🔴 LIVE | News Updates 18 February 2026: ସ୍ତ୍ରୀଙ୍କୁ ତଣ୍ଟିଚିପି ମାରିଦେଲା ସ୍ବାମୀ; ଗୁଳିମାଡ଼ରେ ଥରିଲା କଟକ ସହର; ଯୁବତୀଙ୍କୁ ଦଳିଦେଲା ଦନ୍ତା

ଆମେ ଆମର ପାଠକଙ୍କୁ ପ୍ରତ୍ୟେକ ମୁହୂର୍ତ୍ତରେ ଖବର ସହିତ ଅପଡେଟ୍ କରିବାକୁ ଉଦ୍ୟମ କରୁଛୁ। ଆପଣଙ୍କ ପାଇଁ ସଦ୍ୟତମ ଏବଂ ବ୍ରେକିଂ ନ୍ୟୁଜ୍ ଆଣିବାକୁ ଆମେ ପ୍ରତିବଦ୍ଧ। ପ୍ରାରମ୍ଭିକ ସୂଚନା ମାଧ୍ୟମରେ ଏହି ଖବରକୁ ନିରନ୍ତର କ୍ରମାଗତ ଭାବେ ଅପ୍‌ଡେଟ୍‌ କରୁଛୁ। ସଦ୍ୟତମ ବ୍ରେକିଂ ନ୍ୟୁଜ୍ ଏବଂ ଅପଡେଟ୍ ପାଇଁ sambad.in ସହିତ ଯୋଡ଼ି ରୁହନ୍ତୁ। 

New Update
Feb 18, 2026 20:20 IST

ମ୍ୟାଟ୍ରିକ୍ ପରୀକ୍ଷା କେନ୍ଦ୍ର ୧୬, ପରୀକ୍ଷାର୍ଥୀ ୨୧୮୮

ବରୀ: ଯାଜପୁର ଜିଲ୍ଲା ବରୀ ବ୍ଲକ ଅଧିନରେ କୃପାସିନ୍ଧୁ ସରକାରୀ ଉଚ୍ଚ ବିଦ୍ୟାଳୟ ନୋଡାଲ ସେଣ୍ଟର ଅଧିନରେ ଚଳିତ ବର୍ଷ ୧୬ଟି ପରୀକ୍ଷା କେନ୍ଦ୍ରରେ ମ୍ୟାଟ୍ରିକ୍ ପରୀକ୍ଷା ହେବାକୁ ଯାଉଛି। ୧୪ଟି କେନ୍ଦ୍ରରେ ୨୧୩୮ ଜଣ ପରୀକ୍ଷା ଦେଉଥିଲା ବେଳେ ୨ଟି ମଧ୍ୟାମା ପରୀକ୍ଷାକେନ୍ଦ୍ରରେ ୪୬ ଜଣ ପରୀକ୍ଷାର୍ଥୀ ପରୀକ୍ଷା ଦେବେ। ତେବେ ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଥିବା ସୂଚନା ମିଳିଥିଲା ବେଳେ ସମସ୍ତ ପରୀକ୍ଷାକେନ୍ଦ୍ର ଗୁଡ଼ିକ ସି.ସି କ୍ୟାମେରା ଅଧିନରେ ଥିବା କୁହାଯାଉଛି। ମାତ୍ର ମିଳିଥିବା ସୂଚନା ମୁତାବକ ବରୀ ବ୍ଲକର ସିଦ୍ଧେଶ୍ବର ସରକାରୀ ଉଚ୍ଚ ବିଦ୍ୟାଳୟ, ଅମଠପୁରର ପରୀକ୍ଷା କକ୍ଷ ଗୁଡ଼ିକ ସି.ସି କ୍ୟାମେରା ବାହାରେ ଥିବାର ଅଭିଯୋଗ ଉଠିଛି। ସେହିପରି ରଇପୁର ହାଇସ୍କୁଲ ମଧ୍ୟ ପରୀକ୍ଷା  କକ୍ଷ ଗୁଡ଼ିକ ସି.ସି କ୍ୟାମେରା ବାହାରେ ଥିବା ଜଣାପଡ଼ିଛି।

ତେବେ ଅମଠପୁରର ପ୍ରଧାନ ଶିକ୍ଷକ ଅମରେନ୍ଦ୍ର ରାଉତଙ୍କୁ ପଚାରିବାରୁ ଜିଲ୍ଲା ଠାରୁ ବ୍ଲକ ପର୍ଯ୍ୟନ୍ତ ସମସ୍ତ ଅଧିକାରୀ ସି.ସି. କ୍ୟାମେରା ଲଗାଇବା ଉପରେ ଗୁରୁତ୍ବ ଦେଉଛନ୍ତି ମାତ୍ର ଆମ ବିଦ୍ୟାଳୟରେ କମିଟି ନଥିବା ଏବଂ ଆବଶ୍ୟକ ଅର୍ଥ ନଥିବାରୁ  ଲଗାଯାଇ ପାରିନାହିଁ। ଏସଂପର୍କରେ ଜିଲ୍ଲାଶିକ୍ଷାଧିକାରୀଙ୍କୁ ପତ୍ର ଦ୍ବାରା ଅବଗତ କରାଯାଇଛି। ତାଙ୍କ ପରାମର୍ଶ ଅନୁସାରେ ଭଡ଼ାରେ ୨/୩ଟି କ୍ୟାମେରା ଅଣାଯାଇ ଷ୍ଟ୍ରାଙ୍ଗରୁମ୍ ଆଉ ବାହାରେ ଲଗାଯାଇଥିଲା ବେଳେ ଶ୍ରେଣୀ କକ୍ଷ ବାଦ ପଡ଼ିଥିବା ସ୍ବୀକାର କରିଛନ୍ତି।

ଅପରପକ୍ଷରେ ବ୍ଲକ ଶିକ୍ଷାଧିକାରିଣୀ ପ୍ରତିଶୃତି ସିଂହ ଙ୍କୁ ପଚାରିବାରୁ ତାଲିକା ଦେଖି ଯାଞ୍ଚ କରୁଛି ବୋଲି କହିଛନ୍ତି। ଏସଂପର୍କରେ ଜିଲ୍ଲା ଶିକ୍ଷାଧିକାରୀଙ୍କୁ ବାରମ୍ବାର ଯୋଗାଯୋଗ କରିଥିଲେ ମଧ୍ୟ ସମ୍ଭବ ହୋଇପାରିନଥିଲା। ଅପରପକ୍ଷରେ ସି.ସି କ୍ୟାମେରା ବାହାରେ ରହିଥିବା ଏହି ଦୁଇ କେନ୍ଦ୍ରରେ ପଡ଼ିଥିବା ବିଦ୍ୟାଳୟ ଗୁଡ଼ିକ ପାଇଁ ଯୋଜନାବଦ୍ଧ ଭାବେ ସୁଯୋଗ ସୃଷ୍ଟି କରାଯାଇଛି ବୋଲି ମଧ୍ୟ ଅଭିଯାଗ ଉଠିଛି। ଏଥିପ୍ରତି ଜିଲ୍ଲାପାଳ ସ୍ବତନ୍ତ୍ର ଦୃଷ୍ଟି ଦେବାକୁ ଦାବି ହୋଇଛି।

Feb 18, 2026 20:02 IST

କେରଳର ସମୁଦ୍ରରେ ଖସି ପଡ଼ି ଓଡ଼ିଆ ଶ୍ରମିକ ମୃତ



ବାଲିଶଙ୍କରା/ସୁନ୍ଦରଗଡ଼: କିଞ୍ଜିରକେଲା ଥାନା ଅନ୍ତର୍ଗତ ଗୁଣଡିଆଡିହି ପଂଚାୟତ ଭୁଷିଦାଣ୍ଡ ଗ୍ରାମର ଜସୁଦେବ ମାଝୀ  (୪୮) ୬ ମାସ ତଳେ ପରିବାରର ଅଭାବ ଅନାଟନ ଦେଖି କେରଳ ରାଜ୍ୟକୁ ଦାଦନ ଖଟିବାକୁ ଯାଇଥିଲେ। କେରଳ ରାଜ୍ୟର କୁନୁର ନିକଟସ୍ଥ ସମୁଦ୍ରରେ ସେ ମାଛ ଧରାଳି ଭାବେ କାର୍ଯ୍ୟ କରୁଥିଲେ। ସେ ମାଛ ମାରିବା ପାଇଁ ଯାଇଥିବା ବେଳେ ଅସାବଧାନତା ଯୋଗୁଁ  ବୋଟରୁ ଖସି ପଡ଼ିଥିଲେ। ସାଥିମାନେ ତାଙ୍କୁ ଉଦ୍ଧାର କରିଥିଲେ। କିନ୍ତୁ ତାଙ୍କର ମୃତ୍ୟୁ ହୋଇଯାଇଥିଲା। ପରେ ତାଙ୍କ ପରିବାରକୁ ସୂଚନା ଦିଆଯାଇଥିଲା। ତାଙ୍କ ପୁତୁରା ଜଗନ୍ନାଥ ମାଝୀ ଜରଙ୍ଗଲେଇ ଗ୍ରାମର ସ୍ବେଚ୍ଛାସେବୀ ଲକ୍ଷ୍ମଣ ନାଏକଙ୍କ ସହ ଯୋଗାଯୋଗ କେରଳରୁ କରି ଶବକୁ ଆଣିବା ପାଇଁ ଯାଇଛନ୍ତି।ପରିବାରବର୍ଗ ଶବ ଫେରିବା ଆଶାରେ ଚାହିଁ ବସିଛନ୍ତି।

Feb 18, 2026 20:00 IST

ଏଲ୍‌ପିୟୁ ଦେଖାଇଲେ ୧୫ ଏଆଇ ପ୍ରକଳ୍ପ



ଜଳନ୍ଧର: ନୂଆଦିଲ୍ଲୀରେ ଅନୁଷ୍ଠିତ ଇଣ୍ଡିଆ ଏଆଇ ଇମ୍ପାକ୍ଟ ସମିଟ୍‌ ୨୦୨୬ରେ ଲଭ୍‌ଲି ପ୍ରଫେସନାଲ ୟୁନିଭର୍ସିଟି (ଏଲ୍‌ପିୟୁ) ପକ୍ଷରୁ ୧୫ ଏଆଇ ପ୍ରକଳ୍ପକୁ ଉପସ୍ଥାପନ କରାଯାଇଛି। ଏହି ପ୍ରକଳ୍ପଗୁଡ଼ିକୁ ବିଶ୍ବବିଦ୍ୟାଳୟର ଛାତ୍ରଛାତ୍ରୀ ଓ ଗବେଷଣା ଟିମ୍‌ ବିକାଶ କରିଛି। ଶିକ୍ଷା, କୃଷି, ରୋବୋଟିକ୍‌ସ, ସଂସ୍ଥାଗତ ପ୍ରଯୁକ୍ତି ଓ ସ୍ବାସ୍ଥ୍ୟ ସେବା କ୍ଷେତ୍ର ପାଇଁ ଏହି ପ୍ରକଳ୍ପଗୁଡ଼ିକୁ ବିକାଶ କରାଯାଇଛି। ବିଶ୍ବବିଦ୍ୟାଳୟ ତରଫରୁ ସ୍ଥାପନ କରାଯାଇଥିବା ଷ୍ଟଲ୍‌ରେ ଛାତ୍ରଛାତ୍ରୀମାନେ ହାର୍ଡୱେର ଡିଜାଇନ, ଏଣ୍ଟରପ୍ରାଇଜ୍‌ ପ୍ଲାଟଫର୍ମ, ଡିଜିଟାଲ ସହଯୋଗିତା ଓ ସହାୟକ ପ୍ରଯୁକ୍ତି ପ୍ରଦର୍ଶନ କରିଛନ୍ତି। ବିଶ୍ବବିଦ୍ୟାଳୟର ଛାତ୍ରଛାତ୍ରୀମାନେ ବ୍ରାଉଜର ଆଧାରିତ ଇଲେକ୍ଟ୍ରୋନିକ୍ସ ଡେଭେଲପ୍‌ମେଣ୍ଟ୍‌ ପ୍ଲାଟଫର୍ମ ‘ଦିଆପ୍ଲିକେବଲ’, ୱାର୍କଫ୍ଲୋ ପାଇଁ ଏଆଇ ମଡେଲ୍‌ ଜେନୋମା ସ୍ପେସ୍‌, ବ୍ୟବସାୟ ପରିଚାଳନା ସମାଧାନ ଏକ୍ସାନର୍‌କୁ ପ୍ରଦର୍ଶନ କରିଛନ୍ତି। ସ୍ବାସ୍ଥ୍ୟ ପାଇଁ ମାଟେଜ୍‌ ଏଆଇ, ଫେମୋରା ଏଆଇ, କୃଷିରେ ଡକ୍ଟର କିଷାନ, ଏଜେଣ୍ଟ ହାର୍ଭେଷ୍ଟ, କ୍ରିଷିକା ଏଆଇ, ଭୂତଳ ଜଳ ରୋବଟ୍‌ ସହାୟକ ଅରାକୁ ମଧ୍ୟ ପ୍ରଦର୍ଶନ କରାଯାଇଛି। ବିଶ୍ବବିଦ୍ୟାଳୟର ପ୍ରତିଷ୍ଠାତା କୁଳାଧିପତି ଡକ୍ଟର ଅଶୋକ କୁମାର ମିତ୍ତଲ କହିଛନ୍ତି ଯେ କୃତ୍ରିମ ବୁଦ୍ଧିମତ୍ତା କେବଳ ଅର୍ଥନୈତିକ ଅଭିବୃଦ୍ଧି ନୁହେଁ, ବରଂ ସମାନତା ଓ ସ୍ଥାୟିତ୍ବ ପ୍ରତି ‌ଯୋଗଦାନ ଦେବା ଦରକାର। ଏଆଇ ସମିଟ୍‌ ଭଳି ମଞ୍ଚ ଗବେଷକ ଓ ଛାତ୍ରଛାତ୍ରୀମାନଙ୍କୁ ସହଯୋଗିତା ଓ ବିଶ୍ବସ୍ତରୀୟ ଅନୁଭୂତି ପ୍ରଦାନ କରୁଛି ବୋଲି ସେ କହିଛନ୍ତି।





Feb 18, 2026 19:42 IST

ନାବାଳିକା ଦୁଷ୍କର୍ମକାରୀକୁ ୭ ବର୍ଷ କାରାଦଣ୍ଡ



ସୁନ୍ଦରଗଡ଼: ସୁନ୍ଦରଗଡ଼ ଟାଉନଥାନା ଅଞ୍ଚଳରେ ୨୦୧୮ରେ ଘଟିଥିବା ଏକ ନାବାଳିକା ଦୁଷ୍କର୍ମ ମାମଲାର ଶୁଣାଣି କରି ସୁନ୍ଦରଗଡ଼ ସ୍ବତନ୍ତ୍ର ପକ୍ସୋ କୋର୍ଟ ଅଭିଯୁକ୍ତ ସୁମନ୍ତ ପ୍ରଧାନ (୩୨)କୁ ଦୋଷୀ ସାବ୍ୟସ୍ତ କରିଛନ୍ତି। ତାକୁ ୭ ବର୍ଷ କାରାଦଣ୍ଡ ସହ ୨୦ ହଜାର ଟଙ୍କା ଜରିମାନା କରିଛନ୍ତି। ଜରିମାନା ଅନାଦାୟେ ଅଧିକ ବର୍ଷେ କାରାଦଣ୍ଡ ଭୋଗିବାକୁ କୋର୍ଟ ଉଲ୍ଲେଖ କରିଛନ୍ତି। ୧୮ ତାରିଖ ବୁଧବାର ପ୍ରକାଶିତ ରାୟରେ କୋର୍ଟ ପୀଡ଼ିତାଙ୍କୁ ୫ ଲକ୍ଷ ଟଙ୍କା ଅନୁକମ୍ପାମୂଳକ ସହାୟତା ପ୍ରଦାନ ପାଇଁ ଜିଲ୍ଲା ଆଇନସେବା ପ୍ରାଧିକରଣଙ୍କୁ ନିର୍ଦେଶ ଦେଇଛନ୍ତି। ୩୦.୧.୨୦୧୮ ରାତି ସାଢ଼େ ୭ଟାରେ ନାବାଳିକା ଜଣକ ଘର ପଛପଟେ ଶୌଚ ପାଇଁ ଯାଇଥିବା ବେଳେ ସୁମନ୍ତ ତାଙ୍କ ମୁହଁକୁ ଚାପି ଧରି ଟେକି ନେଇ ଦୁଷ୍କର୍ମ କରିଥିଲା। ଏ ନେଇ ଟାଉନଥାନାରେ ଏତଲା ପରେ ତତ୍କାଳୀନ ଥାନା ଅଧିକାରୀ ଅଶୋକ କୁମାର ଗିରି ଦୁଷ୍କର୍ମ ଓ ପକ୍ସୋ ଆଇନରେ ଏକ ମାମଲା ରୁଜୁ କରିଥିଲେ। କିନ୍ତୁ ସୁମନ୍ତ ଫେରାର ହୋଇଯାଇଥିଲା। ପୁଲିିସ ତନାଘନା ଚଲାଇ ୧୬.୮.୨୦୧୮ରେ ତାକୁ ଗିରଫ କରି କୋର୍ଟ ଚାଲାଣ କରିଥିଲା। ମାମଲାର ବିଚାର ଚାଲିଥିବା ବେଳେ ୧୬.୨.୨୦୨୬ରେ ଜବାବ ସୁଆଲ ପରେ ସମସ୍ତ ସାକ୍ଷ୍ୟ ପ୍ରମାଣ, ପୁଲିସ ରିପୋର୍ଟ ଆଧାରରେ କୋର୍ଟ ଦଣ୍ଡାଦେଶ କରିଛନ୍ତି। ମାମଲାକୁ ସ୍ବତନ୍ତ୍ର ପିପି ପ୍ରଭାତ କୁମାର ନନ୍ଦ ପରିଚାଳନା କରିଥିଲେ।

