ପିଲାଙ୍କ ପାଇଁ ଟଙ୍କାଟିଏ ବି ଖର୍ଚ୍ଚ କରିନାହାନ୍ତି, ବାପା ହିସାବରେ ସେ ବିଫଳ; ପରଦାର ପ୍ରଭୁ ଶ୍ରୀକୃଷ୍ଣଙ୍କ ଉପରେ ପତ୍ନୀଙ୍କ ଆରୋପ

ମୁମ୍ବାଇ: ପିଲାଙ୍କ ପାଇଁ ଟଙ୍କାଟିଏ ବି ଖର୍ଚ୍ଚ କରିନାହାନ୍ତି। ବାପା ହିସାବରେ ସେ ବିଫଳ। ପରଦାରେ ପ୍ରଭୁ ଶ୍ରୀକୃଷ୍ଣଙ୍କ ଚରିତ୍ରରେ ନଜର ଆସି ଲୋକପ୍ରିୟ ହୋଇଥିବା ନୀତୀଶ ଭରଦ୍ବାଜଙ୍କ ଉପରେ ଏଭଳି ଆରୋପ ଲଗାଇଲେ ପତ୍ନୀ ସ୍ମିତା ଭରଦ୍ବାଜ। କିଛି ଦିନ ତଳେ ନୀତୀଶ ପତ୍ନୀଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣି ‌ପତ୍ନୀ, ପିଲାଙ୍କୁ ଭେଟିବାକୁ ଦେଉନଥିବା କହିଥିଲେ। ଏବେ ଏହା ଉପରେ ଜବାବ ଦେଇ ସ୍ମିତା ନୀତୀଶଙ୍କ ଅସଲ ମୁଖା ଖୋଲିଛନ୍ତି।

ତାଙ୍କ କହିବା ମୁତାବକ, “ମୁଁ ଚାକିରି ଛାଡିଦିଏ ବୋଲି ନୀତୀଶ ଚାହୁଁଥିଲେ। ଯେତେବେଳେ ମୁଁ ଚାକିରି ଛାଡ଼ିବାକୁ ରାଜି ହେଲିନାହିଁ, ସେ ମୋତେ ଛାଡପତ୍ର ମାଗିଥିଲେ। ଛାଡପତ୍ର ପାଇଁ ମୁଁ ରାଜି ହୋଇଯିବାରୁ ସେ ତାଙ୍କର ସହମତି ଦେବା ପାଇଁ ମୋତେ ଟଙ୍କା ମାଗିଥିଲି। ହେଲେ ମୁଁ ଟଙ୍କା ଦେବାକୁ ମନା କରିବାରୁ ସେ ରାଗରେ ଏଭଳି ମିଛ ଆରୋପ ଲଗାଇବା ଆରମ୍ଭ କରିଛନ୍ତି। କିଛି ଦିନ ତଳେ ସେ ପିଲାଙ୍କୁ ଭେଟିଥିଲେ। ଫେବ୍ରୁଆରି ୧୩ରେ ସେ ପିଲାଙ୍କୁ ଭେଟିବାକୁ ଆସିବେ ବୋଲି ଯୋଜନା ଥିଲା। ହେଲେ ସେ ଜାଣିଶୁଣି ଭେଟିବାକୁ ନଆସି ଫେବ୍ରୁଆରି ୧୪ରେ ସାମ୍ବାଦିକ ସମ୍ମିଳନୀ କରିଥିଲେ ଏବଂ ମୁଁ ତାଙ୍କୁ ପିଲାମାନଙ୍କ ସହ ଦେଖା କରିବାକୁ ଦେଉନାହିଁ ବୋଲି କହିଥିଲେ।

ସେ ଆହୁରି କହିଛନ୍ତି ଯେ, “ଜନ୍ମ ପରଠାରୁ ସେ ପିଲାମାନଙ୍କର ଖର୍ଚ୍ଚ ଉଠାଇନାହାନ୍ତି। ପିଲାଙ୍କ ପାଇଁ ତାଙ୍କର ଅବଦାନ ଶୂନ। ସେ କେବେ ବି ପିଲାଙ୍କ ସ୍କୁଲ ଫି’ ଦେଇନାହାଁନ୍ତି କିମ୍ବା ସେମାନଙ୍କୁ ଲାଳନପାଳନ କରିବା ପାଇଁ କୌଣସି ରକ୍ଷଣାବେକ୍ଷଣ ରାଶି ମଧ୍ୟ ପ୍ରଦାନ କରିନାହାଁନ୍ତି। ଜଣେ ବାପା ହିସାବରେ ସେ ବିଫଳ। ”