ଅଧିକ ଯୌନକର୍ମୀ ଥିବା ୧୨ ରାଜ୍ୟ ମଧ୍ୟରେ ଓଡ଼ିଶା: ନାକୋ ରିପୋର୍ଟ

ଭୁବନେଶ୍ୱର: ଜାତୀୟ ଏଡସ୍ ନିୟନ୍ତ୍ରଣ ସଂଗଠନ (ନାକୋ)ର ଏକ ରିପୋର୍ଟରେ ମହିଳା ଯୌନ କର୍ମୀ ଏବଂ ପୁରୁଷମାନଙ୍କ ସହିତ ଯୌନ ସମ୍ପର୍କ ରଖୁଥିବା ପୁରୁଷ ଉଭୟଙ୍କ ସର୍ବାଧିକ ସଂଖ୍ୟା ଥିବା ଦେଶର ଶ୍ରେଷ୍ଠ ୧୨ଟି ରାଜ୍ୟ ମଧ୍ୟରେ ଓଡ଼ିଶାକୁ ସ୍ଥାନିତ କରାଯାଇଛି।

ଏହା ୨୦୨୨ ମସିହାରେ ନାକୋ ଦ୍ୱାରା କରାଯାଇଥିବା ପ୍ରୋଗ୍ରାମାଟିକ୍ ମ୍ୟାପିଂ ଏବଂ ଜନସଂଖ୍ୟା ଆକାର ଆକଳନର ନିଷ୍କର୍ଷ ଅନୁଯାୟୀ ପ୍ରକାଶ ପାଇଛି। ଯାହା ପିଅର-ସମୀକ୍ଷା କରାଯାଇଥିବା ଜର୍ଣ୍ଣାଲ୍ ପିଏଲଓଏସ ଗ୍ଲୋବାଲ୍ ପବ୍ଲିକ୍ ହେଲଥ୍‌ର ସାମ୍ପ୍ରତିକ ସଂଖ୍ୟାରେ ପ୍ରକାଶିତ ହୋଇଛି।

ଏହି ସର୍ଭେ ଦେଶର ୩୨ଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ୬୫୧ଟି ଜିଲ୍ଲାରେ କରାଯାଇଥିଲା।

ରିପୋର୍ଟ ଅନୁଯାୟୀ, ଓଡ଼ିଶାରେ ପ୍ରାୟ ୨୪,୬୨୦ ମହିଳା ‌ଯୌନକର୍ମୀ ଏବଂ ୫,୯୭୭ ପୁରୁଷ ଯୌନକର୍ମୀ ରେକର୍ଡ କରାଯାଇଛି। ଅପରପକ୍ଷରେ ଦେଶର ୯.୯୫ ଲକ୍ଷ ମହିଳା ଯୌନକର୍ମୀ ମଧ୍ୟରୁ, କର୍ଣ୍ଣାଟକରେ ୧.୫୩ ଲକ୍ଷ ମହିଳା ଯୌନକର୍ମୀ ରହିଛନ୍ତି। ଏହା ସହିତ କର୍ଣ୍ଣାଟକ ତାଲିକାର ଶୀର୍ଷରେ ରହିଛି। ଏହାପଛକୁ ଆନ୍ଧ୍ର ପ୍ରଦେଶ ଏବଂ ମହାରାଷ୍ଟ୍ର ରହିଛନ୍ତି। ଆନ୍ଧ୍ର ପ୍ରଦେଶ ଏବଂ ମହାରାଷ୍ଟ୍ରରେ ଯଥାକ୍ରମ‌େ ୧.୧୯ ଲକ୍ଷ ଏବଂ ୯୫,୩୫୧ ମହିଳା ଯୌନକର୍ମୀ ରହିଛନ୍ତି। 

ନାକ‌ୋ ଅନୁଯାୟୀ, ଓଡ଼ିଶାରେ ୨,୧୧୩ଟି ହଟସ୍ପଟ୍ ଏବଂ ୧୯୦ ନେଟୱାର୍କ ଅପରେଟର ଅଛି। ହଟସ୍ପଟ୍ ମଧ୍ୟରେ ବେଶ୍ୟାଳୟ, ଲଜ୍/ହୋଟେଲ, ରାସ୍ତା, ରେଳ ଷ୍ଟେସନ, ବସ୍-ଷ୍ଟାଣ୍ଡ, ପାର୍କ, ବଜାର, ବ୍ରିଜ୍ ତଳେ, ରାଜପଥ, ସ୍ପା ଏବଂ ପରିତ୍ୟକ୍ତ ଅଞ୍ଚଳ ଅନ୍ତର୍ଭୁକ୍ତ।

