ଇଲେକ୍ଟ୍ରୋନିକ୍ସ ହବ୍‌ ହେବ ଓଡ଼ିଶା: ପ୍ରଥମ ୧୦ଟି ପ୍ରକଳ୍ପ ପାଇଁ ପୁଞ୍ଜିନିବେଶ ଉପରେ ଅଧିକ ୫୦% ସବ୍‌ସିଡି

ଭୁବନେଶ୍ବର: ଓଡ଼ିଶାକୁ ଏକ ଇଲେକ୍ଟ୍ରୋନିକ୍ସ ହବ୍‌ରେ ପରିଣତ କରାଯିବ। ଏଥି ପାଇଁ ରାଜ୍ୟ ସରକାର ଇଲେକ୍ଟ୍ରୋନିକ୍ସ କମ୍ପୋନେଣ୍ଟ ମାନୁଫାକଚରିଂ (ଇଲେକ୍ଟ୍ରୋନିକ୍ସ ଯନ୍ତ୍ରପାତି ଉତ୍ପାଦନ) ନୀତି-୨୦୨୫ ଆଣିଛନ୍ତି। ଏହାର ଲକ୍ଷ୍ୟ ହେଉଛି ଓଡ଼ିଶାକୁ ଏକ ପ୍ରମୁଖ ଇଲେକ୍ଟ୍ରୋନିକ୍ସ ଉତ୍ପାଦନ କେନ୍ଦ୍ର ଭାବେ ପ୍ରତିଷ୍ଠା କରିବା, ଉଚ୍ଚ କୁଶଳୀ ନିଯୁକ୍ତି ପାଇଁ ସୁଯୋଗ ସୃଷ୍ଟି କରିବା ଏବଂ ଆମଦାନୀ ହେଉଥିବା ଯନ୍ତ୍ରାଂଶ ଉପରେ ଦେଶର ନିର୍ଭରଶୀଳତା ହ୍ରାସ କରିବା। 

ଓଡ଼ିଶାରେ କିପରି ଇଲେକ୍ଟ୍ରୋନିକ୍ସ ଯନ୍ତ୍ରପାତି ଯଥା ରେଜିଷ୍ଟର୍‌, କାପାସିଟର, ଇଣ୍ଡକ୍ଟର, ଡାୟୋଡ୍‌, ଟ୍ରାଞ୍ଜିଷ୍ଟର, ଇଣ୍ଟିଗ୍ରେଟେଡ୍ ସର୍କିଟ୍ ଅଧିକରୁ ଅଧିକ ଉତ୍ପାଦନ ହେବ। ଯେଉଁ ବିଦେଶୀ କମ୍ପାନି କିମ୍ବା ଆମ ଦେଶର କମ୍ପାନିଗୁଡ଼ିକ ପୁଞ୍ଜିନିବେଶ କରିବାକୁ ଚାହିଁବେ ସେମାନଙ୍କ ପ୍ରଥମ ପସନ୍ଦ ଯେପରି ଓଡ଼ିଶା ହେବ, ସେଥିପାଇଁ ରାଜ୍ୟ ସରକାର ଏହି ନୀତି ଆଣିଛନ୍ତି। ଆଜି ଲୋକସେବା ଭବନ ସମ୍ମିଳନୀ କକ୍ଷରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟ୍ ବୈଠକରେ ଉପରୋକ୍ତ ପ୍ରସ୍ତାବ ସମେତ ୩ଟି ବିଭାଗର ୪ଟି ପ୍ରସ୍ତାବ ଉପରେ ମୋହର ବାଜିଛି।

ଯାହା ପ୍ରକଳ୍ପ ନିବେଶର ୭୫% ମଧ୍ୟରେ ସୀମିତ। ୫୦୦କୋଟି ଟଙ୍କାରୁ ଅଧିକ ନିବେଶ କିମ୍ବା ୧୦୦୦ରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି କରୁଥିବା ମେଗା ପ୍ରକଳ୍ପଗୁଡ଼ିକ ପାଇଁ ସ୍ବତନ୍ତ୍ର ବ୍ୟବସ୍ଥା ରହିଛି। ସେମାନଙ୍କୁ କଷ୍ଟମାଇଜ୍ ରିହାତି ପ୍ରଦାନ କରାଯିବ। ସେହିପରି ରାଜ୍ୟର ସୂଚନା ଓ ଯୋଗାଯୋଗ ପ୍ରଯୁକ୍ତିବିଦ୍ୟା (ଆଇସିଟି)ର ଅଭିଭୃଦ୍ଧିକୁ ତ୍ବରାନ୍ବିତ କରିବା ପାଇଁ ଆଇଟି ନୀତି-୨୦୨୫ ଅଣାଯାଇଛି। ପୂର୍ବରୁ ଆଇଟି ନୀତି-୨୦୨୨ରେ ଯେଉଁ ସବ୍‌ସିଡି ଏବଂ ପ୍ରୋତ୍ସାହନ ଥିଲା ତାହାକୁ ନୂଆ ନୀତିରେ ବଢ଼ାଯାଇଛି। ଯେପରି ପୂର୍ବରୁ ଆଇଟି ପାର୍କ, ଆଇଟି ଶିଳ୍ପ କଲେ ୨୦କୋଟିର ପୁଞ୍ଜିନିବେଶ ଉପରେ ୨୫% କ୍ୟାପିଟାଲ ସବ୍‌ସିଡି ଦିଆଯାଉଥିଲା। ଏବେ ‌ନିବେଶ ମୂଲ୍ୟକୁ ହଟାଇ ଦିଆଯାଇଛି। ଏଣିକି ଯିଏ ଯେତେ ନିବେଶ କରିବେ ତା’ଉପରେ ୩୦% ସବ୍‌ସିଡି ଦିଆଯିବ।