ପସମାନ୍ଦାଙ୍କ ପରେ ଏବେ ସୁଫିମାନଙ୍କ ଉପରେ ବିଜେପିର ନଜର!: ଜାଣନ୍ତୁ ବିଜେପିର ନୂଆ ଯୋଜନା

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦିଲ୍ଲୀରେ 'ଜହାଁ-ଏ-ଖୁସରୋ'ର ୨୫ତମ ସଂସ୍କରଣକୁ ସମ୍ବୋଧିତ କରିବା ସମୟରେ ସୁଫି ପରମ୍ପରା ଏବଂ ୧୩ ଶତାବ୍ଦୀର ସୁଫି କବି ଏବଂ ସଂଗୀତଜ୍ଞ ଅମିର ଖୁସରୋଙ୍କୁ ପ୍ରଶଂସା କରିଛନ୍ତି। ପ୍ରଧାନମନ୍ତ୍ରୀ ଗୁଜରାଟର ମୁଖ୍ୟମନ୍ତ୍ରୀ ଭାବରେ ଅହମ୍ମଦାବାଦର ଏକ ସୁଫି ମସଜିଦ 'ସରଖେଜ ରୋଜା'ର ନବୀକରଣ କିପରି କରିଥିଲେ ସେ ବିଷୟରେ ମଧ୍ୟ କହିଥିଲେ।

ଶୁକ୍ରବାର ଏହି ସମାରୋହରେ ପ୍ରଧାନମନ୍ତ୍ରୀ ମୋଦୀ ଯେଉଁଭଳି ଭାବରେ ସୁଫିବାଦ ଉପରେ ଗୁରୁତ୍ୱ ଦେଇଥିଲେ, ତାହା ସ୍ପଷ୍ଟ କରିଥିଲା ​​ଯେ, ବିଜେପି ପସମାନ୍ଦା ମୁସଲିମ ସମ୍ପ୍ରଦାୟ ପ୍ରତି ଯେଉଁ ଆଭିମୁଖ୍ୟ ବଜାୟ ରଖିଛି, ତାହା ଏବେ ସୁଫିବାଦ ପାଇଁ ମଧ୍ୟ ଗ୍ରହଣ କରୁଛି।

ବିଜେପି ସଂଖ୍ୟାଲଘୁ ମୋର୍ଚ୍ଚା ସୁଫିମାନଙ୍କୁ ନିଜ ଦଳରେ ସାମିଲ କରିବା ପାଇଁ ଏକ ଅଭିଯାନ ଆରମ୍ଭ କରିସାରିଛି। ୨୦୨୨ ମସିହାରୁ ଏପର୍ଯ୍ୟନ୍ତ, ଦେଶବ୍ୟାପୀ ସୁଫି ଖାନକା କିମ୍ବା ସ୍ଥାନ ସହିତ ଜଡିତ ୧୪,୦୦୦ ଲୋକ ବିଜେପିରେ ଯୋଗ ଦେଇଛନ୍ତି।

ବିଜେପି ନେତାମାନେ କୁହନ୍ତି ଯେ, ସୁଫିବାଦ ହେଉଛି ଭାରତୀୟ ଇସଲାମର ମୂଳ ଏବଂ ବିଜେପି ଏହି ସତ୍ୟକୁ ଉପସ୍ଥାପନ କରିବାକୁ ଚାହୁଁଛି। ସେଥିପାଇଁ ଏହି ସମ୍ପ୍ରଦାୟର ଲୋକଙ୍କୁ ଦଳ ସହିତ ଯୋଡାଯାଉଛି। ବିଜେପି ବିଶ୍ୱାସ କରେ ଯେ, ମଧ୍ୟଯୁଗୀୟ ଯୁଗର ମୁସଲିମ କବିମାନେ ଭଗବାନ କୃଷ୍ଣଙ୍କ ଭଳି ହିନ୍ଦୁ ଦେବତାଙ୍କ ପ୍ରତି ଅପାର ସମ୍ମାନ ପ୍ରଦର୍ଶନ କରୁଥିଲେ ଏବଂ ସେମାନଙ୍କର କୃତି ଏହାର ଏକ ଉଦାହରଣ। ଏହି ପ୍ରକାରର ଚିନ୍ତାଧାରାକୁ ପ୍ରୋତ୍ସାହିତ କରି, ମୌଳିକ ଚିନ୍ତାଧାରା ଦୂର କରାଯାଇପାରିବ।

'ଗଙ୍ଗା-ଜମୁନାର ତେହଜିବ ହେଉଛି ସୁଫିବାଦର ଆତ୍ମା'। ବିଜେପି ସଂଖ୍ୟାଲଘୁ ମୋର୍ଚ୍ଚାର ରାଷ୍ଟ୍ରୀୟ ଅଧ୍ୟକ୍ଷ ଜମାଲ ସିଦ୍ଦିକି ଇଣ୍ଡିଆନ ଏକ୍ସପ୍ରେସକୁ କହିଛନ୍ତି, 'ସୁଫିବାଦ ଭାରତୀୟ ସଂସ୍କୃତିର ଏକ ଅଂଶ ଏବଂ ଏହା ମୌଳବାଦର ମୁକାବିଲା ଏବଂ ଶାନ୍ତି ପ୍ରୋତ୍ସାହନରେ ଯୋଗଦାନ ଦେଇପାରେ।' ଏହାର ଲକ୍ଷ୍ୟ ହେଉଛି ମଣିଷ ଏବଂ ପରମେଶ୍ୱରଙ୍କ ମଧ୍ୟରେ ଏକ ସିଧାସଳଖ ସମ୍ପର୍କ ସ୍ଥାପନ କରିବା। ଯାହାକୁ ବିଭିନ୍ନ ଲୋକ ଆଲ୍ଲା, ରାମ, କୃଷ୍ଣ, ଖ୍ରୀଷ୍ଟ କିମ୍ବା ୱାହେ ଗୁରୁ ଭାବରେ ପୂଜା କରନ୍ତି।

ସେ କହିଥିଲେ, 'ଭାରତରେ ସୁଫିବାଦର ଅବନତି ଯୋଗୁ ଉଗ୍ରବାଦ ବୃଦ୍ଧି ପାଇଥିଲା। ଏହି ମୂଳବାଦ ମୁସଲମାନମାନଙ୍କୁ ସବୁଠାରୁ ଅଧିକ କ୍ଷତି ପହଞ୍ଚାଇଛି। ସୁଫିବାଦ ସମ୍ପ୍ରଦାୟର ସୀମା ଭିତରେ କାମ କରେ ନାହିଁ। ଗଙ୍ଗା-ଯମୁନା ତେହଜିବ ବା ବହୁଳବାଦୀ ସଂସ୍କୃତି ଏହାର ଆତ୍ମା। ଜମାଲ ସିଦ୍ଦିକି ଏହା ମଧ୍ୟ କହିଛନ୍ତି ଯେ, ମୁସଲମାନମାନେ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ମୋଦୀ ଦେଇଥିବା ବାର୍ତ୍ତାକୁ ବୁଝିବାକୁ ଚେଷ୍ଟା କରିବା ଉଚିତ୍।

ବିଜେପି ନିକଟ ଅତୀତରେ ପଛୁଆ ମୁସଲିମ ସମ୍ପ୍ରଦାୟ 'ବସମାନ୍ଦା' ସହିତ ଯୋଡ଼ି ହେବା ପାଇଁ ଅନେକ ପ୍ରୟାସ କରିଛି। ଏବେ ସୁଫିବାଦ ପାଇଁ ସମାନ ପଦକ୍ଷେପ ନିଆଯାଉଛି। ୨୦୨୩ ମସିହାରେ ସମାନ ଅଭିଯାନରେ, ବିଜେପି ସଂଖ୍ୟାଲଘୁ ମୋର୍ଚ୍ଚା 'ସୁଫି ସମ୍ବାଦ ମହା ଅଭିଯାନ' ଅଧୀନରେ ଏକ କାର୍ଯ୍ୟକ୍ରମ ଆୟୋଜନ କରିଥିଲା ​​ଯେଉଁଥିରେ ୧୦୦ ରୁ ଅଧିକ ଦରଘାର ପ୍ରାୟ ୨୦୦ ସୁଫି ଅଂଶଗ୍ରହଣ କରିଥିଲେ। 