Feb 18, 2026 19:22 IST

ତାଲା ଭାଙ୍ଗି ଘରୁ ଲୁଟ୍‌, ୨ ଲୁଟେରା ଗିରଫ 

ଦଶରଥପୁର: ଯାଜପୁର ଜିଲ୍ଲା ଦଶରଥପୁର ଥାନା ଅନ୍ତର୍ଗତ ଚମ୍ପେଇପାଳ ପଂଚାୟତ ତରାଙ୍ଗ ସାଗରପୁର ଗ୍ରାମରେ ସଂଗଠିତ ଲୁଟ ମାମଲାରେ ଦଶରଥପୁର ପୁଲିସ ୨ଲୁଟେରାଙ୍କୁ ଗିରଫ କରିବାରେ ସଫଳ ହୋଇଛି। ଜଣେ ଲୁଟେରା କେନ୍ଦ୍ରାପଡା ଥାନା ଅଞ୍ଚଳର ଦୁର୍ଯ୍ୟୋଧନ ଦାସଙ୍କ ପୁଅ ବିକ୍ରମ ଦାସ(୨୧) ଏବଂ ଅନ୍ୟ ଜଣେ ଯାଜପୁର ଥାନା କାପାସି ଅଞ୍ଚଳର ଜଡ଼ା ଦାସଙ୍କ ପୁଅ ଚଇନି ଦାସ (୩୫)ବୋଲି ଜଣାଯାଇଛି। ମାମଲାକୁ ନେଇ ଥାନା କେଶ ନଂ ୩୩/୨୬ ଏବଂ ଭାରତୀୟ ନ୍ୟାୟ ସଂହିତା ୩୩୧(୪), ୩୦୫, ୭୪, ୧୧୫(୨)ଧାରାରେ ଉଭୟଙ୍କୁ କୋର୍ଟ ଚାଲାଣ କରାଯାଇଥିବା ବେଳେ ଜାମିନ ନାମଞ୍ଜୁର ହେବାରୁ ୨ଲୁଟେରା ଜେଲ ଯାଇଛନ୍ତି।

ଦଶରଥପୁର ଥାନା ତରାଙ୍ଗ ସାଗରପୁର ଗ୍ରାମର ସୌରପ୍ରିୟା  ମାଝୀ ଏବଂ ତାଙ୍କଏକ ନାବାଳିକା କନ୍ୟା ଗତ ୧୧ ତାରିଖ ରାତି ପ୍ରାୟ ସାଢେ ୧୧ଟାରେ ଘରେ ଶୋଇଥିବା ସମୟରେ ମୁହଁରେ ମାସ୍କ ଲଗାଇଥିବା ୨ଲୁଟେରା ଘର ମୁଖ୍ୟ ଦ୍ୱାରରେ ପଡ଼ିଥିବା ତାଲା ଭାଙ୍ଗି ଘର ଭିତରେ  ପଶି  ଆଲମୀରା ଭାଙ୍ଗୁଥିବା ସମୟରେ ସୌରପ୍ରୀୟାଙ୍କ ନିଦ ଭାଙ୍ଗି ଯାଇଥିଲା। ସୌରପ୍ରିୟା ୨ଲୁଟେରାଙ୍କୁ ଦେଖି ବଡ଼ ପାଟିରେ ଚିତ୍କାର କରିବାରୁ ଲୁଟେରା ୨ଜଣ ତାଙ୍କ ବେକରେ ଧାରୁଆ ଅସ୍ତ୍ର ଲଗାଇ ତାଙ୍କ ନିକଟରେ ଥିବା ଟଙ୍କା ଭର୍ତ୍ତି ଭ୍ୟାନିଟି ବ୍ୟାଗ  ନେଇଥିଲେ। ପରେ ତାଙ୍କ ସେହି ଘରେ ଶୋଇଥିବା ତାଙ୍କ ନାବାଳିକା ଝିଅକୁ ଧାରୁଆ ଅସ୍ତ୍ର ଭୟ ଦେଖାଇ ଘୋଷାଡି ପଦାକୁ ନେଇ ରାସ୍ତାରେ ଫୋପାଡି ଫେରାର ହୋଇଯାଇଥିଲେ।



ପରଦିନ ସକାଳେ ଘଟଣାକୁ ନେଇ ସୌରପ୍ରିୟା ଦଶରଥପୁର ଥାନାରେ ଲିଖିତ ଅଭିଯୋଗ କରିବା ପରେ ଦଶରଥପୁର ଥାନାଧିକାରିଣୀ ହେମଲତା ଦାସ ସଦଳବଳେ ଘଟଣା ସ୍ଥଳରେ ପହଁଚି ପ୍ରାଥମିକ ତଦନ୍ତ କରିଥିଲେ।ପରେ ସାଇଣ୍ଟିଫିକ୍ ଟିମ ଓ ସନ୍ଧାନୀ କୁକୁର ମାଧ୍ୟମରେ ଛାନ ଭିନ କରାଯାଇଥିଲେ ମଧ୍ୟ ଲୁଟେରାଙ୍କ ପତ୍ତା ମିଳିନଥିଲେ ମଧ୍ୟ ଘଟଣାକୁ ନେଇ ଥାନାର ପୁଲିସ  ସବ୍ ଇନ୍ପେକ୍ଟର ଦୁଷ୍ମନ୍ତ କୁମାର ଦାସଙ୍କ ତତ୍ତ୍ଵାବଧାନରେ ପୁଲିସ ତଦନ୍ତ ଜାରି ରଖିଥିବା ବେଳେ ତରାଙ୍ଗ ସାଗରପୁର ଗ୍ରାମ ନିକଟରେ ତମ୍ବୁ ମାରି ରହୁଥିବା କିଛି ଘୁଷୁରୀ ଚରାଳିଙ୍କ ଉପରେ ଚଢ଼ାଉ କରିଥିଲେ। ଚଢ଼ାଉରେ ସେଠାରୁ ଦୁଇଜଣ ଯୁବକଙ୍କୁ ଗିରଫ କରିବା ସହିତ କିଛି ମାରଣାସ୍ତ୍ର, ନଗଦ ଟଙ୍କା ଓ ଅନ୍ୟାନ୍ୟ ସନ୍ଦିଗ୍ଧ ସାମଗ୍ରୀ ଜବଦ କରିଥିଲେ। ଦୁଇ ଯୁବକଙ୍କୁ ଥାନାକୁ ଆଣି ଅଧିକ ପଚରା କରିବାରୁ ଘଟଣା ପଦାକୁ ଆସିଥିଲା। ଜଣେ କେନ୍ଦ୍ରାପଡ଼ା ଥାନା ଅଞ୍ଚଳର ବିକ୍ରମ ଦାସ (୨୧) ଓ ଅନ୍ୟଜଣେ ଯାଜପୁର ଥାନା କପାସି ଅଞ୍ଚଳର ଚଇନି ଦାସ (୩୫)  ଦଶରଥପୁର ବ୍ଲକ ଅଞ୍ଚଳର ଏକାଧିକ ବ୍ୟକ୍ତିଙ୍କ ଘରୁ ଲୁଟ କରିଥିବା ପୁଲିସ ଜାଣିବାକୁ ପାଇଥିଲା। ସେହିପରି ଉଭୟଙ୍କ ନାଁରେ ଯାଜପୁର ଜିଲ୍ଲା ସମେତ ଜିଲ୍ଲା ବାହାର ଥାନାରେ ଲୁଟ ଅଭିଯୋଗ ରହିଛି ବୋଲି ଦଶରଥପୁର ପୋଲିସ ସୂତ୍ରରୁ ଜଣାଯାଇଛି। ଅଟକ ଦୁଇ ଅଭିଯୁକ୍ତଙ୍କ ନାମରେ ପୁଲିସ କେସ ନମ୍ବର ୩୩/୨୬ ମକଦ୍ଦମା ରୁଜୁ କରି ଡାକ୍ତରୀ ମଇନା କରି କୋର୍ଟ ଚାଲାଣ କରିଥିବା ଜଣାପଡିଛି।

Feb 18, 2026 19:17 IST

ଟିକସଦାତାଙ୍କ ସଂଖ୍ୟା ଦଶନ୍ଧୀ ମଧ୍ୟରେ ୨ଗୁଣ



ନୂଆଦିଲ୍ଲୀ: ଭାରତରେ ପ୍ରତ୍ୟକ୍ଷ ଟିକସଦାତାଙ୍କ ସଂଖ୍ୟା ଗତ ଗେ୍ାଟିଏ ଦଶନ୍ଧୀରେ ୨ ଗୁଣ ହୋଇଛି। ଟିକସ ବ୍ୟବସ୍ଥାରେ ଅଣାଯାଇଥିବା ସଂସ୍କାର ଏହି ବୃଦ୍ଧିର କାରଣ ବୋଲି କୁହାଯାଉଛି। ଭାରତୀୟ ଆୟକର ବିଭାଗ ପକ୍ଷରୁ ନିକଟରେ ପ୍ରକାଶ ପାଇଥିବା ଏକ ରିପୋର୍ଟରେ ଟିକସଦାତା ଆଧାର ବା ସଂଖ୍ୟା ବୃଦ୍ଧି ସଂପର୍କରେ ଉଲ୍ଲେଖ କରାଯାଇଛି। ଏହି ରିପୋର୍ଟ ଅନୁଯାୟୀ ୨୦୧୩-୧୪ ଆର୍ଥିକ ବର୍ଷ ବେଳକୁ ଦେଶରେ ଆୟକର ରିଟର୍ଣ୍ଣ ଦାଖଲ କରୁଥିବା କିମ୍ବା ଆୟ ଉତ୍ସରୁ ଟିକସ କଟୁଥିବା କରଦାତାଙ୍କ ସଂଖ୍ୟା ୫.୨୬ କୋଟି ଥିଲା। ଏହା ୨୦୨୫-୨୬ରେ ବୃଦ୍ଧି ପାଇ ୧୨.୧୩ କୋଟିରେ ପହଞ୍ଚିଛି। ଏହା ମଧ୍ୟ ଦେଶରେ ଦ୍ରୁତ ଅର୍ଥନୈତିକ ଅଭିବୃଦ୍ଧି ଓ ମଧ୍ୟବିତ୍ତଙ୍କ ସଂଖ୍ୟା ବୃଦ୍ଧିକୁ ସୂଚନାଉଥିବା ବିଭାଗ ପକ୍ଷରୁ ପ୍ରକାଶ କରାଯାଇଛି।

 

 

Feb 18, 2026 19:16 IST

ଫିଟ୍‌ଜୀର ଫି ଫେରସ୍ତ ଯୋଜନା

ଭୁବନେଶ୍ବର: ଦେଶର ଅଗ୍ରଣୀ ପ୍ରବେଶିକା ପରୀକ୍ଷା କୋଚିଂ ପ୍ରତିଷ୍ଠାନ ଫିଟ୍‌ଜୀର କେତେକ କେନ୍ଦ୍ରରେ ପାଠପଢ଼ା ବ୍ୟାହତ ହେବା ପରେ ଅନୁଷ୍ଠାନ ପକ୍ଷରୁ ପ୍ରଭାବିତ ଛାତ୍ରଛାତ୍ରୀଙ୍କ ପାଇଁ ଫି ଫେରସ୍ତ ଯୋଜନା ଘୋଷଣା କରାଯାଇଛି। ଫିଟ୍‌ଜୀ ପକ୍ଷରୁ କୁହାଯାଇଛି ‌ଯେ କେନ୍ଦ୍ରରେ ପାଠପଢ଼ା ବ୍ୟାହତ ହେବା ଆମ ନିୟନ୍ତ୍ରଣ ବାହାରର ଘଟଣା। ତଥାପି ଆମେ ପାଠପଢ଼ା ଜାରି ରଖିବାକୁ ପ୍ରତିବଦ୍ଧ ରହିଛୁ। ଫିଟ୍‌ଜୀ ଇସ୍କୁଲ ଜରିଆରେ ତୁରନ୍ତ ଅନ୍‌ଲାଇନ୍‌ କ୍ଲାସ୍‌ ଆରମ୍ଭ କରାଯାଇଛି। ଏହି ଘଟଣାରେ ପ୍ରଭାବିତ ହୋଇଥିବା ଯେଉଁ ଛାତ୍ରଛାତ୍ରୀଙ୍କ ପରିବାର ପ୍ରଥମ ପର୍ଯ୍ୟାୟରେ ଫି ଫେରିପାଇନାହାନ୍ତି‌ ସେମାନଙ୍କୁ ପରବର୍ତ୍ତୀ ସମୟରେ ତାହା ଦିଆଯିବ। ୨୦୨୬ ଜୁନରୁ ପୁଣି ଥରେ ଫି ଫେରସ୍ତ ପ୍ରକ୍ରିୟା ଆରମ୍ଭ ହେବ। ସମଗ୍ର ପ୍ରକ୍ରିୟାକୁ ଫିଟ୍‌ଜୀର ଦିଲ୍ଲୀରେ ଥିବା କର୍ପୋରେଟ୍‌ କାର୍ଯ୍ୟାଳୟ ପରିଚାଳନା କରିବ। ଯେଉଁ ଅଭିଭାବକମାନ‌ ଫି ଫେରସ୍ତ ବିଷୟରେ ସୂଚନା ପାଇନଥିବେ ସେମାନେ ଇମେଲ୍‌ କରି ସେବିଷୟରେ ଜଣାଇପାରିବେ। ଅଫଲାଇନ୍‌ କେନ୍ଦ୍ରଗୁଡ଼ିକର ପୁନରୁଦ୍ଧାର ପାଇଁ ଫିଟ୍‌ଜୀ ପକ୍ଷରୁ ଫିଟ୍‌ଜୀ ୟୁନିଭର୍ସ ଫ୍ରାଞ୍ଚାଇଜ ଅପର୍ଚୁନିଟିଜ୍‌ ନେଟ୍‌ୱର୍କ ଅଧୀନରେ ଉଦ୍ୟୋଗୀମାନଙ୍କ ସହ ସହଯୋଗିତା କରିବ ବୋଲି ଘୋଷଣା କରିଛି। ଅନଲାଇନ୍‌ ଓ ଡିଜିଟାଲ ପ୍ଲାଟଫର୍ମକୁ କମ୍ପାନିର କର୍ପୋରେଟ୍‌ କାର୍ଯ୍ୟାଳୟ ପରିଚାଳନା କରିବ।