ରାଜ୍ୟରେ ପ୍ରତି ହଜାରେ ପ୍ରାପ୍ତବୟସ୍କ ମହିଳାଙ୍କ ମଧ୍ୟରୁ ୨ ଜଣ ଯୌନକର୍ମୀ ଅଛନ୍ତି। ପ୍ରାୟ ୮୮.୬ ପ୍ରତିଶତ ଘର କିମ୍ବା ରାସ୍ତା ସ୍ଥାନ ଭଳି ହଟସ୍ପଟ୍ ମାଧ୍ୟମରେ କାର୍ଯ୍ୟ କରନ୍ତି। ପ୍ରାୟ ଚାରି ପ୍ରତିଶତ କେବଳ ନେଟୱାର୍କ ଅପରେଟରଙ୍କ ସହିତ ଲିଙ୍କ୍ ହୋଇଛନ୍ତି, ଏବଂ ଲିଙ୍କ୍ ୱାର୍କର୍ ସ୍କିମ୍ (ଏଲଡବ୍ଲୁଏସ) ଅଧୀନରେ ଗ୍ରାମାଞ୍ଚଳରେ ୭.୪ ପ୍ରତିଶତ ମହିଳା ଯୌନକର୍ମୀ ରହିଛନ୍ତି। 

ଏହା ମଧ୍ୟ ରିପୋର୍ଟ କରାଯାଇଛି ଯେ,  ଓଡ଼ିଶାର ୧୦ ଜିଲ୍ଲାରେ ୧୦୦୦ ରୁ ୨୫୦୦ ମଧ୍ୟରେ ମହିଳା ଯୌନକର୍ମୀ ଅଛନ୍ତି। ସେହିପରି ୧୧ଟି ଜିଲ୍ଲାରେ ସେମାନଙ୍କର ସାନ୍ଦ୍ରତା ୫୦୦ ରୁ ୧୦୦୦ ପର୍ଯ୍ୟନ୍ତ  ଅଛି। କେବଳ ନଅଟି ଜିଲ୍ଲାରେ ୫୦୦ ରୁ କମ୍ ମହିଳା ଯୌନକର୍ମୀ ଅଛନ୍ତି।

ଅଧିକ ପଢ଼ନ୍ତୁ: ମେଧା ପାଟେକରଙ୍କୁ ଅଟକାଇଲା ପୁଲିସ

ରିପୋର୍ଟରେ କୁହାଯାଇଛି ଯେ, ଦେଶର ୩.୫୧ ଲକ୍ଷ ପୁରୁଷ ଯୌନକର୍ମୀଙ୍କ ମଧ୍ୟରୁ, କର୍ଣ୍ଣାଟକରେ ସର୍ବାଧିକ ୪୫,୬୩୦ ଜଣ ଅଛନ୍ତି। ସେହିପରି ମହାରାଷ୍ଟ୍ରରେ୪୦,୧୮୬ ଜଣ ଏବଂ ତାମିଲନାଡୁରେ ୩୮,୨୮୨ ଜଣ ପୁରୁଷ ଯୌନକର୍ମୀ ରହିଛନ୍ତି।

ନାକ‌ୋ ପକ୍ଷରୁ ଓଡ଼ିଶାର ୭୧୭ଟି ହଟସ୍ପଟ୍ ଏବଂ ୧୭୫ଟି ଏଲଡବ୍ଲୁଏସ ଗାଁରେ ୭,୨୦୯ ଜଣ ଟ୍ରାନ୍ସଜେଣ୍ଡରଙ୍କୁ ରେକର୍ଡ କରିଛି। ହଟସ୍ପଟ୍‌ରେ ୯୦.୮ ପ୍ରତିଶତ, ୯୧ଟି ନେଟୱାର୍କ ଅପରେଟରଙ୍କ ପାଖରେ ୬.୩୭ ପ୍ରତିଶତ ଏବଂ ଏଲଡବ୍ଲୁଏସ ଗାଁରେ ୨.୭୭ପ୍ରତିଶତ ଟ୍ରାନ୍ସଜେଣ୍ଡରଙ୍କୁ ମିଳିଛି।

ଅଧିକ ପଢ଼ନ୍ତୁ: ବିଶ୍ବ ପରିବେଶ ଦିବସ: ପ୍ଲାଷ୍ଟିକ୍ କବଳରେ ମଣିଷ, ପ୍ଲାଷ୍ଟିକ୍ ମୁକ୍ତ ଜୀବନ ପାଇଁ ଚାଲିଛି ପ୍ରୟାସ... ଜାରି ରହିଛି ସଂଘର୍ଷ

NACO | Odisha | sex-workers