବର୍ବରତା ଓ ଅରାଜକତା ସୀମା ଟପୁଛି, ରାଜ୍ୟ ରାଜଧାନୀ ଅସୁରକ୍ଷିତ ହେଉଛି ବୋଲି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି। ଭୟଶୂନ୍ୟ ହେଉଛନ୍ତି ଅପରାଧୀ, ବିଶ୍ୱସନୀୟତା ହରାଉଛି ସରକାର। ଆଇନଶୃଙ୍ଖଳା କେତେ ଆଉ ବିପର୍ଯ୍ୟସ୍ତ ହେଲେ ସରକାର ସଜାଗ ହେବେ? ଅପରାଧ ରୋକିବା ଦିଗରେ ସରକାରଙ୍କ ଅସମର୍ଥତା ସାଧାରଣ ଜନତାଙ୍କୁ ଭୟଭୀତ କରୁଛି। ରାଜଧାନୀରେ ମହିଳାଙ୍କ ପାଇଁ ସୁରକ୍ଷିତ ପରିବେଶ ସୁନିଶ୍ଚିତ କରି ନ ପାରିବା ବିଜେପି ସରକାରର ଅପାରଗତା ଓ ସମ୍ବେଦନହୀନ ଆଚରଣକୁ ଦର୍ଶାଉଛି। ମହିଳାଙ୍କ ସୁରକ୍ଷା ସହ ଅପରାଧ ପ୍ରବଣତାକୁ ରୋକିବା ପାଇଁ ସରକାର କଠୋର ପଦକ୍ଷେପ ନିଅନ୍ତୁ। ଘଟଣା ଘଟିବା ପରେ ନୁହେଁ, ପୂର୍ବରୁ ଏହାକୁ ରୋକିବା ଦିଗରେ ସରକାର ତତ୍ପର ହୁଅନ୍ତୁ।

ନୂଆଦିଲ୍ଲୀ: ଅଷ୍ଟ୍ରେଲୀୟ ଅଲରାଉଣ୍ଡର କ୍ୟାମେରୁନ ଗ୍ରୀନ୍ ଏବେ IPL ଇତିହାସର ସବୁଠାରୁ ମହଙ୍ଗା ବିଦେଶୀ ଖେଳାଳି ହୋଇଛନ୍ତି। ନିଲାମରେ କୋଲକାତା ନାଇଟ୍ ରାଇଡର୍ସ, ଗ୍ରୀନ୍‌ଙ୍କୁ ୨୫ କୋଟିରେ କିଣିଛି।ତେବେ ନୂତନ ନିୟମ ଅନୁଯାୟୀ, ଗ୍ରୀନ୍‌ କେବଳ ୧୮ କୋଟି ପାଇବେ। ବାକି ରାଶି ଖେଳାଳି କଲ୍ୟାଣ ପାଣ୍ଠିକୁ ଯିବ।

ନୂଆଦିଲ୍ଲୀ: ଥାଇଲାଣ୍ଡରୁ ଦିଲ୍ଲୀ ଆସିଲେ ଲୁଥ୍ରା ବ୍ରଦର୍ସ। ଗିରଫ କଲା ପୁଲିସ। ଗୋଆ ଅଗ୍ନିକାଣ୍ଡ ଘଟଣାର ଅଭିଯୁକ୍ତ ଏବଂ ନାଇଟ୍ କ୍ଲବ୍ ସହ-ମାଲିକ ଗୌରବ ଲୁଥ୍ରା ଏବଂ ସୌରଭ ଲୁଥ୍ରାଙ୍କୁ ଆଜି ଥାଇଲାଣ୍ଡରୁ ଭାରତ ଅଣାଯାଇଛି।ଇଣ୍ଡିଗୋ ବିମାନ ଯୋଗେ ସେମାନେ ଦିଲ୍ଲୀ ବିମାନବନ୍ଦରରେ ପହଞ୍ଚିଛନ୍ତି। ଗିରଫ ପରେ ଏବେ ଦୁହିଁଙ୍କ ଡାକ୍ତରୀ ପରୀକ୍ଷା କରାଯିବ ଏବଂ ପଟିଆଲା ହାଉସ କୋର୍ଟରେ ହାଜର କରାଯିବ, ଯେଉଁଠାରେ ୨୪ ଘଣ୍ଟାର ଟ୍ରାଞ୍ଜିଟ୍ ରିମାଣ୍ଡ ଲୋଡାଯିବ।

