ତୁର୍କୀ ସହାୟତାରେ ବାଂଲାଦେଶରେ ଅସ୍ତ୍ରଶସ୍ତ୍ର ତିଆରି ହେବ: ୟୁନୁସଙ୍କ ପଦକ୍ଷେପ ନେଇ ଭାରତର ଚିନ୍ତା ବଢ଼ିଲା

ଢାକା: ପାକିସ୍ତାନର ବନ୍ଧୁ ତୁର୍କୀ ଏବଂ ବାଂଲାଦେଶ ମଧ୍ୟରେ ସାମରିକ ସହଯୋଗ ବୃଦ୍ଧି ପାଉଛି। ମହମ୍ମଦ ୟୁନୁସଙ୍କ ନେତୃତ୍ୱରେ ବାଂଲାଦେଶ ଏବେ ଚିଟାଗଙ୍ଗ ଏବଂ ନାରାୟଣଗଞ୍ଜରେ ପ୍ରତିରକ୍ଷା ଶିଳ୍ପ କମ୍ପ୍ଲେକ୍ସ ନିର୍ମାଣ ପାଇଁ ତୁର୍କୀର ସହଯୋଗ ପାଇଁ ଆଲୋଚନା କରୁଛି।

ଦେଶର ଶିଳ୍ପ ବିକାଶ ପ୍ରାଧିକରଣ (ବିଆଇଡିଏ)ର କାର୍ଯ୍ୟନିର୍ବାହୀ ଅଧ୍ୟକ୍ଷ ଚୌଧୁରୀ ଆଶିକ୍ ମହମୁଦ ବିନ୍ ହାରୁନ୍ ତାଙ୍କର ସମ୍ପ୍ରତି ପାଞ୍ଚ ଦିନିଆ ତୁର୍କୀ ଗସ୍ତ ସମୟରେ ଏହା ଉପରେ ବିସ୍ତୃତ ଆଲୋଚନା କରିଥିଲେ। ହାରୁନଙ୍କ ଯାତ୍ରାରେ ତୁର୍କୀର କେନ୍ଦ୍ରୀୟ ଆନାଟୋଲିଆ ଅଞ୍ଚଳର କିରିକ୍କାଲେରେ ଅବସ୍ଥିତ ସରକାରୀ ମାଲିକାନା ମାକିନେ ଭେ କିମ୍ୟା ଏଣ୍ଡିଷ୍ଟ୍ରିସି (ଏମକେଇ) ପରିଦର୍ଶନ ମଧ୍ୟ ଅନ୍ତର୍ଭୁକ୍ତ ଥିଲା।

ହାରୁନଙ୍କ ଗସ୍ତର ଲକ୍ଷ୍ୟ ଥିଲା ତୁର୍କୀ ସହିତ ଗଭୀର ରଣନୈତିକ ପ୍ରତିରକ୍ଷା ସମ୍ପର୍କ ବିକଶିତ କରିବା।  ଏହି ଲକ୍ଷ୍ୟ ସହିତ ଉତ୍ପାଦନ, ପ୍ରଯୁକ୍ତିବିଦ୍ୟା ହସ୍ତାନ୍ତର ଏବଂ କ୍ଷମତା ନିର୍ମାଣ ପାଇଁ ମଧ୍ୟ ଆଲୋଚନା କରାଯାଇଥିଲା।

ନର୍ଥ ଇଷ୍ଟ ନ୍ୟୁଜ୍ ଅନୁଯାୟୀ, ହାରୁନଙ୍କ ତୁର୍କୀ ଗସ୍ତ ସମୟରେ, ତାଙ୍କୁ ଏବଂ ତାଙ୍କର ଅନ୍ୟ ସହକର୍ମୀଙ୍କୁ ଏମକେଇ ଉତ୍ପାଦନ କୋଠା, ପରୀକ୍ଷଣ ସ୍ଥଳ ଏବଂ ତୋପ ପ୍ରଣାଳୀ, ଶକ୍ତି ଏବଂ ଛୋଟ ଅସ୍ତ୍ରଶସ୍ତ୍ର ବିଷୟରେ ଗୋପନୀୟ ସୂଚନା ଦିଆଯାଇଥିଲା।