 

 

Feb 18, 2026 19:15 IST

ୟୁରୋପକୁ ବିମାନ ଚଳାଚଳ ବୃଦ୍ଧି ପାଇଁ ଏୟାର୍‌ ଇଣ୍ଡିଆର ଚୁକ୍ତି



ନୂଆଦିଲ୍ଲୀ: ଦେଶର ଅଗ୍ରଣୀ ବିମାନ ସେବା ପ୍ରଦାନକାରୀ କଂପାନି ଏୟାର ଇଣ୍ଡିଆ ଜର୍ମାନିର ଲୁଫ୍‌ଥାନ୍‌ସା ଏୟାରଲାଇନ୍ସର ସହଯୋଗରେ ୟୁରୋପୀୟ ରାଷ୍ଟ୍ରଗୁଡ଼ିକୁ ଅଧିକ ବିମାନ ଚଳାଚଳ କରିବ। ଏଥିପାଇଁ ଏହି ଦୁଇ କଂପାନି ମଧ୍ୟରେ ଏକ ବୁଝାମଣାପତ୍ର ସ୍ବାକ୍ଷରିତ ହୋଇଛି। ବିମାନ ସେବା ପ୍ରଦାନ କ୍ଷେତ୍ରରେ ବ୍ୟବସାୟ ପରିଚାଳନା ପାଇଁ ହୋଇଥିବା ଏହି ଚୁକ୍ତି ଅନୁଯାୟୀ ଏୟାର୍‌ ଇଣ୍ଡିଆ ସହିତ ଏହାର ସହଯୋଗୀ ସଂସ୍ଥା ଏୟାରଇଣ୍ଡିଆ ଏକ୍ସପ୍ରେସ୍‌କୁ ସାମିଲ କରାଯିବ। ସେହିପରି ଲୁଫ୍‌ଥାନ୍‌ସା ଏୟାରଲାଇନ୍ସର ସହଯୋଗୀ ସଂସ୍ଥାଗୁଡ଼ିକ ମଧ୍ୟ ଏହି ମିଳିତ ପ୍ରକଳ୍ପରେ ସାମିଲ ହେବେ। ଏୟାର୍‌ ଇଣ୍ଡିଆ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ତଥା ପରିଚାଳନା ନିର୍ଦ୍ଦେଶକ କ୍ୟାମ୍ପବେଲ୍‌ ୱିଲ୍‌ସନ୍‌ କହିଛନ୍ତି ଯେ ଅତ୍ୟାଧୁନିକ ବିମାନ ମାଧ୍ୟମରେ ଏୟାର ଇଣ୍ଡିଆ ବିଭିନ୍ନ ଦେଶକୁ ଏହାର ସେବା ବୃଦ୍ଧି କରିବାକୁ ଲକ୍ଷ୍ୟ ରଖିଛି। ଭାରତ ଓ ୟୁରୋପୀୟ ସଂଘ ହେଉଛି ବିଶ୍ବର ଦୁଇ ବୃହତ ଅର୍ଥନୈତିକ କେନ୍ଦ୍ର। ବିଶ୍ବର ଉତ୍ପାଦ ଓ ସେବା ବଜାରରେ ଏହି ଅଞ୍ଚଳର ୨୫ ପ୍ରତିଶତ ଅବଦାନ ରହିଛି। ତେଣୁ ଭାରତରୁ ୟୁରୋପକୁ ବିମାନ ଚଳାଚଳ କ୍ଷେତ୍ରରେ ଥିବା ବଜାର ସୁଯୋଗର ଫାଇଦା ନେବାକୁ ଉଭୟ ଏୟାର ଇଣ୍ଡିଆ ଓ ଲୁଫ୍‌ଥାନe୍‌ସା ଏୟାରଲାଇନ୍ସ ଲକ୍ଷ୍ୟ ରଖିଥିବା ୱିଲ୍‌ସନ୍‌ କହିଛନ୍ତି।

 

 

Feb 18, 2026 19:11 IST

ନୂଆ ସ୍ଲିପ୍‌ୱେଲ୍‌ ୱାର୍ଲଡ୍‌ ଷ୍ଟୋର୍‌



ଭୁବନେଶ୍ବର: ସ୍ଲିପ୍‌ୱେଲ୍‌ ପକ୍ଷରୁ ଭୁବନେଶ୍ବରରେ ନୂଆ ସ୍ଲିପ୍‌ୱେଲ୍‌ ୱାର୍ଲଡ୍‌ ଷ୍ଟୋର୍‌ ଖୋଲାଯାଇଛି। ଏହି ଅବସରରେ କମ୍ପାନିର ଜୋନାଲ୍‌ ବିତରକ ମିତେଶ ଥୱାନି ଉପସ୍ଥିତ ଥିଲେ। କମ୍ପାନିର ଏହି ନିଜସ୍ବ ଷ୍ଟୋର୍‌ରେ ଗ୍ରାହକମାନେ ସ୍ଲିପ୍‌ୱେଲ୍‌ର ବିଭିନ୍ନ ଉତ୍ପାଦର ପ୍ରତ୍ୟକ୍ଷ ଅନୁଭୂତି ହାସଲ କରିପାରିବେ। ଏହି ଷ୍ଟୋର୍‌ ସହରରେ କମ୍ପାନିର ଉପସ୍ଥିତି ଦୃଢ଼ କରିବ। ଏଥିରେ ଶୟନ ବିଶେଷଜ୍ଞ, ଡିଜିଟାଲ ସହାୟତା ଭଳି ସୁବିଧା ମିଳିପାରିବ। ଏହି ଅବସରରେ ଶିଲା ଫୋମ୍‌ ଲିମିଟେଡ୍‌ର ସିଏସ୍‌ଓ ମନୋଜ ଶର୍ମା କହିଛନ୍ତି ଯେ ଉଚ୍ଚ ସମ୍ଭାବନା ଥିବା ବଜାରକୁ ସମ୍ପ୍ରସାରଣ କରିବା ପାଇଁ ଆମର ରହିଥିବା ପ୍ରତିବଦ୍ଧତାର ପ୍ରମାଣ ହେଉଛି ଭୁବନେଶ୍ବରରେ ଆମର ନୂଆ ଷ୍ଟୋର୍‌। ଆମର ବିଶ୍ବାସ ରହିଛି ଯେ ଏହି ‌ଷ୍ଟୋର୍‌ ଗ୍ରାହକମାନଙ୍କ ପାଇଁ ବ୍ରାଣ୍ଡ୍‌ ଅନୁଭୂତିରେ ଉନ୍ନତି ଆଣିବ। କମ୍ପାନିର ଓଡ଼ିଶା କ୍ଲଷ୍ଟର୍‌ ମୁଖ୍ୟ ସିଦ୍ଧଶତ୍ରୁଜିତ ପାତ୍ର କହିଥିଲେ ଯେ ଭୁବନେଶ୍ବରରେ ନୂଆ ସ୍ଲିପ୍‌ୱେଲ୍‌ ୱାର୍ଲଡ୍‌‌ ଷ୍ଟୋର୍‌ ଖୋଲି ଆମେ ବେଶ୍‌ ଆନନ୍ଦିତ। ଗ୍ରାହକମାନେ ନିଜ ପାଇଁ ଚାହୁଥିବା ଆରାମଦାୟକ ଶେଯ ଆବଶ୍ୟକତାକୁ ଏହି ଷ୍ଟୋର୍‌ ପୂରଣ କରିବ ବୋଲି ସେ କହିଛନ୍ତି। 

 

Feb 18, 2026 19:09 IST

ବିଶ୍ବକପ୍‌ର ସୁପର-୮ ସୂଚୀ



ଗ୍ରୁପ୍‌-୧ (ଭାରତ, ଜିମ୍ବାୱେ, ଦକ୍ଷିଣ ଆଫ୍ରିକା, ୱେଷ୍ଟଇଣ୍ଡିଜ୍)

• ଫେବ୍ରୁଆରି ୨୨ ଭାରତ-ଦକ୍ଷିଣ ଆଫ୍ରିକା ଅହମଦାବାଦ
• ଫେବ୍ରୁଆରି ୨୩ ଜିମ୍ବାୱେ-ୱେଷ୍ଟଇଣ୍ଡିଜ୍‌ ମୁମ୍ବାଇ
• ଫେବ୍ରୁଆରି ୨୬ ଦକ୍ଷିଣ ଆଫ୍ରିକା-ୱେଷ୍ଟଇଣ୍ଡିଜ୍‌ ଅହମଦାବାଦ
• ବ୍ରୁଆରି ୨୬ ଭାରତ-ଜିମ୍ବାୱେ ଚେନ୍ନାଇ
• ମାର୍ଚ୍ଚ ୧ ଜିମ୍ବାୱେ-ଦକ୍ଷିଣ ଆଫ୍ରିକା ଦିଲ୍ଲୀ
• ମାର୍ଚ୍ଚ ୧ ଭାରତ-ୱେଷ୍ଟଇଣ୍ଡିଜ୍ କୋଲକାତା

ଗ୍ରୁପ୍‌-୨ (ଇଂଲଣ୍ଡ, ନ୍ୟୁଜିଲାଣ୍ଡ, ଶ୍ରୀଲଙ୍କା, ପାକିସ୍ତାନ) 

• ଫେବ୍ରୁଆରି ୨୧ ନ୍ୟୁଜିଲାଣ୍ଡ-ପାକିସ୍ତାନ କଲମ୍ବୋ
• ଫେବ୍ରୁଆରି ୨୨ ଇଂଲଣ୍ଡ-ଶ୍ରୀଲଙ୍କା କାଣ୍ଡି
• ଫେବ୍ରୁଆରି ୨୪ ଇଂଲଣ୍ଡ-ପାକିସ୍ତାନ କାଣ୍ଡି
• ଫେବ୍ରୁଆରି ୨୫ ନ୍ୟୁଜିଲାଣ୍ଡ-ଶ୍ରୀଲଙ୍କା କଲମ୍ବୋ
• ଫେବ୍ରୁଆରି ୨୭ ଇଂଲଣ୍ଡ-ନ୍ୟୁଜିଲାଣ୍ଡ କଲମ୍ବୋ
• ଫେବ୍ରୁଆରି ୨୮ ପାକିସ୍ତାନ-ଶ୍ରୀଲଙ୍କା କାଣ୍ଡି

 

Feb 18, 2026 19:06 IST

ନେଦରଲାଣ୍ଡ୍‌ସ ବିପକ୍ଷରେ ଭାରତ ବ୍ୟାଟିଂ ଜାରି



• ନେଦରଲାଣ୍ଡ୍‌ସ ବିପକ୍ଷରେ ଭାରତ ବ୍ୟାଟିଂ ଜାରି
• ଅହମଦାବାଦରେ ଭାରତ ଓ ନେଦରଲାଣ୍ଡ୍‌ସ ମୁହାଁମୁହିଁ
• ଟି୨୦ ବିଶ୍ବକପ୍‌-୨୦୨୬ର ୩୬ତମ ମ୍ୟାଚ୍‌
• ଟସ୍‌ ଜିଣି ଭାରତ ବ୍ୟାଟିଂ ନିଷ୍ପତ୍ତି

Feb 18, 2026 18:59 IST

ବାହିଆ ଜଙ୍ଗଲରେ ଯୁବତୀଙ୍କୁ ଦଳିଦେଲା ଦନ୍ତା



 

ଆନନ୍ଦପୁର: କେନ୍ଦୁଝର ଜିଲ୍ଲା ଆନନ୍ଦପୁର ବନଖଣ୍ଡ କାଠକଟା ଫରେଷ୍ଟ ବିଟ ଅନ୍ତର୍ଗତ ତରତରା ପଞ୍ଚାୟତ ବାହିଆ ଜଙ୍ଗଲକୁ ତିନିଜଣ ମହିଳା ସାଙ୍ଗ ପତ୍ର ତୋଳିବା ପାଇଁ ଯାଇଥିଲେ। ସେହି ସମୟରେ ଶିଲନ୍ତି ହୋ(୨୨) ନାମକ ଯୁବତୀ ଜଣକ ହାତୀ ସମ୍ମୁଖରେ ପଡିଯାଇଥିଲେ ଓ ହାତୀ ଶିଲନ୍ତିକୁ ଶୁଣ୍ଢରେ ଧରି ଫୋଫାଡ଼ି ଦେବା ସହିତ ପାଦରେ ଦଳି ଦେଇଥିବା ବେଳେ ଅନ୍ୟ ଦୁଇଜଣ ସାଥୀ ଦୌଡ଼ି ଆସି ଆହତ ଯୁବତୀ ପରିବାରଙ୍କୁ ଖବର ଦେଇଥିଲେl ପରିବାର ଲୋକ ଗୁରୁତର ଅବସ୍ଥାରେ ଶିଲନ୍ତିକୁ ଉଦ୍ଧାର କରି ଜଙ୍ଗଲ ବିଭାଗ କର୍ମଚାରୀଙ୍କ ସହାୟତାରେ ଆନନ୍ଦପୁର ଉପଖଣ୍ଡ ଚିକିତ୍ସାଳୟକୁ ସ୍ଥାନାନ୍ତର କରାଇଥିଲେ। ସେଠାରେ ତାଙ୍କ ଅବସ୍ଥା ଗୁରୁତର ହେବାରୁ ଡାକ୍ତର ତାଙ୍କୁ କଟକ ବଡ ମେଡିକାଲ ସ୍ଥାନାନ୍ତର କରିଛନ୍ତି।

Feb 18, 2026 18:31 IST

କଳା ଗ୍ରାନାଇଟ୍‌ ବୋଝେଇ ତିନି ଟ୍ରାକ୍ଟର ଜବତ



• ଯାଜପୁର ଜିଲ୍ଲା ଜେନାପୁର ଥାନା ଅଞ୍ଚଳରେ ମୂଲ୍ୟବାନ ପଥର ଜବତ
• କଳା ଗ୍ରାନାଇଟ୍‌ ବୋଝେଇ ତିନି ଟ୍ରାକ୍ଟର ଜବତ
• ଜବତ ଗ୍ରାନାଇଟ୍‌ର ମୂଲ୍ୟ ୨୪,୮୧,୬୦୦ ଟଙ୍କା
• ଭିଜିଲାନ୍ସର ବନ ବିଭାଗ ଶାଖା କଲା ଜବତ
   

Feb 18, 2026 18:06 IST

ଗୁଳିମାଡ଼ରେ ଥରିଲା କଟକ ସହର

• 
• ଗୁଳିମାଡ଼ରେ ଜଣେ ମୃତ
• କଟକ ସହର ପ୍ରେସ୍‌ ଛକରେ ଗୁଳିମାଡ଼
• ଗୁରୁତରଙ୍କୁ ଉଦ୍ଧାର ପରେ ଏସ୍‌ସିବିରେ ଭର୍ତ୍ତି
• ଚିକିତ୍ସାଧୀନ ଅବସ୍ଥାରେ ମୃତ ଘୋଷିତ
• ଘଟଣା ନେଇ ଛାନ୍‌ଭିନ୍‌ କରୁଛି ପୁଲିସ

Feb 18, 2026 17:56 IST

ସ୍ତ୍ରୀଙ୍କୁ ତଣ୍ଟିଚିପି ମାରିଦେଲା ସ୍ବାମୀ



ବଲାଙ୍ଗୀର: ସିନ୍ଧେକେଲା ଥାନା ଜାମପଡା ଗାଁ ଖୁଣ୍ଟିଆପଡାରେ  ହତ୍ୟାକାଣ୍ଡ ଘଟିଛି। ସ୍ତ୍ରୀ ପିନ୍ଧିଥିବା ଶାଢ଼ିରେ ତଣ୍ଟି ଚିପି ହତ୍ୟା କରିଛି ସ୍ୱାମୀ। ମୃତ ମହିଳା ଜଣକ ହେଲେ ପୁଷ୍ପାଞ୍ଜଳି ରଣା। ସ୍ତ୍ରୀକୁ ହତ୍ୟା କରି ଅଭିଯୁକ୍ତ ସ୍ୱାମୀ କୃପା ରଣା ଫେରାର ମାରୁଥିବା ବେଳେ ସିନ୍ଧେକେଲା ପୁଲିସ ତାକୁ କାବୁ କରିଥିଲା।  କୃପାକୁ ଥାନାକୁ ଆଣି ଅଟକ ରଖି ପଚରାଉଚୁରା  ଚାଲିଛି। ଘର ଭିତରେ ମୃତଦେହ ପଡିଥିବା ସ୍ଥାନରେ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି। ସାଇଣ୍ଟିଫିକ ଟିମ ତନାଘନା ଚଳାଇଛି। ଗତ କିଛି ଦିନ ହେଲା ସ୍ତ୍ରୀସ୍ୱାମୀଙ୍କ ମଧ୍ୟରେ ଝଗଡ଼ା ଲାଗି ରହୁଥିବା ଗାଁ ଲୋକେ ଚର୍ଚ୍ଚା କରୁଛନ୍ତି।