କାଶୀନଗର: କାଶୀନଗର ଠାରେ ଥିବା ବାରଣାସୀ ସରକାରୀ ଉଚ୍ଚ ବିଦ୍ୟାଳୟଠାରେ ଶିକ୍ଷକତା ପେସା କରିବା ପାଇଁ ଆସନ୍ତା କାଲି ବୁଧବାର ଦିନ ହେଉଥିବା ଯୋଗ୍ୟତା ପରୀକ୍ଷା ନିମନ୍ତେ ଏଠାରେ ପରୀକ୍ଷା ସେଣ୍ଟର ହୋଇଛି। ବିଦ୍ୟାଳୟର ଭାରପ୍ରାପ୍ତ ପ୍ରଧାନ ଶିକ୍ଷକ ଆର. ଦିଲୀପ କୁମାର ଆସନ୍ତା କାଲି ହେବାକୁ ଥିବା ଓଟିଇଟି ପରୀକ୍ଷା ପାଇଁ ସବୁ ପ୍ରସ୍ତୁତି ସରିଛି ବୋଲି କହିଥିଲେ। ବିଦ୍ୟାଳୟ ମଧ୍ୟରେ ପ୍ରଶ୍ନପତ୍ର ତଥା ଏହାର ଅନୁସଙ୍ଗିକ ମେଟାରିଏଲ ସବୁ କଡ଼ା ସୁରକ୍ଷାର ସହିତ ଏକ ସୁରକ୍ଷିତ ସ୍ଥାନରେ ରଖାଯାଇଛି। ଗଜପତି ଜିଲ୍ଲା ଆରକ୍ଷୀ ଅଧୀକ୍ଷକଙ୍କ ନିର୍ଦେଶ କ୍ରମେ ସ୍ଥାନୀୟ ଥାନା ଅଧିକାରୀ ସୁନୀଲ କୁମାର ବେହେରାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ପୁଲିସ ଏଠାରେ ଦିବା ରାତ୍ରି ମୁତୟନ ରହି ପ୍ରଶ୍ନ ପତ୍ରକୁ କଡ଼ା ସୁରକ୍ଷା ଦେଉଛନ୍ତି।

ସମ୍ବଲପୁର: ବାମରା ନିବାସୀ ‘ସମ୍ବାଦ’ର ସାମ୍ବାଦିକ ସନ୍ତୋଷ ଶୁକ୍ଲା ମିଶନ ଛକରୁ ସୁନ୍ଦରଗଡ ସରକାରୀ ଡାକ୍ତରଖାନା (DHH) ଆଡକୁ ଚାଲି ଚାଲି ଯିବା ସମୟରେ ପଛପଟୁ ଦ୍ରୁତ ଗତିରେ ଆସୁଥିବା ଏକ ବାଇକ ଧକ୍କା ଦେଇ ଚାଲିଗଲା, ଯାହାଦ୍ୱାରା ସନ୍ତୋଷ ଶୁକ୍ଲା ରାସ୍ତା ଉପରେ ଛିଟିକି ପଡ଼ି ଅଚେତ ହୋଇ ପଡିଥିଲେ। ସାଙ୍ଗରେ ତାଙ୍କର ସ୍ତ୍ରୀ ମଧ୍ୟ ଥିଲେ। ସ୍ଥାନୀୟ ଲୋକଙ୍କ ସହାୟତାରେ ତୁରନ୍ତ ତାଙ୍କୁ ସୁନ୍ଦରଗଡ଼ ଶଙ୍କରା ସ୍ଥିତ ଏନଟିପିସି ହସ୍ପିଟାଲରେ ଭର୍ତ୍ତି କଲେ। ବାମ ଆଣ୍ଠୁରେ ଗଭୀର ଆଘାତ ଲାଗିଛି । ଚିକିତ୍ସା ଚାଲିଛି, ସେ ବିପଦମୁକ୍ତ ଅଛନ୍ତି |

