ଘୋଷଯାତ୍ରା ପାଇଁ ଗଲା ଦ୍ବିତୀୟ ପର୍ଯ୍ୟାୟ ରଥକାଠ

ଦଶପଲ୍ଲା: ବିଶ୍ବ ପ୍ରସିଦ୍ଧ ଘୋଷଯାତ୍ରା ପାଇଁ ଆଜି ଦଶପଲ୍ଲା ବନାଞ୍ଚଳରୁ ଦ୍ବିତୀୟ ପର୍ଯ୍ୟାୟ ରଥକାଠ ପଠାଯାଇଛି। ଗତ ଜାନୁଆରି ମାସରେ ପ୍ରଥମ ପର୍ଯ୍ୟାୟରେ ୧୦୧ ଖଣ୍ତ କାଠ ପୁରୀ ରଥଖଳାକୁ ପଠାଯାଇଥିବା ବେଳେ ଆଜି ଦ୍ବିତୀୟ ପର୍ଯ୍ୟାୟରେ ୫୮ ଖଣ୍ତ ଅସନ, ଧଉରା ଓ ଶିମିଳି କାଠ କଟକ ଖପୁରିଆସ୍ଥିତ କାଠମିଲ୍‌କୁ ପଠାଯାଇଛି। ଯେଉଁଥିରେ ୨୦ ଫୁଟିଆ ଧଉରା ୧୦ଟି ଓ ଅସନ ୧୬ଟି, ୧୨ ଫୁଟିଆ ଧଉରା ୯ଟି, ଅସନ ୨୨ଟି ଓ ଗୋଟିଏ ଗଣ୍ଡି ଶିମିଳି କାଠ ରହିଛି। ଦଶପଲ୍ଲା ବନାଞ୍ଚଳ ଅଧୀନ ଟାକରା ସଂରକ୍ଷିତ ଜଙ୍ଗଲରୁ ଏହି କାଠ ପଠାଯାଇଛି। ଆସନ୍ତା ଶ୍ରୀରାମ ନବମୀ ତିଥିରେ ଏହି କାଠ ସ-ମିଲ୍‌ରେ ଚିରଟ ହେବାର ପରମ୍ପରା ରହିଛି। 

ଏସବୁ କାଠ କଟାଯିବା ପରେ ବିଭିନ୍ନ ସମସ୍ୟାକୁ ନେଇ ତାବେଡ଼ା, ପାନାବାରୀ ଆଦି ଗ୍ରାମର ଲୋକମାନେ ବିରୋଧ କରି ଆସୁଥିଲେ। ଗତ ଶ୍ରୀପଞ୍ଚମୀ ତିଥିରୁ ଏସବୁ କାଠ ଜଙ୍ଗଲରେ ପଡ଼ି ରହିଥିବା ବେଳେ ଗ୍ରାମବାସୀ ଓ ବନ ବିଭାଗ ମଧ୍ୟରେ ଆଲୋଚନା ହୋଇ ସମାଧାନ ହୋଇଥିଲା। ସମାଧାନ ପରେ ଗ୍ରାମବାସୀ କାଠ ଛାଡ଼ିବାକୁ ରାଜି ହୋଇଥିଲେ। ତେଣୁ ଆଜି ପୂର୍ବାହ୍ଣରେ ମିଟୁକୁଳି ଓ ତିଳାବାଡ଼ି ଗ୍ରାମବାସୀଙ୍କ ଉପସ୍ଥିତିରେ ପୂଜାର୍ଚ୍ଚନା ଓ ସଂକୀର୍ତ୍ତନ ପରେ କାଠ ସ-ମିଲ୍ ଅଭିମୁଖେ ବାହାରିଥିଲା। ଭାରପ୍ରାପ୍ତ ବନାଞ୍ଚଳ ଅଧିକାରୀ ସୁମନ ମାଝୀ, ଟାକରା ବନପାଳ ରାକେଶ କୁମାର ସାହୁ ଓ ବନରକ୍ଷୀ ଦୀପ୍ତିମୟୀ ଦାଶ ଉପସ୍ଥିତ ଥିଲେ। ପୁରୀର ପ୍ରସିଦ୍ଧ ଘୋଷଯାତ୍ରା ଉପଲକ୍ଷେ ୩ ରଥ ନିର୍ମାଣ ପାଇଁ ପ୍ରତିବର୍ଷ ୮୬୫ ଖଣ୍ତ ଧଉରା, ଅସନ, ଫାସି ଓ ଶିମିଳି କାଠ ଆବଶ୍ୟକ ହୋଇଥାଏ। ଗତବର୍ଷ ରଥ ନିର୍ମାଣ ପାଇଁ ୫୧ ଖଣ୍ତ କାଠ ବଳକା ରହିଥିବାରୁ ଅବଶିଷ୍ଟ ୮ଶହ ୧୪ ଖଣ୍ତ କାଠ ଯୋଗାଇ ଦେବାକୁ ଶ୍ରୀମନ୍ଦିର ପ୍ରଶାସନ ନୟାଗଡ଼ ବନଖଣ୍ତକୁ ଚିଠି ଲେଖିଛି। ସେଥିମଧ୍ୟରୁ ସ-ମିଲକୁ ୪୧୮ ଖଣ୍ତ କାଠ ଓ ରଥଖଳାକୁ ୩୯୬ ଖଣ୍ତ ପଠାଇବାକୁ ନି‌ର୍ଦ୍ଦେଶ ରହିଛି।