ପୁଣି ଆରମ୍ଭ ହେଲା ଅନୁଭବ ଯାତ୍ରା, ଉଜ୍ଜୟିନୀ ଯିବେ ଶ୍ରୀମନ୍ଦିର ସେବାୟତ

ପୁରୀ : ଦୁଇବର୍ଷର କୋଭିଡ୍‌ଜନିତ କଟକଣା ପରେ ଚଳିତବର୍ଷ ପୁଣିଥରେ ଶ୍ରୀମନ୍ଦିର ସେବାୟତଙ୍କ ପାଇଁ ‘ଅନୁଭବ ଯାତ୍ରା’ ଆରମ୍ଭ କରିଛି ଶ୍ରୀମନ୍ଦିର ପ୍ରଶାସନ। ଏଥିପାଇଁ ସମସ୍ତ ନିଯୋଗକୁ ଗତ ୩ ତାରିଖରୁ ଶ୍ରୀମନ୍ଦିର ପ୍ରଶାସନ ଚିଠି କରିଛି। ସେହି ଅନୁସାରେ ସମସ୍ତ ନିଯୋଗକୁ ୪/୫ଜଣ ସେବାୟତଙ୍କ ତାଲିକା ସହ ଠିକଣା, ବୟସ, ନମ୍ବର, ଆଧାର କାର୍ଡ ଆଦି ତଥ୍ୟ ମଗାଯାଇଛି। ଫେବ୍ରୁଆରି ୭ ତାରିଖ ସୁଦ୍ଧା ମନ୍ଦିର କାର୍ଯ୍ୟାଳୟରେ ତାଲିକା ପ୍ରଦାନ କରିବାକୁ କୁହାଯାଇଛି। ଏହି ପ୍ରଥମ ପର୍ଯ୍ୟାୟ ‘ଅନୁଭବ ଯାତ୍ରା’ରେ ଉଜ୍ଜୟିନୀର ମହାକାଳେଶ୍ବର, ଓଁକାରେଶ୍ବର ଜ୍ୟୋତିର୍ଲିଙ୍ଗ ଦର୍ଶନ ସହ ଆଖପାଖ ଅଞ୍ଚଳର ଧାର୍ମିକ ଦର୍ଶନୀୟ ସ୍ଥାନ ଭ୍ରମଣ କରିବାର ବ୍ୟବସ୍ଥା କରାଯାଇଛି।