ନୂଆଦିଲ୍ଲୀ: ବିଶ୍ୱର ସବୁଠାରୁ ଧନୀ ବ୍ୟକ୍ତି ଏଲନ ମସ୍କ ଇତିହାସ ରଚିଛନ୍ତି। ସେ ବିଶ୍ୱର ପ୍ରଥମ ବ୍ୟକ୍ତି ହୋଇଛନ୍ତି ଯାହାଙ୍କ ମୋଟ ସମ୍ପତ୍ତି ୬୦୦ ବିଲିୟନ (ପ୍ରାୟ ୫୪ ଲକ୍ଷ କୋଟି ଟଙ୍କା) ଡଲାର ଅତିକ୍ରମ କରିଛି। ଗତ ୨୪ଘଣ୍ଟା ମଧ୍ୟରେ ତାଙ୍କର ସମ୍ପତ୍ତି ୧୬୭ ବିଲିୟନ ଡଲାର ବୃଦ୍ଧି ପାଇଛି। ମସ୍କଙ୍କ ସମ୍ପତ୍ତିରେ ଏହି ଆଶ୍ଚର୍ଯ୍ୟଜନକ ବୃଦ୍ଧି ତାଙ୍କ ରକେଟ ନିର୍ମାଣକାରୀ କମ୍ପାନି ସ୍ପେସଏକ୍ସର ବର୍ଦ୍ଧିତ ମୂଲ୍ୟ ଯୋଗୁଁ ହୋଇଛି। ଏହି କାରଣରୁ ସେ ବିଶ୍ୱର ଅନ୍ୟ ସମସ୍ତ କୋଟିପତିଙ୍କୁ ପଛରେ ପକାଇ ଦେଇଛନ୍ତି। ମୁକେଶ ଅମ୍ବାନୀ ଏବଂ ଗୌତମ ଆଦାନୀଙ୍କ ମୋଟ ସମ୍ପତ୍ତିଠାରୁ ମସ୍କ ଚଳିତ ବର୍ଷର ଅଧିକ ଆୟ କରିଛନ୍ତି।

ଭୁ‌ବନେଶ୍ବର: ଇଣ୍ଡିଆନ ପ୍ରିମିୟର ଲିଗ୍‌ (ଆଇପିଏଲ୍‌)ର ୧୯ତମ ସଂସ୍କରଣ ପାଇଁ ଦୁଇ ଜଣ ଓଡ଼ିଆ ଯୁବ କ୍ରିକେଟରଙ୍କୁ ସୁଯୋଗ ମିଳିପାରେ। ଆଜି ଆବୁଧାବିରେ ଆୟୋଜନ ହେବାକୁ ଥିବା ଆଇପିଏଲ୍‌-୨୦୨୬ ନିଲାମୀ ପ୍ରକ୍ରିୟାରେ ଓଡ଼ିଆ ଖେଳାଳି ରାଜେଶ ମହାନ୍ତି ଓ ସ୍ବସ୍ତିକ ସାମଲଙ୍କୁ ସାମିଲ କରାଯାଇଛି। ଭାରତୀୟ କ୍ରିକେଟ୍‌ ନିୟନ୍ତ୍ରଣ ବୋର୍ଡ (ବିସିସିଆଇ) ପକ୍ଷରୁ କୁହାଯାଇଛି ୨ ଜଣ ଓଡ଼ିଆଙ୍କ ସମେତ ମୋଟ ୧୯ ଜଣଙ୍କୁ ସାମିଲ କରାଯାଇଛି।  ଏଥି ସହିତ ଆଇପିଏଲ-୨୦୨୬ରେ ମୋଟ ୩୬୯ ଖେଳାଳିକୁ ସାମିଲ କରାଯାଇଛି। 

