Jeypore: ଜମିଲା ପଥୋତ୍ସବ: କଣ୍ଠଶିଳ୍ପୀଙ୍କ ଗୀତରେ ଝୁମିଲେ ଦର୍ଶକ

ଜୟପୁର (ତରୁଣ କୁମାର ମହାପାତ୍ର): ଦୀର୍ଘ ବର୍ଷ ଧରି ବନ୍ଦ ହୋଇଯାଇଥିବା ପଥୋତ୍ସବ ଆଜି ପୁଣିଥରେ ଉଜ୍ଜିବିତ ହୋଇଛି। ଏହି ପ୍ରୟାସକୁ ପ୍ରତିବର୍ଷ ବଜାୟ ରଖିବାକୁ ଚେଷ୍ଟା ଜାରି ରଖିବେ ବୋଲି ଆଜି ସଭା ମଞ୍ଚରେ କହିଛନ୍ତି ଆଜିର ପଥୋତ୍ସବର ସାରଥୀ ତଥା ଉପଜିଲ୍ଲାପାଳ ଏ. ସସ୍ୟାରେଡ୍ଡୀ। ଓଡିଆ ସେନେମାର ଅଭିନେତ୍ରୀ ତଥା ଗାୟିକା ଅନୁରାଧା ପାଣିଗ୍ରାହୀ ଓ  ଇଣ୍ତିଆନ ଆଇଡଲର ଗାୟକ ବିଶ୍ବଜୀତ ମହାପାତ୍ରଙ୍କ ମନଛୁଆଁ ଗୀତରେ ସାରା ଜୟପୁର ବାସୀ ମଜା ନେଇଛନ୍ତି। ପୁଣିଥରେ ସୃଷ୍ଟି ହୋଇଥିବାଏହି ଉତ୍ସବ ଜୟପୁରବାସୀଙ୍କ ମନରେ ଭରି ଦେଇଥିଲା ନିଆରା ଅନୁଭୂତି।

ମାର୍ଗଶୀରର ଶୀତୁଆ ସକାଳରେ ଲାଗିଥିଲା ରଥଯାତ୍ରା, ସ୍ବାଧୀନତା ଦିବସ ଭଳି ଗହଳି। ସହରର କୋଣ ଅନୁକୋଣରୁ ଛୁଟି ଆସିଥିଲେ ହଜାର ହଜାର ଲୋକ। ପ୍ରାୟ ୧୦ ହଜାର ଲୋକଙ୍କ ସମାବେଶ ହୋଇଥିଲା। ସକାଳ ୭ଟାରୁ ପୂର୍ବାହ୍ନ ସାଢେ ୧୧ଟା ପର୍ଯ୍ୟନ୍ତ ଜୟପୁର ମୁଖ୍ୟ ରାସ୍ତାରେ ମସ୍ତି କରିବାକୁ ନଥିଲା କୌଣସି ଅଟକ। ପିଲାଙ୍କ ଠାରୁ ବୁଢ଼ାଙ୍କ ପର୍ଯ୍ୟନ୍ତ ସମସ୍ତେ ନାଚିଲେ ଗାଇଲେ ଶିଖିଲେ ଶିଖାଇଲେ। ଶୀତୁଆ ରବିବାର ସକାଳକୁ ରାଜରାସ୍ତାରେ ମନଭରି ଉପଭୋଗ କଲେ। ସାଢ଼େ ୩ଘଣ୍ଟାର ଉତ୍ସବରେ ଏମିତି ମଜିଗଲେ ଯେ ସମୟ କେତେବେଳେ ସରିଗଲା ଜାଣିପାରିଲେ ନାହିଁ। ଅନେକ ସ୍ମୃତି ଓ ଅନୁଭୂତି ସାଙ୍ଗକୁ କିଛି କଳା ଓ କୌଶଳ ନେଇ ଘରକୁ ଫେରିଲେ ସହରବାସୀ। ଏହାକୁ ସଫଳ କରିବାକୁ ଜିଲ୍ଲା ପ୍ରଶାସନ ଯେପରି ବ୍ୟବସ୍ଥା ଗ୍ରହଣ କରିଥିଲା ତାହାଠୁ ଅଧିକ ବ୍ୟବସ୍ଥିତ ଭାବେ ସହଯୋଗ କରିଥିଲେ ସହରବାସୀ। ରାଜରାସ୍ତାରେ ଏକାଠି ହୋଇ ଦମ ଦେଖାଇଥିଲେ ଜୟପୁରିଆ।