BJD, Congress: ବିଜେଡି, କଂଗ୍ରେସକୁ ସତର୍କ ଘଣ୍ଟି: କାମ କରୁନି ନବୀନଙ୍କ ଯାଦୁ, ନାଁରେ ଭୋଟ ହେଉନି

ଭୁବନେଶ୍ବର: ‘ବିଜେଡିରେ ପ୍ରାର୍ଥୀଙ୍କର କିଛି ଗୁରୁତ୍ବ ନାହିଁ। ଯିଏ ଯେଉଁଠି ପ୍ରାର୍ଥୀ ହେଲେ ବି କିଛି ଫରକ ପଡ଼େନି। କାହିଁକି ନା ଭୋଟ ନବୀନ ପଟ୍ଟନାୟକ ଓ ଶଙ୍ଖ ଚିହ୍ନ ନାଁରେ ଅଛି।’ ଏମିତି ଏକ ଭୁଲ୍ ଧାରଣାରୁ ବିଜେଡି ଏବେ ବି ମୁକୁଳି ପାରିନାହିଁ। ୨୦୨୪ରେ ଏହି ଧାରଣାକୁ ନେଇ ରଣନୀତି କରି ବହୁ ନିର୍ବାଚନମଣ୍ଡଳୀରେ ଦଳ ବିଫଳ ହେଲା। ଆଉ ନୂଆପଡ଼ାରେ ବି ସେହି ଭୁଲ୍‌ର ପୁନରାବୃତ୍ତି କଲା। ବିଜେଡି ପ୍ରଥମ ଥର ପାଇଁ ନିର୍ବାଚନରେ ତୃତୀୟ ସ୍ଥାନକୁ ଖସିଗଲା। ନବୀନଙ୍କ ଯାଦୁ କାମ କଲାନି। ନବୀନଙ୍କ ନାଁରେ ଯେ ଆଉ ଭୋଟ ନାହିଁ, ତାହା ପ୍ରମାଣିତ ହେଲା। ଜାତୀୟସ୍ତରରେ ବିଜେପିର ପ୍ରମୁଖ ପ୍ରତିଦ୍ବନ୍ଦ୍ବୀ ହେଲା କଂଗ୍ରେସ। ଓଡ଼ିଶାରେ ବି କଂଗ୍ରେସ ମୁଖ୍ୟ ବିରୋଧୀ ଦଳ ଭୂମିକାରେ ଓହ୍ଲାଇଛି ବୋଲି ଏକ ଧାରଣା ସୃଷ୍ଟି ହୋଇଛି। ପିସିସି ସଭାପତି ଭକ୍ତଚରଣ ଦାସଙ୍କ ନେତୃତ୍ବରେ କଂଗ୍ରେସ ସକ୍ରିୟ ହୋଇଛି ସତ, କିନ୍ତୁ ଭୋଟ ରାଜନୀତିରେ କଂଗ୍ରେସର ପ୍ରଦର୍ଶନରେ ଆଦୌ ଉନ୍ନତି ହୋଇନାହିଁ। ନିର୍ବାଚନୀ ରଣନୀତିରେ କଂଗ୍ରେସର ବିଫଳତା ଯେ ଜାରି ରହିଛି, ଏହା ନୂଆପଡ଼ାରୁ ସ୍ପଷ୍ଟ ହୋଇଗଲା।