Feb 18, 2026 17:48 IST

ଆସନ୍ତାକାଲି ସକାଳ ୧୦ଟା ୩୦ଯାଏଁ ଗୃହ ମୁଲତବି

 



• ଓଡ଼ିଶା ବିଧାନସଭାର ବଜେଟ୍‌ ଅଧିବେଶନ
• ଆସନ୍ତାକାଲି ପୂର୍ବାହ୍‌ଣ ସାଢ଼େ ୧୦ଟା ଯାଏଁ ଗୃହ ମୁଲତବି
• ଗୃହକୁ ମୁଲତବି ରଖିଲେ ବାଚସ୍ପତି ସୁରମା ପାଢ଼ୀ

Feb 18, 2026 17:26 IST

ମା'ତାରାତାରିଣୀ ଚୈତ ମେଳା: ମାର୍ଚ୍ଚ ୧୦ରୁ ଯାତ୍ରା ଆରମ୍ଭ 

ଛତ୍ରପୁର: ଗଞ୍ଜାମ ଜ଼ିଲ୍ଲାର ଆରାଧ୍ୟଦେବୀ ପ୍ରସିଦ୍ଧ ମା' ତାରାତାରିଣୀଙ୍କ ଚୈତ୍ର ଯାତ୍ରା ନିମନ୍ତେ ଆଜି ଗଞ୍ଜାମ ଜ଼ିଲ୍ଲା ପ୍ରଶାସନ ପକ୍ଷରୁ ଏକ ପ୍ରସ୍ତୁତି ବୈଠକ ଜ଼ିଲ୍ଲାପାଳଙ୍କ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛିl ଗଞ୍ଜାମ ଜ଼ିଲ୍ଲାପାଳ ଭି. କୀର୍ତ୍ତି ଭାସନ ଅଧକ୍ଷତା କରି ଚଳିତ ବର୍ଷ ମା'ଙ୍କ ଯାତ୍ରା ସୁରୁଖୁରୁରେ କିପରି ପାଳନ କରାଯିବ ସେଥିପ୍ରତି ସମସ୍ତ ବିଭାଗୀୟ ଅଧିକାରୀଙ୍କୁ ପରାମର୍ଶ ଦେଇଛନ୍ତିl ମା'ଙ୍କ ଯାତ୍ରା ଆସନ୍ତା ମାସର ମଙ୍ଗଳବାର ଚାରି ପାଳି ଅନୁଷ୍ଠିତ ହେବl ମାର୍ଚ୍ଚ ୧୦ ତାରିଖରେ ମଙ୍ଗଳବାରର ପ୍ରଥମ ପାଳି ଯାତ୍ରା ଆରମ୍ଭ ହେବl ଦ୍ଵିତୀୟ ମଙ୍ଗଳବାର ମାର୍ଚ୍ଚ ୧୭, ତୃତୀୟ ପାଳି ମଙ୍ଗଳବାର  ମାର୍ଚ୍ଚ ୨୪ ଏବଂ ଚତୁର୍ଥ ମଙ୍ଗଳବାର ପାଳି ମାର୍ଚ୍ଚ ୩୧ l ପ୍ରବଳ ଜନସମାଗମକୁ ଦୃଷ୍ଟିରେ ରଖି ଶାନ୍ତିଶୃଙ୍ଖଳାରେ ଯାତ୍ରା ଶେଷ କରିବାବୁ ଜିଲ୍ଲାପାଳ ଶ୍ରୀ ଭାସନ ସମସ୍ତଙ୍କ ସହଯୋଗ କାମନା କରିଥିଲେ। ଟ୍ରାଫିକ୍‌, ଆଇନଶୃଙ୍ଖଳା ବ୍ୟବସ୍ଥା ଉନ୍ନତଧରଣର କରିବାକୁ ପୁଲିସ ବିଭାଗକୁ କୁହାଯାଇଛି।



ଭକ୍ତଗଣ ଯେପରି ବିନା ଦ୍ୱିଧାରେ ମା ଙ୍କ ଦର୍ଶନ କରିପାରିବେ ସେଥିପାଇଁ ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା କରାଯିବ। ପାହାଡ ଉପରକୁ ବିନାଅନୁମତିରେ କୌଣସି ଗାଡି ଯିବ ନାହିଁl ପ୍ରଶାସନ ପକ୍ଷରୁ ଭକ୍ତମାନଙ୍କ ପାଇଁ ଯାତାୟତ ପାଇଁ  ବସ ବ୍ୟବସ୍ଥା ରହିବ। ଶ୍ରଦ୍ଧାଳୁଙ୍କ ବସିବା ବ୍ୟବସ୍ଥା, ପାନୀୟ ଜଳ ଯୋଗାଣ, ମୁଣ୍ଡନ ସକାଶେ ସ୍ଥାନ, ଆଲୋକ ବ୍ୟବସ୍ଥା, ଦୀପ ଲଗାଇବା ସ୍ଥାନ ଇତ୍ୟାଦିର ସୁବ୍ୟବସ୍ଥା ହେବ ସେଥିପ୍ରତି ବିଭାଗୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ ଜିଲାପାଳ। ଚଳିତ ବର୍ଷ ଅଧିକ ମାତ୍ରରେ ମୁଣ୍ଡନ ମାନସିକଧାରୀ ଆସିବେ ଏହାକୁ ଦୃଷ୍ଟିରେ ରଖି ମୁଣ୍ଡନ ପାଇଁ ବ୍ୟବସ୍ଥା ରହିବ। ଏହି ବୈଠକରେ ଅତିରିକ୍ତ ଜିଲ୍ଲାପାଳ ଡ଼ଃ ପ୍ରମୋଦ କୁମାର ପୃଷ୍ଟି, ଛତ୍ରପୁର ଉପଜିଲାପାଳ ସୁଭାଶିଷ ବରାଳ, ପୁରୁଷୋତମପୁର ବିଡିଓ ଓ ତହସିଲଦାର, ଏସଡିପିଓ, ଥାନା ଅଧିକାରୀ, ଗଞ୍ଜାମ ଆରଟିଓ, ମନ୍ଦିର ଟ୍ରଷ୍ଟ ସମ୍ପାଦକ ପ୍ରମୋଦ କୁମାର ପଣ୍ଡା, ସେବାୟତ ବାପୁଜୀ ରଣାଙ୍କ ସମେତ ଅନ୍ୟାନ୍ୟ ଅଧିକାରୀ ମାନେ ଉପସ୍ଥିତ ଥିଲେ।

Feb 18, 2026 16:37 IST

ବୋଲଗଡ଼ ବିଡ଼ିଓ ବଦଳି ଦାବି ଧାରଣା ନବମ ଦିନରେ 



ବୋଲଗଡ଼: ଖୋର୍ଦ୍ଧା ଜିଲ୍ଲା ବୋଲଗଡ଼ ବିଡ଼ିଓଙ୍କ ବଦଳି ଦାବିରେ ବ୍ଲକ କାର୍ଯ୍ୟାଳୟ ସମ୍ମୁଖ ଜାତୀୟରାଜପଥ ପାର୍ଶ୍ଵରେ ଧାରଣା ବୁଧବାରକୁ ନବମ ଦିନରେ ଚାଲିଛିl ଏହି ବଦଳି ଦାବିକୁ ନେଇ ବ୍ଲକ କାର୍ଯ୍ୟାଳୟ ପରିସରରେ ଉତ୍ତେଜନା ଦେଖାଯାଇଛିl ଆଜି ଆନ୍ଦୋଳନ ସ୍ଥଳରୁ ବ୍ଲକ ଅଧ୍ୟକ୍ଷାଙ୍କ ସହିତ କେତକ ଆନ୍ଦୋଳନ କାରୀମାନେ ବ୍ଲକ କାର୍ଯ୍ୟାଳୟ ଭିତରକୁ ପଶିବାକୁ ଉଦ୍ୟମ କରୁଥିବା ବେଳେ ସେମାଙ୍କୁ କାର୍ଯ୍ୟାଳୟ ଭିତରକୁ ପୁଲିସ ଛାଡିବାକୁ ଦେଇନଥିଲାl ଏହି ସମୟରେ ସୁରକ୍ଷାକର୍ମୀ ଓ ଆନ୍ଦୋଳନକାରୀଙ୍କ ମଧ୍ୟରେ ଧସ୍ତାଧସ୍ତି ଓ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲାl ଆନ୍ଦୋଳନ କାରୀମାନେ ବିଡ଼ିଓ ବଦଳି ଦାବି ନାରାବାଜି କରିବା ସହିତ ପୁଲିସ ମଧ୍ୟରେ ଧସ୍ତାଧସ୍ତି ଠେଲାପେଲା ପ୍ରାୟ ଅଧଘଣ୍ଟା ଧରି ହୋଇଥିଲା ବେଳେ ବିଡ଼ିଓଙ୍କ ଗାଡିର କାଚକୁ ଆନ୍ଦୋଳନକାରୀଙ୍କ ମଧ୍ୟରୁ କେହି ଭାଙ୍ଗିଦେଇଥିବାର ଜଣାପଡ଼ିଛିl ପ୍ରକାଶଯେ, ବୋଲଗଡ଼ ସରକାରୀ ବାମନ ଉଚ୍ଚ ବିଦ୍ୟାଳୟଠାରେ ପାଳିତ ହୋଇଆସୁଥିବା ବ୍ଲକ ସ୍ତରୀୟ ସାଧାରଣ ତନ୍ତ୍ର ଦିବସରରେ ମିଳିତ ପ୍ୟାରେଡ ଆୟୋଜନ ପାଇଁ ବ୍ଲକ ପ୍ରଶାସନର ଉଦାସୀନତା ସାଥୀକୁ ବିଡ଼ିଓ ଙ୍କ ଅନୁପସ୍ଥିତି ନେଇ ଅସନ୍ତୋଷ ପ୍ରକାଶ ପାଇଥିଲାl ପରେ ସ୍ଥାନୀୟ ବିଭିର୍ଣ୍ଣ ସଂଗଠନର ନାଗରିକ ସମାଜ ପକ୍ଷରୁ ବିଡ଼ିଓଙ୍କ ବଦଳି ପାଇଁ ବିକ୍ଷୋଭ ପ୍ରଦର୍ଶନ କରାଯାଇ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ଥାନୀୟ ତହସିଲଦାରଙ୍କୁ ସ୍ମାରକ ପତ୍ର ପ୍ରଦାନ କରାଯାଇଥିଲାl 

Feb 18, 2026 16:35 IST

ପୁଣି ରେଟୁଡି ଗ୍ରାମରେ ଗଜରାଜଙ୍କ ପ୍ରବେଶ



ଘୁ.ଉଦୟଗିରି: ଗତ କିଛି ବର୍ଷ ହେଲା ଗ୍ରୀଷ୍ମ ଋତୁ ଆରମ୍ଭ ହେଲେ ଘୁମୁସର ବନଖଣ୍ଡରୁ କନ୍ଧମାଳ ଜିଲ୍ଲାର ଘୁ.ଉଦୟଗିରି ବନାଞ୍ଚଳରେ ପ୍ରବେଶ କରି ବ୍ୟାପକ କ୍ଷୟକ୍ଷତି କରୁଥିବା ବେଳେ ହାତୀ ପଲଙ୍କ ଉତ୍ପାତ ଯୋଗୁଁ ଲୋକ ନାହିଁଥିବା ଅସୁବିଧାର ସମ୍ମଖିନ ହେବା ସହ ହାତୀଙ୍କ ଆକ୍ରମଣରେ ଦୁଇ ଜଣ ବ୍ୟକ୍ତି ପ୍ରାଣ ହରେଇବା ସହ ବହୁ ଗାଈଗୋରୁ ମୃତ ଆହତ ହେବା ଏବଂ ବ୍ୟାପକ ଫସଲ ନଷ୍ଟ ହୋଇଥିବା ବେଳେ ହାତୀ ପଲ ଙ୍କୁ ଘଉଡାଇବା ପାଇଁ ଲୋକ ରାଜରାସ୍ତାକୁ ଓହ୍ଲେଇ ଆନ୍ଦୋଳନ କରିଥିଲେ। ପୁଣି କିଛି ଦିନର ନୀରବତା ପରେ ଗତ ଦୁଇଦିନ  ଗୋଟିଏ ଦନ୍ତା ହାତୀ ଘୁମୁସର ବନଖଣ୍ଡରୁ ସ୍ଥାନୀୟ ଜଙ୍ଗଲକୁ ଆସି ଫେରିଥିବା ବେଳେ ଆଜି ପୁଣି ଏକ ଦନ୍ତା ହାତୀ ରେଟୁଡି ଗ୍ରାମରେ ପହଞ୍ଚି କଦଳୀ ବଗିଚାରେ କଦଳୀ ଗଛ ନଷ୍ଟ କରିଥିବା ଦେଖିବାକୁ ମିଳିଛି। ହାତୀ ଆସିବା ପରେ ସ୍ଥାନୀୟ ଅଞ୍ଚଳବାସୀ ପୁଣି ଭୟଭୀତ। ଅନ୍ୟପଟେ ଖବର ପାଇ ସ୍ଥାନୀୟ ବନବିଭାଗ ପକ୍ଷରୁ ରେଟୁଡି ଗ୍ରାମରେ କର୍ମଚାରୀ ପହଞ୍ଚି ହାତୀର ଗତିବିଧି ଲକ୍ଷ କରିବା ସହ ହାତୀକୁ କୌଣସି କ୍ଷତି ନପହଞ୍ଚେଇବାକୁ ଲୋକଙ୍କୁ ଅନୁରୋଧ କରିବା ସହ ହାତୀ ପ୍ରତି ସତର୍କ ରହିବା ଏବଂ ଜଙ୍ଗଲକୁ ନଯିବାକୁ ପରାମର୍ଶ ଦେଇଛନ୍ତି।

