ଓଏଏସ୍‌ ଅଧିକାରୀଙ୍କ ସଂପତ୍ତି ବାଜ୍ୟାପ୍ତି ନିର୍ଦ୍ଦେଶ

କଟକ: ଆୟ ବହିର୍ଭୂତ ସଂପତ୍ତି ଠୁଳ ଅଭିଯୋଗ ସଂପର୍କିତ ମାମଲାର ଶୁଣାଣି କରି କଟକ ସ୍ୱତନ୍ତ୍ର ଭିଜିଲାନ୍ସ ଅଦାଲତର ପ୍ରାଧିକୃତ ଅଧିକାରୀ କନ୍ଧମାଳ ଜିଲ୍ଲାର ପୂର୍ବତନ ଅତିରିକ୍ତ ଉପଜିଲ୍ଲାପାଳଙ୍କ ରୁଦ୍ର ପ୍ରସନ୍ନ ସାହୁ(ଓଏଏସ୍‌)ଙ୍କ ସ୍ଥାବର ଓ ଅସ୍ଥାବର ସଂପତ୍ତି ବାଜ୍ୟାପ୍ତି କରିବା ପାଇଁ ନିର୍ଦ୍ଦେଶ ଦେଇଛନ୍ତି। ଶ୍ରୀ ସାହୁଙ୍କ ୪୫ ଲକ୍ଷ ୪୨ ହଜାର ୯୦୭ ଟଙ୍କାର ସଂପତ୍ତି ବାଜ୍ୟାପ୍ତି କରାଯିବ। ୩୦ ଦିନ ଭିତରେ ଶ୍ରୀ ସାହୁଙ୍କ ଏହି ସ୍ଥାବର ଓ ଅସ୍ଥାବର ସଂପତ୍ତି ବାଜ୍ୟାପ୍ତି କରାଯିବ। ମାମଲାର ବିବରଣୀରୁ ପ୍ରକାଶ ଯେ ଆୟ ବହିର୍ଭୂତ ସଂପତ୍ତି ଠୁଳ ଅଭିଯୋଗରେ ୨୦୦୯, ଅଗଷ୍ଟ ୨୧ରେ ଶ୍ରୀ ସାହୁଙ୍କ ଅନୁଗୋଳସ୍ଥିତ ପୈତୃକ ଘର ଓ କାର୍ଯ୍ୟାଳୟ ଉପରେ ଭିଜିଲାନ୍ସ ବିଭାଗ ଚଢାଉ କରିଥିଲା। ଶ୍ରୀ ସାହୁଙ୍କ ଆୟ ବହିର୍ଭୂତ ସଂପତ୍ତି ବାଜ୍ୟାପ୍ତି ପାଇଁ ଭିଜିଲାନ୍ସ ପ୍ରାଧିକୃତ ଅଧିକାରୀଙ୍କ ଦ୍ୱାରସ୍ଥ ହୋଇଥିଲା। ଭିଜିଲାନ୍ସ ପକ୍ଷରୁ ସ୍ପେଶାଲ ପବ୍ଲିକ୍‌ ପ୍ରସିକ୍ୟୁଟର ଗିରିଜା ପ୍ରସାଦ ପଟ୍ଟନାୟକ ମାମଲା ପରିଚାଳନା କରୁଥିଲେ।