ବାଂଲାଦେଶରେ ପୁଣି ବିଦ୍ରୋହ ସମ୍ଭାବନା: ୯ ମାସ ପରେ ସମାନ ସ୍ଥିତିକୁ ଫେରିଲା ଦେଶ

ଢାକା: ବାଂଲାଦେଶରେ ପୁଣି ଥରେ ରାଜନୈତିକ ବିଦ୍ରୋହର ଆଶଙ୍କା ଦେଖାଦେଇଛି। ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସ୍ ଇସ୍ତଫା ଦେବାକୁ ଚାହୁଁଛନ୍ତି। ଗତ ୯ ମାସ ମଧ୍ୟରେ ଏହା ବାଂଲାଦେଶରେ ଦ୍ୱିତୀୟ ଏପରି ସଙ୍କଟ। ଗତ ବର୍ଷ ଅଗଷ୍ଟ ମାସରେ ମଧ୍ୟ ବାଂଲାଦେଶରେ ବହୁତ ଅଶାନ୍ତି ସୃଷ୍ଟି ହୋଇଥିଲା, ଯେଉଁଥିରେ ଛାତ୍ର ଆନ୍ଦୋଳନ ଯୋଗୁ ଶେଖ ହାସିନାଙ୍କୁ କ୍ଷମତାରୁ ହଟାଇବା ଘଟଣା ଘଟିଥିଲା। 

ଜୁଲାଇ ୨୦୨୪ରେ, ବିଶ୍ୱବିଦ୍ୟାଳୟର ଛାତ୍ରମାନେ ସରକାରୀ ଚାକିରି ପାଇଁ କୋଟା ବ୍ୟବସ୍ଥା ବିରୋଧରେ ଦେଶବ୍ୟାପୀ ପ୍ରତିବାଦ ଆରମ୍ଭ କରିଥିଲେ। ତାଙ୍କର ବିଶ୍ୱାସ ଥିଲା ଯେ, ଏହି ବ୍ୟବସ୍ଥା ବାଂଲାଦେଶର ସ୍ୱାଧୀନତା ସଂଗ୍ରାମୀଙ୍କ ପିଲାମାନଙ୍କୁ ସରକାରୀ ଚାକିରିରେ ୩୦% ସଂରକ୍ଷଣ ଦେବ, ଅନ୍ୟ ପିଲାମାନେ ଏଥିରୁ ବଞ୍ଚିତ ହେବେ। ପ୍ରାରମ୍ଭରେ ପ୍ରତିବାଦ ଶାନ୍ତିପୂର୍ଣ୍ଣ ଥିଲା, କିନ୍ତୁ ଯେତେବେଳେ ସରକାର ଛାତ୍ରମାନଙ୍କ ଉପରେ ଲାଠିଚାର୍ଜ କଲେ, ଏହା ହିଂସାତ୍ମକ ସଂଘର୍ଷରେ ପରିଣତ ହେଲା।

ପ୍ରମୁଖ ଘଟଣାକ୍ରମ:

୧ ଜୁଲାଇ ୨୦୨୪: ଛାତ୍ରମାନେ ରାସ୍ତାକୁ ଓହ୍ଲାଇ ରାସ୍ତା ଏବଂ ରେଳ ଲାଇନ ଅବରୋଧ କରିଥିଲେ। ତାଙ୍କର ଦାବି ଥିଲା ଯେ, ସରକାରୀ ଚାକିରି ପାଇଁ କୋଟା ବ୍ୟବସ୍ଥାରେ ଉନ୍ନତି ଆଣିବା ଉଚିତ୍। ପୁଲିସ ବ୍ୟାରିକେଡ୍ ଲଗାଇ ଉତ୍ତେଜନାକୁ ଆହୁରି ବୃଦ୍ଧି କରିଥିଲା।

୧୬ ଜୁଲାଇ ୨୦୨୪: ପ୍ରଦର୍ଶନକାରୀ ଏବଂ ସରକାରୀ ସମର୍ଥକଙ୍କ ମଧ୍ୟରେ ହିଂସା ଘଟିଥିଲା। ଯାହା ଫଳରେ ଦୁଇ ଗୋଷ୍ଠୀ ମଧ୍ୟରେ ହିଂସାତ୍ମକ ସଂଘର୍ଷ ହୋଇଥିଲା। ଏହି ସଂଘର୍ଷରେ ଛଅ ଜଣ ପ୍ରାଣ ହରାଇଥିଲେ, ଯାହା ଫଳରେ  ହିଂସା ଦ୍ରୁତ ଗତିରେ ବୃଦ୍ଧି ପାଇଥିଲା।

