ଅନ୍ତଃରାଜ୍ୟ ମାଫିଆ ସକ୍ରିୟ: ଦେଶୀ ବନ୍ଧୁକ ପାଇଁ କଟୁଛି କେନ୍ଦୁଗଛ

ବରଗଡ଼ : କିଛିବର୍ଷ ହେଲା ବରଗଡ଼ ଜିଲ୍ଲାର ବିଭିନ୍ନ ଜଙ୍ଗଲରୁ କେନ୍ଦୁଗଛର ସଂଖ୍ୟା ଦ୍ରୁତ ହ୍ରାସ ପାଉଛି। ଏକଦା ଜଙ୍ଗଲରେ ଭରପୂର ଦେଖାଯାଉଥିବା କେନ୍ଦୁଗଛ ଧୀରେଧୀରେ ଶୂନ୍ୟହେବାରେ ଲାଗିଛି। ଖୋଳତାଡ଼ ପରେ ତିନୋଟି ଉଦ୍‌ବେଗଜନକ ତଥ୍ୟ ସାମନାକୁ ଆସିଛି। ପ୍ରଥମ ହେଲା, ଉପକୂଳ ଓଡ଼ିଶାକୁ ବିପୁଳ ପରିମାଣର କେନ୍ଦୁକାଠ ପଟା ଆକାରରେ ଚାଲାଣ ହେଉଛି। ସେଠାରେ ହୋଟେଲ ଶିଳ୍ପରେ ଏଗୁଡ଼ିକ ବ୍ୟବହାର ହେଉଛି। ଦ୍ବିତୀୟ ହେଲା, ଦେଶୀ ବନ୍ଧୁକ ତିଆରି ପାଇଁ କେନ୍ଦୁକାଠକୁ ମାଫିଆମାନେ ଚୋରାଚାଲାଣ କରୁଛନ୍ତି। ଏଥିପାଇଁ ଏକ ଅନ୍ତଃରାଜ୍ୟ ରାକେଟ୍‌ ସକ୍ରିୟ ଥିବା ଜଣାପଡ଼ିଛି। କେନ୍ଦୁକାଠ ଶକ୍ତ ଏବଂ ଅନ୍ୟ କାଠ ତୁଳନାରେ ସାମାନ୍ୟ ହାଲୁକା ଥିବାରୁ ଏହାକୁ ଦେଶୀ ବନ୍ଧୁକ ନିର୍ମାଣରେ ବ୍ୟବହାର କରାଯାଉଛି। ସେହିପରି, ପାଣିଜାହାଜ ଏବଂ ଡଙ୍ଗା ତିଆରି ପାଇଁ ମଧ୍ୟ କେନ୍ଦୁକାଠ ସର୍ବୋତ୍ତମ ବୋଲି କହାଯାଉଛି। ଫଳରେ କାଠ ମାଫିଆମାନେ ଏଗୁଡ଼ିକୁ ବିଭିନ୍ନ ରାଜ୍ୟକୁ ଚୋରାଚାଲାଣ କରି କୋଟି କୋଟି ଟଙ୍କାର ମୁନାଫା ପାଉଛନ୍ତି।

The New Indian Express

ଚାହିଦା ଥିବାରୁ ବରଗଡ଼ ଜିଲ୍ଲାର ଅଧିକାଂଶ ଜଙ୍ଗଲରୁ କେନ୍ଦୁଗଛ କଟାଯାଇ ଚୋରାଚାଲାଣ ହେଉଛି। ବିଶେଷକରି, ପଦ୍ମପୁର ଉପଖଣ୍ଡ ବୁଢ଼ା ପାହାଡ଼, ଗନ୍ଧମାର୍ଦ୍ଦନ ପାହାଡ଼ ଓ ଝାଞ୍ଜ ପାହାଡ଼ରୁ କେନ୍ଦୁକାଠ ଉଭାନ ହେବାରେ ଲାଗିଛି। ଯୋଜନାବଦ୍ଧ ଭାବରେ ଏହି କାଠ ଚୋରି ହେଉଛି। ମାଫିଆମାନେ ଏହି କାଠ କୋଲକାତାରେ ତିଆରି ହେଉଥିବା ବେଆଇନ ଜାହାଜ କାରଖାନାରେ ପଟା ଭାବରେ ବ୍ୟବହାର ପାଇଁ ପଠାଉଛନ୍ତି। ପଦ୍ମପୁର ଉପଖଣ୍ଡରେ ପାଇକମାଲ, ପଦ୍ମପୁର, ନୃସିଂହନାଥ, ଗାଈସିଲେଟ ଓ ଘେଁସ ଆଦି ବନ ବିଭାଗର ପାଞ୍ଚଟି ରେଞ୍ଜ ରହିଛି। ପାହାଡ଼କୁ ସୁରକ୍ଷା ଦେବାପାଇଁ ପ୍ରତ୍ୟେକ ରେଞ୍ଜରେ ରେଞ୍ଜର, ଫରେଷ୍ଟର, ଫରେଷ୍ଟ ଗାର୍ଡ଼ ସହିତ କିଛି ଅସ୍ଥାୟୀ କର୍ମଚାରୀ ମଧ୍ୟ ନିୟୋଜିତ ହେଉଛନ୍ତି। ହେଲେ, ଜଙ୍ଗଲର ମୂଲ୍ୟବାନ କାଠ ଉଭାନ ହେବାରେ ଲାଗିଛି। ପଦ୍ମପୁର ଉପଖଣ୍ଡରେ ଥିବା ଝାଞ୍ଜ ପାହାଡ଼ର କିଛି ଭାଗ ଛତିଶଗଡ଼ରେ ରହିଛି। ଛତିଶଗଡ଼ ନିଜ ପଟରେ ଝାଞ୍ଜ ପାହାଡ଼କୁ ସଂପୂର୍ଣ୍ଣ ସୁରକ୍ଷା ଦେବାରେ ସଫଳ ହୋଇଛି। ରାସ୍ତାରେ ଯିବାବେଳେ ବି ବିରାଟ କେନ୍ଦୁଗଛ ଦେଖିବାକୁ ମିଳୁଛି।  ଓଡ଼ିଶା ପଟେ ପୂରା ଦୃଶ୍ୟ ଅଲଗା। ଜଙ୍ଗଲରେ ଦୂର ଯାଏ କେନ୍ଦୁଗଛ ଆଉ ଦେଖା ଯାଉନାହିଁ। କେବଳ ଛୋଟ ଗଛ ବୁଦା ଜଙ୍ଗଲରେ ରହିଛି। ବିଶ୍ବସ୍ତ ସୂତ୍ରରୁ ଖବର ଅନୁସାରେ, ବରଗଡ଼ ସୀମାରୁ ଛତିଶଗଡ଼ କାଠ ଯାଉଛି। ସେଠାରୁ ପୁଣି ତାକୁ କୋଲକାତା, ବିହାରକୁ ଚାଲାଣ କରାଯାଉଛି।

ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ତୁରନ୍ତ ସତର୍କ ନହେଲେ ଆଗକୁ ବରଗଡ଼ ଜିଲ୍ଲାରେ କେନ୍ଦୁଗଛ ଦୁଷ୍ପ୍ରାପ୍ୟ ହୋଇଯିବା ଥୟ ବୋଲି ତଥ୍ୟାଭିଜ୍ଞ ମହଲ ମତବ୍ୟକ୍ତ କରୁଛନ୍ତି।