ଗତ ୨ ବର୍ଷରେ ଓଏସଆରଟିସିର ୪୫ କୋଟିରୁ ଅଧିକ କ୍ଷତି: ମନ୍ତ୍ରୀ

ଭୁବନେଶ୍ୱର: ଓଡ଼ିଶା ରାଜ୍ୟ ସଡ଼କ ପରିବହନ ନିଗମ (ଓଏସଆରଟିସି) ଗତ ଦୁଇ ବର୍ଷ ମଧ୍ୟରେ ମୋଟ ୪୫ କୋଟି ଟଙ୍କା (୪୫୪,୬୭୨,୩୪୭.୨୪ ଟଙ୍କା)ରୁ ଅଧିକ କ୍ଷତି କରିଛି ବୋଲି ଗୁରୁବାର ରାଜ୍ୟ ବିଧାନସଭାରେ ବାଣିଜ୍ୟ ଏବଂ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ସୂଚନା ପ୍ରଦାନ କରିଛନ୍ତି।

ଜୟପୁର ବିଧାୟକ ତଥା ବରିଷ୍ଠ କଂଗ୍ରେସ ନେତା ତାରା ପ୍ରସାଦ ବାହିନୀପତିଙ୍କ ଏକ ପ୍ରଶ୍ନର ଲିଖିତ ଉତ୍ତରରେ ମନ୍ତ୍ରୀ କହିଛନ୍ତି ଯେ,ଓଏସଆରଟିସି ବର୍ତ୍ତମାନ ୨୬୦ ଟି ରୁଟ୍‌ରେ ମୋଟ ୩୮୮ ଟି ବସ୍ ପରିଚାଳନା କରୁଛି।

ମନ୍ତ୍ରୀ କହିଛନ୍ତି ଯେ, ରାଜ୍ୟ ଦ୍ବାରା ପରିଚାଳିତ ପରିବହନ ନିଗମ ୨୦୨୨-୨୩ ଏବଂ ୨୦୨୩-୨୪ ଆର୍ଥିକ ବର୍ଷରେ ବହୁତ କ୍ଷତି ସହିଛି।

ମନ୍ତ୍ରୀ ଗତ ଦୁଇଟି ଆର୍ଥିକ ବର୍ଷରେ ଓଏସଆରଟିସି ଦ୍ୱାରା ହୋଇଥିବା ଲାଭ ଏବଂ କ୍ଷତିର ବିସ୍ତୃତ ତଥ୍ୟ ପ୍ରଦାନ କରିଥିଲେ। ତଥ୍ୟ ଅନୁଯାୟୀ, ଓଏସଆରଟିସି ୨୦୨୨-୨୦୨୩ ଆର୍ଥିକ ବର୍ଷରେ ୧୪୫.୨୮ କୋଟି ଟଙ୍କା ଏବଂ ୨୦୨୩-୨୦୨୪ଆର୍ଥିକ ବର୍ଷରେ ୧୫୬.୪୪ କୋଟି ଟଙ୍କାର ନିଟ୍ କାରବାର ରେକର୍ଡ କରିଥିଲା। ତଥାପି, ମୋଟ ଖର୍ଚ୍ଚ ୨୦୨୨-୨୩ରେ ୧୬୪.୧୨ କୋଟି ଟଙ୍କା ଏବଂ ୨-୨୩-୨୪ରେ ୧୮୩.୦୭ କୋଟି ଟଙ୍କା ଥିଲା।

ଅଧିକ ପଢ଼ନ୍ତୁ: କଂଗ୍ରେସ କର୍ମୀଙ୍କ ଉପରେ ଲୁହବୁହା ଗ୍ୟାସ୍-ପାଣି ତୋପ ମାଡ଼ 

୨୦୨୨-୨୩ ମସିହାରେ ମୋଟ କ୍ଷତି ୧୮.୮୩ କୋଟି ଟଙ୍କା ଥିଲା ଏବଂ ୨୦୨୩-୨୪ ମସିହାରେ ନିଗମ ୨୬.୬୩ କୋଟି ଟଙ୍କା କ୍ଷତି ରିପୋର୍ଟ କରିଥିଲା। ଏହିପରି, ଗତ ଦୁଇ ବର୍ଷ ମଧ୍ୟରେ ଓଏସଆରଟିସି ମୋଟ ୪୫.୪୭ କୋଟି ଟଙ୍କାର କ୍ଷତିର ସମ୍ମୁଖୀନ ହୋଇଛି ବୋଲି ମନ୍ତ୍ରୀ ସୂଚନା ପ୍ରଦାନ କରିଛନ୍ତି।

ଅଧିକ ପଢ଼ନ୍ତୁ: ଦେବଗଡ଼ରେ ମୃତ ହୋମଗାର୍ଡ ପ୍ରାର୍ଥୀଙ୍କ ପରିବାର ପାଇଁ ୪ ଲକ୍ଷ ଟଙ୍କାର ଅନୁକମ୍ପାମୂଳକ ସହାୟତା ଘୋଷଣା କଲେ ମୁଖ୍ୟମନ୍ତ୍ରୀ

Bibhuti Bhushan Jena