ୟୁକ୍ରେନ ପରେ ଏବେ ଏହି ଦେଶ ଉପରେ ପୁଟିନଙ୍କ ନଜର: ଦଖଲ କରିବାକୁ ଷଡ଼ଯନ୍ତ୍ର, ସାଟେଲାଇଟ୍ ଚିତ୍ରରୁ ସତ୍ୟ ପ୍ରକାଶ

ମସ୍କୋ: ୟୁକ୍ରେନ ଉପରେ ଆକ୍ରମଣ ପରେ, ରୁଷିଆର କାର୍ଯ୍ୟକଳାପ ଏବେ ଏକ ନୂତନ ମୋର୍ଚ୍ଚା ଆଡ଼କୁ ଇଙ୍ଗିତ କରୁଛି। ସାଟେଲାଇଟ୍ ଚିତ୍ରରୁ ଜଣାପଡ଼ିଛି ଯେ, ରୁଷିଆ ଫିନଲ୍ୟାଣ୍ଡ ସୀମା ନିକଟରେ ଚାରୋଟି ଗୁରୁତ୍ୱପୂର୍ଣ୍ଣ ସ୍ଥାନରେ ଏକ ବଡ଼ ସାମରିକ ମୁତୟନ ଆରମ୍ଭ କରିଛି। ଯେତେବେଳେ ତୁର୍କୀରେ ୟୁକ୍ରେନ ଏବଂ ରୁଷିଆ ମଧ୍ୟରେ ଏକ ସମ୍ଭାବ୍ୟ ବୈଠକ ବିଷୟରେ ଆଲୋଚନା ଚାଲିଛି।

ଭ୍ଲାଦିମିର ପୁଟିନଙ୍କ ନୀରବ ପ୍ରସ୍ତୁତି ୟୁରୋପରେ ଗଭୀର ଚିନ୍ତାର କାରଣ ପାଲଟିଛି। ସ୍ୱିଡେନର ଜାତୀୟ ପ୍ରସାରକ ଏସଭିଟି  ପ୍ଲାନେଟ୍ ଲ୍ୟାବ୍ସରୁ ଆସିଥିବା ସାଟେଲାଇଟ୍ ଚିତ୍ର ପ୍ରକାଶ ପାଇଛି ଯେ, ଚାରୋଟି ରୁଷିଆ ଘାଟି କାମେଙ୍କା, ପେଟ୍ରୋଜାଭୋଡସ୍କ, ସେଭେରୋମୋର୍ସ୍କ-୨ ଏବଂ ଓଲେନିଆରେ ସାମରିକ କାର୍ଯ୍ୟକଳାପ  ବୃଦ୍ଧି ପାଇଛି।

କାମେଙ୍କା ଫିନଲ୍ୟାଣ୍ଡ ସୀମାଠାରୁ ମାତ୍ର ୩୫ ମାଇଲ ଦୂରରେ ଅବସ୍ଥିତ। ଫେବ୍ରୁଆରି ମାସରୁ ଏହି ଅଞ୍ଚଳରେ ୧୩୦ ରୁ ଅଧିକ ସାମରିକ ତମ୍ବୁ ସ୍ଥାପନ କରାଯାଇଛି। ଏଠାରେ ପ୍ରାୟ ୨୦୦୦ ସୈନିକ ରହିପାରିବେ ବୋଲି  ଅନୁମାନ କରାଯାଉଛି। ଫିନଲ୍ୟାଣ୍ଡ ସୀମାଠାରୁ ୧୦୯ ମାଇଲ ଦୂରରେ ପେଟ୍ରୋଜାଭୋଡସ୍କରେ, ତିନୋଟି ବଡ଼ ଷ୍ଟୋରେଜ୍ ହଲ୍ ନିର୍ମାଣ କରାଯାଇଛି, ଯେଉଁଠାରେ ୫୦-୫୦ଟି ସଶସ୍ତ୍ର ଯାନ ରଖାଯାଇପାରିବ। ବିଶେଷଜ୍ଞମାନେ ଅନୁମାନ କରିଛନ୍ତି ଯେ, ସଶସ୍ତ୍ର ଯାନର ପ୍ରକୃତ ସଂଖ୍ୟାକୁ ଲୁଚାଇବା ପାଇଁ ଏହି ହଲ୍ ଗୁଡ଼ିକ ନିର୍ମାଣ କରାଯାଇଛି।

