ବିର୍ସା ମୁଣ୍ଡାଙ୍କ ୧୫୦ତମ ଜୟନ୍ତୀ: ଦାୟଦଙ୍କ ମୁଣ୍ଡ ଗୁଞ୍ଜିବାକୁ ନାହିଁ ପକ୍କାଘର

ରାଉରକେଲା(ଦେବବ୍ରତ ଗଡ଼ତିଆ):  ମହାନ ବୀର ବିର୍ସା ମୁଣ୍ଡା ଜୟନ୍ତୀ ପାଳନ ହୋଇଛି। ୧୫୦ତମ ଜୟନ୍ତୀ ହୋଇଥିବାରୁ ଏହାକୁ ଦେଶବ୍ୟାପି ଜନଜାତୀୟ ଗୌରବଦିବସ ଭାବେ ପାଳନ କରାଯାଉଛି। ଏନେଇ ଦେଶବାସୀ ଉତ୍ସାହିତ ଥିବାବେଳେ ବିର୍ସା ମୁଣ୍ଡାଙ୍କ ବଂଶଜଙ୍କ ଦୁରାବସ୍ଥା ଉପରେ କିନ୍ତୁ କାହାରି ନଜର ନାହିଁ। ଏଯାଏ ସେମାନଙ୍କ ପାଖରେ ପକ୍କାଘର ଖଣ୍ଡେ ପହଞ୍ଚିପାରିନି। ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଖଣ୍ଡିଏ ଅନୁମୋଦିତ ହୋଇଛି ସତ, କିନ୍ତୁ ଜମି ଅଭାବରୁ ତିଆରି ହୋଇପାରିନି। ଆଦିବାସୀଙ୍କ ଜମି ସୁରକ୍ଷା ପାଇଁ ଇଂରେଜ ବିରୋଧରେ ସଂଗ୍ରାମ କରି ଯୁବାବସ୍ଥାରେ ସହିଦ ହୋଇଥିବା ବିର୍ସା ମୁଣ୍ଡାଙ୍କ ପରିବାରକୁ ଘର ପାଇଁ ଜମି ଗୁ​ଣ୍ଠେ ନ ମିଳିବା, ଏହି ମହାପୁରୁଷଙ୍କ ପ୍ରତି ଚରମ ଉପହାସ ବୋଲି ଆଲୋଚନା ହେଉଛି।