ମରଣଯନ୍ତା ପାଲଟିଛି ପ୍ରଧାନମନ୍ତ୍ରୀ ସଡ଼କ: ବର୍ଷାରେ ଶୋଚନୀୟ ହୋଇପଡୁଛି, ଯାତାୟାତରେ ସୃଷ୍ଟି କରୁଛି ବିପଦ 

ଓଡ଼ାପଡ଼ା : ଓଡ଼ାପଡ଼ା ବ୍ଲକ୍‌ ବିଡ଼ୋ ପଞ୍ଚାୟତ ଅଧୀନ ୫୫ ନମ୍ବର ଜାତୀୟ ରାଜପଥର ଗଉଡକାଟେଣୀଠାରୁ ବୀଣାକାରକାଟେଣୀ ଗ୍ରାମକୁ ସଂଯୋଗ କରୁଥିବା ପ୍ରଧାନମନ୍ତ୍ରୀ ସଡ଼କ ଖାଲଖମା ହୋଇ ମରଣଯନ୍ତା ପାଲଟିଛି ।

ନିର୍ଦ୍ଧାରିତ ସମୟ ଅବଧି ପରେ ଏବଂ ଗତ ଦୁଇବର୍ଷ ତଳେ ଏହି ରାସ୍ତା ନିର୍ମାଣ କାର୍ଯ୍ୟ ଶେଷ ହୋଇଥିଲା । ଅନ୍ୟପକ୍ଷରେ ରାଜ୍ୟ ସରକାରଙ୍କ ପକ୍ଷରୁ ସମସ୍ତ ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇବା ଲକ୍ଷ୍ୟ ନେଇ ମେଗା ପ୍ରକଳ୍ପ କାର୍ଯ୍ୟ ଆରମ୍ଭ ହେଉଛି। ଏହି ପ୍ରକଳ୍ପ କାର୍ଯ୍ୟ ପାଇଁ ରାସ୍ତା କଡ଼ରେ ରାସ୍ତା ଖୋଳି ପାଇପ୍ ବିଛାଯାଉଛି । ଖୋଳା ଯାଉଥିବା ମାଟିକୁ ପିଚୁ ରାସ୍ତା ଉପରେ ପକାଇ ଦିଆଯାଉଛି। ପରବର୍ତ୍ତୀ ସମୟରେ ମାଟିଗୁଡ଼ିକ ଠିକାଦାର ପକ୍ଷରୁ ରାସ୍ତାରୁ ଉଠାଯାଉ ନ ଥିବାରୁ ବର୍ଷା ହେବା ମାତ୍ରେ ରାସ୍ତାଟି ପାଣି କାଦୁଅ ହୋଇ ଲୋକମାନଙ୍କର ଯାତାୟାତରେ ବିପଦ ସୃଷ୍ଟି କରୁଥିବା ଦେଖିବାକୁ ମିଳିଛି । ରାସ୍ତା ଉପରେ ପକାଇଥିବା ମାଟି ଠିକାଦାର ଉଠାଇବାକୁ ଗ୍ରାମବାସୀ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି।