କିଶୋର କୁମାରଙ୍କ ବାୟୋପିକ୍‌ରେ ଆମିର!

ମୁମ୍ବାଇ: ରଣବୀର କପୁରଙ୍କ ପରେ ବର୍ତ୍ତମାନ ଆମିର ଖାନଙ୍କୁ ଗାୟକ କିଶୋର କୁମାରଙ୍କ ବାୟୋପିକ୍‌ରେ ଅଭିନୟ କରିବା ଲାଗି ଅଫର ପ୍ରଦାନ କରାଯାଇଛି। ନିର୍ଦ୍ଦେଶକ ଅନୁରାଗ ବସୁ ଦୀର୍ଘ ଦିନ ଧରି କିଶୋର କୁମାରଙ୍କ ଜୀବନୀ ଉପରେ ଏକ ଚଳଚ୍ଚିତ୍ର ନିର୍ମାଣ କରିବାକୁ ଚେଷ୍ଟା କରିଆସୁଛନ୍ତି।

କୁହାଯାଉଛି ଯେ ଆମିର ଖାନ କିଶୋର କୁମାରଙ୍କ ଜୀବନକୁ ବାୟୋପିକ୍‌ରେ ଏକ ନିଆରା ଅନ୍ଦାଜ୍‌ରେ ଦେଖାଇବାକୁ ଯାଉଛନ୍ତି। ବର୍ତ୍ତମାନ ପର୍ଯ୍ୟନ୍ତ ଆମିର ଖାନ ଏବଂ ଅନୁରାଗ ବସୁ ଏହି ଚଳଚ୍ଚିତ୍ର ସମ୍ବନ୍ଧରେ ୫ଟି ବୈଠକ କରିଛନ୍ତି। 

ଏହି ଚଳଚ୍ଚିତ୍ରର ନିର୍ମାତା ଭୂଷଣ କୁମାର ରହିଛନ୍ତି। କିଶୋର କୁମାରଙ୍କ ବାୟୋପିକ୍ ଅନୁରାଗ ବସୁ ଏବଂ ଭୂଷଣ କୁମାରଙ୍କ ହୃଦୟର ନିକଟବର୍ତ୍ତୀ ବିଷୟ ଏବଂ ସେମାନେ ଏହାକୁ ଦର୍ଶକଙ୍କ ସମ୍ମୁଖରେ ସର୍ବୋତ୍ତମ ଉପାୟରେ ଉପସ୍ଥାପନ କରିବାକୁ ଚାହୁଁଛନ୍ତି ।

ଫିଲ୍ମ ନିର୍ମାତାଙ୍କ ଚିନ୍ତା ଧାରାକୁ ଆମିର ଖାନ ପସନ୍ଦ କରିଛନ୍ତି ବୋଲି ରିପୋର୍ଟରେ କୁହାଯାଇଛି। ଆମିର କିଶୋର କୁମାରଙ୍କର ଜଣେ ବଡ଼ ପ୍ରଶଂସକ ଏବଂ ସେ କିମ୍ବଦନ୍ତୀ ଅଭିନେତାଙ୍କୁ ପରଦାରେ ଦେଖାଇବା ପାଇଁ ବସୁଙ୍କ ଦୃଷ୍ଟିକୋଣକୁ ତାରିଫ୍ କରିଛନ୍ତି। ଚଳଚ୍ଚିତ୍ର ନିର୍ମାତା ଏହାକୁ ଏକ ଭିନ୍ନ ଉପାୟରେ ଉପସ୍ଥାପନ କରୁଛନ୍ତି ଏବଂ ଆମିର ଏହା ଦ୍ୱାରା ବହୁ ପ୍ରଭାବିତ ହୋଇଛନ୍ତି। ଆମିର କିଶୋର କୁମାରଙ୍କ ବାୟୋପିକ୍‌ ଉପରେ ଚଳିତ ବର୍ଷ ଶେଷ ସୁଦ୍ଧା କାମ ଆରମ୍ଭ କରିବେ।

ଆମିର ଏବେ ତାଙ୍କ ଚଳଚ୍ଚିତ୍ର 'ସିତାରେ ଜମିନ୍ ପର'ର ସୁଟିଂ ଶେଷ କରିଛନ୍ତି। ଏହି ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି ଆର.ଏସ୍ ପ୍ରସନ୍ନ। ଆମିର ଖାନ ବର୍ତ୍ତମାନ ୫ଟି ଫିଲ୍ମ ବିଷୟରେ ଚିନ୍ତା କରୁଛନ୍ତି। ଏହି ତାଲିକାରେ ଉଜୱାଲ ନିକାମଙ୍କ ବାୟୋପିକ, ରାଜକୁମାର ସାନ୍ତୋଷୀଙ୍କ କମେଡି 'ଚାର ଦିନ କି  ଜିନ୍ଦେଗି', ଲୋକେଶ କାନାଗରାଜଙ୍କ ସୁପରହିଟ୍ ଫିଲ୍ମ, ଜୋୟା ଅଖତରଙ୍କ ଚଳଚ୍ଚିତ୍ର ଏବଂ 'ଗଜ୍‌ନି ୨' ଆଦି ରହିଛି। ତେବେ ଆମିର କିଶୋର କୁମାରଙ୍କ ବାୟୋପିକ୍ ନେଇ ବେଶ୍ ଉତ୍ସାହିତ ଅଛନ୍ତି। ଏହା ଉପରେ ସେ ସକାରାତ୍ମକ ପ୍ରତିକ୍ରିୟା ପ୍ରଦାନ କରିଛନ୍ତି।

ଅଧିକ ପଢ଼ନ୍ତୁ:

'ପୁଷ୍ପା ୨:ଦି ରୁଲ୍' ରିଲିଜ୍ ପୂର୍ବରୁ ୧୦୮୫ କୋଟି ଆୟ କଲା, ଏବେ ଡିସେମ୍ବର ୬କୁ ଅପେକ୍ଷା

ରାଗିଗଲେ ପୂଜା ଭଟ୍ଟ: ମେଟ୍ରୋରେ ଏଭଳି ନ କରିବାକୁ ଲୋକଙ୍କୁ ଦେଲେ ପରାମର୍ଶ