Feb 18, 2026 16:33 IST

ପାନୀୟ ଜଳ ସମସ୍ୟାକୁ ପ୍ରାଥମିକତା ଦେବାପାଇଁ ଜ଼ିଲ୍ଲାପାଳଙ୍କ ପରାମର୍ଶ 



ଛତ୍ରପୁର: ଭାରତୀୟ ପାଣିପାଗ ବିଭାଗ (ଆଇଏମଡି) ପୂର୍ବାନୁମାନ କ୍ରମେ ଚଳିତବର୍ଷ ଗଂଜାମ ଜିଲ୍ଲାରେ ତୀବ୍ର ଗ୍ରୀଷ୍ମ ପ୍ରବାହ ପରିଲିକ୍ଷିତ ହେବାର ଆଶଙ୍କା ରହିଛି। ଗ୍ରୀଷ୍ମ ପ୍ରବାହ ଯୋଗୁଁ ଜନଜୀବନ ପ୍ରତି ଅଂଶୁଘାତ ଜନିତ ବିପଦ ସୃଷ୍ଟି ହେବାର ସମ୍ଭାବନା ରହିଛି, ତେଣୁ ବ୍ୟାପକ ଜନସଚେତନତାର ଆବଶ୍ୟକତା ରହିଛି। ଜରୁରୀ କାମରେ ଜନସାଧାରଣ ବାହାରକୁ ଯିବା ସମୟରେ ସାଥିରେ ପାଣି ବୋତଲ,ଛତା, ଟୋପି, ଓଦା କପଡା ମୁଣ୍ଡରେ ପକାଇ ଯାତାୟତ କରିବା ଓ ମଧ୍ୟାହ୍ନ ସମୟରେ କୌଣସି ଜରୁରୀ କାମ ନଥିଲେ ଟାଣ ଖରାରେ ଘରୁ ନ ବାହାରିବାକୁ ଜିଲ୍ଲାପାଳ  ଭି. କୀର୍ତ୍ତି ଭାସନ୍ ଜ଼ିଲ୍ଲାବାସୀଙ୍କୁ ଅନୁରୋଧ କରିଛନ୍ତି। ତା ସହିତ ବିଭାଗୀୟ ଅଧିକାରୀମାନେ ଗ୍ରୀଷ୍ମ ପ୍ରବାହ ପରିଚାଳନାଙ୍କୁ ଏକ ନିୟମିତ କାର୍ଯ୍ୟ ଭାବରେ ଗ୍ରହଣ ନ କରି ଆନ୍ତରିକତା ଓ ସମ୍ବେଦନଶୀଳ ଭାବରେ ସମସ୍ତ କାର୍ଯ୍ୟ ସମ୍ପାଦନ କରିବାକୁ ସ୍ଥାନୀୟ ଋଷିକୂଲ୍ୟା ସମ୍ମିଳନୀ କକ୍ଷରେ ଗ୍ରୀଷ୍ମ ପ୍ରବାହ ପରିଚାଳନା ସମ୍ପର୍କିତ ଜ଼ିଲ୍ଲାସ୍ତରୀୟ ପ୍ରାକ-ପ୍ରସ୍ତୁତି କର୍ମଶାଳାରେ ସେ ପରାମର୍ଶ ଦେଇଛନ୍ତି।    

Feb 18, 2026 15:38 IST

ପୁଣି ଓଡ଼ିଶା ଏଫସିର ଘରୋଇ ପଡ଼ିଆ ହେଲା କଳିଙ୍ଗ ଷ୍ଟାଡିୟମ୍‌

ଭୁବନେଶ୍ବର: ଇଣ୍ଡିଆନ୍‌ ସୁପର ଲିଗ୍‌ (ଆଇଏସଏଲ୍‌)ର ୨୦୨୫-୨୬ ଋତୁ ପାଇଁ କଳିଙ୍ଗ ଷ୍ଟାଡିୟମ୍‌ ଓଡ଼ିଶା ଏଫସିର ଘରୋଇ ପଡ଼ିଆ ବା ହୋମ୍‌ ଭେନ୍ୟୁ ରହିବ। ଏ ନେଇ କ୍ଲବ୍‌ ପକ୍ଷରୁ ସ୍ପଷ୍ଟ କରାଯାଇଛି। ପୂର୍ବରୁ ଓଡ଼ିଶା ସରକାରଙ୍କ ସହ ହୋଇଥିବା ଚୁକ୍ତି ଅନୁସାରେ କଳିଙ୍ଗ ଷ୍ଟାଡିୟମ୍‌ ବିଗତ କିଛି ବର୍ଷ ହେଲା ଓଡ଼ିଶା ଏଫସିର ଘରୋଇ ପଡ଼ିଆ ରହିଆସିଥିଲା। କିନ୍ତୁ ଗତ ବର୍ଷଏହି ଚୁକ୍ତିର ମିଆଦ ଶେଷ ହେବା ପରେ ୨୦୨୫-୨୬ ଋତୁକୁ ନେଇ ଅନିଶ୍ଚିତତା ଜାରି ରହିଥିଲା ଓ କ୍ଲବ ନିଜର କେତେକ କାର୍ଯ୍ୟକଳାପ ବନ୍ଦ କରିଥିଲା। ଘରୋଇ ପଡ଼ିଆ ନଥିବାରୁ ଫେବ୍ରୁଆରି ୧୬ରେ ହେବାକୁ ଥିବା ପଞ୍ଜାବ ଏଫ୍‌ସି ବିପକ୍ଷରେ ଓଡ଼ିଶା ଏଫସିର ପ୍ରଥମ ମ୍ୟାଚ୍‌ ମଧ୍ୟ ସ୍ଥଗିତ ରହିଥିଲା। କିନ୍ତୁ ଏବେ ପୁଣି ଥରେ କଳିଙ୍ଗ ଷ୍ଟାଡିୟମ୍‌କୁ ନେଇ ଓଡ଼ିଶା ସରକାର ଓ ଓଡ଼ିଶା ଏଫସି ମଧ୍ୟରେ ବୁଝାମଣା ହୋଇଥିବା ସୂଚନା ମିଳିଛି। ଏହା ପରେ ବୁଧବାରଠାରୁ ଖେଳା​ଳିମାନେ ତାଲିମ ପାଇଁ ପହଞ୍ଚିଛନ୍ତି। ଓଡ଼ିଶା ଏଫସି ଆସନ୍ତା ୨୪ ତାରିଖରେ ନିଜର ପ୍ରଥମ ମ୍ୟାଚ୍‌ ଇଣ୍ଟର କାଶୀ ଏଫ୍‌ସି ବିପକ୍ଷରେ ଖେଳିବ।





Feb 18, 2026 15:09 IST

ୟୁଏଇକୁ ୬ ୱିକେଟ୍‌ରେ ହରାଇଲା ଦକ୍ଷିଣ ଆଫ୍ରିକା

ନୂଆଦିଲ୍ଲୀ: ଚଳିତ ଟ୍ବେଣ୍ଟି-୨୦ ବିଶ୍ବକପ୍‌ରେ ଦକ୍ଷିଣ ଆଫ୍ରିକା ନିଜର ଶେଷ ଗ୍ରୁପ୍‌ ମ୍ୟାଚ୍‌ରେ ୟୁଏଇକୁ ୬ ୱିକେଟ୍‌ରେ ପରାସ୍ତ କରି ଅପରାଜେୟ ଦଳ ଭାବେ ସୁପର-୮ରେ ପ୍ରବେଶ କରିଛି। ଦିଲ୍ଲୀର ଅରୁଣ ଜେଟଲି ଷ୍ଟାଡିୟମ୍‌ରେ ବୁଧବାର ଖେଳାଯାଇଥିବା ଏହି ମ୍ୟାଚ୍‌ରେ ୟୁଏଇ ପ୍ରଥମେ ବ୍ୟାଟିଂ କରି ୨୦ ଓଭରରେ ୬ ୱିକେଟ୍‌ ହରାଇ ୧୨୨ ରନ୍‌ କରିଥିଲା। ଦଳ ପକ୍ଷରୁ ଆଲିସାନ୍‌ ସରାଫୁ ୪୫ (୩୮ ବଲ୍‌) ଓ ମହମ୍ମଦ ଓ୍ବାସିମ୍‌ ୨୨ ରନ୍‌ (୧୨ ବଲ୍‌) କରିଥିଲେ। ଦକ୍ଷିଣ ଆଫ୍ରିକା ପକ୍ଷରୁ କର୍ବିନ୍‌ ବୋସ୍‌ ୧୨ ରନ ବ୍ୟୟ କରି ୩ଟି ୱିକେଟ୍‌ ନେଇଥିଲେ। ଜବାବରେ ଦକ୍ଷିଣ ଆଫ୍ରିକା ୧୩.୨ ଓଭରରେ ୪ଟି ୱିକେଟ୍‌ ହରାଇ ବିଜୟ ଲକ୍ଷ୍ୟ ହାସଲ କରିନେଇଥିଲା। ଦଳ ପକ୍ଷରୁ ଡେଓ୍ବାଲ୍ଡ ଡେଭିସ୍‌ ୩୬ (୨୫ ବଲ୍‌), ରିୟାନ ରିକଲଟନ୍‌ ୩୦ (୧୬ ବଲ୍‌) ଓ ଐଦେନ ମାର୍କରାମ ୨୮ରନ୍‌ (୧୧ ବଲ୍‌) କରିଥିଲେ। ୟୁଏଇ ପକ୍ଷରୁ ହାଇଦର ଅଲ୍ଲି, ମହମ୍ମଦ ଅର୍ଫାନ୍‌, ମହମ୍ମଦ ଫାରୁକ୍‌ ଓ ମହମ୍ମଦ ଜଓ୍ବାଦୁଲ୍ଲା ଗୋଟିଏ ଲେଖାଏଁ ୱିକେଟ୍‌ ନେଇଥିଲେ। କର୍ବିନ ବୋସ୍‌ ମ୍ୟାଚ୍‌ର ଶ୍ରେଷ୍ଠ ଖେଳାଳି ପୁରସ୍କାର ପାଇଥିଲେ।





Feb 18, 2026 15:08 IST

ବୋଲଗଡ଼ ବିଡିଓଙ୍କ ବଦଳି ଦାବି ନେଇ ବ୍ଲକ୍ ଅଫିସରେ ଉତ୍ତେଜନା

 



ଖୋର୍ଦ୍ଧା: ବୋଲଗଡ଼ର ବିଡିଓଙ୍କ ବଦଳି ଘଟଣାକୁ ନେଇ ବୋଲଗଡ଼ରେ ଅପ୍ରୀତିକର ପରିସ୍ଥତି। ବ୍ଲକ ଅଫିସ ଫାଟକ ନିକଟରେ ପୁଲିସ ଜନତା ଧସ୍ତାଧସ୍ତି ହୋଇଛନ୍ତି।

Feb 18, 2026 14:53 IST

ପୁଣି ଓଡ଼ିଶା ଏଫସିର ଘରୋଇ ପଡ଼ିଆ ହେଲା କଳିଙ୍ଗ ଷ୍ଟାଡିୟମ୍‌

ଭୁବନେଶ୍ବର: ଇଣ୍ଡିଆନ୍‌ ସୁପର ଲିଗ୍‌ (ଆଇଏସଏଲ୍‌)ର ୨୦୨୫-୨୬ ଋତୁ ପାଇଁ କଳିଙ୍ଗ ଷ୍ଟାଡିୟମ୍‌ ଓଡ଼ିଶା ଏଫସିର ଘରୋଇ ପଡ଼ିଆ ବା ହୋମ୍‌ ଭେନ୍ୟୁ ରହିବ। ଏ ନେଇ କ୍ଲବ୍‌ ପକ୍ଷରୁ ସ୍ପଷ୍ଟ କରାଯାଇଛି। ପୂର୍ବରୁ ଓଡ଼ିଶା ସରକାରଙ୍କ ସହ ହୋଇଥିବା ଚୁକ୍ତି ଅନୁସାରେ କଳିଙ୍ଗ ଷ୍ଟାଡିୟମ୍‌ ବିଗତ କିଛି ବର୍ଷ ହେଲା ଓଡ଼ିଶା ଏଫସିର ଘରୋଇ ପଡ଼ିଆ ରହିଆସିଥିଲା। କିନ୍ତୁ ଗତ ବର୍ଷଏହି ଚୁକ୍ତିର ମିଆଦ ଶେଷ ହେବା ପରେ ୨୦୨୫-୨୬ ଋତୁକୁ ନେଇ ଅନିଶ୍ଚିତତା ଜାରି ରହିଥିଲା ଓ କ୍ଲବ ନିଜର କେତେକ କାର୍ଯ୍ୟକଳାପ ବନ୍ଦ କରିଥିଲା।



ଘରୋଇ ପଡ଼ିଆ ନଥିବାରୁ ଫେବ୍ରୁଆରି ୧୬ରେ ହେବାକୁ ଥିବା ପଞ୍ଜାବ ଏଫ୍‌ସି ବିପକ୍ଷରେ ଓଡ଼ିଶା ଏଫସିର ପ୍ରଥମ ମ୍ୟାଚ୍‌ ମଧ୍ୟ ସ୍ଥଗିତ ରହିଥିଲା। କିନ୍ତୁ ଏବେ ପୁଣି ଥରେ କଳିଙ୍ଗ ଷ୍ଟାଡିୟମ୍‌କୁ ନେଇ ଓଡ଼ିଶା ସରକାର ଓ ଓଡ଼ିଶା ଏଫସି ମଧ୍ୟରେ ବୁଝାମଣା ହୋଇଥିବା ସୂଚନା ମିଳିଛି। ଏହା ପରେ ବୁଧବାରଠାରୁ ଖେଳା​ଳିମାନେ ତାଲିମ ପାଇଁ ପହଞ୍ଚିଛନ୍ତି। ଓଡ଼ିଶା ଏଫସି ଆସନ୍ତା ୨୪ ତାରିଖରେ ନିଜର ପ୍ରଥମ ମ୍ୟାଚ୍‌ ଇଣ୍ଟର କାଶୀ ଏଫ୍‌ସି ବିପକ୍ଷରେ ଖେଳିବ।

 

Feb 18, 2026 14:38 IST

ଭାଲୁ ଆକ୍ରମଣରେ ଯୁବକ ଗୁରୁତର

ରାଇରଙ୍ଗପୁର: ଆଜି ଭୋର ସମୟରେ ଭାଲୁ-ମଣିଷ ଲଢେଇ ହୋଇଥିବା ବେଳେ ଯୁବକ ଗୁରୁତର ଆହତ ହୋଇଛନ୍ତି। ତେବେ ଅଳ୍ପକେ ବର୍ତ୍ତିଗଲେ ଯୁବକ । ସୂଚନା ଅନୁଯାୟୀ ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ବନଖଣ୍ଡ ଅନ୍ତର୍ଗତ ଜଟାପାଣୀ ଗ୍ରାମର ଗୋକୁଳ ବରାଳଙ୍କ ପୁଅ ପ୍ରଭାସ ବରାଳ (୩୬) ଶୌଚ ହେବା ପାଇଁ ଗାଁ ପୋଖରୀ ତୁଠକୁ ଯାଇଥିବା ବେଳେ ଗୋଟିଏ ଭାଲୁ ତାଙ୍କୁ ଅତିରିକ୍ତ ଆକ୍ରମଣ କରିବାରୁ ଶ୍ରୀ ବରାଳ ଭାଲୁଟିକୁ ଧକ୍କା ଦେଇ ତଳକୁ ଖସାଇ ଦେଇଥିବା ବେଳେ ଭାଲୁ ନଖରେ ତାଙ୍କର ଶରୀରରେ ଗଭୀର କ୍ଷତ ହେବା ଫଳରେ ଗୁରୁତର ଆହତ ହୋଇଥିଲେ। 



ପରେ ତାଙ୍କ ପରିବାର ଲୋକେ ରାଇରଙ୍ଗପୁର ବନାଞ୍ଚଳ ଅଧିକାରୀଙ୍କୁ ସୂଚନା ଦେବା ସହିତ ଆହତ ଯୁବକଙ୍କୁ ପ୍ରାଥମିକ ଚିକିତ୍ସା ପାଇଁ ରାଇରଙ୍ଗପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଥିଲେ। ବନାଞ୍ଚଳ ଅଧିକାରୀ ଜ୍ୟୋତି ରଞ୍ଜନ ସେନାପତି, ବନପାଳ ପଦ୍ମାବତୀ ମହାନ୍ତ, ବିଟ୍ ପୁନଗୀ ହାଁସଦା ପ୍ରମୁଖ ହସ୍ପିଟାଲରେ ପହଞ୍ଚି ଗୁରୁତର ବ୍ୟକ୍ତିଙ୍କୁ ଭେଟି ତଦନ୍ତ ଜାରି ରଖିଛନ୍ତି। ତେବେ ଉକ୍ତ ଭାଲୁଟି ବୁଢେଇରଣା ସଂରକ୍ଷିତ ଜଙ୍ଗଲରୁ ଗାଁକୁ ପାଚିଲା କୋଳି ଖାଇବାକୁ ଆସିଥିବା ସୂଚନା ମିଳିଛି ।