ତୃତୀୟ ସ୍ଥାନରେ ସେଭେରୋମୋର୍ସ୍କ-୨ ଅଛି, ଯେଉଁଠାରେ ସାଟେଲାଇଟ୍ ଚିତ୍ରରେ ଅନେକ ହେଲିକପ୍ଟର ଦେଖାଯାଇଛି। ଏହି ଘାଟିକୁ ରୁଷିଆର ବାୟୁସେନା ଅଭିଯାନ ପାଇଁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। ଚତୁର୍ଥ ହେଉଛି ଓଲେନିଆ। ୟୁକ୍ରେନ ଅନୁଯାୟୀ, ଏହି ଘାଟିରୁ ୟୁକ୍ରେନ  ଉପରେ ଅନେକ ଥର ଆକ୍ରମଣ କରାଯାଇଛି। ଏଠାରେ ମଧ୍ୟ ନୂତନ ଗତିବିଧି ଦେଖିବାକୁ ମିଳିଛି।

ରୁଷିଆର ଏହି ପ୍ରସ୍ତୁତି ଏପରି ସମୟରେ ହେଉଛି ଯେତେବେଳେ ଫିନଲ୍ୟାଣ୍ଡ ଏବଂ ସ୍ୱିଡେନ ସମ୍ପ୍ରତି ନାଟୋର ଅଂଶ ହୋଇଛନ୍ତି। ୨୦୨୨ ମସିହାରେ ୟୁକ୍ରେନ ଉପରେ ରୁଷିଆର ଆକ୍ରମଣ ପରେ ଫିନଲ୍ୟାଣ୍ଡ ଏପ୍ରିଲ ୨୦୨୩ ମସିହାରେ ନାଟୋରେ ଯୋଗ ଦେଇଥିଲା। ଏହା ପରେ ସ୍ୱିଡେନ ମଧ୍ୟ ମାର୍ଚ୍ଚ ୨୦୨୪ ମସିହାରେ ନାଟୋର ଏକ ଅଂଶ ହୋଇଥିଲା। ରୁଷିଆ ଲଗାତାର ଭାବରେ ନାଟୋ ଉପରେ ଆକ୍ରମଣାତ୍ମକ ଆରୋପ ଲଗାଇଛି ଏବଂ ଆବଶ୍ୟକୀୟ ପଦକ୍ଷେପ ନେବ ବୋଲି କହିଛି। ଏବେ ଏହି ଚିତ୍ରଗୁଡ଼ିକ ସେହି ଚେତାବନୀକୁ ସତ୍ୟ ବୋଲି ପ୍ରମାଣିତ କରୁଥିବା ପରି ମନେ ହେଉଛି।

ଅଧିକ ପଢ଼ନ୍ତୁ: ମୋଦୀ ଦେଲେ ନାରା: ଯବାନ କହିଲେ ଭାରତ ମାତା କି ଜୟ... ଆଦମପୁର ଏୟାର ବେସରେ ବାୟୁବୀରଙ୍କ ସହ ପ୍ରଧାନମନ୍ତ୍ରୀ

ରୁଷିଆ ପୁଣି ଥରେ ୟୁକ୍ରେନ ଭଳି ପଦକ୍ଷେପ ନେବ କି ବୋଲି ଚର୍ଚ୍ଚା ଆରମ୍ଭ ହୋଇଛି। ଏହି ସାଟେଲାଇଟ୍ ଚିତ୍ରଗୁଡ଼ିକ ୨୦୨୧ ମସିହାର ସ୍ମୃତିକୁ ଫେରାଇ ଆଣିଛି, ଯେତେବେଳେ ୟୁକ୍ରେନିଆନ୍ ସୀମାରେ ସମାନ କାର୍ଯ୍ୟକଳାପ ପରେ ୨୦୨୨ ମସିହାରେ ରୁଷିଆ ଆକ୍ରମଣ ହୋଇଥିଲା। ଫିନଲ୍ୟାଣ୍ଡର ପ୍ରତିରକ୍ଷା ଉପମୁଖ୍ୟ ଲେଫ୍ଟନାଣ୍ଟ ଜେନେରାଲ ଭେସା ଭିର୍ତାନେନ୍ କହିଛନ୍ତି ଯେ, ରୁଷିଆ ନାଟୋର ଏକତାକୁ ପରୀକ୍ଷା କରୁଛି। ସ୍ୱିଡେନର ପ୍ରତିରକ୍ଷା ମୁଖ୍ୟ ମାଇକେଲ କ୍ଲେସନ ମଧ୍ୟ କହିଛନ୍ତି, ଆମେ ନାଟୋରେ ଯୋଗଦେବା ସମୟରେ ରୁଷିଆ କହିଥିଲା ​​ଯେ, ଏହାର ଜବାବ ଦେବ, ଏବେ ତାହା ସତ୍ୟ ପ୍ରମାଣିତ ହେଉଛି।

ଅଧିକ ପଢ଼ନ୍ତୁ: ସିବିଏସଇ ଦଶମ ଶ୍ରେଣୀ ପରୀକ୍ଷା ଫଳ ପ୍ରକାଶିତ: ଓଡ଼ିଶାରେ ପାସ୍ ହାର ୯୨.୬୪ ପ୍ରତିଶତ

Russia | Finland | Ukraine