ନୂଆଦିଲ୍ଲୀ: ଗୋଆ ଅଗ୍ନିକାଣ୍ଡ ଘଟଣାର ଅଭିଯୁକ୍ତ ଏବଂ ନାଇଟ୍ କ୍ଲବ୍ ସହ-ମାଲିକ ଗୌରବ ଲୁଥ୍ରା ଏବଂ ସୌରଭ ଲୁଥ୍ରାଙ୍କୁ ଆଜି ଥାଇଲାଣ୍ଡରୁ ଭାରତ ଅଣାଯାଉଛି ଏବଂ ସେମାନେ ଅପରାହ୍ନ ପ୍ରାୟ ୧:୪୫ରେ ଇଣ୍ଡିଗୋ ବିମାନ ଯୋଗେ ଦିଲ୍ଲୀ ବିମାନବନ୍ଦରରେ ପହଞ୍ଚିବେ। ସେଠାରେ ଗୋଆ ଏବଂ ଦିଲ୍ଲୀ ପୁଲିସର ଏକ ମିଳିତ ଦଳ ସେମାନଙ୍କୁ ହେପାଜତକୁ ନେବେ। ତା'ପରେ ସେମାନଙ୍କର ଡାକ୍ତରୀ ପରୀକ୍ଷା କରାଯିବ ଏବଂ ପଟିଆଲା ହାଉସ କୋର୍ଟରେ ହାଜର କରାଯିବ, ଯେଉଁଠାରେ ୨୪ ଘଣ୍ଟାର ଟ୍ରାଞ୍ଜିଟ୍ ରିମାଣ୍ଡ ଲୋଡାଯିବ।

ନୂଆଦିଲ୍ଲୀ: ନ୍ୟାସନାଲ ହେରାଲ୍ଡ ମାମଲାରେ ଗାନ୍ଧୀ ପରିବାରକୁ ଏକ ବଡ଼ ଆଶ୍ୱସ୍ତି ମିଳିଛି। ଦିଲ୍ଲୀର ରାଉଜ୍ ଆଭେନ୍ୟୁ କୋର୍ଟ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ଦ୍ୱାରା ଦାଖଲ ହୋଇଥିବା ଚାର୍ଜସିଟ୍ ଉପରେ ବିଚାର କରିବାକୁ ମନା କରିଦେଇଛନ୍ତି। କୋର୍ଟର ନିଷ୍ପତ୍ତିକୁ କଂଗ୍ରେସ ନେତା ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ଆଇନଗତ ବିଜୟ ଭାବରେ ଦେଖାଯାଉଛି।

ଭଦ୍ରକ: ଦୁର୍ଦ୍ଦାନ୍ତ ଅପରାଧୀଙ୍କୁ ଭଦ୍ରକ ପୁଲିସ ଏନ୍‌କାଉଣ୍ଟର କରିଛି। ଭଦ୍ରକ ଏସପି ମନୋଜ ରାଉତ ଗଣମାଧ୍ୟମକୁ ଏହି ସୂଚନା ଦେଇଛନ୍ତି। ଚରମ୍ପା ମାଲଗୋଦାମ ଅଞ୍ଚଲରେ ଡକାୟତି କରିବାକୁ ଆସିଥିବା କମଳାକାନ୍ତ ଦାସଙ୍କୁ ଟାଉନ ପୁଲିସ ଏନ୍‌କାଉଣ୍ଟର କରିଛି। ଅପରାଧୀର ଗୋଡ଼ରେ ଗୁଳି ବାଜି ଥିବା ବେକେ ସେ ଗୁରୁତର ଭାବରେ ଆହତ ହୋଇଛି। ତାକୁ ଭଦ୍ରକ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଏହି ଘଟଣାରେ ପୁଲିସର ତଦନ୍ତକାରୀ ଟିମ୍ ତନାଘନା ଆର୍ମ୍ଭକରିଛି।

କୋଲକାତା: ପଶ୍ଚିମବଙ୍ଗରେ ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (ଏସ୍‌ଆଇଆର)ର ଦ୍ୱିତୀୟ ପର୍ଯ୍ୟାୟର ଅଂଶ ସ୍ୱରୂପ ମଙ୍ଗଳବାର ଡ୍ରାଫ୍ଟ ଭୋଟର ତାଲିକା ପ୍ରକାଶିତ ହେବ। ରାଜ୍ୟର ମୁଖ୍ୟ ନିର୍ବାଚନ ଅଧିକାରୀଙ୍କ ଅନୁଯାୟୀ, ମୃତ, ନିଖୋଜ, ସ୍ଥାନାନ୍ତରିତ ଏବଂ ନକଲି ଭୋଟରଙ୍କ ସମେତ ମୋଟ 58,20,898 ଜଣଙ୍କ ନାମ ବାଦ ଦିଆଯିବ। ୨୦୨୫ ଅକ୍ଟୋବର ୨୭ସୁଦ୍ଧା ବଙ୍ଗଳାରେ ମୋଟ ଭୋଟର ସଂଖ୍ୟା ୭,୬୬,୩୭,୫୨୯ ଥିଲା, ଯାହା ଏବେ ୭,୦୮,୧୬,୬୩୧ ହେବ।