Feb 18, 2026 14:20 IST

ସରପଞ୍ଚଙ୍କୁ ଗିରଫ ଦାବି କରି ଖେରଙ୍ଗରେ ରାସ୍ତାରୋକ 

ଚାନ୍ଦବାଲି: ଭଦ୍ରକ ମୁଖ୍ୟରାସ୍ତା ଖେରଙ୍ଗ ବଜାରରେ କିଛି ସ୍ଥାନୀୟ ଲୋକଙ୍କ ଦ୍ୱାରା କରାଯାଇଛି ରାସ୍ତାରୋକ। ମୁଖ୍ୟ ରାସ୍ତାରେ ଟାୟାର ଜାଳି ରାସ୍ତାରୋକ କରିଛନ୍ତି ସ୍ଥାନୀୟ ଲୋକେ। ଗତକାଲି ଗାଡ଼ି ସାଇଡ୍ ମରାକୁ ନେଇ ହେଇଥିଲା ବଚସା। ସ୍ଥାନୀୟ ଖେରଙ୍ଗ ସରପଞ୍ଚ ଜିତେନ୍ଦ୍ର ବିଶ୍ୱାଳ ତାଙ୍କ ଗାଡି ନେଇ ଯାଉଥିବା ସମୟରେ କିଛି ସ୍ଥାନୀୟ ଯୁବକଙ୍କୁ ସାଇଡ୍ ମାରିଥିବା ଅଭିଯୋଗ ହୋଇଥିଲା l ସରପଞ୍ଚଙ୍କୁ ଗିରଫ ଦାବି ନେଇ କରିଛନ୍ତି ରାସ୍ତାରୋକ l ଚାନ୍ଦବାଲି ପୁଲିସ ଗତକାଲି ରାତିରେ ସାଇଡ୍ ମରା ଖାଇଥିବା ଲୋକଙ୍କୁ ଗିରଫ କରିଛି l ଏହାର ପ୍ରତିବାଦ କରିଛନ୍ତି ଧାରଣାରେ ବସିଥିବା ଲୋକେ  l



ସେମାନଙ୍କ ଦାବି ରହିଛି ସ୍ଥାନୀୟ ସରପଞ୍ଚଙ୍କୁ ଗିରଫ ଶୀଘ୍ର କରିବା ପାଇଁ l ଯେ ପର୍ଯ୍ୟନ୍ତ ସରପଞ୍ଚ ଗିରଫ ହୋଇ ନାହାନ୍ତି, ସେ ପର୍ଯ୍ୟନ୍ତ ରାସ୍ତାରୋକ ଜାରି ରହିବ ବୋଲି କହିଛନ୍ତି ଆନ୍ଦୋଳନକାରୀ  l 

Feb 18, 2026 14:11 IST

ଆଇନଜୀବୀ ପୀତବାସ ପଣ୍ଡା ହତ୍ୟା ମାମଲାର ଅଭିଯୁକ୍ତ ବିକ୍ରମ ପଣ୍ଡାଙ୍କୁ ମେଡିକାଲରେ ଭେଟିଲେ ବିଜେଡି ନେତା

ବ୍ରହ୍ମପୁର: ଚିକିତ୍ସା ପାଇଁ ଗତକାଲି ରାତିରେ ବ୍ରହ୍ମପୁର ଏମ୍‌କେସିଜି ବଡ଼ ଡାକ୍ତରଖାନାରେ ଭର୍ତ୍ତି ହୋଇଥିବା ପୂର୍ବତନ ବିଧାୟକ ବିକ୍ରମ ପଣ୍ଡାଙ୍କୁ ଆଜି ବିଜେଡି ନେତାମାନେ ଭେଟି ଆଲୋଚନା କରିଛନ୍ତି। ଆଇନଜୀବୀ ପୀତବାସ ପଣ୍ଡା ହତ୍ୟା ମାମଲାରେ ଅଭିଯୁକ୍ତ ଥିବା ପୂର୍ବତନ ବିଧାୟକ ଶ୍ରୀ ପଣ୍ଡାଙ୍କ ଚିକିତ୍ସା ପାଇଁ ଗତକାଲି ରାତିରେ କଡ଼ା ସୁରକ୍ଷା ବଳୟ ମଧ୍ୟରେ ଆଣି ଏମ୍‌କେସିଜିରେ ଭର୍ତ୍ତି କରାଯାଇଛି।



ଆଜି ବିଜେଡି ପକ୍ଷରୁ ଦକ୍ଷିଣାଞ୍ଚଳ ରାଜସ୍ବ କମିସନର୍‌ଙ୍କ କାର୍ଯ୍ୟାଳୟ ଘେରାଉ କାର୍ଯ୍ୟକ୍ରମ ସାରି ବିଜେଡି ନେତାମାନେ ମେଡିକାଲରେ ବିକ୍ରମ ପଣ୍ଡାଙ୍କୁ ଭେଟିଛନ୍ତି। ବିକ୍ରମଙ୍କ ପାଇଁ ମାମଲା ଲଢ଼ୁଥିବା ଆଇନଜୀବୀ ଦୀପକ ପଟ୍ଟନାୟକଙ୍କ ଉପସ୍ଥିତିରେ ବିଜେଡି ମୁଖପାତ୍ର ଲେଲିନ୍‌ ମହାନ୍ତି, ତୁମ୍ବନାଥ ପଣ୍ଡା, ଭୃଗୁ ବକ୍ସିପାତ୍ର, ପୂର୍ବତନ ବିଧାୟକ ଲତିକା ପ୍ରଧାନ, ପୂର୍ଣ୍ଣଚନ୍ଦ୍ର ସ୍ବାଇଁ ଓ ଶ୍ରୀକାନ୍ତ ସାହୁ ପ୍ରମୁଖ ସାମିଲ ହୋଇଛନ୍ତି।

Feb 18, 2026 13:59 IST

ରେଙ୍ଗାଲି ଜଳଭଣ୍ଡାରରେ ବୁଡ଼ି ହାତୀ ଛୁଆର ମୃତ୍ୟୁ

ଦେବଗଡ଼: ବାରକୋଟ ରେଞ୍ଜ ଅନ୍ତର୍ଗତ କୁଲସରା ନିକଟରେ ରେଙ୍ଗାଲି ଜଳଭଣ୍ଡାରରେ ଏକ ହାତୀ ଛୁଆର ମୃତ୍ୟୁ ହୋଇଛି। ଆଜି ସକାଳ ସାଢ଼େ ୮ଟାରେ ବାରକୋଟ ରେଞ୍ଜର ରେଙ୍ଗାଲି ଜଳଭଣ୍ଡାର (କୁଲସରା ଗ୍ରାମ ନିକଟରେ) ନିକଟରେ ୧ ବର୍ଷ ବୟସର ହାତୀ ଛୁଆର ମୃତ୍ୟୁ ସମ୍ପର୍କରେ ରେଞ୍ଜ ଅଫିସର ସୂଚନା ଦେଇଛନ୍ତି।



ଖବର ପାଇ ଦେବଗଡ଼ର ଡିଏଫଓ, ଏସିଏଫ (ପ୍ରଶାସନ), ଏସିଏଫ (ଏନଫୋର୍ସମେଣ୍ଟ), ବାରକୋଟ ରେଞ୍ଜ ଅଧିକାରୀ ଏବଂ ସମସ୍ତ ବନ କର୍ମଚାରୀ ଏବଂ ବାରକୋଟ ରେଞ୍ଜର ସ୍କ୍ବାଡ୍ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ପ୍ରାଥମିକ ତଦନ୍ତ ପରେ, ପାଣିରେ ବୁଡ଼ି ହାତୀ ଛୁଆର ମୃତ୍ୟୁ ହୋଇଥିବା ଜଣାଯାଇଛି। ପୋଷ୍ଟମର୍ଟମ ପରେ ସଠିକ୍ କାରଣ ଜଣାପଡିବ।

Feb 18, 2026 13:48 IST

ଠିକାଦାରଙ୍କ ସନ୍ଦେହଜନକ ମୃତ୍ୟୁ

ଯାଜପୁର: ପାଣିକୋଇଲି ଅଞ୍ଚଳରେ ଥିବା ଆଶୀର୍ବାଦ ରାଇସ ମିଲରେ ଶ୍ରମିକ ଯୋଗାଉଥିବା ଠିକାଦାର ସ୍ଥାନୀୟ ଧନପୁର ଗ୍ରାମର ଶ୍ରୀଧର ବାରିକଙ୍କ ସନ୍ଦେହଜନକ ମୃତ୍ୟୁ। ମିଲ୍ ସମ୍ମୁଖରେ ଉତ୍ତେଜନା।

Feb 18, 2026 13:02 IST

କୂଅରୁ ଉଦ୍ଧାର ହେଲା ଝାରଖଣ୍ଡୀ ହାତୀ

ରାଉରକେଲା: ବୁଧବାର ସକାଳୁ ଏକ ଝାରଖଣ୍ଡୀ ହାତୀ ନୂଆଗାଁ ପଂଚାୟତ ଅନ୍ତର୍ଗତ ଗୋଲଦାରୁ ସାହୁବସ୍ତି ସ୍ଥିତ ଏକ ଚାଷ ଜମିରେ ଥିବା ଚଉତରା ବିହୀନ କୂଅ ଭିତରେ ପଡିଯାଇଥିଲା। ଖବର ପାଇ ନୂଆଗାଁ ଫାଣ୍ଡି ଅଧିକାରୀ ପ୍ରଫୁଲ୍ଲ କୁମାର ସେଠୀ, ଏ ଏସ ଆଇ ସୁଶାନ୍ତ ପାତ୍ର ଏବଂ ହାତିବାରୀ ଫରେଷ୍ଟର ସୁଶୀଲ କେରକେଟା ଘଟଣା ସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟରେ ଲାଗିପଡ଼ିଥିଲେ।



ପରେ ବିଭାଗୀୟ କର୍ତ୍ତୃପକ୍ଷ ଦୁଇଟି ଜେସିବି ମେସିନ ଆଣି ତାହାରି ସାହାଯ୍ୟରେ କୂଅର ଗୋଟିଏ ପାଖରୁ ମାଟି ଖୋଳି କୂଅ ଭିତରକୁ ରାସ୍ତା ତିଆରି କଲେ। ଏହି ରାସ୍ତା ଦେଇ ହାତୀଟି ଆରାମରେ କୂଅ ଭିତରୁ ବାହାରି ଆସିଥିଲା। ହାତୀଟି କୂଅରୁ ବାହାରିବା ପରେ ନିକଟସ୍ଥ ତାଇନ୍ଦା ଜଙ୍ଗଲକୁ ଚାଲିଯାଇଥିଲା।

Feb 18, 2026 12:56 IST

ବଡ଼ବାହାଲ - କୁଣ୍ଡୁକେଲା ରାସ୍ତାରେ ଟ୍ରେଲର ଓ ପିକଅପ୍ ଭ୍ୟାନ ଧକ୍କା, ଚାରି ଆହତ

ସୁନ୍ଦରଗଡ଼: ଆଜି ସକାଳ ୯ଟାରେ  ବିଜୁ ଏକ୍ସପ୍ରେସ ୱେ ବଡ଼ବାହାଲ- କୁଣ୍ଡୁକେଲା ରାସ୍ତାରେ ଘଟିଛି ଦୁର୍ଘଟଣା । କୁଣ୍ଡୁକେଲା ପଟୁ ଭେଡ଼ାବାହାଲ ଅଭିମୁଖେ ଆସୁଥିବା ପିକଅପ୍ ଭ୍ୟାନକୁ ପଛପଟୁ ଜୋରରେ ଧକ୍କା ଦେଇଛି ଏକ  ଟ୍ରେଲର। ଧକ୍କାରେ ପିକଅପ୍ ଭ୍ୟାନ ଓଲଟି ପଡ଼ିବାରୁ ଚାଳକଙ୍କ ସମେତ ୪ ଜଣ  ଆହତ ହୋଇଛନ୍ତି।



ଖବର ପାଇ ଏଲ୍ ଆଣ୍ଡ ଟି ଉଦ୍ଧାରକାରୀ ଦଳ ସମସ୍ତ ଆହତଙ୍କୁ ସୁନ୍ଦରଗଡ଼ ବଡ଼ ଡାକ୍ତରଖାନା ପଠାଇବା ସହ ଭଷ୍ମା ପୁଲିସକୁ ସୂଚନା ଦେଇଥିଲେ। ତେବେ ଦୁର୍ଘଟଣା ପରେ ଆକ୍ରମଣ ଭୟରେ ଟ୍ରେଲର୍ ଚାଳକ ଗାଡ଼ି ଛାଡ଼ି ଜଙ୍ଗଲ  ଦେଇ ଫେରାର ହୋଇଯାଇଥିବା ସୂଚନା ମିଳିଛି। ଭଷ୍ମା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି।

Feb 18, 2026 11:50 IST

ଅପରାହ୍ଣ ୪ଟା ଯାଏ ଗୃହ ମୁଲତବୀ

ଭୁବନେଶ୍ବର: ପୁଣି ଗୃହରେ ବିରୋଧୀ କଂଗ୍ରେସ ଓ ବିଜେଡିର ସଦସ୍ୟମାନେ ନାରାବାଜି କରିବାରୁ ଅପରାହ୍ଣ ୪ଟା ଯାଏ ଗୃହ ମୁଲତବୀ। ବିଧାନସଭାର ଦ୍ବିତୀୟ ଅଧିବେଶନ ଆରମ୍ଭରୁ ଚାଷୀ ପ୍ରସଙ୍ଗରେ ବିଜେଡି ସଦସ୍ୟଙ୍କ ହୋହାଲ୍ଲା କରିଥିଲେ।



ଏଥିପାଇଁ ବାଚସ୍ପତି ପୂର୍ବାହ୍ନ ସାଢ଼େ ୧୧ଟା ଯାଏ ଗୃହକୁ ମୁଲତବୀ ଘୋଷଣା କରିଥିଲେ।

Feb 18, 2026 11:45 IST

ମହାନଦୀ ସେତୁରୁ ଡେଇଁ ମହିଳାଙ୍କ ଆତ୍ମହତ୍ୟା

ବୁର୍ଲା: ୫୩ ନଂ ଜାତୀୟ ରାଜପଥର ବୁର୍ଲା-ସମ୍ବଲପୁର ମହାନଦୀ ସେତୁ ଉପରୁ ଜଣେ ମହିଳା ନଦୀକୁ ଡେଇଁ ଆତ୍ମହତ୍ୟା କରିଛନ୍ତି। ମହିଳା ଜଣକ ବୁର୍ଲା ସହର ମହତାବ ନଗରର ଅଞ୍ଜୁ କୁମ୍ଭାର(୨୨) ବୋଲି ଜଣାଯାଇଛି। ଖବର ପାଇ ବୁର୍ଲା ପୁଲିସ ଘଟଣାସ୍ଥଳକୁ ପହଞ୍ଚି ଉଦ୍ଧାର କରି ଭିମ୍ସାର ବଡ଼ଡାକ୍ତରଖାନାକୁ ନେଇଥିଲା। ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।



ମହିଳା ଜଣକ ବିବାହିତ ହୋଇଥିବା ବେଳେ ଆତ୍ମହତ୍ୟାର କାରଣ ସ୍ପଷ୍ଟ ହୋଇନାହିଁ। ପୁଲିସ ଘଟଣାର ତଦନ୍ତ କରୁଛି।

Feb 18, 2026 11:25 IST

ଗଛକୁ ଧକ୍କା ଦେଇ ବାଇକ ଦୁର୍ଘଟଣା, ଦୁଇ ଗୁରୁତରଙ୍କୁ ଉଦ୍ଧାର କଲା ଅଗ୍ନିଶମ ବାହିନୀ

ଜହ୍ନ।ପଙ୍କ: ବୌଦ୍ଧ ଅଗ୍ନିଶମ ବାହିନୀ ଫୁରୁଡା ନିକଟରେ ବାଇକ ଦୁର୍ଘଟଣାରେ ଗୁରୁତର ଦୁଇ ବାଇକ ଆରୋହୀଙ୍କୁ ଉଦ୍ଧାର କରି ବୌଦ୍ଧ ଡାକ୍ତରଖାନାରେ ଭର୍ତ୍ତି କରିଛି| 