୧୮ ଜୁଲାଇ ୨୦୨୪: ପ୍ରଦର୍ଶନକାରୀମାନେ ବାଂଲାଦେଶ ଟେଲିଭିଜନ ମୁଖ୍ୟାଳୟ ଏବଂ ସରକାରୀ କୋଠାରେ ନିଆଁ ଲଗାଇ ଦେଇଥିଲେ। 'ଏକଛତ୍ରବାଦୀଙ୍କୁ ହଟାଅ' ସ୍ଲୋଗାନ ସବୁଠି ପ୍ରତିଧ୍ୱନିତ ହେବାକୁ ଲାଗିଲା। ତତ୍କାଳୀନ ପ୍ରଧାନମନ୍ତ୍ରୀ ଶେଖ ହସିନା ଶାନ୍ତି ପାଇଁ ନିବେଦନ କରିଥିଲେ, କିନ୍ତୁ ସେତେବେଳକୁ ବହୁତ ଡେରି ହୋଇଯାଇଥିଲା। ଏହି ସମୟ ସୁଦ୍ଧା, ହିଂସାରେ ୩୨ ଜଣଙ୍କର ମୃତ୍ୟୁ ହୋଇସାରିଥିଲା ​​ଏବଂ ଶହ ଶହ ଲୋକ ଆହତ ହୋଇଥିଲେ।

୨୧ ଜୁଲାଇ ୨୦୨୪: ବାଂଲାଦେଶ ସୁପ୍ରିମକୋର୍ଟ କୋଟା ବ୍ୟବସ୍ଥାକୁ ବେଆଇନ ଘୋଷଣା କଲେ, କିନ୍ତୁ ପ୍ରତିବାଦକାରୀମାନେ ସନ୍ତୁଷ୍ଟ ହୋଇ ନଥିଲେ। କାରଣ ସେମାନେ ୧୯୭୧ ସ୍ୱାଧୀନତା ସଂଗ୍ରାମର 'ସ୍ୱାଧୀନତା ସଂଗ୍ରାମୀ'ଙ୍କ ପିଲାମାନଙ୍କ ପାଇଁ ସଂରକ୍ଷିତ ଚାକିରି ସମ୍ପୂର୍ଣ୍ଣ ଉଚ୍ଛେଦ କରିବାକୁ ଦାବି କରିଥିଲେ।

୫ ଅଗଷ୍ଟ ୨୦୨୪: ପ୍ରଦର୍ଶନକାରୀମାନେ ଶେଖ ହାସିନାଙ୍କ ବାସଭବନ ଉପରେ ଆକ୍ରମଣ କଲେ, ଯାହା ପରେ ସେ ଭାରତ ପଳାଇ ଆସିଲେ। ସେହି ସମୟରେ, ହଜାର ହଜାର ଲୋକ ରାସ୍ତା ଉପରେ ଉତ୍ସବ ପାଳନ କରୁଥିଲେ।

ଶେଖ ହାସିନା ପଦ ଛାଡିବାର ପ୍ରାୟ ଗୋଟିଏ ବର୍ଷ ପରେ ଏବେ ମହମ୍ମଦ ୟୁନୁସଙ୍କ ମଧ୍ୟବର୍ତ୍ତୀକାଳୀନ ସରକାର ମଧ୍ୟ ସମସ୍ୟାରେ ପଡ଼ିଛି। ନ୍ୟୁଜ୍ ଏଜେନ୍ସି ରଏଟର୍ସ ଅନୁଯାୟୀ, ଯଦି ରାଜନୈତିକ ଦଳଗୁଡ଼ିକ ସଂସ୍କାରକୁ ଅନୁମୋଦନ ନ କରନ୍ତି ତେବେ ୟୁନୁସ୍ ଇସ୍ତଫା ଦେବାକୁ ଧମକ ମଧ୍ୟ ଦେଇଛନ୍ତି।

ନାହିଦ ଇସଲାମ, ନ୍ୟାସନାଲ ସିଟିଜେନ ପାର୍ଟି (ଏନସିପି)ର ନେତା, ଯିଏ ଗତ ବର୍ଷର ଛାତ୍ର ଆନ୍ଦୋଳନରୁ ବାହାରି ଆସିଥିଲେ। ସେ କହିଛନ୍ତି ଯେ, ରାଜନୈତିକ ସମର୍ଥନ ବିନା ୟୁନୁସଙ୍କ ପାଇଁ କାମ କରିବା କଷ୍ଟକର ହୋଇପଡୁଛି। ଏହା ଯୋଗୁ ୟୁନୁସ ଚିନ୍ତିତ ଅଛନ୍ତି। ସେ କହିଥିଲେ ଯେ, ଯଦି ତାଙ୍କୁ ଦିଆଯାଇଥିବା କାମ ୟୁନୁସ୍ କରିପାରିବେ ନାହିଁ, ତେବେ ୟୁନୁସ ତାଙ୍କ ପଦବୀରୁ ଇସ୍ତଫା ଦେବେ।