ମେକ୍ସିକୋ: କେନ୍ଦ୍ରୀୟ ମେକ୍ସିକୋରେ ଏକ ବଡ଼ ବିମାନ ଦୁର୍ଘଟଣା ଘଟିଛି। ଜରୁରୀକାଳୀନ ଅବତରଣ କରିବାକୁ ଚେଷ୍ଟା କରୁଥିବା ସମୟରେ ଏକ ଛୋଟ ଘରୋଇ ବିମାନ ଦୁର୍ଘଟଣାଗ୍ରସ୍ତ ହେବା ଫଳରେ ଅତି କମରେ ସାତ ଜଣଙ୍କର ମୃତ୍ୟୁ ହୋଇଛି। ଏହି ଦୁର୍ଘଟଣା ଅଞ୍ଚଳରେ ଆତଙ୍କ ସୃଷ୍ଟି କରିଥିଲା ​​ଏବଂ କର୍ତ୍ତୃପକ୍ଷ ତୁରନ୍ତ ଉଦ୍ଧାର ଏବଂ ରିଲିଫ କାର୍ଯ୍ୟ ଆରମ୍ଭ କରିଥିଲେ। ମେକ୍ସିକୋ ରାଜ୍ୟ ନାଗରିକ ସୁରକ୍ଷା ସଂଯୋଜକ ଆଡ୍ରିଆନ ହର୍ନାଣ୍ଡେଜଙ୍କ ଅନୁଯାୟୀ ଦୁର୍ଘଟଣାଟି ସାନ ମାଟେଓ ଆଟେନକୋରେ ଘଟିଛି, ଯାହା ଟୋଲୁକା ବିମାନବନ୍ଦରରୁ ପ୍ରାୟ ପାଞ୍ଚ କିଲୋମିଟର ଏବଂ ମେକ୍ସିକୋ ସିଟିରୁ ପ୍ରାୟ ୫୦ କିଲୋମିଟର ପଶ୍ଚିମରେ ଏକ ଶିଳ୍ପ କ୍ଷେତ୍ର। ବିମାନଟି ଆକାପୁଲକୋରୁ ଉଡ଼ାଣ ଭରୁଥିଲା।

ମଥୁରା: ଉତ୍ତର ପ୍ରଦେଶର ମଥୁରାରେ ସୋମବାର-ମଙ୍ଗଳବାର ରାତି ପ୍ରାୟ ୨ଟା ସମୟରେ, ଯମୁନା ଏକ୍ସପ୍ରେସୱେରେ ଘନ କୁହୁଡ଼ି ହେତୁ ଆଗ୍ରାରୁ ନୋଏଡା ଯାଉଥିବା ୬ଟି ବସ୍ ଏବଂ ଦୁଇଟି କାର ପରସ୍ପର ସହିତ ଧକ୍କା ଖାଇଥିଲେ। ଧକ୍କା ଏତେ ଭୟଙ୍କର ଥିଲା ଯେ ସମସ୍ତ ଗାଡ଼ିରେ ନିଆଁ ଲାଗିଯାଇଥିଲା। ନିଆଁ ଲାଗି ଯାତ୍ରୀମାନଙ୍କ ମଧ୍ୟରେ ଆତଙ୍କ ସୃଷ୍ଟି ହୋଇଥିଲା। ଅନେକ ଯାତ୍ରୀ ବସ୍ ରୁ ଡେଇଁ ନିଜ ଜୀବନ ବଞ୍ଚାଇଥିଲେ। କିନ୍ତୁ ନିଆଁ ଲାଗିଯିବା ପରେ ଅନେକ ଯାତ୍ରୀଙ୍କ ମୃତ୍ୟୁ ହୋଇଥିଲା। ଏକ୍ସପ୍ରେସୱେରେ ଆଗ୍ରାରୁ ନୋଏଡା ଯିବା ପାଇଁ ରାସ୍ତା ସମ୍ପୂର୍ଣ୍ଣ ଜାମ୍ ହୋଇଯାଇଛି। ମୃତ୍ୟୁବରଣ କରିଥିବା ଯାତ୍ରୀଙ୍କ ସଂଖ୍ୟା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।