ଏହା ପ୍ରଥମ ଥର ନୁହେଁ ଯେ, ବାଂଲାଦେଶ ଏମକେଇ ସହିତ ସହଭାଗୀ ହୋଇଛି। ଏହି ଅଧିଗ୍ରହଣଗୁଡ଼ିକ ଏମକେଇ ବୋରାନ ୧୦୫ ଏମଏମ ହାଓ୍ୱିଜର୍ ଉପରେ କେନ୍ଦ୍ରିତ ଥିଲା। ଯାହା ମଧ୍ୟରୁ ୧୮ଟି ୟୁନିଟ୍ ଗତ ବର୍ଷ ଶେଷ ଭାଗରେ କିଣାଯାଇଥିଲା। ଭବିଷ୍ୟତରେ ଏହାକୁ ୨୦୦ ୟୁନିଟ୍‌କୁ ବୃଦ୍ଧି କରିବାର ଯୋଜନା ଅଛି। ଏହା ସହିତ, ବାଂଲାଦେଶ ତୁର୍କୀ ନିର୍ମିତ ଓଟୋକାର ଟୁଲପାର ଲାଇଟ୍ ଟ୍ୟାଙ୍କ କ୍ରୟ କରିବାର ସମ୍ଭାବନା ଉପରେ ଗବେଷଣା କରୁଛି।

ଅଧିକ ପଢ଼ନ୍ତୁ: ୨୧ ଦିନରେ ୧୧ ଥର ଯୁଦ୍ଧବିରତିର ଶ୍ରେୟ ନେଇଛନ୍ତି ଟ୍ରମ୍ପ୍: ପ୍ରଧାନମନ୍ତ୍ରୀ ଚୁପ୍ କାହିଁକି ବୋଲି କଂଗ୍ରେସର ପ୍ରଶ୍ନ

୨୦୧୮ ମସିହାରେ ବାଂଲାଦେଶ ଏବଂ ତୁର୍କୀ ମଧ୍ୟରେ ପ୍ରତିରକ୍ଷା ସମ୍ପର୍କ ସୁଦୃଢ଼ ହୋଇଥିଲା। ଯେତେବେଳେ ଢାକା ତୁର୍କୀ ନିର୍ମାତାଙ୍କଠାରୁ ବେରାକ୍ଟର୍ ଟିବି-୨ ଡ୍ରୋନ୍ ସମେତ ୧୫ ପ୍ରକାରର ସାମରିକ ହାର୍ଡୱେର୍ କିଣିଥିଲା। ଏବେ ଏମକେଇ  ସହିତ ନୂତନ ସହବନ୍ଧନ ଶିଳ୍ପ ସମନ୍ୱୟକୁ ପ୍ରୋତ୍ସାହନ ଦେବ ବୋଲି ଆଶା କରାଯାଉଛି। ରିପୋର୍ଟ ଅଛି ଯେ, ବାଂଲାଦେଶ ଏବଂ ତୁର୍କୀ ଏକ ପ୍ରତିରକ୍ଷା ଶିଳ୍ପ କାର୍ଯ୍ୟଗୋଷ୍ଠୀକୁ ସଂସ୍ଥାଗତ କରିବା ସହିତ ଏକ ବୁଝାମଣାପତ୍ର ସାକାର କରିବା ପାଇଁ ଆନୁଷ୍ଠାନିକ ଆଲୋଚନା କରିବାକୁ ଯାଉଛନ୍ତି।

ସୂଚନାଯୋଗ୍ୟ, ତୁର୍କୀ ଏବଂ ବାଂଲାଦେଶ ମଧ୍ୟରେ ପ୍ରତିରକ୍ଷା ଘନିଷ୍ଠତାର ରିପୋର୍ଟ ଏପରି ଏକ ସମୟରେ ଆସିଛି ଯେତେବେଳେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇବାରେ ଲାଗିଛି। ଭାରତ ସହିତ ସମ୍ପ୍ରତି ହୋଇଥିବା ସାମରିକ ମୁହାଁମୁହିଁ ସମୟରେ ତୁର୍କୀ ଖୋଲାଖୋଲି ଭାବରେ ପାକିସ୍ତାନକୁ ସମର୍ଥନ କରିଥିଲା। ଏପରି ପରିସ୍ଥିତିରେ, ଭାରତର ଚିନ୍ତାକୁ ବୃଦ୍ଧି ପାଇଛି।

ଅଧିକ ପଢ଼ନ୍ତୁ: ଅବ୍ବାସ ଅନସାରୀକୁ ଝଟକା, ହେଟ ସ୍ପିଚ୍ ମାମଲାରେ ୨ ବର୍ଷ ଜେଲ୍

India | pakistan | turkey | Bangladesh