ସୂଚନାରଯୋଗ୍ୟ, ୟୁନୁସ୍ ବାଂଲାଦେଶରେ ରାଜନୈତିକ ଦଳର ରାଜନୀତିକୁ ଉନ୍ନତ କରିବା ଏବଂ ନିରପେକ୍ଷ ନିର୍ବାଚନ କରିବା ପାଇଁ କ୍ଷମତାକୁ ଆସିଥିଲେ, ଯେଉଁଥିରେ ସେ ସମ୍ପୂର୍ଣ୍ଣ ବିଫଳ ପ୍ରମାଣିତ ହୋଇଛନ୍ତି କାରଣ ସେବେଠାରୁ ଦେଶରେ କିଛି ପରିବର୍ତ୍ତନ ହୋଇନାହିଁ।

ନାହିଦ କହିଛନ୍ତି, ଆମେ ସେମାନଙ୍କୁ ସ୍ପଷ୍ଟ ଭାବରେ କହିଥିଲୁ ଯେ, ଲୋକମାନେ କେବଳ ସରକାର ପରିବର୍ତ୍ତନ କରିବା ପାଇଁ ପ୍ରତିବାଦ କରି ନଥିଲେ, ବରଂ ବ୍ୟବସ୍ଥା ପରିବର୍ତ୍ତନ କରିବା ପାଇଁ କରିଥିଲେ। ସଂସ୍କାର ବିନା ନିର୍ବାଚନର କୌଣସି ଅର୍ଥ ନାହିଁ।

ଅଧିକ ପଢ଼ନ୍ତୁ: ଆତଙ୍କବାଦୀ ଆକ୍ରମଣରେ ୨୦ହଜାରରୁ ଅଧିକ ଭାରତୀୟଙ୍କ ଜୀବନ ଯାଇଛି: ଜାତିସଂଘରେ ପାକିସ୍ତାନକୁ ଆଇନା ଦେଖାଇଲା ଭାରତ

ହାସିନାଙ୍କୁ କ୍ଷମତାରୁ ବାହାର କରିବା ପରେ, ୟୁନୁସ୍ ପ୍ରମୁଖ କ୍ଷେତ୍ରଗୁଡ଼ିକରେ ବଡ଼ ସଂସ୍କାରର ପ୍ରତିଶ୍ରୁତି ଦେଇଥିଲେ କିନ୍ତୁ ଆଭ୍ୟନ୍ତରୀଣ ରାଜନୀତି ଯୋଗୁ ସେ ତାହା କରିପାରି ନଥିଲେ। ସମ୍ପ୍ରତି, ବାଂଲାଦେଶ ନ୍ୟାସନାଲିଷ୍ଟ ପାର୍ଟି (ବିଏନପି) ସମର୍ଥକମାନେ ଢାକାରେ ୟୁନୁସଙ୍କ ବିରୋଧରେ ପ୍ରଥମ ବଡ଼ ପ୍ରତିବାଦ କରିଥିଲେ, ଯଥାଶୀଘ୍ର ନିର୍ବାଚନ ତାରିଖ ଘୋଷଣା କରିବାକୁ ଦାବି କରିଥିଲେ।

ସମ୍ପ୍ରତି ବାଂଲାଦେଶ ଏକ ଗୁରୁତ୍ୱପୂର୍ଣ୍ଣ ସ୍ଥିତିରେ ଠିଆ ହୋଇଛି। ଯଦି ୟୁନୁସଙ୍କ ସରକାର ସଂସ୍କାର କାର୍ଯ୍ୟକାରୀ କରିବାରେ ବିଫଳ ହୁଅନ୍ତି, ତେବେ ଦେଶ ପୁଣି ଥରେ ସେହି ସଙ୍କଟରେ ପଡ଼ିପାରେ ଯେଉଁଠାରୁ ଦେଶ ମୁକୁଳିବାକୁ ଚେଷ୍ଟା କରୁଛି।

ଜନସାଧାରଣ ଏବେ ମଧ୍ୟବର୍ତ୍ତୀକାଳୀନ ସରକାରଙ୍କ ପ୍ରତିଶ୍ରୁତିରେ ଅସନ୍ତୋଷ ହୋଇଗଲେଣି, ଏବଂ ଏପରି ପରିସ୍ଥିତିରେ ରାଜନୈତିକ ଦଳଗୁଡ଼ିକର ଆଭ୍ୟନ୍ତରୀଣ ରାଜନୀତି ବାଂଲାଦେଶକୁ ନୂତନ ସମସ୍ୟା ଆଡ଼କୁ ଠେଲି ଦେଇଛି ବୋଲି ଦେଶର ରାଜନୈତିକ ସମୀକ୍ଷକ ମତପୋଷଣ କରିଛନ୍ତି।

ଅଧିକ ପଢ଼ନ୍ତୁ: ଜମିଜମା ବିବାଦରୁ ହତ୍ୟାକାଣ୍ଡ: ହତ୍ୟା ପରେ ନିର୍ଭୟରେ ବୁଲୁଥିଲା ଅଭିଯୁକ୍ତ

Bangladesh | Sheikh Hasina | muhammad-yunus