ମିଳିଥିବା ସୂଚନା ଅନୁଯାୟୀ ମଙ୍ଗଳବାର ବିଳମ୍ବିତ ରାତି ପ୍ରାୟ ୩ଟା ସମୟରେ ବୌଦ୍ଧ ଥାନା ବିରିଗଡ ଗ୍ରାମର ବାବୁଲି ନାଏକ ଓ ଜହ୍ନ।ପଙ୍କ ଗ୍ରାମର ସପ୍ତେଶ୍ୱର ଅମାତଙ୍କ ସହ ଏକ ବାଇକ ଯୋଗେ ବଘିଆପଡା ପଟୁ ବିରିଗଡ ଅଭିମୁଖେ ଯାଉଥିଲେ l ଫୁରୁଡା ନିକଟରେ ବାଇକ ଭାରସାମ୍ୟ ହରାଇ ରାସ୍ତାକଡ଼ର ଏକ କଦମ୍ବ ଗଛକୁ ଧକ୍କା ଦେଇଥିଲା l ଫଳରେ ଉଭୟେ ଗୁରୁତର ଆହତ ହୋଇ ତଳେ ପଡ଼ିଥିଲେ | ସକାଳେ ସ୍ଥାନୀୟ ଲୋକେ ଦେଖିବା ପରେ ବୌଦ୍ଧ ଅଗ୍ନିଶମ ବାହିନୀକୁ ଖବର ଦେଇଥିଲେ ଓ ଅଗ୍ନିଶମ ବାହିନୀ ଉଭୟଙ୍କୁ ଉଦ୍ଧାର କରି ବୌଦ୍ଧ ଡାକ୍ତରଖାନାରେ ଭର୍ତ୍ତି କରିଛି | ଉଭୟଙ୍କ ଅବସ୍ଥା ଗୁରୁତର ଥିବା ସୂଚନା ମିଳିଛି |

Feb 18, 2026 11:19 IST

ଗୋ ମାଂସ ଖାଉଥିବା ନେଇ ନିମେଇ ମେହେରଙ୍କ ଘର ଜାଳି ଦେଲେ ଗାଁ ଲୋକେ

ଦଶପଲ୍ଲା: ଦଶପଲ୍ଲା ଏନ୍‌ଏସି ଅନ୍ତର୍ଗତ ମୋଚି ସାହିର ନିମ‌େଇ ମେହେରଙ୍କ ଘରେ ସଦସ୍ୟମାନେ ଗୋ ମାଂସ ଖାଉଥିବା ନେଇ ଘର ଜାଳି ଦେଲେ ଗାଁ ଲୋକେ। ଘଟଣା ସ୍ଥଳରେ ଦଶପଲ୍ଲା ପୁଲିସ ପହଞ୍ଚି ବୁଝାସୁଝା କରୁଛି।



ଏହି ଘଟଣାରେ ନିମେଇ ମେହେର ଓ ଶାନ୍ତି ମେହେରଙ୍କୁ ଦଶପଲ୍ଲା ପୁଲିସ ଅଟକ ରଖିଛି। ଘରେ ସେମାନେ ଗୋମାଂସକୁ ଶୁଖାଇଥିବାର ବି ଅଭିଯୋଗ ହୋଇଛି।

Feb 18, 2026 11:00 IST

୧୦ଟି ରାଜ୍ୟର ୩୭ଟି ରାଜ୍ୟସଭା ଆସନ ପାଇଁ ନିର୍ବାଚନ ଘୋଷଣା



ନୂଆଦିଲ୍ଲୀ: ନିର୍ବାଚନ କମିସନ ୧୦ଟି ରାଜ୍ୟର ୩୭ଟି ଖାଲି ପଡ଼ିଥିବା ରାଜ୍ୟସଭା ଆସନ ପାଇଁ ନିର୍ବାଚନ ଘୋଷଣା କରିଛନ୍ତି। କମିସନ ଘୋଷଣା କରିଛନ୍ତି ଯେ ନିର୍ବାଚନ ୧୬ ମାର୍ଚ୍ଚରେ ଅନୁଷ୍ଠିତ ହେବ। କମିସନ ଘୋଷଣା କରିଛନ୍ତି ଯେ ମହାରାଷ୍ଟ୍ର, ଓଡ଼ିଶା, ତେଲେଙ୍ଗାନା, ତାମିଲନାଡୁ, ଛତିଶଗଡ଼, ପଶ୍ଚିମବଙ୍ଗ, ଆସାମ, ହରିୟାଣା, ହିମାଚଳ ପ୍ରଦେଶ ଏବଂ ବିହାରର ଆସନ ପାଇଁ ନିର୍ବାଚନ ଅନୁଷ୍ଠିତ ହେବ। ଏହି ଆସନଗୁଡ଼ିକ ଏପ୍ରିଲରେ ଭିନ୍ନ ଭିନ୍ନ ତାରିଖରେ ଶେଷ ହୁଏ। ଉଲ୍ଲେଖନୀୟ ଯେ ରାଜ୍ୟସଭାର କାର୍ଯ୍ୟକାଳ ଛଅ ବର୍ଷ ହୋଇଥାଏ, କିନ୍ତୁ ପ୍ରତି ଦୁଇ ବର୍ଷରେ ଏକ ତୃତୀୟାଂଶ ଆସନ ପାଇଁ ନିର୍ବାଚନ ଅନୁଷ୍ଠିତ ହୁଏ। ଏହି କାରଣରୁ ରାଜ୍ୟସଭାକୁ ସ୍ଥାୟୀ ଗୃହ କୁହାଯାଏ। କାରଣ, ଲୋକସଭା ପରି ନୁହେଁ, ରାଜ୍ୟସଭା କେବେ ବି ଭଙ୍ଗ ହୁଏ ନାହିଁ।

Feb 18, 2026 10:46 IST

କ୍ରିକେଟ ବେଟିଂ ଚଢ଼ଉ,  ୧୫ ଅଟକ

ରାଉରକେଲା: କ୍ରିକେଟ ବେଟିଂ ଚଢ଼ଉ,  ୧୫ ଅଟକ l ସହରର ୨୦ରୁ ଅଧିକ ଅଞ୍ଚଳରେ ଚଢ଼ଉ ଜାରି l ଏଥିରେ ନିୟୋଜିତ ହୋଇଛନ୍ତି ୨୦ ଇନ୍ସପେକ୍ଟର, ୮ ଡ଼ିଏସପି l



ବାସନ୍ତୀ କଲୋନି, ବନ୍ଧମୁଣ୍ଡା, ପାନପୋଷ,  ସିଭିଲଟାଉନ ସିପ, ଡେଲିମାର୍କେଟ, ଛେଣ୍ଡ କଲୋନି ଆଦି ସ୍ଥାନରେ ଚଢ଼ଉ କରାଯାଇଛି l ଅଟକଙ୍କ ମଧ୍ୟରେ ବ୍ୟବସାୟୀ ଓ ଦଲାଲ ରହିଥିବା ଜଣା ପଡିଛି l

Feb 18, 2026 10:43 IST

ବିଜେଡି ସଦସ୍ୟଙ୍କ ହୋହାଲ୍ଲା, ପୂର୍ବାହ୍ନ ସାଢ଼େ ୧୧ଟା ଯାଏ ଗୃହ ମୁଲତବୀ



ଭୁବନେଶ୍ବର: ବିଧାନସଭାର ଦ୍ବିତୀୟ ଅଧିବେଶନ ଆରମ୍ଭରୁ ଚାଷୀ ପ୍ରସଙ୍ଗରେ ବିଜେଡି ସଦସ୍ୟଙ୍କ ହୋହାଲ୍ଲା। ପୂର୍ବାହ୍ନ ସାଢ଼େ ୧୧ଟା ଯାଏ ଗୃହ ମୁଲତବୀ।

Feb 18, 2026 10:31 IST

ମାର୍ଚ୍ଚ ୧୬ରେ ଓଡ଼ିଶାର ୪ ଆସନ ପାଇଁ ରାଜ୍ୟସଭା ନିର୍ବାଚନ

ଭୁବନେଶ୍ବର: ମାର୍ଚ୍ଚ ୧୬ରେ ହେବ। ଓଡ଼ିଶାର ୪ ଆସନ ପାଇଁ ରାଜ୍ୟସଭା ନିର୍ବାଚନ। ୧୦ ରାଜ୍ୟର ୩୭ଟି ଆସନ ପାଇଁ ବି ହେବ ନିର୍ବାଚନ। ଏଥିଲାଗି ଫେବ୍ରୁଆରି ୨୨ରେ ବିଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ ପାଇବ।

Feb 18, 2026 10:01 IST

ସାମାନ୍ୟ ବଚସାରୁ ମଦ୍ୟପ ଯୁବକଙ୍କ ଗୁଳିକାଣ୍ଡ

ଭବାନୀପାଟଣା: କଳାହାଣ୍ଡି ଜିଲ୍କା ଭବାନୀପାଟଣା ସହର ବିବିସିପଡା ହନୁମାନ ମନ୍ଦିର ନିକଟରେ ଗତକାଲି ବିଳମ୍ବିତ ରାତିରେ ଗୁଳିକାଣ୍ଡ ହୋଇଛି। ଠିକା କାମକୁ ନେଇ ସାମାନ୍ୟ ବଚସାରୁ ଜଣେ ମଦ୍ୟପ ଯୁବକ ଗୁଳିକାଣ୍ଡ ଘଟାଇଥିବା ସୂଚନା ମିଳିଛି।



ଏହି ଘଟଣାରେ  ମୁଖ୍ୟ ବିବିସିପଡାର ଝସ ନାଏକ(୩୮) ଓ ଅନ୍ୟ ୨ଜଣ ଯୁବକଙ୍କୁ ଟାଉନ ଥାନା ପୁଲିସ ଅଟକ ରଖି ପଚରାଉଚରା କରିବା ସହ ସେମାନଙ୍କ ଠାରୁ ଦୁଇଟି ମାଉଜର ପିସ୍ତଲ ଜବତ କରିଥିବା ଜଣାପଡିଛି। ଏ ନେଇ ପୁଲିସ ତଦନ୍ତ ଜାରି ରଖିଛି।

Feb 18, 2026 09:21 IST

ରେଳଧାରଣାରୁ ମେଡିକାଲ୍ ଆଟେଣ୍ଡାଣ୍ଟଙ୍କ ମୃତଦେହ ଉଦ୍ଧାର

ବ୍ରହ୍ମପୁର: ଖଡାସିଙ୍ଗ୍ ରେଳଧାରଣାରୁ ଜଣେ ମହିଳାଙ୍କ ମୃତଦେହକୁ ଉଦ୍ଧାର କରିଛି ପୁଲିସ। ମୃତ ମହିଳା ଜଣଙ୍କ ହେଲେ ଗଜପତି ନଗର ତୃତୀୟ ଲାଇନର ରାଜଲକ୍ଷ୍ମୀ ସାହୁ ଓରଫ ପିଙ୍କି (୫୦)।



ରାଜଲକ୍ଷ୍ମୀ ଏମକେସିଜି ମେଡ଼ିକାଲରେ ଆଟେଣ୍ଡାଣ୍ଟ ଭାବେ କାର୍ଯ୍ୟ କରୁଥିଲେ। ରାଜଲକ୍ଷ୍ମୀଙ୍କ ମୃତଦେହ ନିକଟରୁ ଗୁରୁତର ଅବସ୍ଥାରେ ଜଣେ ଯୁବକଙ୍କୁ ଉଦ୍ଧାର କରାଯାଇ ଏମକେସିଜି ମେଡିକାଲରେ ଭର୍ତ୍ତି କରାଯାଇଛି। 

Feb 18, 2026 08:52 IST

ଆଜି ନେଦରଲାଣ୍ଡ୍‌ସକୁ ଭେଟିବ ଭାରତ


ଅହମଦାବାଦ: ଚଳିତ ଟ୍ବେଣ୍ଟି-୨୦ ବିଶ୍ବକପ୍‌ରେ ଆୟୋଜକ ଭାରତ ନିଜର ୩ ମ୍ୟାଚ୍‌ରୁ ୩ଟି ଯାକ ଜିତି ସୁପର-୮ ସ୍ଥାନ ନିଶ୍ଚିତ କରିଛି। ହେଲେ ଏହି ଦଳ ଏବେ ଗ୍ରୁପ୍‌-ଏ’ର ସମସ୍ତ ମ୍ୟାଚ୍‌ ଜିତି ସୁପର-୮ ଖେଳିବାର ଲକ୍ଷ୍ୟ ରଖିଛି। ତେଣୁ ବୁଧବାର ନେଦରଲାଣ୍ଡ୍‌ସ ବିପକ୍ଷ ଗ୍ରୁପ୍‌ର ଶେଷ ମ୍ୟାଚ୍‌ରେ ପୂରା ଶକ୍ତି ସହ ଓହ୍ଲାଇବ। କଲମ୍ବୋରେ ଚୀରପ୍ରତିଦ୍ବନ୍ଦ୍ବୀ ପାକିସ୍ତାନ ବିପକ୍ଷ ହାଇଭୋଲ୍‌ଟେଜ୍‌ ମ୍ୟାଚ୍‌ ଜିତି ଭାରତୀୟ ଖେଳାଳି ଅହମଦାବାଦରେ ସୋମବାର ପହଞ୍ଚି ଯାଇଛନ୍ତି। ବିପକ୍ଷରେ ଦୂର୍ବଳ ଦଳ ଥିଲେ ମଙ୍ଗଳବାର ମୋଟରା ଷ୍ଟାଡିୟମ୍‌ରେ ହାଲ୍‌କା ଅଭ୍ୟାସ କରିଛନ୍ତି।

ଗତ ୩ ମ୍ୟାଚ୍‌ରେ ଭାରତ ପ୍ରଥମେ ବ୍ୟାଟିଂ କରିଥିଲେ ମଧ୍ୟ ୨୦୯ ରନ୍‌ଠୁ ଅଧିକ ସ୍କୋର୍‌ କରିନି। ନେଦରଲାଣ୍ଡ୍‌ସ ବିପକ୍ଷରେ ବଡ଼ ସ୍କୋର୍‌ କରିବାକୁ ଚେଷ୍ଟା କରିବ ଭାରତ। ଅହମଦାବାଦ ପିଚ୍‌ ବି ସହାୟତା ଦେବା ସମ୍ଭାବନା ରହିଛି। ଏଠାରେ ଖେଳାଯାଇଥିବ ଗତ ୫ ମ୍ୟାଚ୍‌ରୁ ୪ ଥର ସ୍କୋର୍‌ ୨୧୦ ଉପରେ ରହିଛି। ଭାରତର ଯୁବ ବିସ୍ଫୋରକ ବ୍ୟାଟର୍‌ ଅଭିଷେକ ଶର୍ମା ୨ ମ୍ୟାଚ୍‌ ଖେଳିଥିଲେ ମଧ୍ୟ ଖାତା ଖୋଲିପାରି ନାହାନ୍ତି। ଏହି ମ୍ୟାଚ୍‌ରେ ରନ୍‌ କରି ସୁପର-୮ ପୂର୍ବରୁ ନିଜ ଆତ୍ମବିଶ୍ବାସ ଉଚ୍ଚରେ ରଖିବା ଆଶାରେ ଅଛନ୍ତି ସେ। ଅଭିଷେକଙ୍କ ସହ ଈଶାନ କିଶାନଙ୍କ ବ୍ୟାଟ୍‌ ପୂର୍ବପରି ଚାଲିବ ତେବେ ଭାରତ ନିଶ୍ଚିତ ବଡ଼ ସ୍କୋର୍‌ କରିପାରିବ। ଗତ ମ୍ୟାଚ୍‌ରେ ଖେଳିଥିବା ଏକାଦଶରୁ ଭାରତ କେବଳ କୁଲଦୀବ ଯାଦବଙ୍କୁ ବାଦ୍‌ ଦେଇ ଅର୍ଶଦୀପ ସିଂହଙ୍କୁ ସାମିଲ କରିପାରେ। ତାରକା ଦ୍ରୁତବୋଲର ଯଶପ୍ରୀତ ବୁମ୍‌ରାଙ୍କୁ ବିଶ୍ରାମ ଦେବନି ବୋଲି ବ୍ୟାଟିଂ ପ୍ରଶିକ୍ଷକ ସୀତାଂଶୁ କୋଟାକ୍‌ ସୂଚନା ଦେଇଛନ୍ତି।