ଏହି କାର୍ଯ୍ୟକ୍ରମରେ ଆସିଥିବା ସୁଫିମାନଙ୍କୁ ମୋଦୀ ସରକାରଙ୍କ ନୀତି ଏବଂ ଯୋଜନାକୁ ସାଧାରଣ ମୁସଲମାନମାନଙ୍କ ନିକଟରେ ପହଞ୍ଚାଇବାକୁ ଅନୁରୋଧ କରାଯାଇଥିଲା। ସେହିପରି, ସାରା ଦେଶରେ ସୁଫିମାନଙ୍କ ପାଖରେ ପହଞ୍ଚିବା ପାଇଁ ବିଭିନ୍ନ କମିଟି ମଧ୍ୟ ଗଠନ କରାଯାଇଥିଲା। ୨୦୨୩ମସିହାରେ, ଏକ ସ୍ଲୋଗାନ ମଧ୍ୟ ଦିଆଯାଇଥିଲା ଯେ, 'କୌଣସି ଦୂରତା ନାହିଁ, କୌଣସି ବ୍ୟବଧାନ ନାହିଁ, ମୋଦୀ ଆମର ଭାଇ'।

ଅଧିକ ପଢ଼ନ୍ତୁ: ବିଜେପିକୁ ପ୍ରଥମ ମହିଳା ଅଧ୍ୟକ୍ଷା ମିଳିବା ନେଇ ଚର୍ଚ୍ଚା: ଜାଣନ୍ତୁ ଦୋଡରେ ଆଗରେ କିଏ

ଏହା ସମସ୍ତେ ଜାଣନ୍ତି ଯେ, ଦେଶ‌ର ଜନସଂଖ୍ୟାରେ ମୁସଲିମ ସମ୍ପ୍ରଦାୟର ଏକ ବଡ଼ ଅଂଶ।ତେବେସମଗ୍ର ସମ୍ପ୍ରଦାୟ ବିଜେପି ସମର୍ଥକ ହୋଇନାହାନ୍ତି। ବିଜେପିର ବିଚାରଧାରା, ବିଜେପି ସରକାରଙ୍କ କିଛି ନୀତି ଏବଂ ନେତାଙ୍କ ବିବାଦୀୟ ମନ୍ତବ୍ୟ ଏହାର ମୁଖ୍ୟ କାରଣ ପାଲଟିଛି। ଏବେ ବିଜେପି ମୁସଲିମ ସମାଜର ବିଭିନ୍ନ ସମ୍ପ୍ରଦାୟ ସହିତ ଏପରି ଭାବରେ ଯୋଗାଯୋଗ କରିବାକୁ ଚେଷ୍ଟା କରୁଛି ଯେପରି ଦଳର ହିନ୍ଦୁତ୍ୱ ପ୍ରତିଛବି ପ୍ରଭାବିତ ନହୁଏ ଏବଂ ମୁସଲିମ ସମ୍ପ୍ରଦାୟକୁ ମଧ୍ୟ ଧୀରେ ଧୀରେ ଦଳର ଭୋଟବ୍ୟାଙ୍କ ଭାବେ ପରିଣତ କରାଯାଇପାରିବ।

ଅଧିକ ପଢ଼ନ୍ତୁ: ରାଉରକେଲାରେ ଲଜ୍ଜା: ସାତ ବର୍ଷର ନାବାଳିକାଙ୍କୁ ଦୁଷ୍କର୍ମ, ଅଭିଯୁକ୍ତ ହେଲ୍ପର ଫେରାର