ଦ୍ରୁତ ବେଗରେ କାର୍ ଚଳାଇବା ଅଭିଯୋଗ: କେନ୍ଦ୍ରମନ୍ତ୍ରୀଙ୍କର କଟିଲା ଚାଲାଣ

ପାଟନା:  କେନ୍ଦ୍ରମନ୍ତ୍ରୀ ତଥା ଲୋକ ଜନଶକ୍ତି ପାର୍ଟି (ରାମ ବିଳାସ)ମୁଖ୍ୟ ଚିରାଗ ପାସୱାନଙ୍କୁ ବିହାର ପରିବହନ ବିଭାଗ ପକ୍ଷରୁ ଦ୍ରୁତ ବେଗରେ କାର୍ ଚଳାଇବା ଅଭିଯୋଗରେ ଏକ ଇ-ଚାଲାଣ ଜାରି କରାଯାଇଛି। ବିହାରର ଏକ ଟୋଲ୍ ପ୍ଲାଜାରେ ନବନିର୍ମିତ ଇ-ଡିଟେକସନ୍ ସିଷ୍ଟମ ଦ୍ୱାରା ପାସୱାନଙ୍କ କାର୍‌ର ଗତି ଧାର୍ଯ୍ୟ ସୀମାଠାରୁ ଅଧିକ ଥିବା  ଜଣାପଡିବା ପରେ ଇ-ଚାଲାଣ ଜାରି କରାଯାଇଛି।

କୁହାଯାଉଛି ଯେ ଏହି ଘଟଣା ଘଟିବା ସମୟରେ ଚିରାଗ ପାସୱାନ ଜାତୀୟ ରାଜପଥରେ ହାଜିପୁରରୁ ଚମ୍ପାରଣ ଅଭିମୁଖେ ଯାତ୍ରା କରୁଥିଲେ। ଟ୍ରାଫିକ୍ ନିୟମକୁ ଅଧିକ ପ୍ରଭାବଶାଳୀ ଭାବରେ କାର୍ଯ୍ୟକାରୀ କରିବା ପାଇଁ ସାମ୍ପ୍ରତିକ ପଦକ୍ଷେପର ଏକ ଅଂଶ ଭାବରେ, ଇ-ଡିଟେକସନ୍ ସିଷ୍ଟମ୍ ବେଗ ଉଲ୍ଲଂଘନକାରୀକୁ ଚିହ୍ନଟ କରେ ଏବଂ ସ୍ୱୟଂଚାଳିତ ଭାବରେ ଚାଲାଣ ଜାରି କରିଥାଏ।

ଗତ ସପ୍ତାହରେ  ବିହାର ପରିବହନ ବିଭାଗ ଏବଂ ଟ୍ରାଫିକ ପୋଲିସ ଏହି ଉନ୍ନତ ପ୍ରଣାଳୀ ମାଧ୍ୟମରେ ୧୬,୭୦୦ରୁ ଅଧିକ ଇ-ଚାଲାଣ ଜାରି କରିଛି। ଯାହାର ପରିମାଣ ୯.୪୯ କୋଟି ଟଙ୍କା। ଇ-ଡିଟେକସନ ଟେକ୍ନୋଲୋଜି ରାଜ୍ୟର ୧୩ଟି ଟୋଲ ପ୍ଲାଜାରେ ସ୍ଥାପିତ ହୋଇଛି ଯାହା ମୋଟର ଯାନ ନିୟମ ଉଲ୍ଲଂଘନ କରୁଥିବା ଯାନ ଉପରେ ନଜର ରଖିଥାଏ।

ଏହି ସିଷ୍ଟମ୍ କେବଳ ଗତି ଯାଞ୍ଚ କରେ ନାହିଁ ବରଂ ଯାନବାହନରେ ଆବଶ୍ୟକୀୟ ଡକ୍ୟୁମେଣ୍ଟ୍ ନ ଥିବା କ୍ଷେତ୍ରରେ ଇ-ଚାଲାଣ ମଧ୍ୟ ଜାରି କରିଥାଏ। ଯଦି କୌଣସି ଯାନ ଫିଟନେସ୍, ପ୍ରଦୂଷଣ, ଏବଂ ବୀମା ଆବଶ୍ୟକତା ପୂରଣ କରୁ ନଥାଏ ତେବେ ମଧ୍ୟ ଏକ ସ୍ୱୟଂଚାଳିତ ଇ-ଚାଲାଣ ଜାରି କରାଯାଇଥାଏ। ଏହା ଗାଡି ମାଲିକଙ୍କ ପଞ୍ଜୀକୃତ ମୋବାଇଲ୍ ନମ୍ବରକୁ ସିଧାସଳଖ ପଠାଯାଇଥାଏ ।

ଜାରି କରାଯାଇଥିବା ମୋଟ ୧୬,୭୫୫ ଇ-ଚାଲାଣ ମଧ୍ୟରୁ ୯,୬୭୬ଟି ଚାଲାଣ ଅନ୍ୟ ରାଜ୍ୟରେ ପଞ୍ଜିକୃତ ଯାନ ପାଇଁ ହୋଇଥିବାବେଳେ ବିହାରରେ ପଞ୍ଜିକୃତ ଯାନ ପାଇଁ ୭,୦୭୯ ଟି ଚାଲାଣ ଜାରି କରାଯାଇଛି। 

ଅଧିକ ପଢ଼ନ୍ତୁ:ମମତା ସରକାରଙ୍କ ଦୁଇ ଦିନିଆ ସ୍ୱତନ୍ତ୍ର ଅଧିବେଶନ ଆରମ୍ଭ

ଅଗଷ୍ଟ ୭ ରୁ ଅଗଷ୍ଟ ୧୫ ପର୍ଯ୍ୟନ୍ତ ଚାଲିଥିବା ଏହି ବିଶାଳ କାର୍ଯ୍ୟକାରିତା ଅଭିଯାନରେ ସଡକ ସୁରକ୍ଷା ତଥା ନିୟାମକ ଅନୁପାଳନରେ ଉନ୍ନତି ଆଣିବା ପାଇଁ ରାଜ୍ୟର ପ୍ରତିବଦ୍ଧତା ପ୍ରତିଫଳିତ ହୋଇଛି।

ଅଧିକ ପଢ଼ନ୍ତୁ:ଦୋଷୀ ସାବ୍ୟସ୍ତ ହେଲେ ବି ବୁଲଡୋଜର ଚାଲିବା ଉଚିତ୍ ନୁହେଁ: ସୁପ୍ରିମକୋର୍ଟ