Feb 18, 2026 08:48 IST

ବୀରମହାରାଜପୁରରେ ସଡ଼କ ଦୁର୍ଘଟଣା, ତିନି ମୃତ



ବୀରମହାରାଜପୁର: ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ଥାନା ହିଲୁଙ୍ଗ ମୁର୍ଷୁଣ୍ଢୀ ରାସ୍ତା ହିଲୁଙ୍ଗ ଛକ ନିକଟରେ ଦୁଇ ବାଇକ ମୁହାଁମୁହିଁ ଧକ୍କା।  ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ଡାକ୍ତରଖାନାରେ ଏବଂ ଆଉ ଜଣଙ୍କୁ ବୁର୍ଲା ନିଆଯିବା ବାଟରେ ମୃତ୍ୟୁ ଘଟିଛି। 

 

Feb 18, 2026 07:48 IST

‌‌ଆମେରିକା ସେନା ଆକ୍ରମଣରେ ୧୧ ଜଣଙ୍କ ମୃତ୍ୟୁ



ୱାସିଂଟନ: ଆମେରିକୀୟ ସେନା ମଙ୍ଗଳବାର ଦିନ କହିଛି ଯେ ଲାଟିନ୍ ଆମେରିକୀୟ ଜଳସୀମାରେ ନିଶା କାରବାର ସନ୍ଦେହରେ ତିନୋଟି ଡଙ୍ଗା ଉପରେ ଆକ୍ରମଣ କରିଛି, ଯେଉଁଥିରେ ୧୧ ଜଣଙ୍କର ମୃତ୍ୟୁ ହୋଇଛି। ଏହା ଟ୍ରମ୍ପ ପ୍ରଶାସନର ମାସାଧିକ କାଳର ଅଭିଯାନର ସବୁଠାରୁ ଘାତକ ଦିନ ଥିଲା। ସେପ୍ଟେମ୍ବର ଆରମ୍ଭରୁ ଛୋଟ ଡଙ୍ଗାରେ କାର୍ଯ୍ୟ କରୁଥିବା ‘ନାର୍କୋଟ୍ରାରଷ୍ଟ’ ଭାବରେ ବର୍ଣ୍ଣିତ ବ୍ୟକ୍ତିମାନଙ୍କୁ ଟାର୍ଗେଟ କରି ଆମେରିକୀୟ ସେନା ଏପର୍ଯ୍ୟନ୍ତ ୧୪୫ ଜଣଙ୍କ ଜୀବନ ନେଇଛି।

Feb 18, 2026 07:06 IST

ରାଜସ୍ଥାନରେ କୁଆପଥର ବର୍ଷା ସମ୍ଭାବନା



ନୂଆଦିଲ୍ଲୀ: ପାଣିପାଗ ଏକ ନୂତନ ମୋଡ଼ ନେଉଛି। ଆଜି ପାଗରେ ଅପ୍ରତ୍ୟାଶିତ ପରିବର୍ତ୍ତନ ଦେଖିବାକୁ ମିଳିପାରେ। ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ ଶୀତ ବିଦାୟ ନେବା ସହିତ ସମତଳ ଅଞ୍ଚଳରେ ବର୍ଷା ହେବାର ସମ୍ଭାବନା ଅଛି। ପାହାଡ଼ିଆ ରାଜ୍ୟରେ ତୁଷାରପାତ ହେବାର ସମ୍ଭାବନା ଅଛି।  ରାଜସ୍ଥାନର କିଛି ସ୍ଥାନରେ ହାଲୁକା ବର୍ଷା ହେବାର ସମ୍ଭାବନା ଅଛି। ପାଣିପାଗ ବିଭାଗ ଏହି ସୂଚନା ଦେଇଛି। ବାୟୁମଣ୍ଡଳ ସକ୍ରିୟ ହେବା ଯୋଗୁଁ ଆଜି ଅପରାହ୍ନରେ ଯୋଧପୁର, ବିକାନେର, ଆଜମେର, ଜୟପୁର ଏବଂ ଉଦୟପୁର ଡିଭିଜନର କିଛି ସ୍ଥାନରେ ହାଲୁକା ବର୍ଷା ହେବାର ସମ୍ଭାବନା ଅଛି। ବିକାନେର, ଆଜମେର, ଜୟପୁର, ଭରତପୁର, କୋଟା ଡିଭିଜନ ଏବଂ ଶେଖାବତୀ ଅଞ୍ଚଳରେ ଏହି ବାୟୁମଣ୍ଡଳ ସବୁଠାରୁ ଗୁରୁତର ହେବ। କିଛି ଅଞ୍ଚଳରେ ହାଲୁକାରୁ ମଧ୍ୟମ ବର୍ଷା ହେବାର ସମ୍ଭାବନା ଅଛି। ଏହି ସମୟ ମଧ୍ୟରେ, କିଛି ଅଞ୍ଚଳରେ ଘଣ୍ଟା ପ୍ରତି ୩୦-୪୦ କିଲୋମିଟର ବେଗରେ ପ୍ରବଳ ପବନ ବହିବାର ସମ୍ଭାବନା ରହିଛି।

Feb 18, 2026 07:01 IST

କଂଗ୍ରେସରୁ ଇସ୍ତଫା, ବିଜେପିରେ ଯୋଗଦେବେ ଭୂପେନ ବୋରା



ଗୁଆହାଟୀ: କଂଗ୍ରେସରୁ ଇସ୍ତଫା ଦେଇଥିବା ଆସାମର ବରିଷ୍ଠ ନେତା ଭୂପେନ ବୋରା ଏବେ ବିଜେପିରେ ଯୋଗ ଦେବାକୁ ଯାଉଛନ୍ତି। ସେ ୨୦୨୧ ରୁ ୨୦୨୫ ପର୍ଯ୍ୟନ୍ତ ଆସାମ କଂଗ୍ରେସର ସଭାପତି ଭାବରେ କାର୍ଯ୍ୟ କରିଥିଲେ। ତାଙ୍କ ଇସ୍ତଫା ପରେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସର୍ମା ମଙ୍ଗଳବାର ଘୋଷଣା କରିଛନ୍ତି ଯେ ବୋରା ଫେବ୍ରୁଆରି ୨୨ରେ ବିଜେପିରେ ଯୋଗଦେବେ। ଭୁପେନ ବୋରା ଫେବୃଆରୀ ୧୬ରେ କଂଗ୍ରେସରୁ ଇସ୍ତଫା ଦେଇଥିଲେ। କିନ୍ତୁ ଦଳର ହାଇକମାଣ୍ଡ ତାଙ୍କ ଇସ୍ତଫା ଗ୍ରହଣ କରିନଥିଲେ। ରାହୁଲ ଗାନ୍ଧୀ ବୋରାଙ୍କୁ ମନାଇବାକୁ ଚେଷ୍ଟା କରି ତାଙ୍କୁ ତାଙ୍କ ନିଷ୍ପତ୍ତି ପୁନର୍ବିଚାର କରିବାକୁ ପରାମର୍ଶ ଦେଇଥିଲେ। ସାମ୍ବାଦିକମାନଙ୍କ ସହ କଥାବାର୍ତ୍ତା କରି ହିମନ୍ତ ବିଶ୍ୱ ସର୍ମା କହିଛନ୍ତି, ଭୁପେନ ବୋରା ଫେବ୍ରୁଆରି ୨୨ରେ ବିଜେପିରେ ଯୋଗଦେବେ। ଦିଲୀପ ସାଇକିଆ ପ୍ରକ୍ରିୟାକୁ ଚୂଡ଼ାନ୍ତ କରିବେ। ଗୁଆହାଟୀ ଏବଂ ଉତ୍ତର ଲଖିମପୁରରେ ମଧ୍ୟ ବହୁ ସଂଖ୍ୟକ କଂଗ୍ରେସ ନେତା ବିଜେପିରେ ଯୋଗଦେବେ। 

Feb 18, 2026 06:56 IST

୧୧ ମାସ ପରେ ପୁଣି ଥରେ ମାଆ ହେଲେ ସୀମା ହାଇଦର!



ନୂଆଦିଲ୍ଲୀ: ଗତ କିଛି ବର୍ଷ ଧରି ଗଣମାଧ୍ୟମ ଏବଂ ସୋସିଆଲ ମିଡିଆର ଶିରୋନାମାରେ ଥିବା ସୀମା ହାଇଦର ପୁଣି ଥରେ ଚର୍ଚ୍ଚାରେ ଅଛନ୍ତି। ତାଙ୍କ ନାମ ସବୁବେଳେ ଖବରରେ ରହିଆସିଛି। କେତେବେଳେ ତାଙ୍କ ବ୍ୟକ୍ତିଗତ ଜୀବନ ପାଇଁ, କେତେବେଳେ ଆଇନଗତ ଜଟିଳତା ପାଇଁ, ଆଉ କେତେବେଳେ ସୋସିଆଲ ମିଡିଆରେ ଭାଇରାଲ ବୟାନ ପାଇଁ। ଗ୍ରେଟର ନୋଏଡାରୁ ଏକ ନୂତନ ଖବର ତାଙ୍କୁ ପୁଣି ଥରେ ଜାତୀୟ ବିତର୍କର ଅଂଶ କରିଛି। ସୂଚନା ମିଳୁଛି ଯେ ସୀମା ହାଇଦର ଏକ ପୁତ୍ର ସନ୍ତାନକୁ ଜନ୍ମ ଦେଇଛନ୍ତି। ଏହି ଖବର ଇଣ୍ଟରନେଟରେ ପ୍ରତିକ୍ରିୟାର ବନ୍ୟା ସୃଷ୍ଟି କରିଛି। ସୀମା ହାଇଦର ଗତ ବର୍ଷ ମାର୍ଚ୍ଚ ମାସରେ ତାଙ୍କ ପଞ୍ଚମ ସନ୍ତାନର ମାଆ ହୋଇଥିଲେ।

ସୂତ୍ର ଅନୁସାରେ, ଗ୍ରେଟର ନୋଏଡାର ଏକ ଘରୋଇ ହସ୍ପିଟାଲରେ ପ୍ରସବ ହୋଇଥିଲା। ଡାକ୍ତରଙ୍କ କଡ଼ା ତଦାରଖରେ ପ୍ରସବ ହୋଇଥିଲା ଏବଂ ମା ଏବଂ ପିଲା ଉଭୟ ସୁସ୍ଥ ଥିବା ଜଣାପଡ଼ିଛି। ହସ୍ପିଟାଲରୁ ଡିସଚାର୍ଜ ହେବା ପରେ ଘରକୁ ପହଞ୍ଚିବା ପରେ ତାଙ୍କ ପରିବାର ପୁଅ ଜନ୍ମ ପାଇଁ ମିଠା ବଣ୍ଟନ କରିଥିଲେ। ପାଖରେ ଥିବା ଲୋକମାନେ ମଧ୍ୟ ଶୁଭକାମନା ଜଣାଇଥିଲେ। ସୀମା ଗତ ବର୍ଷ ମାର୍ଚ୍ଚ ମାସରେ ଏକ କନ୍ୟା ସନ୍ତାନକୁ ଜନ୍ମ ଦେଇଥିଲେ। ଏବେ ପ୍ରାୟ ଏଗାର ମାସ ପରେ ପରିବାରରେ ଆଉ ଏକ ପିଲାର ଆଗମନ ସହିତ ଖୁସି ଦ୍ୱିଗୁଣିତ ହୋଇଯାଇଛି।

Feb 18, 2026 06:52 IST

ସାଉଦି ଆରବ, ୟୁଏଇରେ ରମଜାନ ମାସ ଆରମ୍ଭ

ରିଆଦ: ସାଉଦି ଆରବ ଏବଂ ୟୁଏଇ ସମେତ ଉପସାଗରୀୟ ଅଞ୍ଚଳରେ ରମଜାନ ମାସ ଆରମ୍ଭ ହୋଇଛି। ମଙ୍ଗଳବାର ସନ୍ଧ୍ୟାରେ ସାଉଦି ଆରବ ଏବଂ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ଚନ୍ଦ୍ର ଦେଖାଯାଇଥିଲା। ଏହା ପରେ ବୁଧବାର ପ୍ରଥମ ରୋଜା ପାଳନ କରାଯିବ ବୋଲି ଘୋଷଣା କରାଯାଇଥିଲା। ଆଫଗାନିସ୍ତାନରେ ମଧ୍ୟ ବୁଧବାର ରମଜାନର ପ୍ରଥମ ଦିନ। ଭାରତ, ପାକିସ୍ତାନ ଏବଂ ଅନ୍ୟାନ୍ୟ ପଡ଼ୋଶୀ ଦେଶରେ ରମଜାନ ଫେବ୍ରୁଆରି ୧୯ ଦିନ ଆରମ୍ଭ ହେବ। ସାଉଦି ଆରବର ଚନ୍ଦ୍ର ଦେଖିଥିବା ନେଇ ସ୍ପଷ୍ଟ କରିଥିବା କମିଟି ଦ୍ୱାରା ଘୋଷଣା ପରେ ସରକାରୀ ସାଉଦି ପ୍ରେସ୍ ଏଜେନ୍ସି ଘୋଷଣା କରିଥିଲା ​​ଯେ ସାଉଦି ଆରବରେ ପବିତ୍ର ରମଜାନ ମାସର ପ୍ରଥମ ଦିନ ବୁଧବାର ହେବ। ଏଜେନ୍ସି ମଙ୍ଗଳବାର ଦିନ ରିପୋର୍ଟ କରିଥିଲା ​​ଯେ ସାଉଦି ଆରବରେ ରମଜାନ ମାସର ଚନ୍ଦ୍ର ଦେଖାଯାଇଛି।

Feb 18, 2026 06:48 IST

ପ୍ରଧାନମନ୍ତ୍ରୀ ମୋଦୀଙ୍କ ସହ ତାଙ୍କର ଫଟୋ ସେୟାର କରି ‘ଜୟ ହୋ’ ଲେଖିଲେ ଫ୍ରାନ୍ସ ରାଷ୍ଟ୍ରପତି


ନୂଆଦିଲ୍ଲୀ: ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକ୍ରୋନ୍ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ତାଙ୍କର ଏକ ଫଟୋ ପୋଷ୍ଟ କରିଛନ୍ତି। ଫଟୋର କ୍ୟାପସନରେ ମାକ୍ରୋନ୍ ଲେଖିଛନ୍ତି ‘ଜୟ ହୋକ୍ଷ। ଏହା ପୂର୍ବରୁ, ସେ ମୁମ୍ବାଇରେ ଭାରତ-ଫ୍ରାନ୍ସ ନବସୃଜନ ଫୋରମକୁ ସମ୍ବୋଧିତ କରିଥିଲେ। ସେ ଭାରତ-ଫ୍ରାନ୍ସ ରଣନୈତିକ ସହଭାଗୀର ଶକ୍ତି ଉପରେ ଗୁରୁତ୍ୱାରୋପ କରି କହିଥିଲେ ଯେ ଫ୍ରାନ୍ସ ଏକ ପ୍ରତିବଦ୍ଧ ଏବଂ ସ୍ଥାୟୀ ଅଂଶୀଦାର ଭାବରେ ଭାରତ ସହିତ ଦୃଢ଼ ଭାବରେ ଠିଆ ହୋଇଛି। ଫ୍ରାନ୍ସ ରାଷ୍ଟ୍ରପତି ଆହୁରି କହିଛନ୍ତି ଯେ ବିଶ୍ୱ ବିତର୍କ ଆଉ ଭାରତ ନବସୃଜନ କରେ କି ନାହିଁ, ବରଂ କିଏ ଏହା ସହିତ ନବସୃଜନ କରିବାକୁ ଚାହେଁ ସେ ବିଷୟରେ ନୁହେଁ। ଫ୍ରାନ୍ସ ହେଉଛି ଏକମାତ୍ର ସ୍ପଷ୍ଟ ଉତ୍ତର। ଆମେ ଏଠାରେ ଅଛୁ। ଆମେ ଆପଣଙ୍କ ସହିତ ଏଠାରେ ରହିବାକୁ ଚାହୁଁଛୁ। ଭାରତ-ଫ୍ରାନ୍ସ ସମ୍ପର୍କ ଦୀର୍ଘଜୀବୀ ହେଉ।